ՆՈՐ ԼԻԲԱՆԱՆ
Ազատութեան արշալոյսը խափանուած
Կը ծագի հիմա... արա՜գ ոտնաձայներով...
Շատեր տարակոյսով, խոնջած հարբածին նման,
Կը բանան իրենց պատուհանները տաք շողերուն,
Որ կը թափանցէ հետզհետէ տուներէն ներս սմքած…
Արեւագալ է Լիբանանի տօնացոյցին մէջ տխրահռչակ,
Այսօր տօնահանդէս է վաղուց սպասուած։
Կռունկները կանչելու կ’իջնեն ծովափ՝ մայրերը
կարօտաբաղձ։
Պատերազմի ուրուականը չքացաւ... կը գոռան ոմանք։
Գեղեցիկ է ազատութիւնը... կ’աղաղակեն ուրիշներ։
Անկցի՜ բռնատիրութիւնը՝ որ կողմէն ալ գայ ան...
կը ձայնակցին հազարներ։
Հարսանիք է։ Ողջագուրում ամէնուրեք։
Անկախութեան շքահանդէսն է՝ նո՜ր Լիբանանին՝
Որ կը ցցէ գլուխը յաղթական՝ մահաքունէն զարթնած։
2005