سەرەکی
Embedded Files
گوتنێت کوردی
ئاخڤتنەکا پێدڤی دراستا گوتنێت کوردیدا
"گوتنێت مەزنا نەخشێت ل بەرینە"
"یێ گوهی نەدەتە ئاخڤتنێت مەزنا دێ لێ هێن شاخێت بزنا"
گوتنێت کوردی دەریایەکا فرەهو کویرە چ غەواص ومەلەڤان نەشیاینە وان در ومراریێت وێ بدرستی بینە دەر، چنکی زورا ڤەدایە یا پرە کەس بتنێ نکاریت ب ڤی کارێ هو یێ بەلاڤ دناڤ تورێ مە یێ زەنگین ودەولەمەند پێ رابیت. پەیڤێت ڤان گوتنان وەک گیایێ مێرگ وچیمەنانە ژ هەمی رەنگا تێدانە، بێژەیێت وێ وەک تزبیێت مەلانە پێگڤە گرێداینە ژهەمی رەنگ وجورانە، تریێ ناڤ رەزانە وفێقیێ چەمانە، مەژیێ باب وباپیرانە، شلخا مێشێ یە هنگڤینێ خومالە، فەرهەنگا زمانێ کوردانە یا دارژتی ونڤێسی یە ل سەر سێنگێ ژن ومێرانە، رەوشتە بو هەمیانە، زانینە بو خر زمانزانانە، پێخارنا برسی وتێرانە، سەر بلندییە بو سوحبەتکەری ل گوڤەند ودیوانانە. کەس نەشێت خو ژێ دویرکەت، یا ب مە ڤە نیسیایە، ب دەڤی ڤە ڤەنستی یە ب ئەزمانی ڤە ڤەبستی یە، ب تەشیێ هاتیە رێسان وەکی تەڤنی هاتیە راچاندن، گولاڤە ب هەمی رەنگان هاتیە نەخشاندن، مەلحەمی سەر برینانە، تومکە بو هەمی چیچکانە، بێدەرا سەیدانە، وەرزەشێ لاوانە، دەڤە بو بێ لێڤانە، یێ خو نقوکەتێ ژێ دەرناکەڤێت ب چ رەنگانە، دێ تێدا مینیت بێ هش وصەودا وەک شێت ودینانە. گوتنێت کوردی کادینا کایێ یە، بێدەرا گەنمی یە، وەرزی دەخلی یە یا پر گدیشە، قەبقەبا کەوی یە ل سەرێ گرانە، ل خرا خوری یە، قەب خازە ژ خرا یێ پشت راستە ، یێ بشێت وان گوتنا ب جەمینیت، بەر ئێک ڤە بینیت، هەر ئێک ژ لایێ خو ڤە لسەر بنڤێسیت، چنکی هەر سەرەک ئاقلەکە ، ئو دەستەک بتنێ دەنگی ناکەت، ئو بێدەر هەر خەما بایە دڤێت ئەوێت زانا بسپور دڤێ کاریدا خو بەر هەڤکەن هەر ئێک ژبەرێ خو ڤە دا ئەڤ تورێ هو یێ گرنگ وبها بێتە بەر چاڤ کرن بشێوەکێ راست ودرست وزانستی.
خویندەڤانێ هێژا ئەز یێ ب ڤی کاری رابویم ژ سالێت هەفتێدا حەتا نوکە ئەز یێ بەر دەوامم دڤێ کاریدا، بێ گومان ئەز دشێم بێژم من زورێت لێکداین ژ دەیکا خو ب تایبەت ئو ب گشتی ژ هەمی لایێت دی ڤە. ئو ژ بەر زور ئەگەرا ئەز نەشیایمە بدەمە بەر چاپێ، ئو من نە ئینیەت ئەز وەبکەم، بەلێ ئەزێ شیایم زوربەی ڤان گوتن وبێژا بەلاڤ کەم وسەر نڤێسای دوان لاپەرێت گوگلیدا پێجێت ومالپەرێت من یێت تایبەت کو هژمارا وان دگەهنە دەهان، زور بەی وان گوتنا منێت بەراوردکرین ب سێ زمانا سەرەکی، عەرەبی وئنگلیزی وسریانی ئو ئەڤێ نەهێ منێ ب ناڤکری ب " گوتنێت کوردی". هندی ئەز ب شێم دێ خو تەرخانکەم وبەرهەڤکەم بو خزمەتا گوتنێت کوردی ژ هەمی لایاڤە یێ کو ئەز بکارم بکەم ئو وان ب دەمە بەر چاڤێت هەوە دا سود مفا ژێ ب هێتە وەرگرتن.
١٣- ١- ٢٠١٧ ئەینی- ئەحمەد عەلی حەسەن- دهوک
ئەز کیمە
سلاڤ ورێز بوهەمی مێڤانێت هێژا
ئەز ئەحمەد عەلی دوسکی مە، بونا من ل سالا ( ١٩٥٠ ) یە
ل گوندێ بەرێ بهار ئەز یێ هاتیم سەر دونیایێ
پشتی دو سالا ئەم هات بوین دهوکێ
ئەم ئاکنجی بوین ل تاخێ فەلا ل دەست پێکێ
من ٣ سالا ژ خاندنا خو بوراندن ل قوتابخانا ( مدرسا الطاهرە ) یا فەلا
من بنارەت ب دوماهیک ئینا ل مەدرەسا ( ئولا ) و ( اخوە ) هەر ٦ سالا ئەز دەرچویێ ئێکێ بوم
خاندنا ئامەدەیێ من ل ( سەنەویا دهوکێ ) نوکە دبێژنێ : کاوە، دەربازکر ل سالا ١٩٦٨/١٩٦٧
ل سالا ١٩٦٨ ئەز ب خێزانڤە چوین باژێرێ میسلێ هەتا سالا ٢٠١٤ پشتی شکەستنا میسلێ ئەم ڤەگەریان بو دهوکێ
ئەز دەر چویێ زانکویا میسلێ مە / کولیژا آداب / بەشێ ئنگلیزیێ سالا ١٩٧٢
من گەلەک تشتێت ژ تور وکەلتورێ کوردی جەماندی ژ دەیکا خو رەحما خودێ ل سەربن ئو ژگەلەکێت دی.
من دەست ب ڤەهاندنا هوزان وهەلبەستا کربو ل سالا ١٩٧٠دگەک بەیانا ئادارێ و هەتا نوکە
هندەک بابەت د گەل هوزانێت من یێت بەلاڤ بوین ل ئێزگا کوردی ل هندەک روژناما وەک هاوکاری
هەلبەست وهوزانێت من کەڤن ونوی من نەداینە بەر چاپێ ژبەر گەلەک ئەگەران حەتا نوکە ، بەس ل هندەک بەلاڤوکێت کەڤن ئو نوکە دناڤ پێجێت خو یێت تایبەت ئو ئەڤ وبسایتە ئانکو مالبەر یێ نەهێ ب ناڤێ ( گوتنێت کوردی ) من هەمی یێت تەرخانکرن بو تورو زمانێ کوردی.
٤٠ سال من بوراندن د فێرکرنا قوتابییا ل باژێرێ میسلێ
( ٣ ل قەیارە ، ٦ سال ضواحی ، ٣٠ سال ل ئامەدەیا کندی )
نوکە ئەز خانەشینم ، ئاکنجیێ تاخێ مالتا ئیسلامم ، ل دهوک
من یێ خو بەرهەڤکری بو خزمەتا تور وکەلتورێ کوردی ب گشتی
سەیدا خانەنشین:ئەحمەد عەلی حەسەن
Links to my other websites
Page updated
Google Sites
Report abuse