Rikin te "Church of God"

Teuaei Herbert Wilbur Armstrong e kakoauaaki ba "koaua" tabeua aika e kaoti nakoira bon baai aika ti aki ongoongoo n taabo n taromauri aika a kakaokoro. Bon angin 'koaua' aikai e bon kaotia ba a taekinaki n te B'aibara - ao aei ana katei ae e kinaaki iai ba nikabane baai (koaua ke kewe) e bon karekea kaekaan titiraki i aoiia rinanon kamatebaian te B'aibara. Irouiia tabeman ao e aranaki aei ba bon te 'kaotioti' nakoina.

Bon kaain te 'Sardi' Church of God nte kaawa ae Oregon, i aon Amerika, ae te aro ae rokoroko i Ierutarem rikina. Ma e nooria ba te Church of God aio e a moanna ni bua ke ni katukii tabeua Ana kantaninga ma Ana babaere te Atua, ike e kaota kaairua aikai nakoiia ao ngke a aki kan rairaki ao e a katea te Church of God teuana ae ea manga kinaaki ba te "Philadelphia" Church of God. 'Philadelphia' bon te ka-6 n kaawa (Kaotioti 3:7) ike iai Ana Ekaretia te Atua iai ao aika a katoaaki ma reeta ake e kaotaki n Te Kaotioti, noora mwakoro 2 ao 3. Bon itiua ana "era" te ekaretia aio ae taekinaki nte Kaotioti 2-3. Itiua ana tai n manga kamaiuaki mangke e moan kamiuaki ke ni kateaki iroun Kristo. Reeta ake n Te Kaotioti 2/3 nakon kaawa ake itiua bon kabarabaraan aron aia onimaki kaain ana ekaretia te Atua n kaawa akanne n taai akekei. Ma uoua nanon taeka akanne ba (1) e bon kaeneti nakoiia ekaretia n aia tai abotoro n te tai anne nte moan tienture, ao (2) e kaeneti naba ma aron maiun Ana Ekaretia te Atua inanon maiuna irouiia Ana Abotoro Iesu , man te moan tienture nikarokoa boong ni kaitira ngkai. 

Te ekaretia n aia tai abotoro e bon maiu n aron maiun te ekaretia n te kawa ae Ebeto (Kaotioti 2:1-) nte tai anne ike e aranaki ba Ekaretia i Ebeto ke "Ephesian Church of God". Ao e totonako te ekaretia aio ao e a manga moan kamaiuaki - onoua te tai - n aron taekana n reeta nakon ekaretia i Timirena (Kaotioti2:8-), i Berekamo (Kaotioti 2:12-), i Tiatera (Kaotioti 2:18-), i Tiariti (Kaotioti 3:1-), i Biriterebia (Kaotioti 3:7-), ao i Raoritia (Kaotioti 3:14-).

Ngke e manga kamaiua Ana Ekaretia te Atua teuae Herbert W. Armstrong ao e katereterea ba aei ngkai ana kaonoua (6) n tai ni manga maiu ike e aranna ba te "Biriterebia" Church of God, man 1931, nte ka-20 n tienture. Ngke e mate Armstrong n 1986, ao e mangao te ekaretia ba e rawata aika a kan onea mwiina. E maenako te ekaretia nakon mwaanga aika a maiti - iai aika a bon teimatoa n taui 'koaua' aika kaoti Armstrong ao iai aika a ti butimaea tabeua ao ni katikui tabeua. Ma iai aika a teimatoa ni kawakini koaua ma kaotioti man te B'aibara aika a tiba kaotaki nakon te aonaaba n boong ni kaitira aio rinanon Armstrong. E toki maiun te Biriterebia Church of God n maten Armstrong. Ao n boong aikai e a moanna n nooraki kanoan te ka-7 n reeta nakon te ekaretia i Raoritia, ba bon te reta naba ae kaeneti nakon Ana Ekaretai te Atua n te ka-21 n teinture aio.