Iai kaaro aika a tia ni karika natiia ao a tuangiia n aron aei: "Anne e a riki matam ma ko a bon iangoa arom?" Bon akea. E na bon iai tangiran natiia irouia ao ana kabanea korakoraia ni kaikawaiia i nanon te marurung ao te aroaro ae raoiroi. Ao i nanon rikiraken te ataei ao e na bon tarataraaki iroun ana karo. Ngkana e karaoi waaki ke mwakuri ke katei ke anua aika a raraoi ao e na bon kukurei teuare te karo man kaota kukureina n tao e na kamangaoa iran natina, ke e na boboa angana, ke e na taua baina ni kamauria, ke tao e na kaboa ana bwai natina are e tangiria. Aio bannan te karo ae raoiroi?
Ao ai aron Atuara are Tamara. E karikiira bwa E na reireiniira Kateina, Anuana, Ana Tua, bwa ti aongan weteaki nakon ana Utu n Atua. Tao e kamiimii te koaua aio? Rongorongo i nanon te B'aibara a bon kaotia bwa iai ana utu te Atua bwa iai te Tama ao iai te Nati, are ARA karimoa. E koreaki bwa Iesu ngkai bon ara karimoa ngkana ti manga bungiaki nako nanon ana UTU TE ATUA (FAMILY OF GOD).
E taekinaki naba bwa iai Abanuean te Atua (Kingdom of God) are e a kaan roko. Ao naake a weteaki (called out) i roun te Atua ana riki bwa kaain ana Ekaretia te Atua (Church of God) ao are ana bon karekeaki nakoaiia (positions) n ana Tautaeka (Government) te Abanuea aio. E koreaki naba bwa e na bon maiu n aki tootoki te kaintokanuea are e moan toka iai te Uea are Tawita ao are n tokin te tai ao e na manga toka iai Kristo n te tai are e na manga oki iai n te tai ae e aranaki bwa ana Kauaoki (Second Coming). N okina aio ao e na manga kaoka (restore) ana Tautaeka te Atua ma ana TUA (LAW). Ao n aron tautaeka nako ao e na bon iai taan kairiiri n iteran ke mwangan nako te tautaeka - ke minitirii, n aron are kam ataia. Nakoa ni kairiiri aikai ana bon tauaki i rouiia kaain ana Ekaretia te Atua - naake aika a tia ni weteaki i roun te Atua te Tama nakon te tibanga ae nangi kakawaki aio. Ao n aron kabutan taian tautaeka ao e na iai nakoa aika rietaata ao iai aika mangori. Tao antai aika a na tauii aekan nakoa aikai?
Ngkana ti wareka te O-Tetemanti ao ti na noora rongorongoiia taian buraabeti ke ibonga aika iai mwiokoiia i roun te Atua bwa ana kakoroa bukin ana kaantaninga nako. Eng, aomata aikai a bon weteaki i roun te Atua. Ti nooria naba bwa n te Nu-Tetemanti ao a tia ni weteaki tabemwaang bwa a na riki bwa ana reirei Iesu. Ao n moan bongin te Bentekota ao 120 te aomata a tia ni weteaki bwa a na riki bwa kaain ana Ekaretia te Atua are e kateaki n te bong anne. E nooraki bwa e nangi korakora te wewete man tain te Nu-Tetemanti nikarokoa taai aikai. I bukin teraa?
Aomata aika a weteaki bon iai te Tamnei ae Tabu (Holy Spirit) i rouiia. Te Tamnei ae Tabu aio e reitaki ma tamnein te aomata (human spirit) ni kauka ana taratara te aomata nakon bwain te tamnei (spiritual things). Ti wareka rongorongon te kai ni maiu (tree of life), are i Eten, are e tei (symbolizes) i bukin te Tamnei ae Tabu. Ao ti wareka naba taekan te anera are e tei, ma ana kabaang ae e ura n te ai (flaming sword), i matan mataroan Eten bwa e na akea ae e na manga rin ao e na anaa "uaan" te kai ni maiu aio. Uaan te te kai aio, ae te Tamnei ae Tabu, e bon aki reke i rouiia kaain te O-Tetemanti, ma tii i rouiia buraabeti ke ibonga ake a katabeaki i roun te Atua. Ma, ngke e kaoti Iesu n tain te Nu-Tetemanti ao e karuoa te Tamnei ae Tabu bwa buokaiia aomata n aron are ti wareka taekana n rongorongon te moan Bentekota. E ruo te Tamnei ae Tabu bwa kanga newen te ai (tongue of fire) ao man te tai anne ao e a konaa ni reke i rouia aomata te Tamnei ae Tabu ngkana a bon ukoukoria. Ao ti nooria n te Nu-Tetemanti aron mauiia ao aia mwakuri akana iai te Tamnei ae Tabu i nanoiia - abotoro ma ake a reke bwa kaain ana Ekaretia te Atua.
Nna kaoka riki te koaua aio: Naake a weteaki bon naake e kakoauaa te Atua bwa iai Tamneina irouiia. E weteiia te Atua bwa ana riki bwa kaain ana Utu. Ao ana utu aio e karika ana Ekaretia. Inanon ana ekaretia ao ana reireinaki kateina ma ana tua bwa n tokin te tai ao ana reke bwa taan kairiiri n ana Tautaeka are e na manga kateaki n te tai are e na oki iai Kristo ni kaoka Abanuean te Atua (Ebera 2:6-10; 2 Timoteo 2:12; Ebeto 2:6). Aio ngkanne ana iango te Atua i bukira ni kabaeira ngkana ti "ongo" ana wewete. Aio bon ana euangkerio Iesu Kristo, ae nangi kakukurei, are e roko i bukina. Aio te rongorongo ae raoiroi are e karabaaki nakoira - ti aki ongongo n umantabu bwa e bon aki tataekinaki i rouiia ara mitinare nako.
Ko tangira te kamataata? Nakon 'Antai ao Teraa te Aomata'.
Ko tangira kabarabaraana ae kimototo? Nako ikai.