La gésa dèla Sasèla

La gésa dèla Sasèla

Quànc' cà la Madona l'è 'ndàcia da l'Aziprevet a lamentàs, lûü sübet l'è partit cóma 'n màt a remàa scià sàs, parchè la Maria la gh'à dic' de fàa sü 'na gésa en so ónor, sa'l voleva ca la ghe daves 'na màa a salvàa i pecatóor!

Ma 'l prevòst, ca al gheva la baga gròsa cóma 'na bót, tücc i sàs ca 'l remava, a-i iè 'mpilava gió de sótt. Al pensava: me la fa sü 'n riva a l'Ada, ca le piàa, e me scusa de scavàa la rocia ca l'è 'n gràn trebülàa!

Ma la Madona, ca la voleva miga stàa gió'n d'en foss, de nòc la ghe spostava i sàs sü 'nsom al doss! Quànc' ca stò miracol l'è ignüt a la lüus, la géet fina gió 'n de la tèra la curvava òl müus!

E ognantüu, par fas perdunàa i so pecaac,(parchè a i gieet de 'nbòt hai ne fava tacc), chi portava na galina, chi 'n cunìcc, e iscè la Gésa sa pudüut fala sü al ricc!

Prǜma ià fàc' sü 'n potente mür sènsa molta, con le gràndi arcadi a forma de òlta; pó con la gràn ripiena ià fàc' la piazza: ca a vardass 'ntóren al pareva da vès su 'na terazza!

E sùra 'stò bel pianel, cóma la dic' la Vergine Maria, i püsée bravi mürador, di nòš paes e àanch da via, con gràn bravüra, pazienza e poca spesa, prüma de l'àn mila ieva già finit la Gésa!

Tüc' i Pelegrii che li a-i pasava, sèmpre a di sü 'n pater a-i se fermava: la porta l'era sèmpre verta par dàch sostegn, a l'anima pesanta de chi va e chi vegn!

E quànca la seva sgravada da ogni pecat, la géet la se fermava defò en del sagrat; la se vardava 'ntóren: Albosagia la vedeva: tàat l'era bèl chèl Paes che ogni ateo al credeva!

Albosaggia 21/09/2009 Paolo Piani

La chiesa della Sassella

Quando la Madonna è andata dall'Arciprete a lamentarsi, lui subito è partito come un pazzo a raccogliere sassi, perché la Maria gli ha detto di costruire una chiesa in suo onore, se voleva che gli desse una mano a salvare i suoi peccatori.

Ma il prevosto, che aveva la pancia grossa come una botte, tutti i sassi che raccoglieva li ammucchiava giù di sotto. Pensava: la costruiamo in riva all'Adda, che è in piano, e risparmiamo di scavare nella roccia che è una gran faticaccia.

Ma la Madonna, che non voleva stare in un fosso, di notte gli spostava i sassi su in cima al dosso ! Quando questo miracolo è venuto alla luce, la gente piegava il muso fin giù per terra !

Ognuno, per farsi perdonare i propri peccati (perché anche la gente di una volta ne facevano tanti), portavano chi una gallina, chi un coniglio, e così la chiesa si è potuto farla bene.

Prima hanno costruito un potente muro senza malta, con arcate a forma di volta; poi con una grande ripiena hanno realizzato la piazza: che a guardarsi intorno sembrava di essere su una terrazza!

E sopra questo bel pianello, come ha detto la Vergine Maria, i più bravi muratori , dei nostri paesi e anche da fuori, con grande bravura, pazienza e poca spesa, prima dell'anno mille avevano già finito la Chiesa!

Tutti i Pellegrini che da li passavano, sempre si fermavano a pregare: la porta era sempre aperta per dare sostegno a l'anima pesante di chi va e di chi viene!

E quando si era purificata da ogni peccato, la gente si fermava di fuori sul sagrato; si guardava intorno: vedeva Albosaggia; tanto era bello quel paese che ogni ateo si convertiva.