Page 3 . . . nakon te Toki

Tao e boou te rongorongo aei nakoimi, ae e kainaki te Tamnei ae Raoiroi (Holy Spirit) nakoira aomata. E bon kateretereaki n te B’aibara ba e kainaki te Kai ni Maiu (Tree of Life), ae e tei i bukin te Tamnei ae Raoiroi, mairouia aomata. E kateaki te anera temanna ma ana kabaang n mataroan te ‘o n aroka’ ba e na totokoia aomata ba ana rin ao n anaa uaan te kai aio. Bon te karaki n kaikonaki ma e nangi mataata nanona - e kainaki te Tamnei ae Raoiroi nakoiia aomata! Ao e bon kainaki te Tamnei nakoiia aomata ni bane nikarokoa e a manga kaukaki nakoia tabemwaang n ana tai Iesu. E bon kaukaki naba nakoiia burabeti n te O-Tetemanti. E kaukaki nakon Mote, e kaukaki nakon Eria, e kaukaki nakon Taniera, e kaukaki nakon Tawita, ba ana konaa n korea kanoan te B’aibara, ao akea riki. E aki kaukaki nakon te aonaaba ke nakoiia botanaomata. Ao e tii kaukaki, n ana tai Iesu, nakoiia akana a weteaki i roun te Atua. Ao e taku Iesu, “Akea ae konaa n nakoiu, ma tii roun te Tama, ae e kanakomai iai, ae e weteia nakoiu” (Ioane 6:44). Eng, e tii kaukaki te Tamnei ae Raoiroi nakoiia akana a WETEAKI! E weteira te Atua! E a tia n baireaki (predestined) ba ti na weteaki - n te tai are e a tia n baireia iai te Atua. Akea rekereken weteam ma am tai are ko kauka nanom nakoiNna, ke n te tai are ko taku ba koa tauraoi n butimaea nako nanom. E na weteiko te Atua n te tai are E taku ba kona buobooki n kairiiri (rule) ao ni buoka te Atua n katea te aonaaba ae boou, ae kakukurei, ao ni kaoka (restore) Ana Tautaeka te Atua nakon te aonaaba. E katuka Ana tautaeka te Atua n Ana Ekaretia are e kateia Kristo, ao ko warekia n 1 Korinto 12 ao Ebeto 4 kabarabaraan barongaan Ana tautaeka: te Atua bon atuun Kristo, ao Kristo bon atuun te Ekaretia, ao Abotoro i muina i aan Kristo i aon te aba, ao i aaia abotoro bon taan nakonako n kabarabara (evangelists), ao i aaia bon bwaatita (pastors), ao i muina unimaane (elders), ao ai tia reirei (teachers) i aaia. Riikan (deacons) a bon rineaki ba taan i buobokaki n ana makuri n kakatauraoi n te ekaretia i aon te aba. Ao te Ekaretia bon te moan ua, n aron ae ti kakauringaki n bongin te Bentekota ni katoa ririki. Bon taan moan kamaiuaki – e tuai ni kamaiuaki te aonaaba ni kabane moa ngkai. Ma, e kauringaki botanaomata ba e a tia n baireaki ba iai te tai ake ana mate iai ao i muina te motikitaeka! Ngaia are e bon uaakinako te mate n te aonaaba ao ni kabane aika a tia ni mate ana manga kautaki n te Motikitaeka!

N 1 Korinto 15 ao n moanna man te kibu 22, ao e taekinaki ikai ba i roun Atam ao ti na bane ni mate – bukina ba e bure Atam ao aomata ni kabane ana rinanoan te moan mate (first death)! Ma, man ara bure – ara oi ni bure – ao tia kabaeaki mai iai ba ti na matekaua n te kauoua ni mate (second death) – te mate ae akea tokina! Ao, mairoun Atam rikaaki, Noah ma natina, Aberaam, Moote ma Iteraera n kawai, kaain Tiaina n kawai, kaain Arabia ni kawai, kaain Rutia ni kawai, kaain Inria ni kawai, ana bane ni manga kautaki nakon te Motikitaeka. Iroun Atam ao e na mate te aomata ao i roun Iesu e na manga kamaiuaki te aomata anne – ma iai ana tai ae e a tia ni baireaki iai ba e na kautaki: Iesu te moan ua (kibu 22, 23), ao i muina akana ana aomata Kristo n tain okina, ao muina aomata ni kabane n ‘bongin’ te motikitaeka! Anne aron barongan te manga kautaki (resurrection) i roun te Atua! Ao te Atua e katuka Ana Tautaeka n Ana Ekaretia ngke e moan kateaki i roun Kristo. Ma, tii muin iraua te ririki ao e a manga bua Ana tautaeka te Atua anne mai nanon te ekaretia - tii i nanon teuana te atuu (generation) ao e manga rairaki te ekaretia aio n manga butimaea te euangkerio riki teuana – te euangkerio ae kewe!. Ikai are e a moanna ni bua rongorongon ana euangkerio Kristo, te rongorongo ae raoiroi i bukin abanuean te Atua, e a uruakaki mani kabuaaki taekana. Ao i nanon te maan ae 1,900 te ririki ao e aki roko n taetaekinaki te rongorongo ae raoiroi aei nikarokoa te ririki 1934 ngke e a taetaekinaki moa mai tabon Amerika nako tabona ao uabwi te ririki (1954) i muina ao e a karebetauaaki nakon aban nako te aonaaba man te tabo ni kanako banaa ae te kabanea n oo maaka n te tai anne i aon Erube. Ao n ana Ekaretia te Atua i mwaain 1933 ao bon akea ana Tautaeka te Atua iai ba e a bon tia ni kabakaaki ao n oneaki muina n te euangkerio ae kewe, tii iraua te ririki i muin mateiia ni kabane ana reirei Iesu.

N ana boki Mataio te mwakoro 17 ao kibuna 10 ao ana reirei Iesu a titirakinna ni kangai, “E aera ngkai a taku Ibonga ba e na roko moa Eria?” Ao e kaekaiia Iesu ni kangai, “E na bon moan roko Eria, ao e na kaoki (restore) baai ni kabane”. E taekinna ikai Iesu kaokan Ana Tautaeka te Atua! E na roko "Eria" ao e na kaoki baai ni kabane! Ngke e tabekaki te titiraki aei ao ni kaekaaki i roun Iesu ao Ioane te tia baabitiito e a bon tia n roko. N ana boki Mareko 1:1 ao e taekinaki moan uaakinan ana makuri Iesu n taetaekina te rongorongo ae raoiroi i bukin abanuean te Atua! Ao n te kibu 2 ao e taekinaki ba taben Ioane ngke e roko ba e na katauraoa te kawai i mwaain MOAN rokon Kristo. Ao aei ae e bon karaoia Ioane – e taetaekina ba iai ae e na roko ae rietaata riki nakoina – ao bon akea te bai ae e kaokia te buraabeti aio. Ao e taekinna naba ba bon tiaki ngaia Eria are e kakantaningaaki ba e na kaoki baai ni kabane. Ao e kabarabaraa ikai Iesu ba iai riki temanna ae e na roko n ‘tamnein’ ma korakoran Eria. N te boki ae Maraki (Malachi) 3:1-5 ao e taekinaki manga rokon temanna ae e na katauraoa naba te kawai riki teuana i mwaain KAUOUAN rokon Kristo! E aki roko Ioane ba e na kaoki baai ma e roko ba e na tuangiia aomata ba ana raira nanoiia – a bon tia n ataa Te Tua, ao e roko n tuangiia ba ana raraoma (repent) i bukin riaon tuua akanne. I muin rokon Iesu n taetaekina te euangkerion i bukin abanuean te Atua, ae Ana UTU te Atua, ao te koaua are ti konaa ni bungiaki nako nanon te Utu anne, ao ni kaoka Te Tautaeka nakon te aonaaba ni kabane, ‘te’ euangkerio anne e bon taobaraaki, ao e aki taetaekinaki nakon te aonaaba nikarokoa 1954 – tebwi ma ruaiwa te tienture man Karatia 1:6-7, te tai are e taobaraaki iai te Euangkerio! Te Euangkerio anne e a tia ni kaokaki ngkai, n iriaki ma Ana Tautaeka te Atua ae e kaokaki naba nakon te Ekaretia! N ana tai (era) te ekaretia are te Tiatei (Sardis era – te kaonoua n itera) ao bon akea ana tautaeka te Atua iai. Ma, e a tia ni kaokaki ngkai Ana tautaeka te Atua nakon te Ekaretia!

Ngkana e kainaki te maiu ae akea tokina (immortal life) a e kaina ngkai te abanuea te Atua nikarokoa e kaokaki ana tautaeka te Atua – n Ana kauaoki Kristo. Ao n te boki ae Te Kaotioti 11:15, ao e taekinaki ba abanuean te aonaaba aio (kingdoms of this world): Amerika, Buritan, Buranti, Tiaina, Rutia, Tiaman, Inria, Tiaban, abannako ao tautaeka n te aonaaba aio, ana riki ba ‘abanuean’ Kristo, ara Uea, ao E na tautaeka i aoiia n aki tootoki. Ao ngaira n te Ekaretia, ngkana ti nanomatoa, ngkan ti tokanikai, ao ti na tekateka ma Kristo tautaeka ao ti na tautaeka (reign) ma Ngaia n Ana kaintokanuea,ao ti na anganaki te mwaaka i aoiia aaba nako, ao ti na reireiniia Ana Taeka te Uea, ao Ana Tua te Atua e na baronako mai Ierutarem, ao te aonaaba ni kabane, n tain te mireniam, e na onrake n ataakin te Atua (knowledge of God) n aron taari ae kaonrakea taiani marawa. Ao n mwakoro 20 n Te Kaotioti ao kibuna 4 ao e kangai taekana: “Ao I noori kaintokanuea ao a tekateka i aoia ao ana anganaki te motikitaeka . . . “ Akanne bon kaain Ana Ekaretia te Atua, Ana Utu te Atua – ana toka i aon kaintokanuea, ao ana motika taekan te aonaaba, ana reireinna te aonaaba, ana tautaekana te aonaaba, ba ngkane e roko Kristo ao Ana tautaeka te Atua e nang kaokaki!

(manga reitaki)