நேசிப்பாயா-  Nesippaya - திரை விமர்சனம் - 3/5அ

காதல் + ஆக்‌ஷன் என்ற களம் விஷ்ணுவர்தனுக்கு புதிதல்ல. 'அறிந்தும் அறியாமலும்', 'பட்டியல்', 'சர்வம்' என தமிழிலேயே விஷ்ணுவர்தன் இதற்கு முன் இந்த களத்தில் பல நல்ல முயற்சிகளை எடுத்திருக்கிறார் எனலாம். அதுவும் புதுமுகங்கள் அல்லது மக்களுக்கு பரீட்சயம் குறைந்த முகங்களை மக்கள் மனதில் பதிய வைக்கும் இயக்குநராகவும் அறியப்பட்டவர் விஷ்ணுவர்தன்..

அப்படியிருக்க, மறைந்த நடிகர் முரளியின் இளைய மகனும், நடிகர் அதர்வாவின் தம்பியுமான ஆகாஷ் முரளி மற்றும் இயக்குநர் ஷங்கரின் மகளுமான அதிதி ஷங்கர் ஆகியோரை பிரதான கதாபாத்திரத்தில் நடிக்க வைத்து, 'நேசிப்பாயா' திரைப்படத்தை விஷ்ணுவர்தன் எடுத்திருக்கிறார்.

இந்த திரைப்படம் பொங்கலுக்கு வெளியாகிறது என அறிவிக்கப்பட்டபோது ரசிகர்கள் மத்தியில் சிறு சிறு பேச்சுக்கள் எழுந்தன. காரணம், சங்கரின் 'கேம் சேஞ்சர்' ஜன.10ஆம் தேதி ரிலீஸ் என அறிவிக்கப்பட்டிருந்ததால், நேசிப்பாயா திரைப்படமும் பொங்கலுக்கு ரிலீஸ் ஆவதால் 'பொங்கல் ரேஸில் - தந்தை vs மகள்' என சமூக வலைதளங்களில் பேசப்பட்டது.

அதேபோல், இந்த திரைப்படத்தை தயாரித்த XB பிலீம் கிரியேட்டர்ஸ் இதற்கு முன் விஜய் நடிப்பில் 'மாஸ்டர்' திரைப்படத்தை தயாரித்து 2021 பொங்கலை முன்னிட்டு ரிலீஸ் செய்திருந்தனர். மாஸ்டர் திரைப்படத்திற்கு பிறகு அவர்கள் தயாரித்த 'நேசிப்பாயா' திரைப்படமும் பொங்கலுக்கு ரிலீஸ் ஆகிறது என்பதால் மாஸ்டரை போல் இதுவும் வெற்றி பெறுமா எனவும் கேள்வி இருந்தது. மேலும், வெளிநாட்டு ஒளிப்பதிவாளர், ஸ்ரீகர் பிரசாத் படத்தொகுப்பு, யுவன் சங்கர் ராஜா இசை என பல்வேறு எதிர்பார்ப்புகளும் இருந்தது.

காதல் சார்ந்த திரைப்படம் என்றாலும் காதல் காட்சிகளை நறுக் சுறுக் என வைத்தது பெரிய பிளஸ். ஆனால் அது முதல் பாதியில் மட்டும்தான்... பிற்பாதியில் இன்னும் சில இடங்களில் நறுக்கியிருக்கலாம். அதை பின்னர் பார்ப்போம். ஒளிப்பதிவு, காட்சியமைப்பு ஆகியவை நம் கவனத்தை சிதறடிக்காமல் கதைக்குள் ஈர்க்கும் வண்ணம் இருந்தது. யுவனின் இசையும் ஆங்காங்கே கைக்கொடுத்தது. விஷ்ணுவர்தனின் சிக்னேச்சர் வசனங்களும் படத்திற்கு பிளஸ் எனலாம். உதாரணத்திற்கு, கதாநாயகி, கதாநாயகனிடம் காதலை வெளிப்படுத்தும் காட்சியை சொல்லலாம்.

கண்டிப்பாக, எந்த படத்தையும் பார்க்காதீர்கள் என சொல்லும் உரிமை யாருக்கும் கிடையாது. அதேநேரத்தில் நீங்கள் கொடுக்கும் டிக்கெட்டின் விலை, பார்க்கிங் விலை, திரையரங்கில் உண்ணும் உணவுகளின் விலை, உங்களின் 3 மணிநேரம் ஆகியவைக்கு எந்த மதிப்பும் இல்லை என நினைத்தால், நிச்சயம் நேசிப்பாயா திரைப்படத்தை திரையரங்கில் சென்று பார்க்கலாம்.