گوتن ورامان

گوتن ورامان  

ئەڤە کۆمەکا گوتن وبێژانە من یێت جەماندن ژکەلەک لایانڤە وجان وبەندکرین وبەرهەڤکرین، راست ودرستکرین ژلایێ رێنۆسێ ڤە ودارێشتنێ ڤە، کێم وکاسیان ڤە، واتە وراماناڤە، هیڤیدارم جهێ سۆد بیت ل نک خویندەڤانی هێژا. زۆربەی ڤان گوتن وبێژان من یێت بەلاڤکرین دمالپەڕێ گوتنێت کوردیدا دبن هندەک بابەتێت دی ب درێژی . 

https://sites.google.com/site/gotnetkurdi/home

گوتن وبێژێت کوردی

ئاخا وی کەڤتە هێرە: ل ڤێرێ مر

ئاخڤتن سارە: گۆتن بێ مفانە: گوتن لەوچەیە

ئاخڤتن لێ زرکر: نە هێلە باخڤیت، ئاخڤتن لێ بری

ئاسن ڕەقە : یێ نە گوهدارە ونا هێتە سەر چ ڕێکا

ئاسنی ب ساری د چەمینیت یان بادەت: یێ ب شیان وپڕ هێزە

ئاسنی ب ساری را دقوتیت: خودان هێز وشیانە

ئاش دڕاوەستیت ئەو نا ڕاوەستیت: یێ شەپرزەیە ومژیلە

ئاشی دئالیسیت: مڕوڤەکێ قەلس وچوڕکە وهەرێ برسی یە ودەڤ زۆها

ئاڤ ب ده‌ڤیدا نه‌كر: د گاڤێدا کەت ومر

ئاڤ تێ ئینا: شۆلێ خو گەلەک تازە ولاوکر

ئاڤ د ڕاوەستیت ئەو ناڕاوەستیت: گەلەکێ مژویل و شەپرزەیە

ئاڤ ل دیف مەڕا یان بێرکا وی چۆ: شۆل ب دەست ڤەهات وەکی وی ڤیای 

ئاڤا دسەلکێ یە: چ مفا وبها قەت تێدا نینە

ئاڤێ برم، ژتێهنا مرم: یێ دناڤ خێروخێراتا دا وچ ژێ ناگەهتێ ویێ بێ بەهرە

ئاڤەکێ ب ڤی ئاگری داکەن: ب دویماهیک بینن وبنبرکەن

ئاگر ب مە ڤەنا: نا تەبتیت قەت ناحەویێت، ماڵێ خڕێ چ خوشی پێ نینە 

ئاگر بەردا ماڵێ: کەسێ چ خوشی پێ نینە

ئاگر ژناڤ چاڤا دچیت: یێ ب کەرب وکینە وزۆرێ عێجزە

ئاگرهەلکر: شەرهەل ئێخست ونوی کرە ڤە

ئاگری خوش دکەت: فەساد وفتنەچی وشەرهەلێخە

ئاگرێ سۆرە: یێ هارو ونە حەجمتی یە

ئاگرێ ل بن پیا: یێ شەپرزەیە ومژیلە  وقەت راوستیان بو نینە 

ئاگرێ ل هەڕیێ یە: گەلەکێ زیرەک و زیخە

ئاگرێ وی ڤەمری: ماڵ میرات بو، کەس بو نەما

ئاهێ خودێ دای دمال دا نەمایە: مال میشتبو

ئه‌ڤه‌ لێلێكن، هێشتا لۆلۆك یێت ماین: یێت پتر یێ دماین ئەڤە یا ب دویماهیكە

ئێخستە کراسێ شەرمێ : ل شەرمێدا وپێڤەکر دا کو ڕازی ببیت

ئێشا مریشکا هاتێ: هەمی پێگڤە نەخوشبون وکەڤتن ومرن

ئێکێ کریە دتڕاشێڕا: یا خو ل هێڤیا ئێکی گرتی وکەس پێ نەحەساندیە

ئەزخو ژێ دکرم: خۆ ژبەڵاوی دویردئێخم

ئەڤ پەڕە یێ دکوریا ویڕا مای: چ نەمایە ژبلی تشتەکی کێم یێ بتنێ

ئەڤ تبلا هەی: بەس ئەڤ کوڕە یێ هەی یان ئێکانەیە

ئەڤە پێش وێڤە دەهواتە: نەخوشیێت مەزنترب سەری هاتینە وهێشتا دێ هێن

ئەڤە چ ئاشە دگێریت: ئەڤە چ سوحبەتە دکەت ودڤەگێریت

ئەم بخۆ دکەچەلین: خەلک خشا ژمەدبەت ول دەف وان ئەم دعەیبدارین

ئەم کەڤلکرین: ئەم رویتکرین وهاتینە داقۆتاین

ئەم مێتین: ئەم ڕیتکرین وچ بومە نەهێلا، بەندەوارکرین: بێ حال ماین

ئەو ژی فێری تڕێت بن کەفشا بو: مڕوڤێ  جامێر دەما خو فێری سەخت وفێلا دکەت

ئەو وارە بەلێ نە ئەو بهارە: ئەوجهێ کەڤنە  بەس نە ئەو خوشتڤی نە

ب تومتومکا وی دادا: بەحسێ وی دکەن ب خرابی

ب چاڤێت زل، سەح دکەتە برینێت کول: یێ بێ هێزە یێ لاوازە  وچ ژێ ناهێت

ب سەد ئەزمانا دئاخڤیت: کەسەکێ شاڕەزایە دئاخڤتنێدا ویێ لەبلەبانە

ب سەر وپێڤە چوتێدا: جلگێت وی گەلەک دفرەهن: توشێ ئاریشێ بو

ب گیایێ بهارێ ڤە ناڕیت: گەلەکێ تەنگاڤە ویێ ل بەر مرنێ دبیت نا گەهتە بهاڕێ

ب لاوینیێ ژنێ بینە، دا کور ب تەرا ب گەهینە: بو کارێ بەر وەخت

ب وان سەر ودلا هاتە ڤە: ئەو شولە پێچ بوی یان چێ نە بو ، ما وەکی خۆ

بارێ وی سماقە: یێ بکەرب وڕک وعێجز وعەسەبیە

بای بر وبارانێ شویشت: تشتێ بچیت، بێ سەر وشوین بیت وکەس چ ژێ نەزانیت

ببی زێر تە نا کەمە دبەریکا خودا: تە چەند بهایێ خوهەبیت ئەز هەر حەژ تەناکەم

برایێ کوندیە: یێ بێ ئیفلەحە: ژخرابیێ زێدەتر پێڤە ناهێت

بزنا کلک ریتە: چ دماڵ دا نینە: یێ بەلنگازە، یێ هەژارە

بگرە وبکێشە: دان وستاندن: چویتن وڤەجویتن

بلا ب چیتە ئێکئاڤێ: بچیت ونە زڤریتەڤە ژوەغەری

بلا ئەڤە دناڤ دو نانادا بیت: ئەڤ تۆڵە بو وی نامینیت دێ ژدفنێ ئینن دەر

بلند فڕی بەلێ نزم کەت: مەزن چویێ بەس چ تشتەک ب دەست نە کەڤت

بن هێلینکە: یێ دیماهیکێ یە: ژوی پێڤەتر نینە

بو به‌نیشت وپیڤە ما: بەلا خۆ ژێ ڤە نەکر

بو بەنیشتێ دەڤێ خەلکی: هەمی کەس یێ پێ دئاخڤن

بو زڕنا ددەستادا: دلەپادا ڕونبو، نزانیت دێ چلێکەت وچەوا چارە سەرکەت

بو ڤی گوهی بێژە ژیێ دی دەردکەڤیت: هندی توبێژی یا بێ مفایە و چ تێ ناگەهیت

بو کول وما ددلیدا:  ئەوا وی ڤیا وحەزکری نەگەهشتێ

بو مرارێ پڵنگی: دەما کارەک یان تشتەک گەلەک ڤەما، تام تێ نا مینیت

بو نفشتیا مەڵای: پشتی چاکیێ  خڕابی ژێ چێبیت 

بوجەندەک: مر وگیانێ خو ژدەستدا: هاتە کوشتن

بوخشخشا تڕاشێ: ئەو سوحبەتا هاتیە گوتن دەرکەڤت دڕەو وچ ژبونە

بوقاچکێ دەڤێ خەلکی: هەمی کەس یێ پێ دئاخڤن

بوکوڕێ گوندا: چ مال وحال بو وی نەما، هەژار وبەلنگازبۆ

بێ خوێ کر یان بێ تام کر: بێ مەعنا کر

بێ نان وخوێ یە: بێ وژدانە و چ ل پێش چاڤێت خو نا بینیت، قەنجی ل بیرێ نینە

بیستا ل مە کەتی: بەس تۆڵا خو ژمە ڤەدکەت: بەس دشێتە مە

بێهنا وی هاتە سەرێ دفنێ: زێدەتر نەشێت ئارام وسەبرێ ب کێشیت

بەربو ناڤ جاڤێت مە: شەرێ مەکر: خۆ ل مەدا

بەرچێلا من بەردە: بەلا خۆ ژمن ڤەکە

بەرخێ بەر چێلێ یە: یێ زێدە قەلەوبیت  

بەرکوچک دگەرمن: یێ ل دیوانێ مەدحێت خو بکەت ومەزن باخڤیت

بەرێ پشت ماڵانە: پشتا خۆ یا دایێ

بەرێ پێ خۆ دیت: شاڕەزابو وڕێکا خۆ زانی کا دێ چ کەت وناکەت

بەرێ خودێ ل تە بیت: چاڤێ خودێ ل تە بیت: خودێ تە ب پارێزیت دا چاڤین نەبی

بەرێ وی هەرێ دبن کەفشی ڤە: نابیتە دوست وهەڤال، ونەیێ باوەریێ یە

بەرئاش ب موییاڤە گرێدان وئینان هنداڤ سەرێ مە: ئەم بەر تەنگاڤ کرن

بەریکا گەرمە: یێ گژگژی وپارە یێ دهەین ب مشەیێ

بەرەک ل پێ یان چوکێ خودا: دەما ئێک دەلیڤەکا زێڕین وگونجای ژدەست دەت 

بەژنا مەلکویێ عەجەمە: بەژنەکا زراڤ وبلند وژێهاتی یا هەی

بەس گوی تێکڤەدە: بو شۆلەکا پیس وکڕێت دا ب هێتە ڤەشارتن وبنبربیت

بەفرا ناڤ تاویایە: بو وی کەسێ نەرم وحەلیم و گوهدار وبێ زەرەر

بەفرا ئێک شەڤی یە: یا جوان نازک ووقەشەنگ وژێهاتی یە 

پاتێ قیری وما ب دەلنگێت مە ڤە: ژمەڤە نابیت، ژێ خلاس نابن

پاش پەحنی ل هێرڤە بن: بچیت ونەزڤریتە ڤە

پشتا وی یا ل کەڤری: ئێکێ ب هێز هاریکار ووێرەک یێ ل پشت وی 

پشتیێ کناڕیا یە ب پشتا من ڤە : من نەڤێت یێ گرانە ل بەرمن

پفکەنێ دێ بابەت: سڤكە وەک بای: یێ زەعیفە وگۆشت پێڤە نینە

پڵنگێ لاتێ یە: گەلەکێ زیرەک وچەلەنگ و ویرەکە

پلی پتکانێ ب خۆ ب پارا دکەت: یێ زەنگینە و بێ مننەت پاڕا دمەزێخیت

پێت مە یێت کرینە دزکێ مەدا: هاتن وچون ولڤین یا ل مە حەرامکری

پێرێ بیرناهێنە بیرێ: باشی وقەنجی ناهێنە بەرچاڤان

پێشێ کۆرتانی یە: دەمێ ئێک شۆل نەکەت وژپارێت دانای بخۆت

پیڤازێ ب دەڤێ من نەخو: کارەکی نەکە و بو من ب هێتە حسێبکڕن

پەڕ پێڤەکرن: زۆر بەرز وبلندکر: فراندە بەر ئەسمانی

پەرێ وەکی بەرێ: پاشڤە زڤریڤە وەکی هەر جار

تبلا بڕی خێ ناکەت : چکارا ناکەت

تڕانە، دبنە مژانە: حەنەک دبنە شەر

تڕێت وی نا چنە چ گەلیا: گەلەکێ بو خۆ ددانیت، خو گەلەک مەزن دکەت

تڤەنگ لێ بو گوپاڵ: فیشەک ل بەر نەمان وما ب دەستان

تۆ ببی هنگڤینێ گارەی تە تام ناکەم: حەژ تە ناکەم

تۆ ببیە گۆلا موحمەدی تە بێهن ناکەم: من تو نەڤی، ل بەر منێ گرانی

تۆپز کەنداڵە: ئاخڤتنا وی نە یا بنە جهە وڕێک وپێکە

تەپەسەرە: بن دەستە، یێ مەلیلە، هەرێ قوتایە

تەنگێت خو سست کرن: دەست ژخەبات وبزاڤێ بەردا

تەنگێت خو شداندن: دەست هاڤێتە خەبات  خۆ ب هێز ئێخست

تەنیا سێلێ یە: یێ کرێتە، روی رەشە

جلە کەڤتە ملە: مە بڤێت ونە ڤێت دێ شول وهەوجەیا وی قەتینن

جهۆڕەکێ ژێ کێمە: یێ بێ عاقل و نەزانە

جهێ پێ خو دیت: دەلیڤە ودەرفەتا خودیت

جهێ پێلاڤا جهێ ویە: یێ بێ بهایە وبێ قیمەتە

جەرکێ خو ل بەر دەرێ مە شکاند: مە های ژچ نەبو ئەم گونەهبارکرن

چ بکەنە کارێ، ئەو دهێتە خارێ: چ گوهورین نینە

چاڤبرسی تێر دبن، بەلێ مالبرسی تێر نابن

چاڤێت تە دڕۆن: ئەڤ خوشی لەزەت  ل تە پیروزبیت

چاڤێت خو لێ نە ڤەکرن: کەیفا خو پێ نەئینا

چاڤێت وی هاتنە دەرێ: گەلەک پێڤە وەستیا ویێ ب سانەهی نەبۆ کری

چام و چریس‌ ب سه‌رێ مه‌ ئینان: ئەم ئێخستن دادەکی

چامێت ڕەش ئینانە سەری: بێ سەر وبەرکر، گیرە ب سەری ئینان

چڕایێ وی گەشبۆ: خودێ کوڕەک دایێ ونەما ماڵ میرات

چو عەردێ چێل لێ سەقەتکری: زڤری سەر سوحبەتا کەڤن

چێل مر ودەو بریا: ڤێکەڤتن نەمان پشتی مرنێ

خو کرە خولیا بەر کوچکێت بەڵاڤیا: چ بها و چ روی و چ سیانەت بو خو نەهێلان

خودان خەبەرە: خودان سوز وپەیمانە

خونە دێ بەرەک ژکەعبێ کەڤیت: چ تشتێ مەزن چێ نابیت

خویێ دخۆت وئاڤێ ب سەردا ناکەت: گەلەکێ عێجز وکەرب گرتیە

خۆ بەردا عەردی: دەست داهێلان وخۆ رادەستکر، یا کێم ژبەردانە

خۆ نە بادە: چ سەختا وفێلبازیا  ل مە نەکە

خۆ ئاڤ ب دەڤیدا نەکر: دەملدەست کەت وئێک سەر مر  

خەمێت خو برنە ناڤ ئاخێ : بێ مراز مر وچو

خەیالا پشێ ژی هەر ژژە: ئەو کەسێ تەڤشیێ بەرێ خوبیت

دبن هنگلێت خۆ یێ چوی: یێ پندڤی وعنری

دبێژی عویجە: مروڤە کێ کولافی یە  وزۆرێ خوڕەیە  

دبێژی کا یا دسەریدا: یێ بێ مەژی ونەزانە ، چ تێ نا گەهیت

دژمنێ سەری خویە: دخەما خو نینە، خرابیێ دهینتە بەرێ خۆ

دکیرێڕا زڕاڤە بلا دوێڕێڕا ب بقەتیێت: چ لێ دهێت  بلا وەلێ بهێت قەت نە خەمە

دلێ وی ژقالبێ وی مەزنترە: یێ وێرەکە وچەلەنگ ونەترس وب جەرگە

دنیا ل بەر من کرە بەندکێ می: بەر تەنگاڤ کر

دنیا لێ کرە زوتکا گۆرگی: بێ هیڤی کر

دنیا لێ کرە قەلپیچکا کەزانێ:  رێ لێ بەرزەکرن

ده‌وارێ باش، ئالیكا خۆ زێده‌ دكه‌ت: شول راستە ویێ بێ دەخەسە

دهێت سوتن بەلێ نا هێت گوتن: نهینیێ دەر ناکەت

دو چویچك ب بەرەكی كوشتن: ب دەست ڤە هات ب درستی

دوھنی ژکێچێ چێدکەت: مروڤەكێ مال كەرە

دێ باڵاڤا وی کەت: دێ چاما ئینتە سەری

دێ به‌ڕکا ته‌ داقوتم: چ نا مینیت نە بێژم

دێ بێژی حەلانە: یێ کەڕە  وگوهـ ل مڕوڤی نابیت

دێ بێژی رساسێ دسەریدا: حشک وبێ مەژی یە

دێ دەڤێ خۆ ڤەکەم: دێ هەمی تشتا بێژم وکەمە سەر بەڕکێ

دێ سەڕ وی شوت: دێ قوتیت وچ تێرا ناهێلیت

دێ هۆڵانێ پێکەت: دێ لاو قوتیت ونەرمژینیت

دێ وەرە فی کەری بدە ڤێ ڕێ یان ڤی کەڤری: یێ نە زانە و چ تێ ناگەهیت

دێ وەرە ڤی کەری بدە ڤێ پرێ: گەلەکا ب ئیزایە لێ بچیت

دێهلا ل بایێ، سە دهێت ژبەغدایێ: ژنا دەهمەن پیس بیت زەلام  قەست دکەنێ

دەست دزانیت کیرێ دخوریێت: کەس وەکی خودانی ب شولێ خۆ نزانیت

دەستێ خوژێ کێشا: مایێ خۆ ژوێ کاری بڕی

دەستێ خۆ یێ ب کولاڤێ خۆڤە نای: خۆ ژبەڵا دکریت ودپارێزیت

دەڤێ خو دبای دوەرینیت: یێ هەژارە  وچ دبەریکێ دا نینە

رابۆ سەر ئێک ودووا خۆ: پاشڤە زڤریڤە وەکی بەرێ

ڕحا وی کرە کولندی: چ ڕێک ل بەرنەهێلان وپێنگاڤ ل بەر قوتکرن

رویتە، یێ خەبەر پویتە: بێ نرخ وبهایە

ڕیتە ب تەشکێت خۆڤە: چ ژێ چێ نەکر، شکەستن ئینا

زراڤێ درێسیت: مەتحا دکەت: دفیرینیت: گەلەکێ بو خۆ دانیت 

زڕچە پۆز هاتێ: عنری وخنزری ژئاقارێ خۆ دەرکەڤت

زینێ ل چێلێ کری: ژێ نەهاتنا ئەوان جلکێت ل بەر وی 

زەگزەگە: بو وی زەڵامیێ درێژ وب هێز

ژ سەر تاقا پشتی نا ڕابیت: خۆ شۆلەکی ناکەت بەتال وعەتال.

ژبنێ گوهی یە: ژمەجبوری، چ ژێ نەهاتنە

ژنەکا سیقلبۆقە: ئاگر ژێ دچیت، یا بێ دەلنگە

سەر وی گوهی نەنڤە: ئەوا تو ل هێڤیێ نا چێ بیت

سەرێ ژۆریە: گەلەک لاو و باشترە ژهەمیان

سەرێت ڕێکا لێ گرتن: چ دەلیڤە بو نە هێلان

شەربەت ب دەڤیدا نەکر: ئێکسەر کەڤت ومر

شەقشەقا ددانایە: ژبەر سەرمایێ یان تایێ یان ترسێ

قۆرچیا ل زکێ خۆ ددەت : گەلەکێ برسی یە

قۆنا وی هاتەڤە یان دڕیا : گەلەک پێڤە وەستیا

كولندێ دەرنە ڤەکریە: چ نهێنیا نا بێژیت

کابێ وی سۆت: دکاڕێ خودا نە یێ سەر کەڤتی یە

کرە هەڤیر:  نەرمژاند، راستە عەردی کر، تێر لێدان

کرە ئاڤ: ب درستی ئەو کارکر

کورسیکا وی یێ دهەژیێت: چ نەمایە دێ کەڤیت و ب دیماهی هێت

کوریا تە نا بڕم : نە ترسە چ ل تە ناکەم

کوریا وی یا ددەستێ مندا: بێ من نە شێت چ بکەت

کولا دلێ حەموی ساڤاره: دڤێت حەزا وی ب جهبیت

کولاڤێ من بچیتە سەری: ئەوا هاتیە سەرێ من ب هێتە سەرێ وی ژی

کون دگوهێت مە کرن: گەلەک دئاخڤیت: ئەم کەڕکرین، ئەم ژگۆها کرین 

کون زڤیرکە: گەلەک دزۆرن ومشەنە  وهار ودژوارن.

کونجرۆکە یان پاتەیە: هەژار وچ نینە کەس چ پیتێ نا دەتێ 

کونجی سمە: دکاراندا یێ بسپۆر وشەهرەزایە

کوندێ لێ دخینیت: کەس ژێ نەمایە ، یێ کاڤلبوی ، بێ خودانە ، خڕێت مرین

کەرا دخەسینیت: نە یێ راوستیای یە و خۆ دچ تشتا نا گریت

کەس نەشێت ستێرا وی درست کت: یێ نە قولەیە: یێ ب زەحمەتە

کەسێ ب ڕتل نەمایە: دەما چەلەنگ وفێرس ومێرخاس وزیرە ک نەمینن

کەڤتە سەر کوڕیا خۆ: بێهنا وی ورەحەت بو وروینشتە خاڕێ

کەلا نیسکێ یە: زویکا عەسەبی بیت وبلەزدهێتە خارێ

کەو ب دارێ وی کەت: بێ زەحمەت بوهات، نە ل دیف هێز وشیانێت وی

گرتن وڤەکێشانە: گەنگەشە: دان وستاندنە

گوتنا مێ ب سەر نێری دکەڤیت: ب نەرمێ شول بەر ئێک ڤە دهێن

گولا پێ ناچنن: ل دەف مە زۆرێ عەزیز ونازدارە

گوی مریشکە: زۆرێ نەخوشە ، وەکی گوی ژمروڤی ڤەنابیت

گیسکێ مالێ بەرێ: هەمی پێ وەردهێن ولێ دخۆرن ولێ خڕدبن ودئێشینن

گەنمێ ئیتالیە: ئەڤ مروڤە بکێر هەمی شولاتێت

ل بهارێ کوشتی، ل پائیزی شویشتی: ڤەمان ئێخستێ: پاش ئێخستن

ل دیڤ طایێ ویە: چ بێژیتێ گوهێ خۆ ددەتە: ب کێر ئێک و دوو دهێن، پێک دکەن

ل شین خەرتۆکا دگەریێت: چ نەمایە ژبلی تیفکلان 

لێڤ ولمپوڕێت وی چ یێت شوربوین: یێ پوسیدەیە وخەمگینە

ما ب لێڤا ویڤە: بەڵا خو ژێڤە نەکر: بو به‌نیشت وما پێڤه‌

ما تە ڕیهێت خو ل بەرهەتاڤێ سپیکرینە :  یێ نەزانە 

ما تە کاریش خاریە: ئەو مروڤێ گەلەک دهلنگڤیت ودکەڤیت    

ما قه رێ  ئێتیما یە: ڤەگەرینا قەری ب مشەیێ بو خودانا 

ماڵ دۆشاڤو:  بو وی کارێ دهێتە گوتن یێ نە ژدل

مرادا عیسوی کیسک وقەلینە: چاڤێ وی بتنێ یێ ل بەرژەوەندیا وی

مرادا ميسوى تيتنه: حەزا وی دڤێت ئەوە

مروڤەکێ چوك شکێنە: یێ ڤەبۆریە، یێ ئاخڤتن دەق ب دەقە

مروڤەکێ چەچ ریخە: گەنگەشێ دکەت ل سەر هندەک تشتێ بێ بها

ملحه‌مێ سه‌ر برینایه‌: یێ قەنجە وزۆرێ باشە

من ئاخڤتنا تە ب شەکر شکاند: من نەهێلا تو ئاخڤتنا خۆ ب دویماهی بینی

موی چڕکە: بو وی کەسێ چیڕ نەخوش

موی دبەڕا ناچیت: ئەو کار یێ راست ودرستە وبێ کێم وکاسی یە

مۆڕکا خەوێ کەتە سەرسێنگی: زیکا دخەو دچیت ودنڤیت

مە کراسێ دڕێژ وشۆڕ بوتە کەردکر:مە حسابەکا باش بوتە دکر بەس وەسا نینە

نا گه‌هیت سه‌رێ خو‌ ب خورینیت:  گه‌له‌ك یێ ب شۆل بیت، یێ شەپرزەبیت

نانێ فلانکەسێ کەتە سەر پشتا خەزالێ: هاتە را تەقاندن

نەزانی، خوشیا گیانی: یێ نەکەرە: یێ تەمبەلە

ها ددفنێت خودانە: بخۆ، گوتنا کەرب وعێجزیێ یە

هات دەست ژپیا درێژتر: ئەو شولە پویچ بوی یان چێ نە بو

هاتە جهێ فەڵە لێ کوشتی : چو سەر سوحبەتا خۆ یا بەرێ

هاتە ڤە ب وان سەر ودلا ڤە: ئەو شولە پویچ بوی یان چێ نە بو

هه‌ر یێ چويڤ ل مله‌: چویڤێ وی هه‌ر یێ ل سه‌ر ملی ویێ به‌رهه‌ڤه‌ بۆ شه‌ڕی

هەچیێ کەرەک هەی، کورەک هەی: کەر یێ هاریکارە

هەر بەرەک ل گوزه كا خودا: ئەو فەندە ل وی زڤری

هەی میتک پێ وەرو: داخازا مرنێ بو دکر، نفرینە خودێ تە نەهێلیت

وان ژی شەربەتا مە ڤەخار: ئەوا هاتیە سەرێ مە هاتە سەرێ وان ژی وئەو آەربەت تامکر.

وه‌كی تینكێ تینێ یه: دهێت ودچیت بێ راوستیان: هه‌ر یێ ب بزاڤە

وێ ژمشکا ببیت، دێ هنبانا کێشیت: کارێ وان هەر خرابی یە

وی عەدما مە ئینا: چ دمە نەهێلا، زیان گەهاندە مە

وەرە ڤی کەری بدە ڤێ قوڕێ یان ئاڤێ: لێ ناچیت، یا ب ئیزایە

وەک تاژیێ یە: گەلەکێ لاواز وزراڤ بت بەلێ یێ ب غارە

وەک کەلێ شەکرێ یە: یێ خوین شرینە وخوش جامێرە

وەک ئاگرێ ل هەڕیێ یە: یێ زیرەک وچەلەنگە

وەکی باگوردانیە: یێ خڕو قەلەوە

وەکی بڤرێ مەڵایە: چ ئێش وئەلەم لێ نینن ویێ ساخلەمە

وەکی پێشیێ یە: یێ سڤک و بێ هێزە

وەکی تاژی یە: چون خوشە وپێ سڤکە

وەکی تڤرێ یە: یێ ساخ وساخلەمە

وەکی چێلا زەرە: چ چاکی وباشی ژێ چێ نا بیت

وەکی سەیێ پێ سۆتی یە: ل عەردەکی نا ڕاوستیت: ل چ عەردا نا حەویێت

وەکی سەیێ کوڵانایە: جهەکی نا هێلیت نە چیتێ

وەکی کتکا دماشێ ڤەدایە: پیس وڵاوازو نەهاتی و قورڤچیە

وەکی هێلینکا قەلێ یە: یابلندە ونە یا موکمە

یا بێ داڤ ودەلنگە: بو ژنکا بێ شەرم وبێ هەتک وحەیا 

یا تیرا دبنیدا مای: یا دهێت خڕابتر وپیسترە  ژئەوا بۆری

یێ ب عویرکە: یێ ب عینادە وب کەرب  وکینە و زوی دپندڤیت

یێ بنگرتی یە: بو مرۆڤێ زەنگین ودەولەمەندە

یێ بێ دەرپێ یە: یێ بێ شەرم وبێ هەتک وحەیایە

یێ بێ زەڕاڤە: یێ ترسینوکە وبێ جەرگە

یێ بێ زەڤەرە: کەسەکێ بێ زاخ وبێ قەلافەت وچ دبەرهەنگارێ وی نە

یێ بێ سەر وچاڤە: بێ مەعریفەت وخو نەنیاس

یێ بێ قامە: بێ سەلیقە یە، نە تەبتی یە ونەخوشە

یێ بەرقۆلپەکە: یێ  باربەر وخوش جامێر

یێ بەرئاتاڤ یان ئافاتە: گەلەک بەلا وئارێش بو چێ دبن

یێ پشت کولە: نهینیێت وی یێ ژدەرڤە

یێ پەراسی خاڕە : یێ بێ باوەرە: مڕوڤی باوەری پێ نینە

یێ خوێ دخوت وئاڤێ سەردا دکەت: زورێ تورەیە و یێ ل بەلایەکێ دگەریت

یێ خەنی بوی: یێ کەڤتی یە خێرا خودێ وزەنگین بوی

یێ دایە بۆڕی: دخەما چ نینە، یێ بێ شەرم وحەیایە

یێ دچنە دئێک ودودا: گەلەک حەژ ئێک ودو دکەن، بێهنا وان بێ ئێک ناهێت

یێ دەست دڕیایە: ئەو کەسێ مال مەزێخ وزوی مەحتل دبیت

یێ دەڤ دڕیایە : چ خۆ ددەڤی نا گریت وچ ب هێتە سەر دەڤی دبێژیت

یێ دەڤ ولێڤ سەیە: مروڤەکێ دارگرانە ونعیمویە 

یێ زڕە  یان یێ سویارە: یێ نە ژقامە نە ڕاوستیای یە

یێ ژقەبری ئینایەدەر: یێ زەعیف وڵاوازە ، گەلەکێ بێ هێز وزاخە

یێ کولیا دگریت: گەلەکێ برسی یە

یێ کۆرەیە: خاندن ونڤێسینێ نزانیت

یێ کەتیە دکۆشا دەیکا خودا: هەکە ئێک کەتە دگەلەک خوشیادا

یێ گوهـ مارە: گوهێت وی زۆر دخوەشن بو بهیستنێ

یێ نە سونەت کریە: مروڤێ بێ بەخت و بێ وژدان

یێ وەلوەلی یە : گەلەک د ئاخڤیت ویێ بەرامبەر زوی دسەردا دبەت  

یێ ئاڵف خوشە: چ تشتێ دانیە ل بەر دخوت، هەمی جورێت خارنێ دخوت

٢٠٢١ – دهوک – ئەحمەد عەلی