E ngae ngke te kabanea n rietaata, bwa e reirei ao e karekea rabakauna man ana TAUTAEKA TE ATUA are e tararuaa te unibweeti, ao Rutibeero e karinna inanona kaairuaan bwaai ni kabane ao e a karao ana babaere ae bon nangi buakaka. E kamwakuria ana iango are e buakaka inanoia anera ake a mena i aana ni karokoa e rin irouia bwa ana kaaitara naba. Ana waaki Rutibeero aei, tao e bon kakaraoia tao inanon mirion ma mirion te ririki. N bon arona ao e na moan kaririia man kataia n ibita ana iango temanna te anera imwiin temanna. E na karinna inanoia te iango are a aki tau bwaai ake a anganaki, are a aonikaiaki iroun te Atua, ao ni karika te ngurengure ao te buaakak n nano inanoiia.
Ngke e kariaia iango n mataaiakinana ibon irouna, te bakantang, mataaiakinan aia bwai tabeman, te iango buaka ao te ngenge, ao imwiina te ngurengure ao te kaaitara, bwa ena rin inanona, ao IAI TE BWAI AE RIKI NAKON ANA IANGO RUTIBEERO! E riki ana iango bwa ena kaburei bwaai nikabaneia, ena ibitii ao ni kaminoai. E riki n buretata ana iango. E anganaki ma raouna n anera te inaomata n kaira bon aia iango. A bon aki konaa ngkai ni karaoiroa aia iango - e a bon kangaanga ngkai bwa ana iango n te aro ae riai, e koaua ao n eti.
Ae nooraki irouia aomata aika a niniaki irouiia taimonio ao ti konaa n nooria bwa ngaia iai taimonio aika a nano roo, kanga ataei aika uarereke. Tabemwaingina bon taan wanawana, a matairiki, a tokonoonoo, a kamwamwane. Tabemwaangina te kan unuun irouia, tabeman bon akea aia katei, Tabeman a kaaboingongngo ma a karaba iowawaia inanoia. Ma ngaiia ni kabaneia bon taan kaburei bwaai nikabaneia, a ibitii ao a kaminoai.
A bon konaa Taatan ma ana taimonio ni kaira nanoiia aomata ao tao tautaeka n taai aikai? Tao ko rootaki naba n aia kariirii taimonio? E na kaekaaki aei n Mwakoro 4 - Kamiimii Ibukiia Botanaomata.
Ngke e noora mwiin aia urubwai anera te Atua, ao e nooria naba bwa ngaia ana kariki bwai are bon te kabanea ni tamaroa e a tia ni kaaitaraa, ao e a tuku te Atua bwa temanna ae e rawa ao ae e aki kona ni bure.
Ao te Atua bon te Tama inanon ana UTU te Atua.
Taraa Ioane 1:1-5. 'Te Taeka' ae e riki n iriko (kibu 14) e a bon kaman iai - man koangkoa - imwaain rikin bwaai - ma te Tama. Te Atua te Tama e karikii bwaai ni kabaneia - te unibweeti ma kanoana - mai iroun are e riki bwa Iesu Kristo (Ebeto 3:9, Col. 1:16-17)
Ngke e mena i aon te aba Iesu, ao e tataro nakon te Atua, Tamana are i karawa. Te Tama e taekinna bwa Iesu bon "natiu ae tangiraki, are I kukurei irouna." Iesu e maeka bwa te aomata, ao e kaririaki n aiarora, ma akea ana bure.
Te kaaua (4th) n taeka n te Baib'ara n I-Matang bon "God" - te Atua (Karikani B'ai 1:1). Ao te taeka are e moan koreaki iai te Baib'ara ae te taetae n Ebera (Hebrew) bon Elohim, te nauna (noun) ae bururare (plural) nanona, kanga ai aron te taetae n I-Matang ae 'family' (utu), church (ekaretia) or group (mwakoro). Te Utu ae mimitong bon te Atua. Bon te temanna te Atua - te utuuna, ae kaaina e riaon temanna te Aomata.
E nooria te Atua bwa akea riki ma bon kaain ana utu te Atua, aika a konaa ni onimakinaki bwa ana aki bure - n katotoonga te Atua - ae e aki konaa ni bure. Ibukin kakoroan raoi ana kainibaere ibukin te unibweeti ae akea tokina, ao e nooria te Atua bwa akea riki bwa tii Ngaia (ae ana utu te Atua) ae e konaa ni onimakinaki ni karaoa te tabe (supreme purpose) ibukin te unibweeti.
E aera Aomata a Onea mwiia Anera
(e na reitaki)