Mauri,
Ko a tia ni wareka te rongorongo i aan te atuu n rongrongo ae Uean te Atua? Ngkana ko tuai ao a 'click ikai bwa e na mataataa riki kanoan te rongorongo ae mwakoro inano ikai ngkana ko warekia..
E a kaan roko Uean te Atua?
E bati n tataekinaki te taeka ae 'Te Toki'. E mwaiti aron kabwarabwaraana iroun temanna ma te manna are tao bon koauan aia aro. Ma ti katiteuanaaki n te koaua bwa e na roko te toki ngkana e a oki Iesu. Okin Iesu bon aan ara koaua ngaira Kiritian, bwa ngkana e aki oki Iesu ao bon akea te maiu are e aki toki. Ti ataia bwa e taekinaki n te B'aibara Ana taeka Iesu are e kaangai:"N na nako,.. ao N NA MANGA OKI". Bwa aongkoa E na oki bwa E na kairiira nakon nera are E a tia ni katauraoia, n aron are taekinaki n te karaki.
A titirakinna Ana Reirei Iesu ni kaangai:. "Teraa kanikina ibukin Okim ao Tokin te aonaaba?" Eng, ti nooria ikai bwa te Toki e rekereke ma okin Iesu. E kaekai Iesu ao E taku:"Kam na taraingkami bwa akea e na mwamwanaai ngkami. Bwa e na mwaiti aika a na roko n taku bwa Ngai (Iesu) te Kristo; ao ana mwamwanaaia aomata". A na kangaa ni mwamwanaaki aomata n te koaua are Iesu bon te Kristo?
Euangkerio aika Uoua
E mwaiti aika a tia n roko n taekinna bwa Iesu te Kristo ao a tia n mwamwanaia aomata man te moan tienture. N na kabwarabwaraa teutana i aon aei. Imwiin waereken Iesu nako Karawa ao e a boo naba te mangaongao imarenaia taan onimakinna (A.D.31) bwa te euangkerio raa ae e na tataekinaki: Ana euangkerio Iesu, ke te euangkerio IBUKIN Iesu. E tokanikai te kauoua ni kaoti- e na tataekinaki te euangkerio ibukin Iesu. Eng, bon iai burabeti ni kewe aika a kaoti n te moan tienture (ao n taai naba aikai) aika a roko n tataekinna bwa Iesu te Kristo, ma a bon kakeaa naba oin ana euangkerio Iesu are te rongorongo ibukin Uean te Atua are e na roko n tautaeka iaon te aonaaba imwiin Okin Iesu. E butanako nakon aban te aonaaba te (kauoua) euangkerio aio ao e bon kaitiboo ma ngaia n te aba ae Karatia (wareka rongorongona n Karatia 1:6-7, 13-15).
N Mataio 24:5 ao Iesu e bon taekina naba bwa a mwaiti aika a na roko n Arana ao a na mwamwanaia aomata aika a mwaiti naba. Taraa ngkanne te kibu onoua, "Ao ko na ongo taekan taian buaka ao rongorongon buaka aika ana riki: tai karawawatako iai: bwa ana bon riki bwaai akanne, ma te toki e tuai n roko." Te kibu 8 rikaaki a bon taekanna naba bwaai aika ana riki: te rongo, te aoraki, mwaieen ke rurun te aonaaba, ao tiringakiia taan onimaki.A bon riki naba bwaai aikai n aia tai Abotoro ake 12 ao a bon bane ni tiringaki, ibukin aia koaua, ma tii Ioane.
Kanikina Ibukin "Tokin te Aonaaba"