Kristian ma te Aonaaba

Koreaki iroun Teatarake T. Rotan, Okitoba 2018

Ti bon kakoauaa bwa i aon Kiribati ao e bon rau mauiia akana a araniia bwa Kristian. A teimatoa n kakoroa bukin tabaeiia n aia aaro aika kakaokoro n akea totokan aia waaki irouiia aomata nako ke iroun te Tautaeka. Bon akea te itabaraaraa imarenan te aro teuana ma teuana ao tao ti na ongo bwa iai te kamaamate, ma are ti bon ataia bwa tabetai e riki te kakauntaeka ke te kaetieti imarenaiia kaain te aro ae tii teuana ke ma taan buutakinako. Ao e tii toki ikanne: akea te buaka ke tao teraa riki. E ngae n anne ao bon akea te Kristian i aon Kiribati ae e nangi rootaki maiuna man itera nako aikai. Eng, Kristian i aon Kiribati bon taian kabane n Kristian i aon te aonaaba aika a bon rau mauiia. Tao aroiia naba aei Kristian i tinaniku? Akea aia kangaanga n aiarora?

Bon tiaki!

Ko ataia bwa a nangi babainikiriniaki Kristian i aon aaban te aonaaba tabeua. Ko ataia bwa a titiringaki Kristian i aaba i tinaniku? Ko ataia bwa tautaeka a moana n kaaitaraiia Kristian n te itera teuana ma teuana?

Ti na moanna mai irouiia aaba n Mutirim. Aaba aikai a bon aki tangiriia Kristian bwa ana maeka i buakoiia. Ao teraa ae a karaoia? A bootataaia ao n tiringiia. Aia tautaeka e bon kaungaa te waaki n tiritiri aio. Bon angiia Kristian n aaba aikai a bon birinako n kakaea mauiia n aaba riki tabeua. E riaon tebubua te ngaa Kristian aika a bainikiriniaki ao n tiringaki ni katoa ririki n aaba aikai, n aron taekana n aia ribooti botakin te aro n Kristian tabeua. E taekinaki bwa inanon te ririki ae tii 2016 ao nakon 600,000 Kristian aika a bainikiriniaki n aaba aikai. N moan teiraken te ririki aio 2018, ao n te aba teuana i Aberika ao a tiringaki nakon 6,000 Kristian, ae angiia bon kaara ao ataei aika uarereke, aika a anaaki ni korekoreaki ao ni kororoaaki, ao aine a anaaki n tauaki n akiakaaka ao a manga tiringaki.

Tao tii aaba n Mutirim aika iai aia marena ma Kristian? Bon Tiaki.

Nako ikai ibukin ataakin aaba aika a nangi babainikiriniia Kristian n boong aikai!

Ao riki, ko konaa n kawara Christian Views and Issues n te website ae "Kiribati Newswatch" ibukin rongorongoiia ma kateiia Kristian i abatera.