Teoria zinetikoak azaltzen ditu legeak
2.1. Boyle-Mariotteren legea
Boyle-Mariotteren legean, tenperaturak jarraitzen du. Teoria zinetikoaren arabera, gasak prozesu osoan tenperatura berean jarraitzen badu, horrek esan nahi du haren partikulak abiadura berean higitzen direla.
- Bolumena txikitzean, partikulak lehenago iritsiko dira hormetara, eta haien aurkako talka kopurua handitu egingo da.Horrek presioa handitzea eragingo du.
- Aitzitik, bolumena handitzen badugu, partikulek, abiadura berean higitzen direnez, denbora gehiago beharko dute ontziko hormekin talka egiteko, eta gasak eragindako presioa txikiagoa izango da.
2.2. Gay-Lussacen legea
Teoria zinetikoaren arabera, gas baten tenperatura igotzea partikulak arinago higitzen diren seinale da; hau da, haien higidura-abiadura handitu egiten da.
- Gasa berotzean, tenperatura igo eta partikulen abiadura handitu egingo da; beraz, gasaren partikulak lehenago iritsiko dira ontziko hormetara. Bolumenak bere horretan jarraitu eta hormen kontrako talka kopurua handitzen denez, presioa handitu egingo da.
- Ontzia hoztuz gero, gasaren partikulak motelago higituko dira, ontziko hormetara iristeko denbora luzeago beharko dute eta presioa txikituko da.
2.3. Charlesen legea
Teoria zinetikoaren arabera, gas baten partikulen higidura-abiadura handitzen bada, gasaren tenperatura igo egiten da.
- Partikulen higidura-abiadura handitzen bada, tenperaturak gora egingo du, eta gasaren partikulak lehenago iritsiko dira ontziko hormetaraino. Ez badugu gasaren presioa handitzea nahi, ontziaren bolumenak handiagoa izan behar du.
- Tenperatura jaisten denean, ontziaren bolumena txikitu behar da,presio konstanteari eustearren.Partikulak motelago higitzen dira, eta beraz, bolumena txikitzean, segundoko talka kopuruak konstante jarraizten du.