Lectura e familias 23-24
Durante o presente curso escolar, continuamos no programa de bibliotecas escolares “Lectura e familias”.
Somos Comunidade, e este é un dos aspectos dos que nos sentimos máis satisfeitos nesta escola. A presenza constante das familias nas actividades escolares está sendo marabillosa. Destacamos as seguintes actividades:
Obradoiros no atelier e Comunidades de aprendizaxe
Diferentes familias asisten de forma sistemática e acordada co profesorado titor da escola, a impartir obradoiros de artesanía no novo atelier da escola: calceta, ganchillo, costura, cerámica, scrapbooks, reutilización de tea vaqueira, etc.
Tamén en relación co PDI de artesanía houbo familias que acudiron á escola a colaborar no desenvolvemento dos proxectos que se estaban levando a cabo na aula.
A colaboración das familias como comunidades de aprendizaxe está a desempeñar un papel crucial no desenvolvemento dos proxectos de artesanía. As familias participan activamente, achegando os seus coñecementos e habilidades en diversas técnicas artesanais, como a costura, a calceta, os traballos en barro. Esta participación non só enriquece os proxectos, senón que tamén fortalece os lazos comunitarios e fomenta un ambiente de aprendizaxe colaborativa. Grazas a esta sinerxia entre escola e familias, os estudantes benefícianse dunha experiencia educativa máis completa e enriquecedora.
Obradoiros de artesanía no atelier e colaboracións puntuais nos proxectos
Telleiras de Meaño
Visita guiada a unha antiga telleira de Dena, onde o dono abriu as instalacións e unha nai foi explicando e facendo preguntas durante o recorrido. No contexto houbo investigacións e elaboración de lapbooks. No atelier, esta mesma nai guiou e acompañou o proceso de realizar unha tella decorativa por neno/a.
Queremos festa 2
Un grupo de familias, de forma voluntaria, organizou na escola a segunda edición dunha festa para a comunidade educativa que levou por título "Queremos festa 2". A través da venda de rifas, camisetas e venda no propio día de comida e augas, patrocinan a súa propia celebración.
Durante este curso, a festa tivo lugar o domingo 12 de maio desde as 11 ata as 19:30 coas seguintes actividades:
Andaina musical: unha ruta circular dende a escola ata o banco do amor, acompañada de pequenas intervencións musicais en diferentes puntos.
Romería e xantar popular. Preparación de mesas e sillas (cedidas polo Concello) na escola para xantar en comunidade. Este xantar foi acompañado de diferentes actuacións musicais (a maioría de exalumnos e familias membros da Banda Unión Musical de Meaño) .
Contacontos no novo auditorio natural da charca, a cargo de Olalla González e Marc Taeger (con ilustracións realizadas no momento).
Sesión DJ.
Obradoiro de coiro. Día do libro.
En relación co PDI de artesanía, o martes 23 de abril, invitamos a toda a comunidade educativa na biblioteca para realizar un obradoiro de coiro. Nel, ademais de aprender sobre as diferentes técnicas, realizamos un marcapáxinas en coiro.
Cantigas de peto
Unha nai e un pai da escola, músicos profesionais, ofrecéronse voluntariamente a preparar cada venres á última hora a cantiga do mes. Ensináronlles ás demais familias a tocar diversos instrumentos de percusión e a cantar. En colaboración co mestre de música, que tamén prepara as cantigas co alumnado da escola, o último venres de cada mes reunímonos en comunidade para cantar. Todas as cantigas son populares de Galicia, e grazas á recopilación dos últimos anos, xa contamos cun bo cantigueiro.