Ti na moanna man rikiia Taimonio
E ngae ngke e reiakinaki ao ni kataneaiakaki n ana kaintokanuea ana TAUTAEKA TE ATUA i bukin te unibweeti, ao Rutibeero e bon kaburei bukin bwaai (wrong reasoning) ao e a karaoa ana babaire aika nangi bure. E mamanaiia anera ake a mena i aana ni karokoa e ibita aia iango nakon te kaaitara. E karaoa aei tao e nako n te maan ae iraua te mirion te ririki. N aron ae e ataaki, e na bae n mamanaa temanna moa, ao i muin temanna i muin temanna. E na karekea irouiia te iango bwa ana namakinna te aki rau n nano, bwa e bure te Atua nakoiia, ao n karinna i nanoiia te nano-maraki (bitterness) ao te uun (resentment).
Ngke e kariaia Rutibeero iango ni kamoamoa (vanity), n bakantang (jealousy), n mataaiakinan ana bwai temanna (envy), te mataairoro (lust) ao te ngenge (greed), ao i muina te uun (resentment) ao ai te kaaitara (rebellion), bwa ana rin ao ni maeka i nanona, ao IAI TE BWAI AE E RIKI NAKON ANA IANGO! E riki ana iango bwa e na karaoa te eti ao te raoiroi nakon te kamwaraa (perverted), e na "tuubun" koaua (distorted), e na kaburei nanon bwaai (twisted)! E riki n buretata (warped) ana iango. E bon anganiia anera te Atua inaomataia i aon aia iango. Ma ngke a rineia bwa ana kaaitara ao ikanne are e a aikoa konaa n manga kaetaki aia iango nakon ae e eti – a aikoa konaa n manga iango raoi, n iangoa te koaua, n iango nakon te eti. Anera aikai a nangi kinaaki n araia ae 'taimonio' ke "demons" ibukin aia mwakuri aika a kamiimii, a kakamaaku ao a kamamate.
Ao kam a tia n noori anuaia taimonio rinanoiia aomata aika a ‘niniaki’ (possessed). A bon konaa n kanakoaki mai roun te aomata rinanon aran Iesu Kristo ao korakoran te Tamnei ae Tabu, n aron ae tataekinaki n te B’aibara, ao tao ko a tia n noori biirim aika a karaoaki ibukin aei n aron te "Exorcism". Tabemwangia taimonio a bon nanobaba (silly), kanga aroiia ataei aika a kamonaaki. Tabemwaangia a bon nangi bwaati n mamanaia aomata (crafty), a nangi waekoa aia iango (sharp), taan iango/kabotaeka (shrewed), taan kam'am'ane (subtile). Tabemwaangia a bon tatauraoi nakon te uun ke te buaka (belligerent), akea aia katei (rude), a kabuingongo ma iai te nanobuaka i rouiia (sullen) ao aika a unuun n taai nako (ill-humored). Ma ngaiia ni kabaneiia a bon bane ni karika te eti ao te raoiroi bwa ana kamwaraa (perverted), taan ibiti koaua (distorted), taan kaburei nanon bwaai (twisted).
Ao anti? Teraa te bwai ae te anti
N arora n aomata ao e mwaiti i buakora aika a kakoauaa te bwai ae a arana bwa te anti. Uoua aekan te anti aika a "nooraki" i roura ngaira aomata: 1) anti aika rabata ni man (monsters, devils, etc), ao 2) anti aika rabata n aomata (zombies, vampires, demons, the dead, etc). Ao man te karinan ae 2) ao a nangi nonoraki riki anti ake tamnein ke tein rabataia ara utu, ara koraki, raoraora, ke naake ti kinaiia, ma a tia ni mate.
Ti bon ongongo taian rongorongo mai i rouia aomata bwa a "kawaraki" i rouia aia koraki aika a tia ni mate. Tabeman a "noora" tamnein aia aomata ae e a tia ni mate. Tabeman a "taotaonaki" i rouiia aia mate. E mwaiti aekan rongorongo i bukin 'noorakiia aomata aika a tia ni mate. Anti ngkanne aikai? Maate (the dead) aika a manga "uti" ao n manga rerebu n aki akaaka?
Ao e a kanga aron tein rabataia ngke a "nooraki"?
A taku tabemwaang bwa kanga te tamnei (spirit) rabataia. Ao tabeman a taku bwa kanga man-kaakang - "monsters". Ao iai ngkane te karinan n anti ae e rietaata. Anti aika a karineaki (respected). A katokaaki n ana karinan te Atua, ao a karineaki bwa kanga taian "atua", ma, n aron aia taeka taan onimakiniia, "Antira aikai a bon mwaaka naba, ma i aan teutana te Atua are e karika karawa ma aonaaba". Anti/atua aikai a taekinaki bwa aongkoa iai korakoraiia ma m'aakaiia. A konaa ni katoki aoraki, karekea te iooki, karekea te kab'aia ma te tekeraoi - anti aika raoiroi. Ao iai naba anti/atua aika a iowawa - a karekea te mwengabuaka, te raure, te aoraki ao a tiritiri naba. A okora anti aika buaakaka aikai ma ake a raoiroi? Ke, bon te anti temanna ae e konaa ni anganiko te marurung, ao e konaa naba ni tiringa are ko bakantang irouna?
Te B'aibara e aki toki n taekina uoua aonaaba - ara aonaaba aio ao aia aonaaba anera ae e aki nooraki - te aonaaba ae rabata (physical world) ao te aonaaba aei tamnei (spirit world). Aomata a bon matoatoa rabataia ao a nooraki; anera bon akea kanoan rabataia bwa tamnei (spirit) ao a aki nooraki.
Anera aika raoiroi bon ana anera te Atua aika tabu. Anera, ke anti, ke atua, aika a iowawa bon ana taimonio Tatan aika buakaaka. Ti na kamatataira riki ikai bwa n te B'aibara ao te taeka ae "anera" e bon nanonaki iai bwa tabonibain te Atua ae Mimitong. N te B'aibara naba ao te taeka ae "taimonio" e bon nanonaki iai tabonibain Tatan ae te Riaaboroo - anera aika a tia ni bure!
Akea riki kingin te raoiroi bwa tii te Atua ma ana anera aika tabu. Ao akea riki kingin te iowawa ma te buakaka bwa tii Tatan ma ana taimonio. Ae nanona bwa bon ana taimonio Tatan aika a karikiia bwa anti aika a konaa n nooraki n aroiia nako, ao moaraariki bwa anti aika a na karineaki bwa aongkoa atua naba. Uringnga bwa ngke a karikaki anera ao bon iai naba korakoraiia ke m'aakaiia ae e anganiia te Atua
I bukin teraa?
Bwa e na kateimatoaaki te "toma" ma Tatan, e ngae ngke a taku aomata bwa tiaki te mwakuri n riaboro. E kakaotia Tatan te Riaboro rinanon "anti" nakoiia aomata bwa aongan teimatoa aomata n kakoauaa bwa a bon uti man te mate aia mate. E na kataia Tatan n tiringa ana taeka te Atua are te mate e bon aki ataa te bwai teuana - akea ana kanamakin, akea ana iango, e aki 'maiu', e aki konaa n nooraki n nakonako n akiakaaka, e aki konaa n wirikiriki i taningam, ke tao teraa riki. Ao te kauoua, e na kateimatoa Tatan bwa aomata a na onimakinna riki aia anti nakon te Atua are kinging bwaai ni kabaneiia. N teina aei ao aomata a na raroa nako mai i roun te Atua - te bwai are e tangiria Tatan.
(reitana)