Kam ataia ba teraa te “Rongorongo ae Raoiroi?”
Kam ataia ba boni Iesu ae e uota te rongorongo aei nakoira ma e aki tataekinaki i rouia, ba a aki ataia, ana ‘toro’ te Atua?
E a boo taina ba e nangi kaotaki nanon te rongorongo ae raoiroi aei?
Te rongorongo ae raoiroi ae e uotia mai Iesu nako aon ara aonaaba ae mangaongao aio, ae e onrake n te iowawa, ae onrake i rouia utu aika maenako, ae e onrake n te aki ongeaaba, ae e onrake n te kamoamoa, ae onrake n boua aika kaaraki, ae onrake n te aoraki ma te mate, bon rongorongon te aonaaba teuana ae boou.
Te ‘Aonaaba Ningabong’ ke te aonaaba i muin ara aonaaba aio ae e maneweaki n te B’aibara ba “ABANUEAN TE ATUA” bon ara aonaaba aio ae e na manga kaboouaki, n ikotaki ma te unibweeti ae banin, ao e na kaokaki nako iai Ana TAUTAEKA TE ATUA. N Ana kauaoki Iesu E na oki ba E na anaa kaintokanuean te aonaaba ae ngkai mai i roun Tatan ao E na kaoka Ana Tautaeka te Atua are e kamaunaaki ngkoa i roun Tatan ngke e katokaaki ngkoa ba ‘uean’ te aonaaba aio.
Ana kaantaninga te Atua ba botanaomata ni kabaneia ana reke nakon te aonaaba ae boou aio. Ba bon Aia kaantaninga ngke A karika te aomata ba ana riki ba taan tararuaa mani karikirakea taian aonaaba i nanon te unibweeti ae totoa are A tia ni karikia. A moan karikaki anera i bukin te tabe aio ma e nooraki ba a aki tau n aron ae e nooraki n ana kaaitara Rutibeero ma raona n anera ake a mena i aana. E nooria ikai te Atua te Tama ba akea riki ae e na konaa ni karaoa te tabe aio ba bon tii te UTU N ATUA, are kaaina moa ngkai bon tii te Atua te Tama ao te Atua te Nati.
E reke Ana iango te Utu n Atua ba ana kamaita AEKAIA ba, n taina are e a tia ni baireaki, ao ana riki ba taan tararuaa mani karikirakea te aonaaba ningabong ae e a kaan roko. A karaoa aio rinanoia aomata: a karikaki aomata ba aekan ao katotoongan te Atua. A tuai n riki ba kaain te Utu ae Mimitong aio ba a bon karikaki moa ba te iriko ma te raraa. Te Utu n Atua bon TAMNEI!
N taningaan rokon Iesu ba E na kaoka Abanuean te Atua ao ti kaantaningaaki ngaira aomata n ‘mauira aio’ ba ti na karekea i roura anuan ao katein te Atua. Ti na kabanea ara tai ni kamatebaia Ana Tua i bukin te maiu n Tamnei, ba ngkana e a roko te tai are ti na ibitaki nakon te Tamnei ao e na iai i roura te anua ao te katei n Atua.
Ti karikaki ngaira aomata ba katootoongan ao aekan te Atua, ao ngkana iai i roura anuan ao katein te Atua n te tai are ti a manga ibitaki nakon te tamnei, ao tia bon riki ba kaain Ana Utu te Atua – TI NA RIKI BA ATUA naba ngaira! BON AEI TE RONGORONGO AE RAOIROI ae E kataia Iesu n tuangiira ngaira aomata rinanon Ana reirei ma Ana taeka ni kaikonaki ma Ana miterio ba n te taina ao ti na bane n riki ba Atua!
Te Utu n Atua ngkai ae ti ataia man rongorongo aika a koreaki n te B’aibara bon te utu ae mamakuri – taan karikibai. N te tai are ti riki ngaira aomata ba ai bon aron te Atua ao ti na mamakuri naba ao ti na konaa n tararuaa mani karikirakea kanoan te unibweeti ae totoa aio. Ti na katannakoaki ma ara aonaaba aika a kakaokoro ao ti na riki ba Uea i aoia – iai teuana ana aonaaba, iai nimaua, iai tebubua, nakon maitin ara kakaonimaki ni kamatebaia Ana Tua ma Ana mioko n te aonaaba n iriko ma te raraa aio.
Bon te rongorongo ae raoiroi ae raba nanona ngkoa ma e a boo taina ni kabutaki nakon te aonaaba ni kabuta: TI ANGANAKI NGAIRA AOMATA TE KONAA BA TI NA RIKI BA ATUA!
Te Atua bon te Utu. Iai te Tama ao iai te Nati ake kaain te utu. Te Tina, n aron kabaraana ae e kabonganaa te B’aibara, bon te Ekaretia – Ana Ekaretia te Atua!
Tao ti na konaa ngaira aomata n riki ba Atua?
E maiti kiibu n te B’aibara aika a tataekina ba ngaira aomata ti konaa n riki ba natin te Atua. Te Atua e bon weteira ngaira ni kabane ba natina. E taekinaki naba ba Iesu Kristo bon ara karimoa. E karimoa n teraa? Bon te karimoa n Ana utu te Atua! Ao ngaira aomata ti kaantaningaaki ba ti na riki ba tarin Iesu n te utu anne n taina are e a tia ni baireaki.
Iai te maane ae Rotan, ao iai natina ae Tekooti. Ao Tekooti bon Rotan naba. E kinaaki Tekooti ba kaain te utu ae Rotan ba bon natin Rotan.
Ai arora ngaira aomata: ti kinaaki moa ngkai ba ‘natin’ te Atua ma e na roko te tai are ti na ‘bungiaki’ kaua nakon ana utu te Atua – ao ti nang riki raoi ba tarin te Atua te Nati – ti na rabatanaki n te Tamnei ao iai anuan ma katein te Atua i roura - ti na riki ba bon Atua ngaira!
Ti anganaki ara tai ngkai n maiura i aon te aonaaba aio ba ti na kataia ao ti na karekea anuan ao katein te Atua n maiura. Iai aika a ‘kabuebue’ aia kakae ao iai aika a ‘abue’ ao iai aika a ‘maitoro’. Ngkana ti roko n te aonaaba n tamnei ao ti na bon anganaki tabera ike a bootau ma kabuebuen ara ‘kekeiaki’ ngkoa i aon te aonaaba n iriko ma te raraa.
Ao, n aron tein utu ae ti ataia, ao te Atua te Tama E na teimatoa n tei ba Tamara – Atuun te Utu – ao te Tia Babaire. Kristo, te Karimoa, E na teimatoa n nakoana ae te ‘Tia Taetae’ – te Taeka – ae E na tutuangiira Ana moti te Atua te Tama. Ao ngaira aika kaain te utu n Atua ti na riki ba Uea, i aan Kristo, i aon ara aonaaba aika a kakaokoro i nanon te unibweeti ae totoa aio!
E na iai te Tautaeka ao e na iai naba kaaina. Bon tiaki te tautaeka ike ana rineaki kaaina i rouia aika ana tautaekanaki (Democracy) ma e na tei te tautaeka ae te ‘Theocracy’ – Ana Tautaeka te Atua te Tama. Burabeti ao uea ma aomata aika a maneweaki araia n te B’aibara n aron nakoaia are a katabeaki iai i roun te Atua ao i roun Kristo ana riki ba kaain te tautaeka: Aberaaam, Eria, Ioteba, Tawita, Ana Reirei Iesu ake Tengaun-ma-uoman, ao n aroia nako. Tabeiia ma nakoiia ike a tia ni katabeaki iai n tain te O-Tetemanti ao n te Nu-Tetemanti e na boni reitinako n te aonaaba ae boou!.
Ko kan riki ba kaain te aonaaba ningabong? Kamatebaia Ana tua ma Ana taeka te Atua ba teraana Ana motinnano ibukim. Ko konaa naba n rieta am wareware man rongorongo aika a katokaaki n te web site aio.
Tekeraoi.