Nicolaus, Dei gratia Rigensis episcopus, universis Christi fidelibus, tam futuris, quam praesentibus, feliciter consumari. Cum fidei fons, exortus in Riga, rivos suos in diversas provincias idolatria delusa derivaverit, nomenque Domini nostri Iesu Christi, gentibus incognitum, notificaverit; absurdum valde videretur et indignum, ut his, qui huic fonti laboribus plurimis et expensis non modicis consolationis fomenta praebebant, irriguo privarentur.
Hinc est, quod universitati vestrae notum esse volumus, quod nos, de consensu et voluntate capituli nostri, nec non honestorum ac prudentum virorum peregrinorum, et aliorum, tunc praesentium, consilio, de terris, videlicet Osilia, Curlandia, Semigallia, exceptis Mederothe, Uppernede, post discessum domini Mutinensis episcopi, tunc in partibus Livoniae apostolicae sedis legati, Domino acquisitis seu deinceps acquirendis, tertiam partem, cum omni iure temporali, decimarum et locatione ecclesiarum, civibus Rigensibus ac eorum haeredibus utriusque sexus in beneficio porreximus, ita tameo, ut ecclesias dotent, et nobis personas idoneas repraesentent, quae a nobis curam recipiant animarum, et tam laici quam clerici nobis in synodalibus obediant. Quicunque autem vice episcopi ecclesias synodi causa visitaverit, cum septem equitaturis procurabitur.
Praefatum autem beneficium duodecim consules nomine ipsius civitatis receperunt, iuramento fidelitatis ecclesiae Rigensi et nobis praestito, quod ipsam civitatem Rigam, et omnes terminos episcopatus nostri, contra quaelibet, excepto imperio, defendant, et eam fidem nobis servent, quam fideles suo domino servare tenentur, idem per omnia successoribus nostris servaturi. Si autem ex his duodecim quis morte vel quocunque alio modo a consilio civitatis cesserit, successor ipsius nobis homagium facere et secundum praescriptam formam iurare tenetur. Inter cetera talem addimus distinctionem, quod de terris praetaxatis, quantum ad dioecesin Rigensem pertinebunt, rata erunt omnia, secundum tenorem praelibatum. In episcopatibus autem in posterum creandis partes nostras interponemus fideliter pro civibus iam dictis, ut obtineant portionem suam, quam tenebunt de manibus episcoporum instituendorum. Et ne series huius rationabilis facti oblivione labatur, aut scrupulum contradictionis admittat; praesens scriptum nostro, ecclesiaeque nostrae, nec non domus fratrum militiae Christi sigillis roboramus.
Testes huius facti sunt: Iohannes praepositus. Mauritius prior. Henricus, camerarius ecclesiae Rigensis. lordanis, plebanus scti Petri, eiusdem ecclesiae canonicus. Arnoldus, capellanus noster. Magister Volquinus. Rodolfus de Casle, Gerfridus Widikee, fratres militiae Christi. Nobilis vir, dominus Albertus de Arnestein. Hildemarus Scoke, Conradus et Volquious de Halle, peregrini. Waltherus miles, Theodoricus de Berewich, Iohannes de Raceborg, Fridericus de Lubeke, Henricus filius Ertmari , cives Rigenses.
Datum anno gratiae MCCXXXI. V. idus Augusti, indictione IV, pontificatus nostri anno primo.