پەیڤا دنیا دگوتنا کوردیدا
پەیڤا (دنیا) عەرەبی یە، بەرامبەرێ وی(جیهانە): واتە وێ نیزیک بونە، ئانکو بەرڤەچونا نەمانێ یە. براستی ڤێ پەیڤی زور جهێ ڤەدای دناڤ هزر وبیرێت خەلکی، یا هاتیە شروڤەکرن ب گەلەک شێوا: چەند مەخلوقات دهەین، دناڤدا بەری قیامەت رابیت. لنک هندەکا دنیا جیهان هەمی یە، ئەرد وئەسمان دگەل ئەوێ دناڤدا. لنک هندەکا هەرچار وەرزێت سالێ نە بدیفک ڤە ئو مانە ژیانێ ئەگەر راوستیا دنیا نامینیت. لنک هندەکا روناهیا روژێ یە وتاریاتیا شەڤێ یە. لنک هندەکا ئەڤ خولیاقەتە ئەگەر نەما دنیا نامینیت. لنک هندەکا سولتانە، مالە ئو دەولەمەندی یە. لنک هندەکا دەمە، وەختە، زەمانە. لنک هندەکا دەست پێکا ژیانێ یە یان ژی ئەوە: بەری ئادەمی ئو پشتی وی حەتا روژا قیامەتێ. دنیا ژیانە ئو ئاخیرەت ژیانە.
ئەڤە چەند گوتنێت ل سەر دنیایێ:
دنیا بو دو برا ما، وان ژی پێک نه‌کر
دنیا بو که‌سێ نه‌مایه
دنیا خر نەیاربیت، بلا مروڤ یاربیت
دنیا دبیت بهوست دوژمن نابیت دوست
دنیا دنیا بیت بزن سویاری گای بیت
دنیا دهژیێت، بەس نابژیێت
دنیا دەورانە
دنیا سارە، گلدە یارە، دونیا گەرمە گلدە شەرمە
دنیا شەکالە دێ راخرینن
دنیا ل بەر بو پەقیژکا کەزانێ
دنیا نە شەڤ وروژەکە
دنیا هه‌ر روژه‌کێ بو ئێکی یه
دنیا هەمی تیربیت، بهوستەکی ژمروڤی دویربیت
دنیا وەک ژنا قەحبەیە، جار بو منە جار بو تەیە
دنیایێ خانێ، هندا ژێ بارکر، هندا دانایێ
دنیایێ هەی هایێ، بو کەسێ نەمایێ
تێبین وشروڤەکرنا گوتنێت ژوری:
ئەڤ دنیا ئەم تێدا نا راوستێت، یا بەر دەوامە، دەورانە دزڤریت، هند د‌هین ئو هند دچن بو کەسێ زندی نا مینیت. شەڤ د‌هێت ئو روژ دچیت وەک چەرخێ. ئەم یێ تێدا دڤێت ئەم بژین ب چ رەنگێ هەی، چ ب باشی یان ب خرابی، دیف راکێشانە، دیف خرینە حەتا مرنێ. بو ئێکی پتنێ نا مینیت بەر دەوام جار بو تە یە جار بو من. هندە تشت تێدا دهێنە گوهارتن جار دهژیێت بەس دسەر هندێرا نا خرابیت یان بژیێت. جار جار ئەڤ دنیایە ل بەر هندەکا وەسا تەنگ دبیت ئو تاری دبیت وەکی بەقیشکا کەزانێ ئەوا بچیک. زور جارا دنیا ل بەر هندەکا بلند بیت ئو ل بەر هندەکا نزم دبیت یێ چنە ب سەر دکەڤیت ئو یێ بەرز دبن دکەڤیت. ل نک گەلەکا هەر وەکی ئەڤ دنیا بەس بو وانە قەت تێر نابن هەکە ئەو هەر دوک کەس برابن، دبیت پێک نەکەن. هەر دەم کەر بو کینی یا هەی دناڤ بەرا هەمی کەسادا چ خویانی یان بیانی چ دوست بیت یان دوژمن بیت. هەکە مروڤ بخو خوشکەت دڤێت بژیت ب شادی ئو بەختەوەری بلا مروڤی نەیارهەبن. ئو دڤێت مروڤ خو پارێزیت ژ هەمی رەخا ڤە چ ئاریش بن یان رەوشا دنیایێ بیت دا چ ئازار وتارێت نە هێنە بەرێ مروڤی. ئو دڤێت مروڤ خو ژ ڤان ئاستەنگا دەربازکەت ئو نەهێلیت خرابی بگەهتە مروڤی. دڤێت مروڤ تێدا بژیت ب باشی وچاکی چنکی دنیا بەر هندێ ناکەڤیت مروڤ پشتا خو ڤە دەت دویماهی هەر مرن وهێلانا ئو بو کەسێ نامینیت. ئەم دێ ژێ بارکەین ئو پشتی مە هندەکێت دی دێ دانێ ئو ئەو ژی دێ چن دیف مەرا ئو ئەڤە دێ ڤەکێشیت حەتا روژا قیامەتێ.
١٦-٥-٢٠١٧ - دهوک – ئەحمەد عەلی حەسەن