سالوخەتێت جلکێت دریای
دڤان پەیڤێت ژێریدا ئەو نیشان وسالوخەتێت جل وبەرگانە ئەوێت دریای وکەڤن بێ جوداهی چ یێت ژنابن، مێرابن یان زاروکابن، ل ڤێری ئەم دشێین بێژن کو زۆربەی وان پەیڤان یەکسانن دگەل ئێک حەتا رادەکا نێزیک. ئەڤ مشە پەیڤە دناڤ زمانێ مەدا نیشانەکە کو کورد هەرێ کارکەر وئێشکەربو و ل هەمی دەما ئەو جل وبەرگێت وان ددریایبون دکار وشولاندا. ئەڤە ژی جهێ پەسند وشانازیێ یە بو مللەتێ کورد کو هەر دەم حەزا کاری دڤیا نە کو شەر وجەنگان، بەلێ بەر وڤاژی هەرێ دگەل تەناهیێ بویە ویێ ئاشتی خازبو. ئەڤ کۆما پەیڤان من یێت خڕڤەکرین وهەر ئێک ژوان من واتێت داینێ وهەمبەرکرن دگەل رستەکێ بو رونکرنا وێ پەیڤێ ب درستی:
بەرئێكچون: تیک کەتنێ - سەحکێ شەپکێ تە یێ ژبەرئێكچوی
پاتەکری: پنی وپاتە یێت برینی - کون یێت هاتینە درین - شەلێ وی یێ پاتەکری یە ژپنیان
پرپتی: پرتکی: چ تێ نە ماینە، نەشێت ئێدی ب کەتە بەر خو- کراسێ تە یێ پرپتی دبەر تەدا
پرتکی: گەلەکێت دریاین - گورێت وێ ییت پرتکین دپیادا
پرزمی: کەڤن بوی - یێ پرپتی بوی - ڤان جلکێت پرزمی بهاڤە ب کێر چ ناهێن
ترتربون: چرچربون - دەرسوکا مامێ من ژهەمی رەخان یا ترتربوی
ترگالی: رەنگەکی جلکێت کەڤنن - ئەو چ ترگالن دبەر تە
تیكتیكبون: تیکالیبون: ژێکڤەبونا تیکان - شەروالێ بابێ من یێ تیكتیكبوین ژپێسیرێ
چرچری: ترتربون - ئەڤ شیتکە یا چرچری
دریای: شەقبون، کونبون - شەلێ وی گەلەکێ دریای. ئانکو زۆر شەقێت دکەتنی
دڤێلەبون: زڤێلەبون - هەڤالکەراسێ دەیکا وی ژهەمی ئالا یێ دڤێلەبوی
رويشالوتکی: زڤێلەبوی - رويشالوتکێت ب کراسێ ڤێ ژنێدا دهێن
زڤێلەکری: یێ شێقشیق بوی - شیقالێت دکەتینێ - من قەمیسێ وی زڤێلە زڤێلە کر ژکەربادا
ژكاركەڤتن: چ تێ نەمایە - شەلێ خۆ پاڤێژە چنکی یێ ژكاركەڤتی
ژناڤچون: ژێکڤەبون - کورتەکێ ڤێ کچێ یێ ژناڤچوی
شێق شیقبون: زڤێلەکری - ئەڤ جلگە ناهێتە پاتەکرن ب چ رەنگا چنکی ییت شیق شیقبوین
شیقالی: یێ زڤێلە بوی - هەرتیکەک یا بو خۆ چوی - ئەو چ دەرپێ شیقالی یە دپێ تە
قورڤچین: گلڤچین: تێکچون - کراسێ من قورڤچی هندی هوین دشون
كونكونبون: کونتێڤەبون - ئەڤە چیە ئێلەکێ تە یێ كونكونبوی
کنجری: شێق شیق بوی - ژبەر ئێک هاتیە دەر وکون بوی - ئەو چ جلکێت کنجرینە دبەر تە
کەرخەسپالی: زۆرێت کەڤن وپرتکی نە - چ جلکێت دی نەبون ڤان کەرخەسپالا بکەیە بەر خۆ
مەحیان: حولیبوی - هندی ئەو بچیکە خۆ دخشینیت جلکێت وی یێ دمەحیان
هلزمی: هلوزیای: هلوەریای - کی دێ ڤان جلکێت هلزمی کریت
هلزمی: هلوەریای: هلوزیای - شەپکێ مێرێ تە یێ هلزمی
هلوزیای: هلزمی: هلوەریای - چ تێ نەمان - ئەو چ شەپکێ هلوزیایە دبەر تەدا
هلوەریای: هلوزیای: هلزمی - کا وان جلکێت هلوەریای ژبەر خو بکە
وەکێکیا پەیڤێت دریانێ
بەرئێكچون: تیک کەتنێ
پاتەکری: پنی وپاتە یێت برینی، کون یێت هاتینە درین
پرپتی: پرتکی: چ تێ نە ماینە، نەشێت ئێدی ب کەتە بەر خو
پرتکی: گەلەکێت دریاین
پرزمی: یێ کەڤن بوی یان یێ پرپتی بوی
ترتربون: چرچربون
ترگالی: رەنگەکی جلکێت کەڤنن
تیكتیكبون: تیکالیبون: ژێکڤەبونا تیکان
چرچری: ترتربون
دریای: شەقبون، کونبون
دڤێلەبون: زڤێلەبون
رويشالوتکی: زڤێلەبوی
زڤێلەکری: یێ شێقشیق بوی ئو شیقالێت دکەتینێ
ژكاركەڤتن: چ تێ نەمایە
ژناڤچون: ژێکڤەبون
شێق شیقبون: یێ زڤێلەکری بوی، ناهێتە پاتەکرن ب چ رەنگا چنکو یێ بویە شیقال
شیقالی: یێ زڤێلە بوی، هەرتیکەک یا بو خۆ چوی
قورڤچین: گلڤچین: تێکچون
كونكونبون: کونتێڤەبون
کنجری: شێق شیق بوی، یێ ژبەر ئێک هاتیە دەرێ و کون بوی
کەرخەسپالی: زۆرێت کەڤن وپرتکی نە
مەحیان: حولیبوی
هلزمی: هلوزیای: هلوەریای
هلزمی: هلوەریای: هلوزیای
هلوزیای: هلزمی: هلوەریای: چ تێ نەمان
هلوەریای: هلوزیای: هلزمی
١٧-٨-٢٠١٧ دهوک – ئەحمەد عەلی حەسەن