گالین وگڤتن

دیالوگ

چیە دیالوگ یان گالین وگڤتن ؟

   واتەیا ڤێ بێژێ ئەڤەیە: دی: ئانکو دوو، جوت کەس، لوگ: ئاخڤتن یان پەیڤتن ئانکو دوو کەس پێگڤە دگالن دگەل ئێک ب ئنیەتا پەیداکرنا گڤتنەکێ دناڤ بەرا خودا. ڤێجا ئەڤ رەنگە سوحبەتا زاردەڤ دڤێت کێمتر نەبیت ژدوو کەسان. نڤێسەرێ ڤی شێوێ نڤێسینێ دوو کەسان یان پتر پەشداردکەت دوێ گڤت وگویێدا ئەوا چێدبیت بەرامبەر دا هندەک پێزانینێت پێدڤی  ب گەهینە خویندەڤانی.

جۆرێت دیالوگێ: گەلەک تەرزێت دهەین بەلێ یێت سەرەکی ئەڤەنە:

١- نورمال: ئەو گڤت وگالێنە ئەوا دکەڤیت دناڤ بەرا دوو مروڤان یان پتر ب ئاخڤتنەکا سروشتی.

٢- ئەدەبی: ئەو ژی دوو جوینن ئێک: گالینا ژناڤدا ئاکتەر دگەل دخو دئاخڤیت ئو گالینا ژدەرڤە دناڤ بەرا هندەک ئاکتەرانە. دڤی رەنگیدا ئاکتەر دگەل ئێک دئاخڤن ب شێوەکێ ئاسان دناڤ هەمی جۆرێت نڤێسینی چ: شانوگەری، چیروک، هوزان، بەخشان هتد...

 ٣- هەمەجۆر: دان وستنادنا هزر وبیرا ل سەر خڕ رەنگێت بابەتان وەک: ئاریشێت تایبەت، ئایین، سیاسەت، یاسا هتد...

ئەڤە چەند نمونەنە ژ ڤان تەرز وجۆران:

١) دوو دوستێت درست

هوگر وهەڤال دوو کورە جحێلن زۆر دوستن دگەل ئێک ژبچیکاتیێ هەرێت پێگڤەنە مەزنبوین ل خوشی ونەخوشیا ئو ل تەنگاڤیا وبەر فرەهیا روژەکێ ئەڤ گڤتنە چێبو دناڤ بەرا واندا.

هوگر: هەلو هەڤال تو ل کیرێیی ؟

هەڤال: بو تە چ ژمن دڤێت بێژە ئەزێ ل سویکی؟

هوگر: وەرە  فلان جهی ئەز پێدڤیێ چەند پارا مە.

هەڤال: کێم یا گەلەک دا بزانم.

هوگر: دوو سەد هزارەک هەکە تە هەبن.

هەڤال: بلا خو ل من بگرە دەمەکێ کورت.

هوگر: بەس گیرو نەبی دێ مینم ل هیڤیا تە.

هەڤال: پشت راستبە ئەز گیرو نابم خودێ حەزکەت.

پشتی دەمهژمێرەکی هەڤال گەهشتە دەف هوگر.

هوگر: تو زوی نەهاتی من چەند جارا تلەفونا تە کر تە بەرسڤ نەدا

هەڤال: تە راست دڤێت حەتا ئەز گەهشتیم موبایلا خو ب فروشم یا گرتیبو.

هوگر: باوربکە من غێر هزر ژتەکر ل من ببۆرە.

هەڤال: ئەڤە ئەو پارێت تە ژمن داخازکرن.

هوگر: وی کەسی راستا گوتی: هەڤال ژی هەنە وهەڤالوژک ژی هەنە.

هەڤال: بەلێ وی ژی راستا گوتی: چ جارا زێر قەلپ نابیت.

هوگر: بەلێ وەیە هەڤالێ درست هەر دیار دبیت ل تەنگاڤیا.

٢) رێڤینگ دگەل شڤانی

   سپێدەکا زوی سویارەکێ سەر هەسپی قیتکرە رەخێ گوندەکێ کەتیە بن لێڤا چیای راوستی ل بەر شڤانەکێ گوتێ:

رێڤینگ: مامێ شڤان من پسیارەکا هەی.

شڤان: کەرەمکە بێژە تە چ دڤیت.

رێڤینگ: ئەڤە چەندە تو ل ڤێرێ؟

شڤان: ئەڤە سپێدە سحارێ ئەزێ ل ڤی کیڤەچەرێ پەزی د چەرینم.

رێڤینگ: چ کەس بەرچاڤێت تە نەکەڤتینە دڤێرێرا چوین.

شڤان: بەلێ بەری دەمەکێ کورت ئێک دهات ب لەز.

رێڤینگ: ئێ یێ چەوابو وکیڤە چو؟

شڤان: سلاڤکرە من وداخاز ژمن کر پێچەکا شیری ب دەمێ.

رێڤینگ: پشتی هنگێ بەرێ خو دا کیرێ.

شڤان: دەما شیرێ خو ڤەخاری وهەلەکێ بهنا خو ڤەدا.

رێڤینگ: ڤێجا  وی مروڤی قەستا کیرێ کر؟   

شڤان: وی قەستا ڤی چیای کر وبەرێ ڤەبو رەخێ دی.

رێڤینگ: تو دشی هندەک نیشان وسالوخدانێت وی بو من بێژی.

شڤان: بەلێ ئەز دکارم بو تە دیارکەم بەس بێژە من ژبەر چێ؟

رێڤینگ: هەکە تو شیای رەوشا وی دیارکەی ب درستی دێ تە خەلاتکەم.

شڤان: ب راستی ئەو مروڤەکێ سەیربو کێم هەبن ژوی تەرزی.

رێڤینگ: لەزکە بو من بێژە یێ چەوا بو دەمێ من نە کوژە.

شڤان: ئەو ژسەری ڤە یێ حوچ ، یێ لێڤ موچ، ریهـ لوچ، بەژن کچوچ، پێ چەکوچ.

رێڤینگ: ئەوا تو گوتی یا راستە، وەیە ووێڤەترە.

شڤان: خەلاتێ تە بومن چیە پشتی من زانی؟

رێڤینگ: ب درستی تو نە شڤانی بەلێ تو خێڤزانی.

شڤان: من خەلاتێ خو ژتە دڤێت یان بەرسڤا من بدە ب شێوازێ من گوتی.

رێڤینگ: خەلاتێ تە: بزنا کوچ، نێریێ ب قوچ، گیسکێ گوریلوچ، میها بێ ئاهو سوچ.

شڤان: نوکە درستە: ئێک ب ئێکێ یێ حوچ ب کوچێ ئو لێڤ موچ بو خودانا قوچێ.

رێڤینگ: کودەکێ شیری بو من ب دوشە دا ب کەڤمە ل دیف نێچیرا خو.

شڤان: سەر هەر دو چاڤان، مە شیر دا حوچوی دێ دەینە خوشچوی.

٣) خاپاندن بەرامبەرێ پیلانێ

 جارەکێ سەروکێ هوزەکێ ڤیا هوزا بەرامبەری خو وژناڤببەت وبنبرکەت ووێرانکەت. ڤێجا ئەڤ پیلانە بو دانا. قاسدێ خو فرێکرە دەف چەتو ئاغای هەڤرکێ وی ب ئینیەتا خاپاندنێ ب حێجەتا مەعزوماتێ وئاشت بونێ.

قاسد: ئاغا ئەز قاسدم ژتەرفێ لەتو ئاغای.

چەتو ئاغا: هو قاسدو بێژە وی چ ژمن دڤێت ئەز بکەم؟

قاسد: بەرێز یێ گوتی تو مەعزومی ل نک وی رۆژا ئەینی.

چەتو ئاغا: بلا من قەبیلە بەس ب ڤی مەرجی.

قاسد: ئەو چ مەرجە ئاغایێ هێژا دا ب گەهینمێ؟

چەتو ئاغا: بێژێ ئەز دێ گەلەک زەلاما دگەل خو ئینم.

قاسد: بلا وەبیت چنکی یێ گوتیە من دەست ژویرا هندی بهێن درستە.

چەتو ئاغا: پا بێژێ ئەم دێ هێین ل وی ژڤانی.

   (دروژا چونێ چەتوی مێرترین وزیرەکترین زەلام ورەشەکێت خو دگەل خو جەماند چنکی وی بهنا خاپاندنێ ل دەف لەتوی دیارکر وتێدیت).

چەتو ئاغا: گەلی خوشمێر ومێرچاکا ئەم دێ چین وێرێ بەس دڤێت هوین دهشیاربن وچاڤ ڤەکربن ژبەر هەمی پیلانا.

سەروکێ زەلاما: ئاغایێ قەدرگرن ئەم دحازر وئامادەیەنە بو هەر دەلیڤەکا تەنگ ودژوار بو تە بکەین.

چەتو ئاغا: هەمی پێگڤە ب کەڤنە ل دیف پێت من  ب تەرزەکێ پێشکێش وجوان خو دیارکەن.

سەروکێ زەلاما: ئەمر وفەرمانا تەنە ئاغایێ مە، یێ پشت راستبە ژڤێ ئالی ڤە.

    (دەما چەتو ئاغا دگەل زەلامێت خو گەهشتیە هوزا لەتو ئاغای رێزەکا  زۆرا گرنگ بو وان هاتە گرتن وپێش وازیەکا گەلەکا تازە بو وان هاتە دانان).

لەتو ئاغا: هوین گەلەک ب خێر هاتن. مە زۆر پێخوشە هوین هاتن.

چەتو ئاغا: سوپاسیا تە دکەین بو ڤێ داخازیێ.

لەتو ئاغا: هیڤیا من ئەوە ئەم پێگڤە بژین ب تەناهی بێ شەر ولێگدان ژنهو وێڤە.

چەتو ئاغا: خوش بازارە ئەم ژی ڤێ حەزدکەین دا بەس کوژتن دناڤ بەرا مەدا چێبن.

لەتو ئاغا: ئەڤە سوز وپەیمانە ئەڤە چێنەبیت ل پێشە روژێ.

    (پشتی خارنێ وسوحبەت وچا ڤەخارنێ چ رویدان ودناڤ بەرا واندا قەت چێنەبو، ئو پشتی خاتر خازتنێ چەتو ئاغا ب زەلامڤە زڤرین هوزێ، هەمیا دیتن کو هوز خڕ یا سەر وبنبوی ویا هاتیە تالانکرن ژهەمی رەخاڤە).

چەتو ئاغا: گەلی زەلاما مە زانی وی دڤیا خەفکەکێ ل بەر من ڤەدەت، بەلێ مە نەهێلا ئەو چیبیت بەر پیلانا مە، بەس مە نەزانی وی تەپکەکا دی یا ڤەدای رەخ یا دی کو دبێژنێ: تەپکا ل بەر خەفکێ ودێ ئەم کەڤینێ)

سەروکێ زەلاما: وەیە ئاغایێ بەرێز چنکی کورد دبێژن: تو چەندێ مێربی ژتە مێرتر یێت دهەین. ئو تو چەندێ فێلبازبی ژتە فێلبازترێت دهەین).

چاڤە رێبن ل هندەکێت دی ...

٢٩- ١٠- ٢٠١٨ دهوک – ئەحمەد عەلی

٤- کەر وزەنگل

رۆژەکێ رێکا پاشایەکی رەخ ئاشەکێ ئاڤێ ڤە چو وڤیا سەحکەتێ کا چەوا کاردکەت:

ئەڤ گڤت وگوت چیبو دناڤ بەرا وێ وئاشەڤانی

پاشا: چەوا ئەڤ ئاشە کاردکەت؟

ئاشڤان: بەگێ من مە کەرەکێ گرێدای ل ژۆرێ ئەو بادەت

پاشا: دا بچین سەحکەینێ

ئاشەڤان: کەرەمکە دگەل من وەرە

پاشا: ئەڤە چ زەنگلە تە ب ستویێ وی ڤەکری؟

ئاشەڤان: هەکە دەنگێ زەنگلێ نە هاتە من دێ زانم کەرێ راوەستیای

پاشا: ب کەنی، چەوا دێ زانی ئەگەر کەر راوستیا وزەنگەل لەقاند؟

ئاشەڤان: ئەز بەنی ما کا ئەو کەرێت شپتی تە ڤێ هزرێ بکەن!  

٥- دیکل ورویڤی

رویڤیەکی هندەک گوشت خار ل سەر گویفکەکی، هەستیەک ئاسێ بو دگەلالیشکا ویدا

رویڤی: هەوارە ب گەهنە من هەوارە

دیکل: چ ل تە قەومیە رویڤیو تو هو دکەیە هاوار؟

رویڤی: هەستیەکێ دحەفکا منرا ئاسێبوی

دیکل: ڤێجا تە چ ژمە دڤێت بکەین؟

رویڤی: دێ وی خەلاتکەم یێ دەر بێخیت

دیکل: بەس سەر سوزا خو بە ئەز دێ دەر ئینم

رویڤی: وەعدەبێت ئەز وەبکەم دیکلو

دیکل: کا دەڤێ خو ڤەکە ب فرەهی

رویڤی: خو نێزیکە ونە ترسە ژمن

دیکل: رویڤیو من دەر ئێخست

رویڤی: سەحەتا تە خوش سوپاس بو تە

دیکل: کا خەلاتێ تە ل گەل من گوتی؟

رویڤی: خەلات گەهشت دەما سەرێ تە ژدەڤێ من دەرکەتی

دیکل: ئەز تێ نە گەهشتم چەوا؟

رویڤی: تو پاری بوی ددەڤێ مندا ومن تو نەخاری

٢٠-١-٢٠١٩ -دهوک – ئەحمەد عەلی

٦-پەشیمانی

ب چاڤ پیکەڤتنەکا تلەڤزیونی ژلایێ پێشکێشکەرەکێ ب زەنگینترین کەس دجیهانێدا (بیل جیتسی) کەت ئەڤ گڤت وگالین چێبو دناڤ بەرا واندا:

پێشکێشکەرێ: ئەو چ نهینی یە بو سەر کەڤتنا تە؟

دەولەمەند: ئەڤ سەکە بو تە تە چەند دراڤ دڤێت ل سەرب نڤێسە

پێشکێشکەرێ: ب شاشی ڤە، گوتێ مەبەستا من نە ئەڤەیە

دەولەمەند: پا کا بێژە ڤە تە چ دڤێت؟

پێشکێشکەرێ: تو چەوا هوسا زەنگین بوی؟

دەولەمەند: بگرە ڤی سەکی پارێ تو حەزدکەی دانە سەر ئەو ژتەرایە

پێشکێشکەرێ: ببۆرە ئەز نا وەرگرم سەکێ تە

دەولەمەند: ئەڤە من سەک دراند. نهینیا سەرکەڤتنێ من نە وەکی تە دەرفەت ژلەپێ خو دکرن

پێشکێشکەرێ: بەلێ من ئەڤە نە دزانی

دەولەمەند: ئەگەر تە زانیبا تو دا بیە زەنگینترین پێشکێشکەر دڤێ جیهانێدا

پێشکێشکەرێ: دێ شێین ڤێ خەلەکێ جارەکا دی دوبارەکەین

دەولەمەند: بلا بەس دەرفەتا بو تە هاتی چارا دی ناهێتە ڤە ودو بارە نابیت

١١-٢-٢٠١٩ دهوک - ئەحمەد عەلی

٧- شڤان ورەزڤان

"ژخوچی"

    شڤانەکی پەزێ خو کێشا ب رەخ رەزەکی ڤە وێڤەی گوندی ب ئنیەتا هندەک تری ب دەست خوڤە بینیت ژرەزڤانی، ئینا گوتێ:

شڤان: خودێ قووەتا تە

رەزڤان: مامو ژخو چی

شڤان: بەرسڤا من "رەحمەت ل دەیبابێت تە نە"

رەزڤان: ئەرێ وەسایە بەس پشتی هنگێ چ ل دیفدا دهێت

شڤان: دا بێژم هندەک تری بدە من

رەزڤان: دا بێژم: نەخێر ئەز نا دەم

شڤان: ژبەر چ؟

رەزڤان: هەر دا بێژم ژخوچی

شڤان: تە چەوا زانی دڤێ بێژم تە؟

رەزڤان: چنکی گەلەکێت دی وەکی تە ئەڤە یا گوتی

شڤان: لەوما تو ژسەری بن بردکەی

رەزڤان: ئەگەر ڤێ نەبێژم مامو چ تری بو من نامینیت

١٧-٢-٢٠١٩ دهوک – ئەحمەد عەلی

٨- کاروانچی ومێڤاندار

"بارێ پیڤازا"

     کورە جحێلەکی بارەکێ پیڤازا برە کوندەکێ دەشتێ، بو مێڤانێ پیرە مێرەکی. پشتی شەڤبێریێ مێڤانداری کچا خو پێشکێشی وی کر وبێ نەخت لێ مارکر. ئەو ژی تێ کەت بارێ پیڤازا بو خەزیرێ خو هێلا ورۆژا پاشتر ژنکا خو ل دەوارێ خو سویارکر وقەستا گوندێ خوکر. ب رێڤە رویبارەکێ بوش کەتە بەر وان، ل دەواری خۆری دا دەربازبیت. جوتیارەکی گوتێ.

جوتیار: ئەڤە دێ چ کەی؟

جحێل: دەینە ئاڤێ

جوتیار: هشیاربە ئاڤا بوشە دێ ژنکێ بەت

جحێل: ما چ ژمن دێ جیت

جوتیار: ئەڤە تو چ دبێژی؟

جحێل: بابێ یا دایە من ب بارەکێ پیڤازا

بویک: من ب زڤرینە ڤە من تشتەکێ خو یێ ژبیرکری

جحێل: تە چ ژبیرکریە؟

بویک: ل مال دێ زانی

پیرەمێر: بو هوین ڤەگەریان؟

بویک: باب ئەز دگەل ڤی مێرکی ناچم

باب: ژبەر چ کچا من؟

بویک: ژبەروێ چەندا تە ل گەل من کری

باب: من چ کریە بابو بێژە؟

بویک: تە ئەز بێ نەخت دامێ

باب: کورو هەرە ڤە پێنج زێرا نەختێ بویکێ بینە

جحێل: بلا ئەز بەنی دێ وەکەم

باب: یا راستە ئەڤا بیرمەندا گوتی

جحێل: چ گوتیە ؟

باب: بێ نەختی، بێ بەختی

   جحێل چوڤە ونەختێ خو لێکدا ودگەل چەند ریهسپیا هاتنە ڤە وژنکا خو دگەل خو بر، هەر سەر وی رویباری بەری ل ئاڤێ ب دەن گوتە زەلاما هشیاربن دەما هوین بویکێ دەربازدکەن دا نەکەڤتە دئاڤێدا چنکی من نەختەکێ گرانێ پێدای ئەز دترسم ب خندقیت.

 ١٧-٢-٢٠١٩ دهوک – ئەحمەد عەلی

9- شیرەتا خەسیێ ل پویکا نوی

ئەڤ دیالوکە دکەڤندا ل گوندا یا چێبوی دناڤ بەرا خەسیێ دگەل بویکا وێ یا نوی ئەوا نەزان ونە گوهدار.

خەسی: تو دزانی ئیپراخا ب لێنی

پویک: وەی مالا تە چەوا نزانم

خەسی: دایێ وەرە ڤێ قازانکێ دانە سەر کوچکی

بویک: سەر چاڤا خەسیێ

خەسی: هندەک ئاڤێ بکە سەر دگەل چەند حەلانکا

بویک: بلا دێ وەکەم وەکی تە گوتی

خەسی: بەس بلا ئاگرێ تە یێ نەرم بیت ونەیێ بۆر بیت

بویک: ئەز ڤێ هەمیێ دزانم

خەسێ: جار جار سەحکێ دا ئیپراخ نە سوژن

بویک: نە هەوجەیە ئەز چاک دزانم

خەسی: من ژبیرک پا تەبقکا ریخێ ژی دناڤ هەلدە

بویک: ئەز دزانم دا وەکەم

خەسی: دێ هەرە ڤێ ژی بکە کچا نە ل بەر چ مالا رابوی

بویک: من ئەو ریخ بەردا سەر خەسیێ

خەسی: سەحەتا تە خوش ژنا بەر مالا

بویک: کا وەرە سەحکە ژدەرڤە من چ دیت

خەسی: خێرە تە چ دیت

بویک: سەحکێ چەند پێشی یێ ب قازوخێ کەری ڤە

خەسی: ژڤێرێ حەتا بەر دەری، شیرەتێت من کەتنە سەر یێ کەری

 ٢-٢-٢٠٢٠ – دهوک – ئەحمەد عەلی

١٠- شەڤا زەنگلێ

ئەڤ گڤت وگوتە یا هاتی دناڤ بەرا بابێ کال وکورێ مازن بەری شەڤا زەنگلێ بهێت وکا دێ چەوا خۆ بەرهەڤ وئامەدەکەن بو هاتنا وێ شەڤێ.

باب: گایێ سۆر ب هێلن بو شەڤا زەنگلێ

کورێ مازن: ئەڤە چ شەڤە هوسا یا ب ترس؟

باب: سەرماترین شەڤە ل زڤستانێ کورێت من.

کورێ مازن: گەنگی دهێت وچەوا دێ زانن؟

باب: من زەنگل یا ب سەرێ دەرێ خانی ڤەکری

کورێ مازن: مفا ژوێ چیە؟

باب: دەما لێدا گای ڤەکوژن وتێر گوشتی بخون

کورێ مازن: ژبەر چێ بوچی؟

باب: دا هوین سێ سێ بانی ژبەفرێ رادن

کورێ مازن: ئەمرێ تە یە باب دێ وەکەین

باب: دەنگێ زەنگلێ یێ دهێتە گوهێ من

کورێ مازن: نوکە چ بکەین؟

باب: وەکی من گوتیە هەوە وەبکەن

کورێ مازن: رابن سەر خۆ دا شیرەتا بابێ خۆ ب جهبینن

باب: من نەگوتە هەوە: بلا گایێ سۆر بمینیت بو شەڤا رەش

کورێ مازن: ب گوتنا تە ئەم رێزگاربوین ژمرنێ بابو

باب: کورێت من "ئاقل تانجا زێرینە، بەلێ دسەرێ هەمی کەساندا نینە".

٢٦-٤-٢٠٢٠ – دهوک- ئەحمەد عەلی

١١- عەیدو وحیتو

ڤێکەڤتنەک دناڤ بەرا عیدو وحیتو پشتی فەرمانا نەهێلانا هاتن وچونێ داین ل هەرێما کوردستانی وخەلک نە دەرکەڤن ژمالێت خۆ ژبەر ڤەگرتنا دەردێ کورونای، بەری جەژنێ عەیدوی سەرەدانەک برە دەف حیتوی ئەڤ گڤت وگوتکە دناڤ بەرا واندا چێبو.

عەیدو: ئێڤاری باش مامێ حیتو

حیتو: وەی تو سەر چاڤا هاتی خالێ عەیدو

عەیدو: ئەز زۆرێ ماندی مە

حیتو: خێرە ژبەر چێ؟

عەیدو: ئەز ل بازا بوم ئەڤە ژسپێدێ وەرە

حیتو: تە چ دکر؟

عەیدو: من جلکێت عەیدێ کرین

حیتو: تە ژخۆ کرین مامێ عەزیز

عەیدو: بو تو وە دبێژی ما سوبە نە عەیدە

حیتو: بەلێ بەس کرنە قەدەغە ودەرکەتن نینە

عەیدو: ژبەر چ نینە تو نا بێژیە من؟

حیتو: ژبەر کرونایێ دا خەلک نە هێنە ڤەگرتن

عەیدو: بو چی بەس کورونا ل ئاهەنگ وجەژنا ول نەڤروزێ یا هەی

حیتو: ئەڤە ل دیف زەوقێ وان مامێ نەکرعەیدو

عەیدو: پا ئەز چ ل ڤان جلکان بکەم

حیتو: کا تە چ کریە دا سەحکەمێ

عەیدو: پێلاڤە وپەنتەرونە وقەمیسە

حیتو: ئێ روژا ئێکی پێلاڤێ ل سەر بانی بکە پێ خۆ

عەیدو: بو ل سەر بانێ؟

حیتو: ل وێرێ وەرە وهەرە دا جیران تە ببینن

عەیدو: پشتی هنگێ چ بکەم؟

حیتو: پەنتەرونی ل حەوشێ بکە بەر خؤ وپیاسێ بکە

عەیدو: ئەڤێ بو کێ وە بکەم؟

حیتو: دا مالباتا تە ببینن تو یێ کەشخەیێ

عەیدو: کەنگی قەمیسی ل بەر بکەم؟

حیتو: روژا دویماهیێ ل هولێ ل پێش تلەڤزیونێ

عەیدو: بو چی ل بەر تلەڤزیونێ؟

حیتو: دا ئەوێ نەهێلای تو ب دەرکەڤی تە ببینیت

عەیدو: ب خودێ کورونا بو بەنیشت وب مەڤە ما

حیتو: ئەڤە تشتەکێ سەیرە خالێ عەیدو

عەیدو: دیارە کورونا بەس سێ روژێت جەژنێ خۆ ئاشکرا دکەت

حیتو: ئەرێ تو ب خودێ:" کورونە وجەژن وجەژن وکورونە"

عەیدو: مەخسەد ئەوە: نەهاتنە ونەچونە وبەلێ بەس کرین وفروتنە

حیتو: ئاخ بو تە کورونا دو هزار وبیستێ تە چەوا میستێ!

٢٥-٥- ٢٠٢٠ – دهوک – ئەحمەد عەلی

١٢- شەفیقێ بەنگلادیشی

شەفیقێ گلێش مالینە ل باژێرێ دهوکێ یە دەمێ دوانزدە سالان، مروڤەکێ بەر نیاسە دناڤ جڤاکیدا ب جامێریا خۆ ورەوش ورەفتارێت چاک ل ناڤ سویک وبازاران. ڤێکەڤتنەک ژلایێ پەیامنێرەکی دگەل هاتە کرن ئەڤ گڤتن چێبو: وی پەیامنێر ب ناڤ کر ب ( هەڤال) و خۆ دانە (دوست).

هەڤال: ئەڤە چەند سالە تو کاردکەی ل باژێرێ دهوکێ

دوست: دۆرێت دوانزدە سالان

هەڤال: تو چەوا فێری کوردی بوی

دوست: روژ ب روژ من پەیڤ دنڤێسین وژبەردکرن

هەڤال: خەلک حەژ تە دکەن حەتا چ رادە؟

دوست: کەسێ دلێ من نەهێلایە حەتا نوکە ومن ژی

هەڤال: هاولاتی هاریکارن دگەل هەوە

دوست: زۆر دقەنجن ژهەمی لایان ڤە وناهێتە گوتن

هەڤال: رەوشا هەوە دگەل مالا چیە ل جەژنێ؟

دوست: بەخشیشا ددەنە مە ودیاریا

هەڤال: تو جەوا سەرە دەریێ دگەل کارکەرێت خۆ دکەی

دوست: ب جانی وئەز تورجومانێ وانم ل دەمێت تەنگاڤیان

هەڤال: تە چ داخازەک هەیە بێژی دەربارێ کارێ خۆ؟

دوست: خەلک گلێشی نە هاڤێن سەر جادا ول ناڤ بازاری

هەڤال: چ تێبین بو تە دیاربویە سەر باژێرێ دهوکێ ب گشتی

دوست: ب راستی زادێ دهێتە رێتن دناڤ گلێشی یێ مشەیە

هەڤال: تو چەوا دبینی ئەڤێ چەندێ؟

دوست: ئەو خارن دێ دەولەتەکا فەقیر پێ خۆدان بیت

هەڤال: ئاخڤتنا تە یا درستە ودجهێ خۆدایە

دوست: ئەز دەم دبێژم: "دهوک بچیک بەلێ گلێش گەلەک"

هەڤال: ب راستی ئەڤە ژی یا درستە تە ل نیڤەکێ دا

٢٨-٥-٢٠٢٠ – دهوک – ئەحمەد عەلی

١٣- سەیدا وشاگرد

چەندە ژیێ تە؟

سەیدا: تو چەندێ دهژمێری؟

شاگرد: دهژمێرم ژ ئێکێ حەتا سەدێ

سەیدا: نە ئەو. تە چەند سال هەنە؟

شاگرد: سال سالێت خودێ نە من چ ژێ نینن

سەیدا: کورێ من مەخسەدا من تو کورێ چەندانی؟

شاگرد: یێ دووانم. دەیک وبابێ من

سەیدا: ئهو من دڤێت بێژمە تە چەندە ژی تە؟

شاگرد: کەس نزانیت هەمی ژیێت مە ب دەستێ خودێ نە

سەیدا: وەی ژتە کورو. تە ئەز شاش وحێبەتی کرم. پا چ بێژم؟

شاگرد: بێژە. چەند ژژیێ تە بوری یە؟

سەیدا: ژنوی من زانی ژی کورتو.

١٤-٨-٢٠٢٠ – دهوک – ئەحمەد عەلی

١٤- باب وکور

یەزیدێ بسطامی شەڤ دبوراند ب عیبادەتی وب کرنا نڤێژان، شەڤەکێ دیت کورێ وی یێ ب رەخ ویڤە، دل پێسوت ژبەر سەرماێ ونەخەڤتنێ، ئو ئەڤ گڤتنە دناڤ بەرا واندا چێبو:

باب: هەرە بنڤە شەڤەکا درێژ یا بەر تە ڤە کورێ من

کور: پا تو بو چی نا نڤی بابو

باب: یا هاتیە گوتن بو من ئەز بو وی رابم

کور: ئەز وێ دزانم بەس ئەو کی بون دگەل پێغەمبەری ب شەڤێ رادبون

باب: هەڤال هوگرێت وی بون

کور: باب ڤێجا من ژی بێ بار نەکە ژ وێ شانازیا دگەل تەبم

باب: کورێ من هێشتا تو یێ بچیکی ونە بالقبوی

کور: باب من دیت دەیکا من ب چکلکێت هویر دانن دبن دارێت مەزن دا ئاگر پێ هەلبیت

باب: جیە مەرام ومەخسەدێت تە ب ڤێ؟

کور: ترسم خودێ روژکا قیامەتێ دەست ب مە بچیکا بکەت بەری مازنا ئەگەر ئەم سەردا بچن

٢٠-٨-٢٠٢٠ – دهوک – ئەحمەد عەلی

15- پەیامنێر ومامێ سلۆ

ئەڤ گڤت وگوت یا چێبوی دناڤ بەرا پەیام هنێرەکی دگەل مامێ بەرێز ئەحمەدێ سلۆی ل نیڤا بازارێ دهوکێ ل سەر رەوشا خەلکی وئەڤ دان وستاندنهاتە بەرهەڤکرن ب رەنگێ پرسیاران وبەرسڤ هاتە دان ب شێوێ گوتنان ژ لایێ مامێ سلوی ڤە..

پەیامنێر: چەوا دبینی رەوشا ڤێ خەلکی؟

مامێ سلۆ: مەتەلا رویڤیێ دەشتێ وزوزانا یە.

پەیامنێر: مەخسەدا تە پێ چیە؟

مامێ سلۆ: دەما کەتیە تەنگاڤیێ چ فەند وفێل نەمان ل بیرێ.

پەیامنێر: مامو وەزعێ گشتێ چەوانە؟

مامێ سلۆ: خەلکی گازندا دکەن وداخازا موچەی دکەن.

پەیامنێر: ئەڤە سویچێ کێ نە؟

مامێ سلۆ: یێ حوکمەتانە وخەلکی نا دەنە شولی یێ دماین ب هیڤیا راتبا ڤە.

پەیامنێر: چیە رەوشا گەنج وجحێلیت مە؟

مامێ سلۆ: روژ نڤستی نە، شەڤ هەلستی نە.

پەیامنێر: ژبەر چێ؟

مامێ سلۆ: نە کەسب ونە کەدە، بەتال وعەتالن.

پەیامنێر: بو شول ناکەن؟

مامێ سلۆ: ما کا شول، یێ کولانا دپیڤن.

پەیامنێر: بو هەمی کارا ناکەن؟

مامێ سلۆ: شتلا چەمیای قەت ناهێتە راست کرن.

پەیامنێر: دێ چەوا درستبن؟

مامێ سلۆ: دگوتن قوتابی سەرێ رمێنە وگەنج یێت پاشە روژێ نە.

پەیامنێر: ما نە وەیە مامێ سلۆ؟

مامێ سلۆ: بەس نوکە هەردو بونە چنە. نڤستی وپالداینە پخێنا خەوێ یە.

پەیامنێر: چارە سەری چیە؟

مامێ سلۆ: دەرفەتا بدەن دا خەلک خۆ ب خۆدان کەن.

پەیامنێر: چەوا دا بزانم؟

مامێ سلۆ: خەلک خۆ وحوکمەتێ خودان دکەن، نە بەر وڤاژی.

پەیامنێر: ئانکو ب چ رەنگ؟

مامێ سلۆ: هاریکاریا وان بێتە کرن چنکی دەستەک بتنێ دەنگی ناکەت.

پەیامنێر: پا ژبەر چ چاندیێ مە پاشکەڤت؟

مامێ سلۆ: چنکی ب هەرچار ملانڤە یێ دهێتە ژور.

پەیامنێر: تالیا مە چێە دگەل ڤی رەوش وحالی؟

مامێ سلۆ: مامو هندی ئەردێ خۆ پاشدا.

پەیامنێر: ئەم چ بکەین؟

مامێ سلۆ: ژبەر بازرگانیا ژدەرڤە دهێت ب ئەرزانی ئەردێ مە ما بەیار.

پەیامنێر: پا تو چەوا دبینی بو ڤێ دان وستاندنێ دگەل حوکمەتا مەرکەزی؟

مامێ سلۆ: یا فاشلە وب چێ ناچیت وهەر یا ژخۆیە.

پەیامنێر: ما ژبەرچێ پێک ناکەن؟

مامێ سلۆ: گەل کێ بکەن، ساحەکا بێ خودانە ژڤێرێ حەتا بەسرا.

پەیامنێر: ژبەر چ تو وەدبێژی ئەگەر چیە؟

مامێ سلۆ: ما کێ ها ژکێ هەیە؟ هەر ئێک تەفشێ بەرێ خۆنە.

پەیامنێر: کا بو مە هێژ رونکە؟

مامێ سلۆ: چنکی بێ خودانی گەلەکا ب زەحمەتە.

پەیامنێر: وەیە راستە پا ئەڤە چەوا وەلێ هات؟

مامێ سلۆ: مامو گوتنەک دبێژیت: بێ خودێ بە، نە بێ خودان بە.

پەیامنێر: ما ئەم پێڤە نەچوین ئەڤە چەند سالا؟

مامێ سلۆ: ئەم چ جارا پێڤە ناچن، بلیرێ هەر بو گوهێ گای بێژە.

پەیامنێر: دویماهی چیە؟

مامێ سلۆ: دێ هەر مینن وەسا نا گەهین چ ئارمانجا تیرا مە هەر  ب کەچی دکەڤیت.

پەیامنێر: وەیە؟

مامێ سلۆ: وێڤە ترە عەشیرەتێت عالەمێ بونە دەولەت. ئەم دێ بینە چ تشت؟

پەیامنێر: پا ئەڤێ چ پێ دڤێت؟

مامێ سلۆ: ئەڤێ ئخلاس پێ دڤێت، زانین پێ دڤێت، دلسوژی پێ دڤێت. قێمەتا ئاخێ پێ دڤێت، ئەڤ ئاخە شەرفا هەر کەسەکی یە، دڤێت سەیتەرە لێ بهێتە کرن وب هێتە پاراستن چنکی ئاخ هەمی تشتە ئەگەر نە! ئەم چنینن وچ نابن ونابینە چ؟ دا ڤێ بکەینە گوهارک وبکەینە گوهێ خۆ.

٢٤-١٢-٢٠٢٠ – دهوک – ئەحمەد عەلی

16- جوهی وکور وچەرمێ گای

 جوهی ل سەر لێڤا رویباری گوهێ کورێ خۆ گرتبوو ودبەرا هندەک شەق لێدان دەما ئێکێ خەلکێ گوندی دوێرێ را دچوو، وی مایێ خۆ تێکر وگوتێ:

گوندی: بو تو وی کوری دقوتی؟

جوهی: مامو تو مایێ خۆ تێ نەکە ونە شولا تە یە.

گوندی: کا بێژە من وی سویچەک کریە تو ڤێ ب سەری وی دهینی.

جوهی: دا چەرمێ گای دبەر ئاڤێدا نە بەردەت.

گوندی: ما بەردایە دا تو ولێ بکەی؟

جوهی: ئەگەر بەردا پشتی هنگێ قوتان یا بێ فایدەیە.

گوندی: ئەرێ دگوتن فلانکەس یێ ئەقل جوهی یە.

جوهی: ئەم مەژیێ خۆ ب کار دهینن بەری تشتەکی بکەین.

گوندێ: ب خودێ راستە ئەقل تانجا زێرینە بەلێ دسەرێ هەمی کەساندا نینە.

جوهی: بلا ئێشانا پێشیێ بیت نەکو یا پاشیێ بیت.

گوندی: ئەم یێ دفێربوین "دراڤێ خۆ ژی بدەین وسەرێ خۆ ژی بدەینە شکاندن".

٢١-١-٢٠٢١ – دهوک- ئەحمەد عەلی 

١٧- کور دگەل بابێ

گڤتن دناڤ بەرا کوری و بابی ل سەر ژنئینانێ.

کور: باب من دڤێت ژنێ بینم.

باب: ل دەستپێکێ بێژە: ل من ببۆرە.

کور: ژبەرچێ؟

باب: بێژە: ل من ببۆرە.

کور: بو؟ من چ کریە؟

باب: بەس بێژە: ل من ببۆرە.

کور: من کارەکێ خراب کریە؟

باب: داخازا لێبۆرینێ بکە.

کور: سەبەب چیە؟

باب: بێژە من ببۆرە.

کور: ب یارمەتیا تە... بەس بێژە من ژبەرچێ ڤێ بێژم؟

باب: دێ هەر دوبارەکەم بێژە ببۆرە.

کور: ئەرێ باب بلا وەکی تە بیت ((ببۆرە)).

باب: نوکە تو دەرچوی  ب سەرکەڤتن ژڤێ راهێنانێ.

کور: چەوا من دڤێت بزانم؟

باب: دەما تو فێربی کا دێ چەوا داخازا لێ بۆرینێ کەی بێ سەدەم... وێ گاڤێ تو یێ بەرهەڤی بو ژنئینانێ کورێ من.

٢٥-١-٢٠٢١ – دهوک – ئەحمەد عەلی

١٨- سولتان وجاریا تێگەهشتی

سولتەکی بهیست کو بهایێ جاریەکێ گەهشتە سەد جاریان لهەمبەرێ وێ ژبەر ڤێ چەندێ حەزکر کا ئەگەرا ڤێ چیە؟

سولتان: بو چی بهایێ تە هندێ گرانە؟

جاری: چنکی ئەز زۆرا تێگەهشتی مە

سولتان: ئەگەر تە بەرسڤێت من دان دێ تە ئازادکەم

جاری: بلا ئەزا ئامەدەمە

سولتان: ئەگەر تە ب درستی چاب نەدا دێ سەرێ تە برم

جاری: وەکی تە گوتی بێژە

سولتان:جانترینکراس،خوشترین بێهن،تامترین خارن،نەرمترین نڤین وباشترین وەلات

جاری: بو من بینن هەسپەکی دگەل چەند کەلوپەلا

سولتان: بو تو وە دبێژی، تو یا پشت راستی ژبەرسڤدانێ

جاری: دێ ڤێ قەسرێ هێلم و ئەزا ئازاد

سولتان: وەسا تو یا زانایێ دێ بێژە

جاری: کراسێ ئێکەمین یێ بەلنگازی بو هەمی وەرزان

سولتان: راستە جانێ

جاری: بێهنا دەیکێ بلا یا پێس ودژینبیت

سولتان: وەیە ووێڤەترە

جاری: ئەو نڤینە دەما تو ل سەر دخەوی ب تەناهی و رەحەتی

سولتان: چ شوین وەکی وی نینن ئەڤە ژی راستە

جاری: تامترین خارن ئەو نانێ حشکە دەما برسی دخوت ب ترسی

سولتان: راستە ودرستە جانا بێ حیلە

جاری: ب خاترا هەوە ئەڤە ئەز چوم

سولتان: تە بەرسڤا پرسا دویماهیێ نەدا  

جاری: باشترین وەلات ئەوە یێ ئازاد بێ کو نەزان حوکمی لێ بکەن

سولتان: هەرە تو یا هەژیێ ئازادبونێیێ

٩-٣-٢٠٢٢ دهوک 

١٩- هەلبژارتنا رەنگان

? Azad: Hi Ashti, how are you today

ازاد: مرحبا اشتی كيف حالك اليوم

ئازاد: سلاڤ ئاشتی تو یێ چاوانی؟

? Ashti: I'm fine, what’s your favorite color

اشتی: أنا بخير ما هو لونك المفضل ؟

ئاشتی: ئەزێ چاکم، باشترین رەنگێ تە کێژکە؟

 Azad: I like the black color

ازاد: يعجبني اللون الأسود.

ئازاد: ئەز حەز رەنگێ رەشدکەم.

Ashti: Oh, that's good Azad

اشتی: هذا جيد يا عمار.

ئاشتی: ئەڤە باشە ئازاد.

 ? Azad: Do you Have a color that you hate

ازاد: هل لديك لون تكرهه؟

ئازاد: تە هەیە رەنگەک تو حەژێ نەکەی.

Ashti: Yes, I hate the pink color

اشتی: نعم أكره اللون الوردي.

ئاشتی: ئەرێ، کەربێت من ژرەنگێ پیڤازی ڤەدبیت،

Azad: me to, another question Ashti

ازاد: انا ايضا سؤال اخر اشتی.

ئازاد: ئەژی، پرسیارەکا دی ئاشتی.

. Ashti: Ok hurry up Azad because I’m late

اشتی: حسناً ، أسرع يا عمار لأنني متأخر.

ئاشتی: بەلێ، لەزێبکە ئازاد ل من درنگە.

? Azad: What's the best color for a house

ازاد: ما هو أفضل لون للمنزل ؟

ئازاد: چ رەنگ قەنجترە بو خانی.

Ashti: for me, I like the yellow color, it is modern

اشتی: بالنسبة لي أنا أحب اللون الأصفر فهو حديث.

ئاشتی: ل نک من، حەزا من یا ل رەنگێ زەر چنکی یێ نوی یە.

? Azad: What about clothing

ازاد: وماذا عن الملابس؟

ئازاد: پا دەربارێ جلکان تو یێ چاوانی؟

. Ashti: I like the white color, it is very elegant

اشتی: يعجبني اللون الأبيض فهو أنيق جدا.

ئاشتی: حەزا من یا ل سەر رەنگێ سپی، زۆرێ رەسەنە.

Azad: Thank you Ashti, have a good day

ازاد: شكرا لك اسماعيل اتمنى لك يوم سعيد

ازاد: سوپاس ئاشتی خوش روژەکێ ببورینی 

١٥-١-٢٠٢٤ ئەحمەد عەلی