ՀԻՆԳԵՐՈՒ ԲԱԳԻՆԸ

Լիզպոնի տղոց յիշատակին

Երէկ,

Հինգ նոր զոհեր ինկան

         մարտի դաշտին վրայ.

Տեսիլքի վկաներ՝ անոնք շրջեցին

         ընթացքը պայքարին:

Որքան դաժան էր ելքը ընտրանքին,

         դաժա´ն ճակատագրին,

Եւ սակայն, անոնք նոր էջ մը բացին

         հայոց դիւցազնավէպին:

Որքան անգութ ու անտարբեր մարդկութեան դիրքը՝

         արդարութեան կանչին,

Նոյնքան վճռակամ հայուն կամքը՝

         անոր բարեշրջումին:

Պիտի գայ օրը, արար աշխարհ ողբայ

         պիտի ցեղիս տառապանքը,

Ողջակիզումը, որ նպատակի ճամբուն վրայ

         գիտէ արեան գետեր ծորել։

Պիտի գայ օրը, երբ ողջ մարդկութիւնը խոնարհի´

         պիտի միլիոններու բագինին առաջ,

Ու զմայլի ճիտին, որ կանգուն կը պահէ

         բագինը, նոր հերոսներ ծնանելով:

1983