گوتن وسەقا

گوتن ل سەقایێ بەفرێ

بەفر وجەمەد دوو رەنگێت جودانە ودجێوازن ژئێک ودوو ب شێوەکێ بنگەهی ب چێبونێ، هەردوو تەرز وێنەکە ژئاڤێ بەلێ هەر ئێک ژوان گەش وسەقایەکێ تایبەتێ سار دڤێت بو پەیدابونێ، جەمەدێ زۆر رەنگێ دهەین کو چێدبیت ب هاریکاریا بایێ سارێ قەرسی ودشێت وێ ئاڤا رون ب گوهێریت دا ببیتە رەق وتەق، هەر کەسەک دکاریت وێ چێکەت ل مال، بەلێ بەر وڤاژێ بەفرێ ئێک رەنگێ هەی یێ تایبەت ئەو ژێ ئەوە رەنگێ پەرمێچکان ب رەنگێ ئەندزیاری ددەتە ل سەر رەنگێ سپیڤە یێ نەرم وشل ودهێتە چێکرن ب کارتێکرنا سروشتی ژبەر رەوشا سەقای یا وەرزی بێ کو دەستێ مروڤی تێدا هەبیت وب چ رەنگان نەشێت وەسا چێکەت.

ل ژێری قەفتەکا گوتنانە ل سەر بەفرێ

١- پەیڤا بەفرێ ل پێشیا گوتنێ

‌به‌فر ژی یا سپییه‌، بەلێ چ تام تێنیە

بەفر ب هێتە ناڤ تەنگێ، نا دەتە دچوکارا

بەفر باری، من تو خاری

بەفر بێ با نابیت - بەفر بێ با نینە

بەفر بەفرە، کەڤر کەڤرە

بەفر تەلیسێ میرانە

بەفر‌ حه‌لیا، لنگ وه‌شیا

بەفر دجیت چیا دمینیت، مروڤ دچیت ناڤ دمینیت، گا دجیت چەرم دمینیت

بەفر دچیت، ئەرد دمینیت

بەفر دحەلیێت، بەس چیا دمینیت

بەفر دهێت وەک میرا، دەما دچیت وەک فەقیرا

بەفر دهێت وەکی میرا ودچیت وەکی فەقیرا

بەفر زبلێ ئەردی یە

بەفر ساریا خۆ نا هێلیت

بەفر ساريا خۆ ناهيليت

بەفر سپییە، بەلێ کەر وگولک ددەنە بەر بێیا

بەفر سر وسەقەمە فێعلا خۆ ناهێليت

بەفر سەران ببەت، ئەو هەر دێ یا خۆ کەت

بەفر فعلا خۆ ناهێلیت

بەفر قەیدا مێرانە

بەفر كهته كولانێ، تەرش وتەوال ما ل کولانێ

بەفر کەت کولانا، مێر کەتن دیوانا

بەفر ل چیایێت بلند دباریت

بەفر ل زوزانا دهێت رم رم، ل دەشتێ شین دبیت گەنم، جوتیار دبنە حاکم

بەفر هات وەکی میرا، چو وەکی فەقیرا

بەفر هەڤیر ترشێ عەردی یە

بەفر و با دئارن، ل چیایێت بلند دبارن

بەفر يا سپيه وبەریک يا خاليه

بەفرا ب شلووڤە، چەند هات هندێ دی چووڤە

بەفرا سار وتەزی، خوشە ناڤ ماستێ پەزی

بەفرا سپییە، قیرێ رەشە

بەفرا کانینا بچیک، ب عەردیڤە بی میچک

بەفرا کانینا کچک، ب ئەردی ڤە دبیتە مویچک

بەفرا کانینا مازن، ب ئەردی ڤە دبیتە ئاسن

بەفرا گر، زوی ڤەکر

بەفرا گولین، هرچا خرین، مێرێ گەفین، ژێ نە ترسە

بەفرا گەلەکا سپی یە، بەلێ کەر وگولک ددەنە سەر

بەفرا ل ناڤ بەرواریا دهێت 

بەفرا ل ناڤ تاوییا

بەفرا هویرە، دوماهیا دویرە

بەفرا هیر، خو دهاڤێتە رانێ ستیر

بەفرا هیر، دکەڤیت هەتا راهنێ ستیر

بەفرا هیر، هاتە چوکێ ستیر

بەفرا ئادارێ، بکەڤیت حەتا گوهێت دارێ، نامینیت حەتا ئێڤارێ

بەفرا ئیڤارا، بارانا سحارا

بەفرێ سەرێ چیا سپیکر، تە ژی سەرێ من سپیکر

بەفرێ گژە گژە، خیالا پشێ هەر ژژە

بەفرێ گژە گژە، خەیالا دلێ کتکێ ژی هەر ژژە

بەفرێ لێکر، نیسکی کارێ خۆکر

٢- پەیڤا بەفرێ دناڤەرۆکا گوتنێدا

بێندلخە، بەفر کەت تلخە تلخە

بەری بەفرێ با تێت، بەری مرنێ تا تێت، دگەلیاندا دەنگێ گورگان دهێت

ج روژ بەفر وبارانە، ئەو روژ زڤستانە

چ روژ بەفر وبارانە، ئەو روژ زانا بزنانە، وبالاڤا جلکانە

چ ياره، چ نه ياره، بەفر هەرا صارە

حەتا بەفر نەهێت، عەرد سپی نابیت

خودێ چیا دبینیت، لەوما بەفرێ لێ دبارینیت

دهێت بەفر وەک میرا، دروینیت وەک پیرا، دچیت وەک فەقیرا

دیوارێ سەر بەفرێ یە

سەد سالا بەڤر نەهێت، هەر گاڤا ب هێت هەر یا سارە

مرۆڤ دچیت، ناڤ دمینیت، بەفر دچیت، چیا دمینیت، گا دچیت، کەڤل دمینیت

نیشانا مرنێ تایە، نیشانا بەفرێ ژی بایە

نيشانێت بەفرێ بانە، ونیشانێت مرنێ تانە

هەر رەنگەکێ سپی بیت، دێ بێژن بەفرە

هەکە گورك دخەما بەفر وبارانابا دا بخۆ کەپەنەکی چێکەت

٣- پەیڤا بەفرێ دگەل مەهان وهەیڤان وەک: هەر دوو کانینان، شباتێ، شواتێ، ئادارێ، ئاڤدارێ

شباتێ، بەفر وبا تێ

شواتێ بەفر وباتێ، کور ژدارا تێ، کچ ژگیا تێ

کانینا بچیک، بەفر دهێت پیچک پیچک، ب عەردیڤە دبیتە میوچک

کانینا کچک، بەفر ب عەردیڤە یا بییە مچک

کانینا مەزن، بەفر دهێت بەژن بەژن، وەسا دچیت هەر وەکی ئاگر ل بن

کانینا مەزن، بەفر ل عەردی بی ئاسن

کانینا مەزن، بەفر وبا تێکرا بەزن

مەها ئادارێ، بهوستەکا بەفرێ هاتە خارێ، خۆ نەگرت حەتا دانێ ئێڤارێ

هەیڤا شواتێ، بەڤر وباتێ

هەیڤا ئاڤدارێ، بەفر هاتە خارێ، خۆ نەگرت هەتا ئێڤارێ

یێ بەفرێ بخووت، دێ بێیا ل خۆ کەتە جووت

٢٦-١١-٢٠٢٠ – دهوک- ئەحمەد عەلی حەسەن

ئەڤ بابەتە یێ هاتیە نویژەنکرن جارەکا دی

٤-٤-٢٠٢٦– دهوک- ئەحمەد عەلی حەسەن