Edición de audio e video
En teoría isto ía ser na primeira avaliación, pero como introducimos a parte de animación en 2D non nos deu tempo, así que vai empezar na segunda.
Que é o que imos facer? pois algo como isto:
Proposta:
Gravarse a un mesmo recitando unha poesía galega (eu escollín "A descoberta", de Manoel Antonio), para despois engadirlle a esta locución unha música, uns efectos de audio e unhas imaxes.
Requisitos:
Duración de entre 35 e 60 segundos.
Mínimo 15 imaxes a 768x576.
Música sen dereitos de autor.
Tres efectos de son.
Programas a empregar:
- Gravación da locución: eu empreguei a gravadora de voz do móbil, pero podedes empregar calquera dispositivo e programa que dea unha calidade un pouco decente.
- Conversión de arquivos: un dos problemas máis frecuentes e latosos é a incompatibilidade de formatos de audio e video, e necesitamos cambialos. Tedes solucións online para a conversión de arquivos, pero tede en conta que a conexión do colexio é extremadamente lenta, tentade facelo na casa.
- Descarga de audio: para escoller a música é necesario que esta teña dereitos libres, un par de opcións para atopar música sen copyright son Jamendo e FMA, escoitar o que anda por aí e baixarnos o que máis nos aquele. É altamente recomendable escoller un fragmento INSTRUMENTAL. Eu escollín "Mystic Cave". Para a descarga de sons complementarios funme a freesound, que require rexistro, mais ten moooooitos sons. Outra opción que usa moita xente é o banco de sons do ite. Tamén podedes gravar os vosos propios sons.
- Edición e montaxe de audio: aquí o Audacity será o programa escollido. Libre, gratuito e moi eficaz.
- Edición de imaxe: xa o coñecedes de outros traballos, o GIMP.
- Edición de audio e video: Empregaremos openshot, este non funciona en Windows, así que teredes que facer todo o traballo de montaxe na clase. Tede en conta que é un programa non profesional e dá fallos, así que GARDADE CONTINUAMENTE os vosos avances.
Podedes descargar o meu proxecto e todo o material empregado (menos os audios orixinais, que pesaban moito).