Bimba ma Raoia Nako
Bimba ma raoiia nako
Iroun Teatarake T. Rotan, 31 Oct, 2018
N taai aikai ao ngkana e kabonganaaki te taeka ae Bimba, ke binabina-aine, ke binabina-mwaane, ao e bon nanonaki bwa te binabina-aine (are bon te mwaane) e aki tii karaoiia bwa e na taraa n aine ma, n aron ae bon te aine, e kaitataaniia mwaane ao e anga rabatana bwa e na kabonganaaki n aiaron te aine. Aei ae riki naba nakoiia binabina-mwaane. E kakoauaaki bwa iai naba aekan aomata aikai aika a aki 'kaitataniia' raoiia n mwaane ke n aine. E ngae n anne, N au marooroo ikai ao N na marooroo i aoiia aomata aika a kaitataniia are bon raoiia ni mwaane ke n aine ao are a kataneaiia n kakarao te aro ni baitingako are e bon aki karikaki rabatan te aomata temanna ma temanna bwa ana karaoia (unnatural act). A aranaki aekan aomata aikai ba homosexuals, ke n araia ae "beebete" riki taiani gay. A na aki kairuruaaki naakai ma aomata aika a aranaki ba transgenders. Trangenders a bon ti kan katotoonga te riki n aomata are teuana ma e aki kakaraoa te makuri ni kamaira are e na rekereke iai ana katootoo.
Ngkana ti noora rongorongoiia aomata 6,000 te ririki n nako nakon ana tai Noa ao ti na nooria bwa e rabunaki aon te aonaaba n te ieka ibukin aia bure aomata aika mwaiti. Teuana aia bure bon te 'tataanga' ma raoiia n mwaane ke n aine. E nangi ataaki naba rongorongoiia kaain kaawa aika Totom ma Komora bwa kateiia bon te baba-kurabeiia aomata (sodomy - tao ko ataia bwa aran te aro n baitingako aio bon ingoan te kaawa ae Sodom, ke Totom). Ibukin aroia ae kamaira i matan te Atua aio ao e kabakaaki te burimton i aoiia.
Taan wareware n te B'aibara a bon ataia bwa e nangi ribaa te katei aio te Atua. Bon iai te rekenikai nakon te aomata ae e kakaraoa te katei aio ao iai naba te rekenikai nakon te aba, ke te kaawa, ae e butimaea mani kaungaa te waaki aio. Nakon temanna te aoraki ao tokina te mate, ao nakon te aba te burimton ae kamamate n aiaron Totom ma Komora, ke tao te angibuaka, te maeruru, te eka, te rongo, ao atao teraa riki.
N ana tai Iesu, are te moan tienture, n te ririki 54 A.D ao te Embora Nero bon iai uoman buuna mwaane - eng, mwaane. Rongorongon teuae Nero e taekinaki bwa e reke nakoina te aoraki (STD) are e roota ana iango are e aranaki bwa e tabaua. E taekinaki bwa e kabueka naba ana kaawa ae Rom n te tai naba anne. N te ririki 79 A.D ao a rabunaki kaawa aika Pompeii ma Herculaneum, kaawan naba Room, n mwaakorokoron te worekeno (volcano) are Vesuvius. E nooraki imuin aia keniken taan kakae rongorongo bwa kaain kaawan i Room aikai a bon kakaraoa naba te aro ni baitingako aio n aia tai ni maiu. E katuaekaki te aomata n ana bure (individual sin) ao te aba n ana bure (national sin).
N te kauoua n tienture ao e otinako te boki teuana ae The Outlines of Pyrrhonism ae e katereterea bwa iai aaba n aron Room ae e tabuaki n te tua kakaraoan te aro n babaitingako aio, ma iai aaba n aiaron Persia aika a bon kaunga man akea aia kangaanga iai. E taku riki bwa irouiia kaain Room ao e kamaamaa karaoan te aro aei ma irouiia I-Tiaman bon akea aia kangaangaa iai. E oti ikai nanououan aia iango aomata, bwa e bon uki kakaraoan te aro n baitingako aio ke e tabuaki. E oti ikai bwa bon iai ataakin taekan te B'aibara irouiia ma e a moanna ni bua.
N te katenua ao te kaaua n tienture ao Embora n Rom a kamatoai tuua ibukin katuaekakiia aomata aika a kakaraoa te aro n baitingako aio. Bon tii te tiringaki te aomata ae karaoa te waaki aio ma te matoa (rape). N te kaaua n tienture n ana tai Embora Kontitantiin ao e katea te tua (law) te uea aio bwa ana botataaki n tiringaki binabinaaine aika a kakaraoa te aro n baitingako aio i aon te aba ae Aikobita ao n aban Rom nikabuta. E kamatoaaki irouiia teniman Embora n Rom bwa naake a reke n kakaraoa te aro n baitingako aio ana anaaki ni kauraaki n te ai.
N te kaonoua n tienture ao e kamatoaaki n ana tua Rom meang n aia boki n tua ae te Body of Civil Law bwa ana tiringaki akana a kakaraoa te aro n baitingako aio.
N te kaitiuua n tienture ao a katea aia tua aban Erube bwa e katabuaki ao iai te rekenikai nakoiia akana a kakaraoa te aro ni baitingako aio
Ririki ake imuina nakon te ka-11 n tienture ao e a manga mamaara taian tua i aon aei are e a manga rikirake kakaraoana. Ma n te ka-12 n tienture ao te Council of London e katanoataa nakoiia kaain Ingiran bwa bon te bure i matan te Atua (sin) te aro aio.
N te ka-13 n tienture ao e kateirakea te Inquisition te Boobe ke Pope Gregory IX are teuana mai buakon ana tua ana anaaki ni kabuekaki n te ai akana a ataaki bwa a kakaraoa te aro n baitingako aio.
Man te tai anne nikarokoa moan teiraken te ka-18 n tienture ao e nangi kamatoaaki n aban nako te aonaaba bwa e tabuaki kakaraoan te aro n babaitingako aio. N te ririki 1721, i aon Tiaman, ao te aine ae Nei Catharina Margaretha Linck e kamateaki ibukin te aro n baitingako aio. Ma n te ririki 1794 ao te abanuea ae Prussia e a manga kabebetea ana tua i aon te aro n baitingako aio.
N te ririki 1803, i aon Ronton, ao e bon karaoaki te kabanea n kamamate nakoiia a kakaraoa te aro n baitingako aio.
N te ririki 1791 ao te aba ae Buranti (France) bon te moan aba n te aonaaba ae e kamauna ke e a aki kaburea te aro n baitingako aio. Ao nikiran aban te aonaaba aika bubura a bane n katotoonga te Netherlands n kamaraua aia tua i aon te aro aio: Brazil n 1830; Rutia n 1832; Portugal n 1852; Japan n 1880; Italy n 1889; ao nikiran nako aaba aika mwaiti.
Ao te aba ae Amerika?
N te ririki 1814 ao te aba aio e bon ira nanon te tua ae Crime against Nature ao e karinna n ana oin tua. Ao n 1903 ao e moan karaoa ana moan katikitiki Amerika nakoiia mwaane ake a kinaaki n araia ae te Gay.
Ma e a kangaara Amerika n taai aikai ngkai e a manga butimaeia gay ma raoiia nako ma aroiia n babaitingako are e tabuiia ngkoa?
N te ririki 1906 ao e buretinaki teuana te boki, Imre, ae e koreaki iroun te I-Amerika temanna, ae rongorongon aia tangira uoman mwaane ae kakaongora ao e butanako i aon Erube. Aio bon moan teirakean kairan aia iango aomata, n taai akekei, bwa ana butimaeiia aomata aika a gay.
N te ririki 1910 ao Nei Emma Goldman bon te moan aomata ae e tataekina inaomataia Gay n ana boki ao ana tataenikawai bwa a riai ni butimaeaki gay i buakoiia botanaomata nako.
Ao n te ririki 1919 ao e moan kaotinakoaki te birim, Different from Others, ae karakinaiia gay ae e kananokawaki nakoiia akana a matakuakinna.
Ao n te ririki 1924, tebwi-ma-uaniua (18) te ririki imuin Imre, ao e a kateaki te moan botaki ibukin inaomataiia binabinamwaane ao binabinaaine ae e kinaaki ngkoa bwa LGBT, ao i muin tabetai, n boong aikai bwa LGBTQ.
N 2003 ao te aba ae Belgium e kabaatia bwa e a uki te mare imarenan te mwaane ma te mwaane ao te aine ma te aine. Kabaraana teuana: e a reke aia raitinti gay bwa ana kakaraoa aia aro n babaitingako are e bon katabuakaki man moan karikan bwaai. Man imuin ana waaki Belgium ao aban nako te aonaaba a manga katootoo.
N 2011 ao te United Nations (UN) e kaota kinaakiia gay ma aroiia n babaitingako ao e taku bwa anne bon inaomataiia. Ana kaantaninga te UN bwa aban nako te aonaaba aika a kaaina te UN ana butimaea ana babaire rabatan te UN aio. Abara, Kiribati Te Boboto, aio bon kaain te UN. Abara, Kiribati ae nangi taua ana Taeka Kristo, bon kaain te UN. E na ira ana babaire te UN ao n karinna n ana oin tua te aro n babaitingako aio? Uringnga Totom ma Komora, ao Pompeii ma Herculaneum!
N 2017 ao kautuun ara tautaeka ma kaain ana tiim bon iruaa n aia kabotikiraoi kaain te Bimba. Teraa ae kataia n kaotia ikai te tautaeka? E ira tuangakina iroun te UN bwa e kawa n katuuaeaki ao n aki karekeaki buokana man itera nako aika mwaiti? Uringnga bwa ngkana e riki bwa tuan te aba ao te rekenikai e na bakara te aba ae banin.
E ngae n anne, tao ti na konaa n katotoongiia reirei tabeua i Aotiteria ake a bon taua ana taeka te Atua.