2. Euri azidoa

Ura, berezko egoeran, substantzia neutroa da; beraz, euriak ere neutroa izan behar luke. Baina Lurreko bazter batzuetan, zenbait gas erruz isurtzen dira atmosferara, errekuntzen ondorioz; CO₂ (karbono dioxidoa), NO (nitrogeno monoxidoa) eta SO₂ (sufre dioxidoa), besteak beste.

Atmosferan, nitrogeno eta sufre oxidoak aireko oxigenoarekin konbinatzen dira, eta konbinazio horien ondorioz eratutako konposatuak,urarekin nahasiz gero, HNO₃ (azido nitriko) eta H₂SO₄ (azido sulfuriko) bihurtzen dira. Euria egiten duenean, goitik datorkigun euri hori azidoa da eta kalte larriak eragiten ditu landaredian; hain larriak, basoak oso-osorik suntsi baititzake.