Acios e vides

Club de lectura interxeracional: un fío que nos une a través das palabras e das emocións

O noso club de lectura interxeracional consolidouse este curso como unha das experiencias máis entrañables e emotivas desenvolvidas no centro. Tras o seu inicio o ano pasado, este curso 2024-2025 celebrouse con periodicidade no Centro de Día de Meaño, converténdose nun espazo de encontro único entre xeracións.

Cada sesión xirou arredor de lecturas vinculadas ao Proxecto Documental de Centro deste ano, Cruzamos? (a América). Deste xeito, foron moito máis ca encontros literarios: foron viaxes compartidas cheas de memoria, cultura, historias de ida e volta e emocións comúns.

Limos poesía, narrativa, non ficción… sempre cun enfoque que favorecese o diálogo entre maiores e cativos. Ademais, realizamos pequenas manualidades relacionadas coas lecturas e mesmo gozamos da gastronomía como elo de unión: sobremesas típicas de diferentes culturas e épocas fixeron das sesións unha festa para os sentidos.

Queremos destacar especialmente a marabillosa implicación e disposición do persoal do Centro de Día de Meaño, así como a colaboración comprometida de varias familias do colexio, que participaron activamente no deseño, na planificación e no acompañamento das sesións. Grazas a todas e todos por facer realidade este soño lector e humano.

Sobre o libro "Poemar o mar" de Antonio García Teijeiro

Ao longo do curso, o Club de Lectura Interxeracional “Acios e Vides” do CEIP As Covas-Meaño continuou coa súa andaina, nesta ocasión mudando de localización: as xuntanzas pasaron a celebrarse no Centro de Día do Concello de Meaño, un espazo que nos permitiu ampliar a participación e fortalecer os lazos coa veciñanza máis maior.

Unha das lecturas compartidas foi Poemar o mar, de Antonio García Teijeiro. A través dos seus versos mergullámonos en paisaxes mariñas e imaxes salgadas, e compartimos lecturas, emocións e reflexións arredor do océano. Este encontro enriqueciuse coa participación de Enrique e Rebustiano, dous mariñeiros do pobo que nos contaron as súas experiencias no mar, traendo á conversa unha sabedoría viva e entrañable.

Non faltaron tampouco os momentos creativos nin os doces: elaboramos pequenas manualidades inspiradas no mundo mariñeiro e compartimos rosca, larpeira e chocolate quentiño. Máis alá da lectura, este club segue a ser un espazo de encontro interxeracional, no que libro a libro, imos tecendo afectos e aprendizaxes compartidas.

Sobre o libro "Rosaura e o mar" de Isabel Blanco

Mergullámonos na poesía mariñeira da man do libro Rosaura e o mar. Os seus versos, adicados a distintos oficios do mar, serviron de punto de partida para compartir lembranzas, coñecementos e emocións arredor da vida mariñeira.

Limos poemas, falamos de oficios tradicionais vencellados ao mar e reflexionamos sobre como están a mudar co paso do tempo. Tivemos tamén a sorte de montar unha pequena exposición de aparellos de pesca que nos permitiu ver de preto útiles tradicionais, e mesmo aprender a facer nós mariñeiros, da man da sabedoría das persoas maiores.

Observamos peixes e outros animais mariños, escoitamos historias reais e descubrimos a forza do mar como fonte de vida, traballo e inspiración. Ademais, como parte do traballo previo na escola, o alumnado elaborou un audiolibro con estes poemas, poñendo voz, emoción e sensibilidade a cada verso, nun proxecto creativo que puxo en valor a oralidade e a expresión artística. Unha xornada para lembrar, chea de aprendizaxes compartidas e poesía con cheiro a salitre.