گوتن ودەم

وەخت ودەم دناڤ گوتنێت کوردیدا

چەند پەیڤێت دەمێ ب سەر شەڤ وروژێ ڤە

روژهەلات

روژ، روز ، تاڤ، بەرتاڤ، حەتاڤ، هەتاڤ، هەتاو، تاو، روك ، ميهر، ئاهۆر، هور، خۆر

گەرم، گەرمی، گەرماتی، تەحرە، قرچینا نیڤرو، کەلاتی

روژئاڤا

شەڤ، شەفەق، تاریستان، زولومات، شەڤاتاری، شەڤرەش، سیاهی، رەشاهی

سەرکێ سەحارێ، سحار، سهار، سەحارێ، فەجرێ، بەیانی، بەر بەیانی، بەربانگ

تیروژ، تیروژک، تیشک، تویشک، تیژک، تیژگ، تیژە

ڕۆشنی، روناهی، رونی، روهنی، روناکی

بەری سپێدێ، سەرێ سپێدێ، سپێدە، سوبە، سبە، سەرێ سوبێ، سوباهی، دەستپێکا روژێ

بەری نیڤرو، نیڤرو، دانگێ نیڤرو، پشتی نیڤرو، بەری ئێڤاری، ئێڤاری، دانگێ ئێڤاری

دەم ب گشتی تشتەکێ بەرز وگرنگە دژیانا مروڤیدا. گەلەک دبێژن دەم ژیانە. دەم دبۆریت ئو کەس نەشێت ب راوستینیت یان پاشڤە بزڤرینیت وەکی وی دڤێت یان ل دیف حەز ومەرامێت وی.

وەخت ب رامانا جڤاکی دبنە دو جۆر: یێ سروشتی یان یێ فیزیاوی، ئو دەمێ جڤاکی. یێ ئێکێ ئەو دویری یە دناڤ بەرا دو گاڤاندا ژژیێ مروڤی، ئو دهێتە هژمارتن ب ڤی تەرزی وەک: چەرخ، سال، هەیڤ هتد...).

یێ دووێ ئەو سەربۆرێت ژیانێ نە یان یێت دجڤاکێ نە یێ مروڤ تێدا دبۆریت ل دەمەکێ تایبەت ژوەختێ سروشتی یان یێ فیزیاوی. ژبەر ڤێ چەندێ دەمی رولەکێ گرنگێ هەی دژیانا مروڤاندا. ئەڤ ژیان یا پێڤە گرێدایە ب مەکومی.

دەم دبۆریت ب لەزەکا راست وتایبەت، دچیت بەرەف پێشیێ ڤە، گرێدایە ب سستمەکا گونجای ڤە، بو خڕ کەسان یەکسانە، زوی بکوتایێ دهێت، ژکێمایە، ئو ناهێتە پاش ئێخستن وڤەگوهاستن وگوهورین. زانیارێت ڤی بابەتی دبێژن: دەمی بهایێ خۆ یێ جڤاکی هەی دژیانا مروڤاتیێدا: دەم هەبونە دهێتە جان وبەندکرن وپەرژەوندیکرن، دەم ئازادی یە خودان دشێت ب تەرزێ وی دڤێت ب رێڤە ببەت، دەم کار وشیان ولڤینە، دەم جهئینانە کارانە چنکی هەر تشتەکی چەند دەمەکێ تایبەت دڤێت، دەم بارگرانییە ل سەر کەسی بو ب جهئینانێ، ئو دەم نویکرنە و نویژاندنە وپێشڤەچونە، چنکی دەمێ مە یێ رابۆری، یێ نهو ویێ دهێت ئانکو ئایندە هەمی پێگڤە نویکرنا ژیانێ یە. یێ بۆری یێ پڕ بهایە چنکی پارچەکە ژمە، یێ نهو یێ بۆری دگەهینتە یێ داهاتی ب رەنگەکێ نویژەن، ڤێجا ئەڤێ داهاتو گرنگیێ ددەتە ژیانا مە ب شێوەکێ نوی و رەنگەکێ باشتر وچێتر.

ئەڤا ژۆری ژلایێ جڤاک وسروشتیڤە، بەلێ ژئالێ فلکلوری ڤە دەمی جهێ خۆ یێ تایبەتێ هەی ل نک بیرمەندێ کورد یان ئاقلمەندێ گوتنێت پێشینان، وان پەیڤێت دەم ووەختان یێت ب کار ئیناین ب رەنگەکێ راست ودرست کو مەراما خۆ ب جوانی بکەت درستێت گوتنێدا وەک ڤان پەیڤێت دەمێ نێزیک: رۆژ، شەڤ، سپێدێ، سوبە، ئەڤرۆ، ئێڤاری ، هتد... یان ل دەمێت درێژ وەک: حەفتە، هەیڤ، مەهێ، سال، زەمان یان ژی دەمسال ووەرزێت سالێ وەک: زڤستان، بهار، هاڤین، پائیز. هەر وەسا دناڤ چەند پەیڤێت ب سەر دەمی ڤە: وەک: کەنگی، دگاڤێدا، جارەکێ ل چلێ زڤستانێ. دهندەک گوتناندا پەیڤەکا دەمی بتنێ دهێت یا سەربخۆ، ئو هندەک جاران دو پەیڤ وەک شەڤ ورۆژ یان شەڤ وهەیڤ، شەڤ وسپێدە، ب ڤی رەنگی گوتنێت کوردی گرنگیا دایە دەمی ئو ب تەرزەکێ قەشەنگ وجوان یێت دهاتینە دارژتن وڤەهاندن دناڤ بەند وگوتنێت کوردیدا، کو بوینو پێخارنا زمانێ کوردی دئاخڤتنا رۆژانەدا:

ئەڤە گولوازەکێ نمونێت گوتنانە ل سەر دەمی:

ئاخڤتنا میرا بیژە، بەلێ روژا شەری ل مال نەبە

ئادار بو هەشت، قولنگان هێلا دەشت

ئادارێ، ئاگر خوشترە ژساڤارێ

ئادارە، دەو ل دارە

ئاڤا پائیزان، ل سەرێ ئازیزان

ئێغبالا مامێ گەورە، ب شەڤێ ساهی یە ب روژێ عەورە

ئەم کەتینە زەمانەکێ خراب

ئەو وارە ، بەس نە ئەو بهارە

ب دانە، بەلێ بزانە

ب روژێ دگەریێت ل کولانا، ب شەڤێ د چیتە کەزانا

بلا ئەو خەم بو وێ گاڤێ بیت

بهارێ خو ته‌ر نه‌كه،‌ زڤستانێ خو گیرو نه‌كه‌

بینە کچا چل سالى نەئینە بێژنا بیست سالى

بەرەڤانێ شەڤێ هەرشەڤە

پائیز هات وهاڤین چو، بەریکا فەقیری دریا

پائیزە گورگێ حیزە

تڕ ل شوات، ئادار هات

جارەکێ سلامەت، یا دی هەلامەت

چ روژ بارانە، زفستانه‌

چڵ بە چڵ، کوینێ خو ببە سەرێ مڵ

چل روژ پشتی چلا، مالێ ببه‌ سه‌رێ ملا‌

حه‌فت جاران یا ره‌ڤای بە، نە جاره‌کێ یا به‌ردای بە

خه‌به‌رێت شه‌ڤ وروژێ نە ئێکن

دو بهارا دچەرینیت

دونیا نە شەڤ وروژەکە

دێ چیتە سەر بانێ هەیڤێ

دێ روژا نیڤرو چیت

دەما مروڤ پیربو، نە ب کێر کونێ دهێت، نە مەشکێ

دەوێ بهارێ بدە یارێ

دەوێ پائیزێ بدە ئەزیزێ

روژ دچن به‌لێ موقەدەر ناچن

روژا خوش نه‌ده‌ ب یا نه‌خوش

رۆژا نیڤرۆ دێ خۆ دەتە رەڤان

رەوشا مالا، کالێ سالا

زڤستان هات وبه‌رکا فه‌قیری دریا

سال زڤری ل سالێ گوت خوزیکێت سالا پار

سیبەرا سپێدێ ل من نەدەت یا ئێڤاریا یا شخۆیە

شه‌ڤێت جه‌ژن، هەژار ژی ده‌وله‌مه‌ندن

شولێ ئەڤرۆ نەهێلە بو سوبە

شەڤا تاری ژ هنگورڤا یا کفشە

عەورێ رەش بارانە، عەورێ سپی زڤستانە

که‌س ب روژه‌کێ نه‌بویه‌ مه‌لا

گاڤا تو چویی حیلا ئه‌ز ژوێڤە دهاتم

گرارا مێرا ب حەمد(وەخت) دکەلیت

ل نک کورا شەڤ وروژ ئێکن

مە خۆ ل سالێ گرت، دێ خۆ ل مەهێ ژی گرن

نەیێ ڤی زەمانی یە

هات مروڤێ مالێ، چو زیانا سالێ

هاڤین دەیبابە

هەیڤا خو یا ژقوین ڤە دیتی

هەیڤا دبن عەوری یە

١١-٤-٢٠١٩ دهوک – ئەحمەد عەلی حەسەن

واتە ورامانا مەهێت سالێ

چلە: رێبەندان: رێ دهێن گرتن ژ بەربەفرێ

رەشەمێ: رەشە مەهە: مەها رەش: ل ڤێ مەهێ تاری دکەفتیە شوین وجهان

ئادار: ئاڤدار: ئاڤ دکەفتیە چق وتاکێت داران

نيسان: نەوروز: نەڤروز: سەرێ سالا کوردی یە

گولان: گولدان: بشکڤتنا بشکوشک وگولان ل ناڤ باخچان

پوشبەر: پیشبەر: گیا وشینکاتی وکەسکاتی حشک دبیت ودبیتە پیش وپەلاخ

تیرمەهـ: تەمووز: جۆخینان: ناڤێ مەها هەفتیە گەرمترین هەیڤا هاڤینێ یە

تەباخ ، گەلاڤێژ: چلێ گەرمێ و دیاربونا گەلاڤێژێ

رەزبەر: بەرێ رەزی: مەها ئێکێ یە ژپاییزێە، بەرهەم ئێنانی باخ و رەزه

کەوچەر: جوتمەهە: کەتنا بەلگێت داران‌

مژدار: سەرماوەز: سر وسەرما ومژ دکەڤیتە دنیایێ

به‌فرانبار: بارینا بەفرێ: بەفر دباریت وسر وسەقم دگەهتە پلێت ژۆری

٩-١١-٢٠٢٠ – دهوک – ئەحمەد عەلی

وەرزێ زڤستانێ

ناڤێ زڤستانێ دناڤ شێوێت کوردیدا

زستان- زڤتان- ڤستان- زمستان- زمسان- زوسان- زووسان

زڤستان ل دیف وەرزێ پائیزێ دهیت ودکەڤیتە پێش بهارێ، ئەڤ وەرزە یێ پێ گوتیە ژسر وسەرمایێ، یێ پڕە ژ بەفر وبارانێ، سارترین دەمسالە ناڤ هەمی وەرزاندا، رەوشا دونیایێ هەرا تەزی، جەمدی وقەرسی یە، گەش وسەقا یێ هوینە.

چەند گۆتن لسەر زڤستانێ

ئاگر فێقیێ زڤستانێ یە

دنیا سارە ، گلدە یارە

زڤستان هات وبەرکا فەقیری دریا

زڤستانا سەر هژین، چێترە ژزڤستانا دیف هەژین

کانوینا کچک، خوش دبن بەر کوچک

ل زڤستانێ، ئاگر ژدەیبابا زۆر ب سەبرترە

ل کانوینێ ، دفن پیسترە ژ قوینێ

هات بارانا پەلێ، دەمێ لنگا وبلندکرنێ

هات بارانا پەلێ، دەمێ چاندنا نیسکێ وباقلێ

هەردو مەهێت کانوینێ، حسابا خو بکە وکادینێ، گەرم کە جهـ ونڤینێ

چ ژ‌ده‌‌نگێ تپ تپا پێت ده‌‌يندارى وچپ چپا ده‌‌نگێ دلوپان نه‌‌خوشتر نينه‌‌ ل زڤستانێ

١٠-١١-٢٠٢٠ – دهوک – ئەحمەد عەلی

مەها خزیرانێ: ناڤ ورێنوس ورامان دگەل چەند پێزانین وگوتنان

ل دەف کوردا ناڤێ ڤێ هەیڤێ ئەڤەنە: جەهزەران: پوشبەر: پێشبەر: زەردان: هەزیران: هوزەیران: حوزەیران: خەزیران: خزیران...

ل نک بیانیا: حزيران: بؤونه: يونيو: جوان: جون: جونو...

وەرزێ هاڤینێ:

سێ هەیڤن (خزیرانە، تیرمەهە، تەباخە) ل ڤی دەمێ سالێ چلێ هاڤینێ دەستپێدکەت پلا گەرمێ بلندبیت ب دژواری نەخاسمە ل دەمێ نیڤرۆ ول نیڤا چلەی کو دبێژنێ ب سریانی (بِنْكْ، ب واتا بنیاد ئانکو بنک یان بنوک) وگەش وسەقا بنەجهدبیت، باران دراوستن وبنبردبن، فیقی دگەهیت وزەرزەوات چێدبن. ئەڤ وەرزە دەستپێدکەت ژبیست وئێکی خزیرانێ حەتا دگەهیتە چارێ تەباخێ. خزیران هەیڤا ئێکێ یە ژهاڤینێ شەڤ تێدا کورت دبن ورۆژ درێژدبن. دڤێ هەیڤێدا دەخل ودان دهێنە دورین وئاگر وسوتن مشەدبن.

چەند پێزانین ل سەر خزیرانێ:

رامانا خزیرانێ: حزيران: خۆ ڤەدان وڤەکێشان ژگەرما رۆژێ ل دەمێ تەحرێ

واتا وێ ب ئارامی وسریانێ (گەنمە) چنکی ل ڤێ دەم وەختێ هەیڤێ ئەڤ دەرامەت دگەهیت بو دورینێ

رویدانا فەلەکی: ژرویدانێت چەرخ وفەلکی دڤێ هەیڤێدا (گوهورینا هاڤینێ یە ل نیڤا باکۆرێ ژۆری رێکەڤەتیێ: پیست وئێکێ هەیڤا شەشێ)

پێناڤکرنا خزیرانێ ل جیهانێ:

یونیو: هەیڤا زایینێ: جوان: جون: لاتینی یان رومانی(ژنا موشتەری ئەوا خوشکوک وجوان)

بؤونة: قوپتی یە

حزيران: گەنم: ب سریانی یە

حزيران: ل رۆژهەلاتی

یونیو: ل یەمەنێ وگزیرتا عەربی ول مسرێ

جوان: ل مەغربا عەربی

جەمادا دووێ: مەها مشەختی یە

چەند گوتنێت کوردی ل سەر هەیڤا خزیرانێ:

خزیران خنزری، بالەتە کەتە تری

خزیران خنزری، گیا ل مێرگا کوزری

خزیران خنزری، شینکاتی ل ئەردی بەهی کری

خزیران خنزری، ئاگر بەر بەربیت پالا گری، چ جارا ژی نا ڤەمری

خزیران خنزری، نەما شینکاتی ژبلی بنا کاویری، ئو بنا شەحفری

خزیران خنزری، نەما شینکاتی ژبلی بنا کاویری، ئو گیایێ حێشتری

خزیران خنزری، چ خۆ ل بەر ناگری، ژبلی شافری مێوا تری

خزیران خنزری، چ تشت خو ل بەر ناگری، ژبلی گوملێ شافری، ئو مێوا تری

خزیران خنزری، چ تشت خو خو ل بەر ناگری، ژ بلی خورنیفکێ و دارا تری

ل سێزدێ خزیرانێ: رۆژ بەرێ خۆ دەتە زڤستانێ

ل خزیرانێ: رۆژ بونە سال، زک بونە جوهال، کابانی بونە بەقال

چەند گوتنێت عەرەبی ل سەر هەیڤا خزیرانێ دگەل گوهورینێ ب کوردی:

1- ل خزیرانێ، سەقا بەرەف کوزیرانێ : في حزيران الجو نيران: حزيران فيه نيران

ب کوردی: خزیران خنزری، گیا ل مێرگا کوزری

2- خزیران بایینکە، تیرمەهـ شەوتینکە، تەباخ کەوینکە : حزيران الهاوي وتمّوز الشاوي وآب الكاوي

3- خزیران هەیڤا کەیفێ دەستپێک بهارە، وداوی هاڤینا دژوارە : ئانکو ل پێشیێ یا خوشە و ل پاشیێ گەرمە حزيران شهر البسط والكيف أوله ربيع وآخره صيف

4- حەتا سەرما نەمریت، توی ناگەهیت : البرد ما بيموت ليستوي التوت

٥- خزیران، ماستی دکەتە ترشان : شوب حزيران بيعمل اللبن عيران

٦-ل هەیڤا خزیرانێ، تێدا دورینە ودگەل سوتنێ : شهر حزيران فيه الحصاد والنيران

٧- خزیران هەیڤا گەهشتنێ، ئانکو یا فێقی وزەرزەواتی : حزيران شهر الريان (أي الخضار والفواكه)

ب کوردی: ‏ خزیران خنزری، بالەتە کەڤتە تری

٨- خزیران، گەنموکێ دکەتە خەیزەران : بحزيران تبقى الذرة مثل الخيزران

٩- ل خزیرانێ، گیا دکەڤیت ل بەر نەمانێ : بحزيران العشب فان

ب کوردی: خەزیران خنزری، گیا ل مێرگا کوزری

١٠- خزیرانێ، تەنیرا مژمژانێ : حزيران طباخ المشمش

١١- ل خزیرانێ دکەڤیت مژمژ، ول هنارێ دهێت کژکژ: بحزيران بينزل المشمش وبيكبر الرمان

١٢- ل خزیران، دگەهیت گوندورێ زەڤیان : حزيران يا بيطلع سطيحة يا بطيخة

١٣- ل خزیرانێ یێ دخەوبێت بلا ئاڤێ ل سەرێ خۆ بکەت : بحزيران كب المية عراسك يا نعسان

١٤- ل خزیرانێ ستێرا پێرو ل عەسمانا ب شەڤێ دهێتە دیتن وتەرازی بلندبیت

في حزيران تطلع الثريا ويعتلي فيه الميزان

چەند گوتنێت میسیلیا ل سەر هەیڤا خزیرانێ دگەل گوهورینێ ب کوردی:

١- خزیرانە عونبارا بانە : حزيـران عنبــاغ الهــوا

چنکی هور وبا ب دژواری دهێن هەر وەکی عونبار وهاتیە ڤەکرن ژبەر گوهورینا گەشی

٢- خزیران بابێ ئاگران : حزيـران أبـو النيـران

دڤێ هەیڤێدا ئەی چریسکا ئاگری دبیتە ئەگەر بو سوتنا دەخل وجەهی وپیشان

٣- زێدە دبن پێشی، کێم دبن مێشی : حزيغـان مكثـغ البــق ومقـلل الذبـان

دڤێ هەیڤێدا پێشی خەرزی دکەت وپشتی هنگێ ب مشەیێ زێدەدبن بەلێ مێش ل کێمێ دەن

چەند گوتنێت قوپتیا ل سەر هەیڤا خزیرانێ دگەل گوهورینێ ب کوردی:

خزیران: بؤونه أي بااونى نهالا بەران ئانکو کەندالێ شاهان ل ئەقسورێ ل مسرێ

١- ل خزیرانێ ڤەگوهاستن وعونبارکرنا دکاکێ یە : بؤونه نقل وتخزين المونة

٢- خزیرانە، شکاندنا بەرانە : چنکێ گەرم تێدا بەرز وبلندبیت : شهر بؤونة يفلق الحجر

٣- ل خزیرانێ، مشەدبیت گەرم گورانێ : بؤونة تكثر فيه الحرارة الملعونة

چەند گوتن ب ئنگلیزی دگەل گوهورینێ ب کوردی:

١- "Calm weather in June, sets the corn in tune."

نەرمە بایێ خزیرانێ، گەنموکێ دکەتە وەک شفکا خەیزەرانێ

٢- "The June bee portends lots of honey."

مێشا هنگڤینی ل خزیرانێ، زۆر هنگڤین ژێ هانێ

٣- " "June will break your heart

خزیران دێ دلی ل تە قورمچینیت

تێبین: ژپیزانین وگوتنێت ژۆری بو مە وەسا دیاردبیت کو ئەڤ هەیڤە زۆرا گرنگە دناڤ وەرزێت سالێدا، چنکی گەلەک گوهورین دکەڤنە گەش وسەقای چ یێت سروشتی یان ژرەفتارێت تێدا پەیدادبن ل سەر خەلکی ژلایێ ژیانێ ڤە. یا ژهەمیا گرنگتر پلا گەرمێ یە ل بەر بلندبینێ ڤە دچیت وئاگر وسوتن تێدا زێەدبن وزۆر مشەدبن. بنوکا ئاگری یە، بابێ سوتنێ یە، گیای وپیشی دکوزرینیت، تەحرا وێ مروڤی دشەوتینیت، دەما دخنزریت ئانکو تۆرەدبیت ودعنریت چ خۆ ل بەرناگریت ژبلی هندەک شینکاتیا وەک: مێوا تری، خورنیفکێ، شافر، کاویر وهندەکێت دی. هەکە شێوێت کوردی ئەڤ ناڤ دابنە ڤێ هەیڤێ وەک: جەهزەران، پوشبەر، پێشبەر، زەردان، هەزیران، هوزەیران، حوزەیران،خزیران، خەزیران. ئەز دشێم بێژم ناڤێ ڤێ هەیڤێ زۆرێ نێزیکە دڤێ گوتنا کوردیدا:" خزیران خنزری، گیا ل مێرگا کوزری". چنکی پەیڤا ( کوزری) دهێت بو شەوتین وسوتنا ئەوا ب سەرڤە سەرڤە دەما دکەڤتە چەرمێ مروڤی یان ژی ل گیای وپیشی ل ئاقاری یان ل چولان. ڤێجا پەیڤا: کوزری، کوزرین، کوزراندن، کوزیران زۆر دەنە ب سەر پەیڤا خزیران بەس پیتا دەستپێکێ: چ حێ بیت یان خێ بیت ل نک خەلکەکێ یان ل دەڤ مەژی بەلێ دبیت یا کوردی دبیت ل دەستپێکێ (کوزیران) بیت بەلێ خۆ ڤوگوهاستیە خێ ژبەر سڤکیا ڤی پیتی ل سەر ئەزمانی.

١٥-٦- ٢٠١٩ – دهوک – ئەحمەد عەلی حەسەن

سەرما پیرێ: برد العجوز

دناڤ کەلوپۆرێ کوردی یێ مللیدا

ئەڤ کەلوپۆرێ چەرخ وفەلەکی یێ کەڤن دناڤ مللەتێ کورداندا گرێدایە ب ژیانا وان ڤە وهاتیە بەلاڤکرن ل هەمی دەڤەران ویێ بەرەف براندنێ ڤە دچیت ل چەرخێ پێزانینا زانستی وپێشکەڤتنا تەکنولوجی.

مەها شباتێ دویماهیا وەرزێ زڤستانێ یە کو ل ڤی وەرزی چیروک وگوتن ومەتەلوک دهێنە ڤەنەقلاندن وگوتن ژهزر وبیرێت مللی وزۆربەی ژوان ل سەر زڤستانێ نە ل وان شەڤێت درێژ ل کوچک ودیوانان، مەبەست ئەوبوو دا خۆ ب پارێزن ژسر وسەقەما زڤستانێ دا کو تویشی ئێش ودەردا نەبن دەما دەر دکەڤن.

گيسكێ پيرێ دەمسالەکا مللی یە دکەڤیتە پاشیا زڤستانێ، ئەو چەند روژن وەسا دیاردبن ب سەرمایەکا زۆرا دژوار کو دکەڤیتە پێش وەزێ بهارا رەنگین، جار روژن ژمەها شباتێ وسێنە ژدەستپێکا بهارێ ل ئاڤدارێ، بەرێ ئەڤ حینە ب هێت پلا گەرمێ بەرەف بلندیێ ڤە دچیت وئەڤە دبیتە دەرفەت بو خاپاندنا خەلکی چنکی وەسا هزر دکەن کو سەرما بۆری ونەما ل دەڤەرێ بەلێ دڤەگەریێت دەملدەست ب رەنگەکێ دژوارتر ب هر وبایەکێ شدیای یێ پڕ ئاخ وتوز و عەجاج. ئەڤ گەش وسەقا دبیتە ئەگەر بو نساخیا بچیکان ومروڤێت دانگ عەمربەری بهار خۆ ب کێشتە ناڤ واری.

ئەڤ دەم حینە یێ هاتیە پێ ناڤکرن ب ( سەرمایا پیرێ) چنکی دبێژن پیرە ژنەکێ هەست ب گەرمێ کر وچاڤ دا چیچکێ (ویت ویتانی) دەما هیلینا خۆ چێکری بو هێک کرنی ژبەر ڤێ پیرێ هزرکر کو زڤستان ب دویماهی هات وسەرما نەما ل دەڤەرێ، ڤێجا رابوو هەر سێ گیسکێت خۆ لوچکرن ژپیرتی ودبەرا ب دلەکێ پڕ شاد وب کەیف وخوشی وجڤین وخەبەر دانە زڤستانێ وگوتێ: شباتوك ب تر وفس چوو.

"تڕ ل شباتێ ، ئادار ب سەردا هاتێ، گيسكێ خۆ هاڤيته لاتێ".

"ئەز گيسكم گيسكه لوكم ، بهار هات ئەزێ خوشكوكم".

"ترن ترن شباتوكێ، دەركەتى ئاداروكێ، من خوارى کەنگروکێ".

ڤێجا سەر بۆرا ڤێ چیروکا مللی یا گەهشتیە مە وئەوا بەر بەلاڤبووی ل نک مە وزۆر مللەتێت دی ل رەخ ودوران. ژبەر وان خەبەر وجڤینان شبات زۆر تورە بوو وکەرب وکینیێ گرت ئینا داخاز ژ برایێ خۆ ئادارێ کر کو ببیت هاریکار دگەل وی دا کو دەرسەکێ نیشا پیرێ بدەن گوتێ سێ روژا ب قەر بدە من داببن حەفت روژ دگەل یێت من دا بارانەکا دژوار بهێت ل سەر پیرێ وگیسکێت وێ ئەوێت خۆ ل بەر سرا شوباتێ گرتین ودا ب خندقن دبن ئاڤ رابونێ ڤە.

پشتی گیسکێت پیرێ بارانێ برن پیرێ قەستا هیلینا چیچکێ ویت ویتانی کر ودێت یێ مری ل وێرێ ئینا گوتێ ب دلەکێ پڕ خەم وکوڤان:

( چیچکێ ويت ويتانى، ته هيچ ل دەمێ سالێ نەزانى، ته مالا خۆ خراب كر ويا من ژى ل سەر دانى).

١٤-١١- ٢٠٢٠ – دهوک- ئەحمەد عەلی