دزی وگوتن

گوتن سەر دز ودزیاتیێ

دز هەر دزیە، چ یا بچیک بیت یان یا مازن بیت، دیکل بیت یان ملیاربیت،ناڤەکێ پیسە، کارەکێ چەپەلە، چ دین وئول ڤێ چەندێ قەبیلناکەن، چ یاسا پشتەڤانیێ بو وێ رەفتارێ ناکەن، چ مللەت وعەدەت ڤێ وەناکەن، خودانێ دزیێ یێ روی رەشە ل دنێ وئاخرەتێ وخودان چ جارا ب وی مالێ هاتیە دزین خوشیێ ولەزەت پێ نابەت. کورد دبێژن: بلا شیرێ قەتلێ ل ملی بیت، بەلێ رەحما خودێ ل دلی بیت، ڤێجا هەمی تشت ب ئینساف حەتا دگەل کورا بخوی دڤێت یا راست ودرست بیت. ئەڤێت ژێری گوتنێت کوردینە ل سەر ڤێ چەندێ، یا ئێکێ رامان وتێبینا باب وپاپیرانە، شیرەتا بیرمەندانە بو مە هەمیانە، یا دووێ هزر وبیرێت کورانە ل سەر ڤی بابەتێ هویێ گرانە، ئەوێ دکەڤیت سەر ملێت مە خڕانە، کو ڤێ نەهێلن بمینیت ناڤ جڤاکی ب چ رەنگانە.

گوتنێت بەرێ ل سەر دزیێ:

ئاخڤتنێت دزان وەک یێت دینانە

ئەرێ دز وحیز بەحشتینە؟

ئەگەر دیتم ئەزم، نە دیتم دزم

بەرێ من بازەبەر بیت، بلا دز گەلەک بن

پارە ئیمان دزە

تویرکێ دزان یێ کونە

چ دزو بیت، یان رێزو بیت، دێ حال هوبیت

حیزا مێرێ خۆ بە، دزا مالا خۆ بە

حەفت جارا ل مالا خو بگەرە، پاشی جیرانێ خو دزکە

خودان ودز بونە دوست، گا گورا ودەر ئێخست

خودانێ دزی، دزیدانێ ڤە رزی

خونە ما مالێ دزیێ یە

دارێ خو راکە کتکا دز دێ رەڤیت

دایکا دزی جار سینگی دخوت وجار ل سینگی دەت

دز خومالە، نوبەداری بەتالە 

دز دزا ناس دکەن

دز هەبن شەڤ رەش دمشەنە

دز هەر دزە، ئێکە، چ گایە چ هێکە 

دز ئەو دزە ئەوێ دزیا ژدزا دکەت

دزا ژدزا دزین، عەردو وعەسمان لەرزین 

دزا مالا خوبە، حیزا مێرێ خوبە

دزێ ب بولیلە

دزێ ب زەنگلە

دزێ خومالە، دەر گرتن بەتالە

دزێ دا، حیزێ دا، بەلێ بێ نەفسێ نە دا

دزێ دیکل دپاخلێدا

دزێ نەگرتی سولتانە

دزیا دکەت ودسەررا سویندا ژی دخوت

دزیکەر نەبە وژحاکمی نە ترسە

دزیێ بکە، بەل دزیا ب ئیمان بکە

دەرگەهێ خو بگرە، جیرانێ خو دز نەکە

دەرێ خو بگرە وجیرانێ خو نەکە دز

دەستێ دزا ب دزان نا هێتە برین

دەیکا دزی دو تڕا دکەت ئێکێ ژکەیفێ یا دی ژترسێ 

رەحمەت ل گورا کفن دزی

ژخالا دزا، هەمی خەلک دزە

ژدزاڤە خڕ خەلک دزن

ژنا خدام یا حیز ودزە

شەڤ ئێکە ودز هزار

فلانکەس دزێ ب زەنگلە

مالێ دزی حەرامە، نابیتە خوارنا مروڤان

من دزێ خو گرت

نەکە رەڤ، دز دێ تە حسابکەن دز 

هەمی کەس دزانن دز مروڤە 

وەکی ئاگرێ دزایە یێ زەعیفە

یێ دزیێ بکەت، دێ حیزیێ کەت

یێ نە ب سەر خودانی ڤە یێ دزی یە

گوتنا بەرێ هاتیە گوتن ل سەر دز ودزیاتیێ ویا نوکە خەلک دبێژن:

بەرێ دگوتن: دزێ دیکل دپاخلێدا

نوکە دبێژن: دزێ ملیار دبەنقێدا

بەرێ دگوتن: دزێ خومالە، دەر گرتن بەتالە

نوکە دبێژن: دزێ خومالە، خڕ دەرگەهـ ل پێش وی مان ڤالە

بەرێ دگوتن: خودان ودز بونە دوست، گا گورا ودەر ئێخست

نوکە دبێژن: دز وخودان بونە هەڤال گا ژکولەکێ برە مال، گوتن حەلال

بەرێ دگوتن: دز ئەو دزە ئەوێ دزیا ژدزا دکەت

نوکە دبێژن: ئەو دزە، دزیێ ژدزا بکەت، دسەررا گەفا لێ بکەت

بەرێ دگوتن: دزا ژدزا دزین، عەردو وعەسمان لەرزین

نوکە دبێژن: دزا ژمللەتێ خو دزین، نە هەست لەرزی، ونە مویێت سمبێلا هژین

بەرێ دگوتن: دایکا دزی جار سینگی دخوت وجار ل سینگی دەت

نوکە دبێژن: دایکا دزی هەر سینگی دخوت وهەستیکا دهەژارا وەردکەت

بەرێ دگوتن: دزا مالا خوبە، حیزا مێرێ خوبە

نوکە دبێژن: دزا وەلاتێ خوبە عەدەتە، وحیزا یارێ خوبە نە قوبحەتە

بەرێ دگوتن: دز هەر دزە، ئێکە، چ گایە چ هێکە

نوکە دبێژن: دز ئێکە، یێ ب بەر وپێکە، ل ڤێرێ ب دوشە بو وێرێ فرێکە

بەرێ دگوتن: دزێ نەگرتی سولتانە

نوکە دبێژن: دزێ راگرتی نە بەس میرە، شاهـ  وسولتانە

بەرێ دگوتن: دزیێ بکە، بەلێ دزیا ب ئیمان بکە

نوکە دبێژن: دزیێ نەکە، خو بێ ئیمان نەکە، هەژاری ژبیر نەکە

بەرێ دگوتن: دز دزا ناس دکەن

نوکە دبێژن: ژبەرهەر دوکان، فەقیر وژار ب ژاری ژیان

بەرێ دگوتن: رەحمەت ل گورا کفن دزی

نوکە دبێژن: نەعلەت بارن سەر کفن دزێ مری،  دگەل کوری یێ دار دقوینا مریارا کری

بەرێ دگوتن: دزێ ب بولیلە

نوکە دبێژن: دزێ ب بولیلە، یێ پڕ فەند حیلە، ناهێلیت ل دیف خو چ دیلە

بەرێ دگوتن: خونە ما مالێ دزیێ یە

نوکە دبێژن: ئەرێ وەیە، خوش گێرە یە، ببەن مالێ پیرەیە

بەرێ دگوتن: چ دزو بیت، یان رێزو بیت، دێ حال هوبیت

نوکە دبێژن: ئێک دزو بیت، یێ دی مێژو بیت، هەر دێ حالێ هەژاری هۆبیت

بەرێ دگوتن: خودانێ دزی، دزیدانێ ڤە رزی

نوکە دبێژن: ب گورزی دزی، ناکەت ترسا قازی، دێ وەسا ژیت ب سەرفەرازی

بەرێ دگوتن: دەرگەهێ خو بگرە، جیرانێ خو دز نەکە

نوکە دبێژن: دەر ودەربەند دڤەکرینە، چەند دهێت تێرا برینە

بەرێ دگوتن: من دزێ خو گرت

نوکە دبێژن: دزو تو من بەردە، من تو یێ بەردای، چێلێ ببە دگەل گای

بەرێ دگوتن: ژدزاڤە خڕ خەلک دزن

نوکە دبێژن: چنکی دزی یا بویە عەدەت نە قوبحەت

بەرێ دگوتن: حەفت جارا ل مالا خو بگەرە، پاشی جیرانێ خو دزکە

نوکە دبێژن: حەفت قاسا ب کرین، مال هەر دێ هێتە دزین

بەرێ دگوتن: دزێ دا، حیزێ دا، بەلێ بێ نەفسێ نە دا

نوکە دبێژن: دزا دزی، حیزا ب قوزی، ل برسیان زک قولزی

بەرێ دگوتن: دەرێ خو بگرە وجیرانێ خو نەکە دز

نوکە دبێژن: کی کەتیە خانی؟ دئێختە ستویێ جیرانی

بەرێ دگوتن: ئەگەر دیتم ئەزم، نە دیتم دزم

نوکە دبێژن: دیتم یان نەدیتم، دزم ونا بەزم، قەت دخو نا قەلزم

بەرێ دگوتن: دزیا دکەت ودسەررا سویندا ژی دخوت

نوکە دبێژن: دز مەمیانە، نە هەوجەی سویندانە، نەپەنە نیهانە

بەرێ دگوتن: دارێ خو راکە کتکا دز دێ رەڤیت

نوکە دبێژن: سەد جارا بێژە دزی تو دزی، نینە رەڤین ناکەت  بەزی

بەرێ دگوتن: مالێ دزی حەرامە، نابیتە خوارنا مروڤان

نوکە دبێژن: یێ ڤێ دبێژیت، دز ڤێ نا پێژیت 

بەرێ دگوتن:: نەکە رەڤ، دز دێ تە حسابکەن دز 

نوکە دبێژن: نە درەڤن ونە دبەزن، سەر ڤی کاری دلەیزن

بەرێ دگوتن: دز خومالە، نوبەداری بەتالە 

نوکە دبێژن: دز خومالە، نوبەدار هەڤالە

هەمی کەس دزانن دز مروڤە بەرێ دگوتن:

نوکە دبێژن: گایێ ساخ دەردئێخیت ژگوڤە

بەرێ دگوتن: ئەرێ دز وحیز بەحشتینە؟

نوکە دبێژن: هەکە وەبیت یێت ماین خڕ جەهنەمینە

بەرێ دگوتن: یێ نە ب سەر خودانی ڤە یێ دزی یە

نوکە دبێژن: مالێ دزی ریخا چێلێ یە وپشکلا پەزی یە

بەرێ دگوتن: یێ دزیێ بکەت، دێ حیزیێ کەت

نوکە دبێژن: دز دزە، حیز حیزە، وەکی گویێ دبن میزە

بەرێ دگوتن: ئاخڤتنێت دزان وەک یێت دینانە

نوکە دبێژن: ئاخڤتنێت دزا دنەپەنی نە

بەرێ دگوتن: تویرکێ دزان یێ کونە

نوکە دبێژن: تویرکێ دزان هەرێ پڕە 

بەرێ دگوتن: دەیکا دزی دو تڕا دکەت ئێکێ ژکەیفێ یا دی ژترسێ

نوکە دبێژن: ترس ل دەف دەیکا دزی نە مایە چنکی هەرا ب کەیفە 

بەرێ دگوتن: دەستێ دزا ب دزان نا هێتە برین

نوکە دبێژن: چنکی دز خڕ هەڤالن

بەرێ دگوتن: دز هەبن شەڤ رەش دمشەنە

نوکە دبێژن: دزێت دهەین ب شەڤ وروژ   

بەرێ دگوتن: شەڤ ئێکە ودز هزار

نوکە دبێژن:چ شەڤە چ روژە، دز زۆرە

بەرێ دگوتن: فلانکەس دزێ ب زەنگلە

نوکە دبێژن: ئەو دزە یێ ب پشت وملە

بەرێ دگوتن: وەکی ئاگرێ دزایە یێ زەعیفە

نوکە دبێژن: ئاگرێ دزا هەر یێ گەشە

بەرێ دگوتن: بەرێ من بازەبەر بیت، بلا دز گەلەک بن

نوکە دبێژن: بەربیت یان بازەبەربیت، ل نک دزا بێ ترس دبیت

بەرێ دگوتن: پارە ئیمان دزە

نوکە دبێژن: ئیمانا دزان پارەیە

بەرێ دگوتن: حیزا مێرێ خۆ بە، دزا مالا خۆ بە

نوکە دبێژن: حیزیێ ژی دکەت ودزیێ ژی دکەت

بەرێ دگوتن: دزیکەر نەبە وژحاکمی نە ترسە

نوکە دبێژن:حاکمێ خۆ ژدزا دکریت هەکە دێ مریت

بەرێ دگوتن: ژنا خدام یا حیز ودزە

نوکە دبێژن: هەکە خودانێ مالێ دزبیت بلا خدام حیز ودزبیت

بەرێ دگوتن: ژخالا دزا، هەمی خەلک دزە

نوکە دبێژن: نک جامێرا خەلک خوشکوکن، نک دزا دزوکن

بەرێ دگوتن: دزێ ب زەنگلە 

نوکە دبێژن: دزێ ب زەنگلە، وەکی مارێ بن گلگلە

٢٣-١-٢٠٢٠ دهوک – ئەحمەد عەلی