கேம்சேஞ்சர் - GameChanger -  திரை விமர்சனம் - 4/5

ராம் சரண், கியாரா அத்வானி, எஸ்.ஜே. சூர்யா, அஞ்சலி, ஸ்ரீகாந்த் உள்ளிட்டோரை வைத்து ஷங்கர் இயக்கத்தில் உருவான கேம் சேஞ்சர் படம் இன்று ரிலீஸாகியிருக்கிறது.இந்திய அரசியலில் இருக்கும் ஊழலை மையமாக வைத்து எடுக்கப்பட்டிருக்கும் அரசியல் ஆக்ஷன் டிராமா கேம் சேஞ்சர்.

முதல்வர் பொப்பிலி சத்யமூர்த்தியின்(ஸ்ரீகாந்த்) பதவிக்காலம் முடியப் போகிறது. இதையடுத்து அப்பாவின் பதவிக்கு தான் வர வேண்டும் என பொப்பிலி மொபிதேவி(எஸ்.ஜே. சூர்யா) ஆசைப்படுகிறார்.

இந்நிலையில் கலெக்டராக வந்திருக்கும் ராம் நந்தனோ(ராம் சரண்) ஊழல்வாதியான மொபிதேவி முதல்வராகிவிடக் கூடாது என களத்தில் இறங்கி வேலை செய்கிறார்.

மொபிதேவியை வெற்றி பெறவிடாமல் ராம் நந்தன் என்ன செய்கிறார்?. அப்பண்ணா, பார்வதி எதற்காக போராடினார்கள்?, அப்பண்ணா நினைத்தது நடந்ததா? ராம் நந்தன் எதிர்பார்த்தது போன்று தேர்தல் நடந்ததா என்பதே கதை.

அப்பண்ணா, ராம் நந்தனாக அசத்தியிருக்கிறார் ராம் சரண். ஐபிஎஸ் அதிகாரியான பிறகு மீண்டும் தேர்வு எழுதி ஐஏஎஸ் அதிகாரியாகி ஊழலுக்கு எதிராக போராடும் ராம் நந்தனின் கதாபாத்திரம் ஸ்டைலாக உள்ளது. அப்பண்ணாவின் கதாபாத்திரம் ரசிகர்களை வெகுவாக கவர்கிறது

ராம் நந்தனின் காதலி தீபிகாவாக நடித்திருக்கிறார் கியாரா அத்வானி. ராம், தீபிகாவின் காதல் டிராக் பெரிதாக கவரவில்லை. அதே சமயம் அப்பண்ணாவின் மனைவி பார்வதியாக வந்து அனைவரின் கவனத்தையும் ஈர்த்திருக்கிறார் அஞ்சலி. கியாராவை விட அஞ்சலிக்கு தான் வெயிட்டான கதாபாத்திரம்.

வில்லன் பொப்பிலி சத்யமூர்த்தியாக மிரட்டியிருக்கிறார் ஸ்ரீகாந்த். பொப்பிலி மொபிதேவியாக சிறப்பாக நடித்திருக்கிறார் எஸ்.ஜே.சூர்யா.

படத்தின் முதல் பாதி ராம் நந்தன் கல்லூரி மாணவராக இருந்து ஐபிஎஸ் ஆவதை காட்டுகிறது. முதல் பாதியில் காமெடி கை கொடுக்கவில்லை. ஆனால் இடைவேளை டுவிஸ்ட் நன்றாக இருக்கிறது. இரண்டாம் பாதி பரபரப்பாக செல்கிறது.

தமனின் இசை படத்திற்கு பக்கபலம். ஜரகண்டி பாடல் அனைவரையும் கவரும்படி இருக்கிறது.திருவின் ஒளிப்பதிவு அருமை.

பக்கா கமர்ஷியல் படமாக வந்திருக்கிறது கேம் சேஞ்சர். கமர்ஷியல் படம் பார்க்க விரும்புபவர்களுக்கு ஏற்றது கேம் சேஞ்சர்.