Te Moan Taeka . . . . .
E taraa n akea kubaia kaain te aonaaba ngkai te rongo (drought), te akea n amwarake (starvation) ao te aoraki buaka (diseases) aika i aon kawaiia n rootii aaba n aron Pakistan ao India; ke, te United States of Europe ae i aon kawaina ngkai n bai; ke, te "nuclear overkill" e kaotia bwa ibukin temanna te aomata n tii ngaia, ao e katautauaki bwa mwaitin 'tibana' bon 150 te tan (ton) te mwakairoiro (explosives equivalent). Ma te bwai are a nangi tabeakinna - e taraaki - bon te bobotaki n taanga (sex).
Tao teraana te rongorongo n te nutibeeba ae e kakaongoraa, ke, e nangi kabubanako, ke e kananokawaki, e bon aki tabeakinaki irarikin rongorongo aika a irekereke ma te mwakuri n "bwaitingako" (sex), ke bwaai aika "sexy."
E kuri n bwaai ni kabane ao e na iai tamnein te aine ae tao ti tabeua te kunikai ae e bwaina, ke, bon akea. A kabonganaaki tamnei aikai ibukin te anainano ibukin kabooan bwaai. N beeban ma makatiin itinaniku ao e na bon iai tamnein te aine i nanon baana teuana. Tabeua beeba e a bon taotira tamneiia aine man te moani baa ni karokoa te kabane ni baa. Eng, e nga te beeba ae e na babaiakinaki? Te beeba ae e katanoataa rongrongon te reirei, te aoraki, te "climate change", te maiu n Kiritian? Bon tiaki. E na anaaki riki te beeba ae e nooraki bwa iai rongrongon te 'sex' inanona ma tamneiia aine aika a taraa ni bebekan. Te tautau (rape), te tautau ma te matoa, te tautau ao te tiritiri, tauakiia ataei aika uarereke - aikai rongrongo aika ti kan warekii ma n ongoraei - te sex - te sex - te Sex!
Ti maiu ngkai inanon te aonaaba ae e tii tabeakinna te maiu n tangako (sexual revolution).
"Sexy European" bon tiaki ainen Erube - bon aran te kaa n raraun (sports car) teuana. Te taeka ae "sexy" e a kabonganaki bwa taekan te kunikai, te kaa, te kau, te kaboiarara, te katangitang, arom n nakonako, karaoan iram, karoroan matam, am tii ngkana ko taetae, te shampoo, te shoulder-bag, ao a mwaiti kurikuri riki.
Ko aki kona ni birinako mai iai. Te koaua ni koaua anne e bon mena i matam. Te babaitingako ao mwakuri aika a rekereke ma te 'sex' e a bon buronako man uaanako man taabo ni bane.
E raoiroi aei?
Teraa uwaana?
Ao e a kanga aron aban Scandinavia are a nangi kabongana te maiu n "free love" ke, e nangi rababa aia 'tangira' are butimaiia aomata aika a kan 'matuu' ma ngaiia, ao a ataaki bwa akea irouiia totokan ke kamamaean te mwakuri n 'sex'? Bon tii man aaba aikai, are e bon kariaiakaki iroun aia tautaeka, ae e teimatoa kakaraoan aia birim ao aia makatiin "kaara." Bon ngaiia aika a moan katanoataa naokon te aonaaba ae banin bwa e uki irouiia te 'wife swapping', ke, taanga uoman a manga kakaibibiti buuia n tii te tai ae uarereke. Ma, n te aonaaba ae ngkai, e bon ataaki korakoran ao rikiraken te 'tataanga' irouiia ataein te reirei, te 'takakaro' irouiia buu-n-uma, mwaane a manga ibitiia bwa aine ao aine nakon te mwaane, i aon Kiribati ao e a moanna n rikirake kaain te Bimba - binabina-aine ao binabina-mwaane,