Te Abanuea - Summarised
KABARABARAAN TE ATUA MA ANA "PLAN" IBUKIN KAMAIUAKIN TE AOMATA
TE MOAN TAEKA
Koaua aikai a bon bane n anaaki man ana Taeka te Atua, te Baibara ae Tabu. Ana aomata te Atua e bon kakoauaa ba e na riai n maiuakinna nikabane te taeka are e otinako man wiin te Atua (Mataio 4:4)
1. TE ATUA – TE UTU
Te Atua (God) bon te Utu - iai te Atua te Tama ao te Atua te Nati – te utu teuana. Akea moan rikiia ao akea naba tokin mauiia. Aia makuri bon te kakariki bai. Ngkai te utu Ngaiia ao e na iai atuun te utu (Head) are te Atua te Tama – te tia kairiirii (Leader). Te Atua te Nati (Iesu Kristo) e ongotaeka (obey) ao E karaoa are E tuangaki irouin te Atua te Tama. Ngkai iai te tia kairiirii ao nanona ba iai te tautaeka.te Nati e tangira te Tama ao te Tama e tangira te Nati. Te utu ae a itangitangiri ma Aia tautaeka ae e anaaki n te tangira (Love). A kamaiu baai nikabane man Maakaia (Power) –ara aonaaba ma kanoana ao te unibweeti ma kanoana nako. A tangiria ba Ana tibaa mauiia n Atua ngaia are a kamwaita aekaiia ma katootoongaiia rinanon te aomata, ba E kaantaningaia te Atua te Tama ba, n taina are E a tia n baireia, ao ana bane aomata n riki ba kaain te Utu n Atua – ana riki ba Natina, ma Iesu te karimoa.
2 I-Korinto 1:3; 11:31; Mataio 3:17;
2. TE ATUA TE TAMA
Te Atua Te Tama bon te kabanea ni Maaka. Bon Ngaia are e tuanga te ‘Taeka’ baai ake ana karikaki, ao e taetae te Taeka ao a riki. Anuan te Atua bon Moan te Eti (Righteous). Akea tokin Wanawanana (Wisdom). Te Atua ae akea tokin raababan Ana Tangira ma Ana Akoi. Akea tokin Ana Nanoanga. Ma te Atua ae Unuun ngkana ko karekea atuam riki temanna irarikina. E kawakina maium ngkana ko ongoaaba nakon Ana Tua ao E na irantaangaiko nakoia akana a kan kamaruako. Ngkana ko nakonako n Ana Tua ao E na kai kabarai am bure (ngkana ko tataro n butiia) ao E na kamarurungko man aoraki ike ko ituuaki iai. Bon tii te Atua, n Ana Karaatia (Grace), ae konaa ni ‘weteiko’ nakon Natina, ao n riki ba temanna man buakoiia taian “moan-uaa”. Bon tii te Atua te Tama ae E ataa tain te Toki. Akea ataakin te Atua iroun te aonaaba man te tai are a kaotinakoaki mai Eten Atam ma ‘buuna’ nikarokoa taai aikai ike E a moanna n kaotia, (rinanon Kristo), nakoiia kaain Ana Ekaretia. N te “Aonaaba Ningabong” ao E na rua te Atua nako aon ara aonaaba aio n maeka iai ba e na reke te aonaaba aio ba nen kautuun Ana Tautaeka.
Ioane 1:1-3; Te Otinako 34:6; James 3:17;
3. TE ATUA TE NATI
Imwaain karikan baai ao bon iai te Atua ao te “Taeka”. Ao te ‘Taeka’ bon te Atua naba are a bane n karikaki baai Irouna. Ngke a tia n karikaki aomata ao a nooraki ba e a korakora te bure i aon te aonaaba ao E a baireia (decreed) te Atua ba e na ruo nako aon te aba te ‘Taeka’ ba e na kabaraiia aomata man aia bure. E ruo te ‘Taeka’ nako aon te aonaaba ba ai Iesu – Natin te Atua ao Natin te Aomata. Man te tai aei ao e a bon matoa ba bon iai Ana utu te Atua – ba iai te Tama ao iai te Nati. E kanakoi maakana ma mimitongina te Taeka, ao e riki ba te aomata (Iesu) ao E mate i bukin aia bure aomata. E manga uti man te mate, ao E aerake nako karawa ba E na riki ba ara Ibonga are Rietata (High Priest). N te tai are E a tia n baireia te Atua te Tama ao E na manga kaoka Iesu Kristo nako aon te aba. Bukin okina aei ba E na kaoka Abanuean te Atua i aon te aonaaba aio, ao E na riki ba aia Uea ueea ao E na tautaeka i aon te aonaaba ma raona n uea, ana aomata te Atua (saints).
Ioane 1:1-2, 10, 14; 3:16; Deutronomy18:15; Mataio 17:15-17; Makuri 2:32-33; Roma 5:8; Biribi 2:5-8; Ebera 4:14-15; Te Kaotioti 1:13-16
4. TE TAMNEI AE TABU
Te Tamnei ae Tabu (Holy Spirit) bon Korakoran ao Maakan (Power) te Atua ae akea tokina (omnipotent). Maakaiia aei e karaoa bukin Ana taeka te ‘Taeka’ n karika te aonaaba ma karawa. E taetae te ‘Taeka’ ao te Tamnei ae Tabu e kakoroa bukina. Tamnein te Atua bon te Maaka ae e karikiia ba Ana konaa n mena n taabo nibane (omnipresent). Tamnein te Atua aei bon te toma (link) ma tamnein te aomata are ana konaa aomata n ataa te Atua ao n reitaki ma Ngaia. E kakorakoraa te Kristian ba e na iira nanon taian Tua. E kaira nanona ao e buokiia n kakaea te kawai ibukin karekean rinna n te Abanuea. E tii konaa n anganaki te aomata te Tamnei ae Tabu ngkana e raira nanona ao e babetitoaki n aran Iesu Kristo. Naake e a mena te Tamnei ae Tabu irouiia a riki ba kaain Ana Ekaretia te Atua are e moan rua te Tamnei nakoiia aomata n bongin te Bentekota n Ana tai Iesu Kristo. N tain te O-Tetemanti ao te Tamnei ae Tabu e bon ti mamakuri ma Ana burabeti te Atua ao ake a tia ni “weteaki” ba ana toro i bukina.
Makuri 1:8; 2:1-4, 38; Roma 8:9, 14; 1 Korinto 2:11; Taian Areru 51:11;
5. ANERA, AO TAIMONIO, AO AIA AONAABA
E moan karikiia anera te Atua imain karikan te aonaaba ao karikan te aomata. E anganiia te korakora ao te maaka ba ana riki ba tabonibaina ngaiia. Ngkai bon taamnei ngaiia ao bon iai te maiu inanoia (self contained life) are e karekea irouiia te maiu ae aki toki (immortality). Ao te Atua e bon anganiia anera te inaomata n rinea te raoiroi ke te buaakaka (free moral agency).
Rutibeero bon te akeanera ngkoa temanna ae nangi karineaki. E reke irouna te kamoamoa ao e mataiakinna ana kaintokanuea te Atua are e a kaaitara. E karenakoaki nako aon te aba, ngaia ma raona anera aika a boutokia, ao e a riki ba Tatan te Riaboroo ao anera ake raona a riki ba taimonio. I aon te aba ao Tatan e a tekateka i aon kaintokanuean te aonaaba –atuan te aonaaba - nikarokoa te bong aei
Ana anera te Atua a bon mena i ‘Karawa’ ma te Atua. Bon tabonibain te Atua are a kakawariia Ana aomata te Atua iaon te aonaaba n buokiia n te itera teuana ma teuana. Bon tautia naba, ao ngkai a kakatauraoiia ba ana ira Iesu ruo nako aon te aba n Ana kauaoki.
Taimonio bon ‘anti’ ake taan kakamaakuiia aomata, n aron are ti ataia ngkai. Bon ngaiia ake anaa bannan ke tamneiia naake a mate ao a kaotiia nakon ana koraki nako te mate ba aongkoa e kaoti tamnein aia mate. Bon ngaiia taan kaiririiko nakon te kangaanga. Ao bon ngaiia ‘antin’ taian aoraki ake ko rootaki iai nte tai teuana ma teuana.
Itaia 13:12; Iobi 38:6-8; 2 Betero 2:4;
6. TE AOMATA
N rongorongon te kariki bai ao te Aomata bon te kabane n bai ae e karikaki iroun te Atua. E karikaki man tanon te aba (dust of the ground). Bon akea maiuna ma ngke e uka te ikeike ni maiu (breath of life) te Atua nako nanona ao e a riki ba tiouru ae maiu (living soul). E maiu te aomata man te raraa are e buti inanon rabatana nikabuta man ana makuri te buroo ae tabena ba e na bammiia te raraa ni kamaiu nikabuta nanon rabatan te aomata. E maiu te aomata ngkana e teimatoa ni b’am te buroo. Ngkana e toki ana b’am te buroo ao ikanne are e a toki naba maiun te aomata. Bon akea te maiu ae akea tokina irouna. Ma e ngae ngke te iriko ma te raraa, e bon karikaki te aomata ba katootoongan ao aekan te Atua. Iai te tamnei teuana (spiritual component) ae e karinaki iroun te aomata, n ana kaburoro (brain), ba ena kabobongaa ana iango (mind). E aranaki ba tamnein te aomata (human spirit). E bon kaantaningaia te Atua ba n taina are E a tia ni baireia ao te aomata e na riki n tamnei (spirit being) n aiaron te Atua ae e Tamnei.
Karikani bai 1:26-27; Iobi 32:8; 1 Korinto 2:11; 1 Ioane 5:11-13
7. TAMNEIN TE AOMATA
Ngke e karika te aomata te Atua man tanon te aba, ao E angana te ang ni kamaiu ba e na ikeike, ao te aomata e riki ba te tiouru ae maiu (living soul). Man ana kariki bai te Atua ao tii te aomata e anganaki te tamnei teuana (spirit component) ae akea irouiia maan nikabane aika a karikaki. Bukin aei ao te aomata e konaa n iango raoi (think rationaly), e konaa n karaoi babaire (make decisions), e konaa n karaoi baai (invent), e konaa n iangoi rabakau aika boou (technology), e konaa n titiraki ba bukin teraa? Te man, ngkanne, e bon tia n katauaki aron maiuna are e na maiu inanona: bon iai kanana ae e a tia ni katauaki ao akea riki; bon iai aron katean nena ni maeka ao akea riki; bon iai ana tai n kakaea kanana ao akea riki; bon iai ana tai ni matu ao ni uti ao akea riki; bon iai aia tai ni ‘bootaki’ i bukin karikan natiia ao akea riki. E a bon tia ni ‘borokuremiaki’ aron mauiia man ngke a bungiaki nikarokoa a mate. Ana iango (mind) te aomata, ma tamnein te aomata (human spirit), a kaai n angan te aomata te wanawana (intelligence) ae nangi raka riki iaoiia aekaia maan nako. E angan naba te aomata inaomatana ba e na karaoi baai n takun nanona (free will). Akea aei iroun te man. Tamnein te aomata bon te toma (link) are e konaa ni kabonganaa te aomata n reitaki ma te Atua, ke kabarabaraana teuana, Tamnein te aomata bon te toma are e na katomaa te Tamnei ae Tabu ma te aomata ibukin bain te maiu n Tamnei. Akea te tamnei ae a anganaki maan. Aei te koaua teuana ae a aki kan kakoauaa tiaintiti (scientists) kioina ngkai a bon aki kakoauaa bai ae te tamnei (spirits). Ao bon aei te toma are a kua ni kakaea tiaintiti (missing link) ae e kaota te okoro i marenan wanawanan te eebe ma wanawanan te aomata. Ana Taeka te Atua n te Baibara e bon tataekina uoua aekan tamnei: Tamnein te aomata, are inanon te aomata, ao Tamnein te Atua (Tamnei ae Tabu”) are e anganaki te aomata n ana tai n rairannao (conversión process).
Ao, ngkana, e a mate te aomata, ao tamneina (tamnein te aomata) e okira te Atua ni kariariaa te manga kautaki. Te kabotau teuana ba tamnein te aomata (human spirit) bon kanga te video camera ae e rarawea maiun te aomata n ana taini maiu. N tain te manga uti, ngkana e bon tangiria te Atua ao E na konaa n kaoka te aomata nakon arona teuana n ana tai ni maiu man rongorongona ake a raweaki n te “video camera”. N tain motikan taekan te aomata ao e na bon taraaki naba te video camera ba te bai ni kakoaua. Ngkana ko reke n te “kabuekaki” ao tamneim (human spirit) bon te moan bai ni kamaunaaki (destroyed) ba e na akea rongorongom ae e na uringngaki n te aonaaba ae boou.
Karikani Bai 2:7; Iobi 32:8; Ana Taeka Te Tia Rabakau 3:21’, 12:7; Takaria 12:1; Roma 8:16; 1 Korinto 2:11-15
8. ANA EKARETIA TE ATUA
E moan kateaki Ana Ekaretia te Atua n bongin te Bentekota ngke E ruo te Tamnei ae Tabu nakoiia Ana Reirei Iesu. E bon kainaki ngkoa nakoiia aomata bain te Tamnei ngke e kaotinakoaki Atam ma Nei Ewa mai Eten, ao a kateaki kerubim n kawain te kai-ni-kamaiu (Te tamnei ae Tabu) ba e na aki roko iai Atam, ao ai aomata nikabane (Karikani Baai 3:22). N tain te O-Tetemanti ao a bon ti anganaki Ana Burabeti te Atua te Tamnei ae Tabu i bukin tabeiia ike a tia ni weteaki nako iai (Ruka 16:16). N te tai anne ao e bon tuai n teirakea Ana makuri te Atua ni kakamaiu. Ngke e roko Iesu nako aon te aonaaba ao E uota rongorongon te kamaiuaki. Ao ngke e aerake nako Karawa i muin utina ao E kaoka te “Tia Buobooki” nakoiia Ana Reirei. Aei bon moan ruoan te Tamnei ae Tabu nakoiia botanaomata. N aron are e karaoaki nakoiia Ana burabeti te Atua ngkoa ao Ana Ekaretia te Atua a bon ‘weteaki’ naba nakon tabeiia ae kakawaki n Abanuean te Atua. Naake e reke irouiia te Tamnei ae Tabu aika kaain Ana Ekaretia te Atua a bon aranaki naba ba te “moan-uaa”, ke te “firstfruits”. E kaukaki mataiia (iroun te Tamnei ae Tabu) nakon ataakin Ana Euangkerio Iesu. E kaukaki nanoiia ba ana ukoukora nanon Ana Taeka te Atua nikabane ma Ana Tua. Ana riki ba moan kaain te Abanuea. Ana riki ba uea, tia reirei ao ibonga n Ana Tautaeka te Atua are E na roko n kateia Kristo n Ana kauaoki.
E bon tuai toki Ana wewete te Atua, ba e na reitinako nikarokoa te ‘Toki’.
1 I-Korinto 12:12-14, 27; Korote 3:15; Makuri 2:1-3; 1 Korinto 1:2; 1 I-Korinto 1:26; Mataio 22:14
9. TE EUANGKERIO
Te Eungkerio (Gospel) bon Ana Euangkerio Kristo are rongrongon Abanuean te Atua ae e a kaan roko, kaokan (restoring) Ana Tauataeka te Atua (Government of God) nako aon te aonaaba, ao te rongorongo ae raoiroi (good news) nakoia aomata ba kaotan kawaiia nakon te maiu are e aki tootoki (everlasting life) n Abanuean te Atua. Te Rongrongo ae Raoiroi aio e bon kaotia ba E na bon OKI Iesu Kristo. E na kaoka Abanuean te Atua, ao E na manga moan kaoka Ana Tautaeka te Atua nako aon te aonaaba. Iai aika a tia ni ‘weteaki’ ba ana buoka Kristo n tautaeka. Ana kaantaninga te Atua ba nikabaneiia aomata aika a tia ni bungiaki nako aon te aonaaba ana butimaeaki nakon te Abanuea - ti ngkana a kariaia. Imuin te Motiki Taeka ao ana anganaki aomata kanuangaiia are e bootau ma aia makuri i aon te aba ngke a moan maiu ngkoa. E katauraoaki aia “ruu” n te “maantion” (mansión) ke te bareti (palace). Neiia ke aia ‘ruu’ aikai bon taian buraneti – iai ana anganaki teuana, iai 5, iai 10, iai 100. Te mantion bon te unibweeti ae akea tokin buburana. Kanoan te Rongrongo ae Raoiroi aio ba bon nikabane aomata aika ana butimaeaki ba ana rin n te Abanuea (Ruka 10:2). Naake a bon tuai n ongo taekan te Kristo ana bon anganaki aia tai n reirei (reireinaki irouiia taian ‘moan-uaa’) ao ngkana a butimaea ma nanoiia ae koaua ao a bon ibitaki naba nakon te rabata n tamnei (spirit being) are e aki mamate ao n riki ba kaain te Abanuea. Ake a bon aki butimaea te Kristo (ao te katautau ba bon tii tabeman) ao ana kamaunaaki rabataia ao rongorongoiia ma taekaiia ba kanga aongkoa a bon aki bungiaki nako aon te aba.
Mareko 1:1, 14; Ruka 4:43; 9:2; Roma 15:16; 2 Timoteo 1:10; Mataio 3:2; 24:14; 28:19-20; Mareko 1:15; Ruka 24:47;
10. TABEN TE EKARETIA
Taben (Mission) te Ekaretia ngke e kateaki bon reitan kakaotan (witness) ao kabutan Ana euangkerio Iesu Kristo nakoiia botanaomata nikabaneiia n aban te aonaaba nikabane. E bon reke karaoan aio rinanon aia anga nano ao aia kabwi kaain te Ekaretia n reitaki ma Ana buoka te Atua rinanon Tamneiina ae Tabu. Ngkai “rabatan” te Ekaretia e kanoaki iroun temanna ma temanna (individuals) ao bon taben anne ba ena reita nako ana makuri Iesu n katanoataa nakon te aonaaba te rongorongo are e nangi roko Abanuean te Atua.
Mataio 28:19-20; Mareko 1:15; 16:15-16; Makuri 1:7-8; 8:12; Makuri 28:31; Mataio 16:18-19; Ruka 24:44-47; 4:18-19
11. TE MOAN-UAA
Te Moan-uaa (The Firstfruits) bon kaain Ana Ekaretia te Atua. Ngaiia aika a moan anganaki te Tamnei ae Tabu. E moan karuoaki te Tamnei ae Tabu nakoia Ana Reirei Iesu n bongin te Bentokota are e moan kateaki iai Ana Ekaretia te Atua. Ao man te tai anne ao e bon tii konaa ni kuneaki te Tamnei ae Tabu n Ana Ekaretia te Atua. Ana Ekaretia te Atua e bon kaantaningaaki ba e na kanakoa te moan uaa (bear the firstfruits) ke e na nooraki mairouna ‘uaana’ ngkai iai te Tamnei ae Tabu irouna. Uaaia ngkanne e na nooraki man aia kakaonimaki n baina te maiu n Kristian: te kamatebai i aon te B’aibara, te kamatebai i aon Ana Tua te Atua, te kamatebai i aon Ana kawai te Atua i bukin kamaiuakiia (redemption) aomata nakon te maiu ae e aki tootoki, te kakaonimaki n Tataro, te kamatebai i aon Abanuean te Atua ma Ana Tautaeka, ao ai tataekinan te Rongorongon ae Raoiroi ae Ana Euangkerio Iesu Kristo ae rongrongon Abanuean te Atua ao are e nangi roko. Bukin tabeiia ae kakawaki are a “weteaki” nako iai ao e a moannaki naba motikan taekaiia, ngkai a bon maiu. N tokin te tai ao e na otinako “uaaia.” Ake a raoiroi uaaia ana anganaki kanuangaiia, n rokon Kristo, ao ake a aki ana ira te kauoua ni uti (2nd Resurrection), are imuin tengaana te ririki.
Te Moan-uaa, ke te Ekaretia, bon ngaiia ake e makoro taekaiia n te B’aibara are n okin Iesu Kristo ao ana moan kautaki (first resurrection) ao ana waerake ba ana kaaitiboo ma Ngaia n te nang. Rokon Iesu ba E na kaoka te Abanuea ao Ana Tautaeka te Atua i aon te aonaaba. E nangi oti ngkanne ‘uaaia’ kaain te Ekaretia ba ana riki ba tia reirei, ibonga, ao ni uea ma aia Uea ueea n te Abanuea.
Rom 8:23; 16:5; 1 Korinto 15:23; Te Kaotioti 14:4; Kaotioti 20:6; Kaotioti 1:6;
12. ROKON KRISTO
Bon akea ae e ataa manga okin Iesu. Ma, e nangi tataekinaki n te B’aibara ba E NA OKI. Ao bon iai ngkoa ae bon Ana taeka are E taku, “Nna nako AO Nna manga OKI.” E bon taku naba Kristo ba E aki ataa te tai are E na oki iai ba bon tii te Tama (Te Atua Te Tama). Ma e kaotaki te bai ae e na riki n okiNna. Iai te buu ae e na tanga e ana ongo kaain te aonaaba nikabaneiia. Iai te rebetau kanga te baa n tain te kakarau. E na kaoti Iesu i karawan te aonaaba (sky) ao e na nooraki irouiia kaain te aonaaba nikabaneiia. E na rua mai karawa ao E na tei teutana te tai i aon te nang (clouds) i karawan te aonaaba. Iai raona aika ana iria ba bon te baronga n Anera aika Tabu aika maiti kurikuri. Ikai ngkanne are e na nooria te Ekaretia (te Moan-uaa) n uaerake nakon Iesu n te nang. E na bon tia n ibitaki rabataia nako n te rabata n Tamnei (Spirit Beings) n aron Kristo, ma ana kaotiia ba ana nooraki. Ana Ekaretia te Atua aika a bon maiu n te tai anne a bon ibitaki inanon te rube ni mata: ana Ekaretia te Atua ake a tia ni mate ana kautaki (te moan uti) ao e na ibitaki rabatiia nakon te Tamnei ao ana bane u uaerake nakon Kristo n te nang. Iai, ngkanne, ana taanga ni buaka te aonaaba aika a katauraoiia ba ana buakana Natin te Atua (bon ana kabanea n anga Tatan n kan eekaanako te Atua). E na boo te buaka ao e na bon koonaki te tanga ni buaka mai aon te aba: Taenikain ana taanga ni buaka Tatan e a kaotia ba e a toki uean Tatan i aon te aonaaba ao e a oki te Abanuea nakon Ana Utu te Atua.
Mataio 16:27; 25:31; Te Kaotioti 1:7; Kaotioti 11:18;
13. TE MIRENIAM
I muin te buaka ao e na bon kakaai te aonaaba i rouiia aomata aika a bon maiu n tain te kauooki ao i muin te buaka. Bon aomata aika iriko ma te raraa. E na mangaongao te aonaaba muin te buaka ma ikai ngkanne e a kakoroaki bukin Te Rongorongo ae Raoiroi: E a oki Iesu Kristo ba e nangi katea Ana Tautaeka te Atua n te Abanuea. Ana tautaekanaki kaain te aonaaba n te tai anne, ake bon aomata (te iriko ma te raraa) iaan ana tararua aia Uea ueea (King of kings) ma raona “moan-uaa” aika ana uea irarikiNna. I nanon te maan ae teuana te ngaa (1,000) te ririki ao e na bon maiu te aonaaba n aiaron butina ngkoa ma iai te okoro. E nangi AKEA Tatan n te mireniam anne. Aomata ana bon waakina mauiia n akea te tia kaririia ke tia mamanaiia. Tabeiia “ibong” ma “tia reirei” n te tai aei bon tataekinan Iesu nakoiia aomata ba ana kakoauaa ba bon Ngaia Natin te Atua ao Ngaia are E a Uea i aon te Aonaaba ngkai. Iai aika ana kakoaua ao iai aika ana aki. E bon teimatoa aron te aonaaba ngkao are iai te mate ao iai te bung. Taan tia reirei ma ibonga ana bon kateimatoa aia anga reirei nakoiia ake a tiba manga bungiaki ao ni babitiitooia akana a kakoaua Iesu Kristo. Ana reireinaki te maiu n Kristian ao ana tuangaki ba teraa tabeiia ike a kaantaningaaki ba ana karaoiia n te aonaaba ningabong are i muin te mireniam. E na toki te mireniam i muin teuana te ngaa te ririki.
Te Kaotioti 20:2-6;
14. TE KAUOUA N UTI
Aei te kaututi ae te kauoua n kaututi (2nd Resurrection). Aei are a nangi kautaki nikabaneiia botanaomata aika a tia ni mate. Ao ana bon kautaki nakon te Motiki Taeka. N aron kam warekia i eta ao te “Moan-uaa” a motikaki taekaiia ngke a maiu. Ake iai “uaaia” ana butimaea Kristo n okina. Raoiia aika akea ‘uaaia’ ana mate ao ana ira te kautuuti aei. E na ataaki ba Te Atua te Tama, te Atua te Nati bon Tamnei (Spirit Beings) bon kaain te Utu n Atua ae Tamnei. Te Moan-uaa ngke a ibitaki nakon te Tamnei a bon riki ba kaain Ana Utu te Atua – Natin te Atua n aron karimoaiia Iesu Kristo. Ngkai a riki ba kaain te UTU N ATUA ao ana karaoa naba taabe ake taben te Utu n Atua: Ana riki ba Uea, ana Tautaeka, ao ana Motiki Taeka irarikin Kristo, ma te Atua..
Akana a rawa n kakaoauaa Iesu Kristo ao ana anganaki te kauoua ni mate (second death). Ao tatan ma ana taimonio ana kakiraroaaki ni kabureaki n te maan ae akea tokina.
Te Kaotioti 20:12, 13, 14: Kaotioti 20:10;
15. TERAA I MUIN TE MOTIKI TAEKA
Te moan bai. Te Atua te Tama e bon kaantaningaia ba ana kamaiuaki,ke, ana anganaki botanaomata nikabaneiia te maiu ae e Aki Tootoki (Everlasting life). Anne te bai ae E tangiria Tamara te Atua. Ana babaire te aomata e bon tuku nakoina.
Ana anganaki kanuangaiia ake a kamaiuaki: “iai nimaua, iai 10, iai 100.”
Te “Moan-uaa” ana uea i aon buraneti (te ruu) ake a mena i nanon te unibweeti (te baareti-mansion) ae nangi totoa i tinanikun ara aonaaba aio. (Ara aonaaba aio e na reke ba Kautuun Ana Tautaeka te Atua ike E na maeka naba iai). Ake a kautaki n te kauoua n kautuuti ana tibatibaaki i marenan birion ma birion buraneti i karawa. Bon iai tabeiia ae mimitong ao ae nangi kakawaki kaain te buraneti teuana ma teuana ba ana katamaroaa, ana karikirakea ao ana kateimatoa maiun aia buraneti – tao nimaua ke 100. Aio ngkoa are E moan iangoiia te Atua ngke A karika te aonaaba ma “karawa”. A nooria ba anera ake a moan miokoaki ba ana tararuaa te unibweeti a manga kaaitara are a urubekebeke te unibweeti man muin te buaka i marenan Rutibeero ma te Atua. Ma, te Atua a manga moan “karika” kaua te aonaaba ike A karikiia aomata ba katootoongaiia ao aekaiia ma te kaantaninga ba ana tararuaa naba te aonaaba aio. Ma, ti konaa n nooria ngkai ba bon akea okorora ma Rutibeero ma ana anera. Ti urua aon ara aonaaba aio, ti kaboitiniia, ti tiringiia arokan ao manin te aonaaba. E aki baati Rutibeero ma ana anera. E aki baati te Aomata ma kanoana. Tao e na bae n taku te Atua: “Tao tii Atua n Arora Aika Ana Konaa n Tararuaa Ara Kariki Bai Aei?”
“TI na karika te aomata n KATOOTONGARA ao n AEKARA”, e taku Ana Taeka.
Ikai are E a waakina Ana makuri te Atua ni KAMWAITA AEKANA (REPRODUCING HIMSELF) rinanon te aomata. Ao aio ngkanne kakawakin ao BUKIN TERAA te aomata
**********************************************************************************
(E na manga reitaki)