کوردی

\ 

 ژیانا مروڤی : دەمێ بەرێ ئو دەمێ نوکە  

      یێ گوهێ نەدەتە مەزنا ، دێ لێهێن شاخێت بزنا

     لدیوان وکوچکێت د بەرێ مروڤەکێ سەرە  دا سوحبەتکێ یان سەرهاتیەکێ یان چیروکەکێ یان سترانەکێ یان نسحەتەکێ دا بێژیت هەمی ئەو کەسێت ل وێرێ ، پیرەمیربان یان جحێل بان بچیک بان یان مەزنبان دا گوهان دەنێ قازانج وسود بو خو ژێ وەردگرتن. نوکە ل ئەڤان جها تو ڤی نابینی چنکی پانزدە پێگڤە ژ بچیک و گەنجا  دێ ئاخڤن ئو کەس دکەسێ ناگەهیت ئو کەس ژ وان بهای ژ ئێک و دو نا وەرگرن ئو چەند مروڤێت زانا و تێگەهشتی ل وێرێ د مت وکەرن نا ئاخڤن چنکی کەس ژ وان لێبوکا پیتی نا دەنە گوتنا وان.

گوهداریا ب سود چێترە ژ بەشداری بێ بها وسود  

    ئەگەر نە گوڵ بی ، نە بە ستری

         ئەگەر دو کەس لێ کەتبانە یان ب جرە چوبانە چ ل کولانەکێ یان ل سویک وبازارا مروڤێت خێرخاز دا کەڤنە دناڤ بەینا واندا دا ژێک ڤەکەن و دەنە پاش ونەدهێلان مەزنبیت ئو دا پێک ئینن. نوکە ئەگەر وەسا چێبو هەر ئێک ژ رەخێ خوڤە دێ هێت وموبایل کارکری وێنا د گرت و ڤیدیودکەت ئو بزوتا دەنە بن وان دا پتر جەنگ بەردەوامبیت وڤەکێشیت.   

خو بدە پاش ژ ڤان کارێت چەپ وخار

هاریکاریا ل تەنگاڤیێ چێترە ژ زێدە پێنگاڤیێ

        ئەگەر مروڤەک کەتبا ئاڤێ یان ترمبێلا وی وەرگێریابە یان مالا ئێکی سوتبا خەلکێ ل وێڕێ دا بلەز وبەز دەست ئانەهیێ و هاریکاریێ درێژکەن بو وان ئو ژوێ تەنگاڤیێ دەر دئینان. نوکە دڤان رەنگە تەنگاڤیادا بارا پتر تەماشەکەرن، وێنەگرن، ڤیدیوگرن ئو خودانێ تویشێ دبن دەست پێت واندا وندادبن ودمرن وبن گەردبن وبەرپیا دچێن.  

یێ تویشێ رویدانەکێ بیت زورا گرنگە دەستێ ئالیکاریێ ب نک ڤە بچیت  

ئاقڵ تانجا زێرینە بەس د سەرێ هەمی کەسان نینە

            ئەو کەسێ خندقی یان مری یان سوتی دا خەلکەکی خێرخاز دا وان راکەن وبەنە گورخانا ب شێوەکێ جان ودرست. بەلێ خێرخازێت نوکە تو نوزانی کا وی دکیری را ناڤێ وی بدرستی دگەل وێنەکێ وی ئینا و بەلاڤکر دگروپیدا ئو دێ مینیت وچاڤێ وی لێ بیت کا چەند پێخوشی دێ بو وی هێن ئو ژ بیردکەت کا چ ل وی مری هات ئو کیڤە بر.   

خو دویر بێخە ژ ڤان رەنگە رەوشتا چنکی 

مرن کەرێ بەقالانە بەر دەرێ هەمی مالانە  

    نەزانو بەرێ خو بدە جیرانو

          دەما مێڤانەکی یان پسیارکەرکی قەستا مالەکێ کربا ئو دەر قوتابا بچیکێ وێ خێزانێ بخێرهاتنکا جوان ب وان کەسان د کر ئو ب رەنگەکێ درست سەربەسەردکرن. بەلێ نوکە دێ بینی بچێکێ سێ سالی ل پشت دەری بدەنگەکێ بلند دێ کەتە قێژی ل وان کەسا ئو دێ بێژیت هەرن کەس ل ڤێرێ نینە یان بابێ من یێ نڤستییە یان دەیکا منا گوتی دەرگەهی بو کەسێ نەڤەکەن.

بکە کارێ باش ، خو ژ کارێ خراب بدە پاش 

   رەشو ب دەستێت خو هەکە ئاڤ دێ تە بەت

       خویندەڤانێ بەرێ هەبون پەرتوکێت قوتابخانێ دگەل ئەوا سەیدا بو دگوت ل وێرێ، بێ مەلزەمە، بێ ماموستایێ تایبەت، بێ قورس وسیدی ئو بێ خاپاندن ئو بێ هەمی تشت بەس یێ سەرکەفتی بو ئو دگەهشتە پێنگاڤێت بەرزو بلند. بەلی نوکە ئەڤە هەمیێت د هەین ئو هێشتا پتر ژ ئەڤا ئو گەلەک رەنگێت دی، بەلێ تو باش د بینی هەرێ بنکەفتی یە ئو ژ زانینێ کێما وەرگرتی ئو یێ ڤالایە ژ گەلەک تشتێت پێدڤی دژیانێ دا.  

 راستو درستو ،خارو شکەستو 

  چەند رامان ورەوشتێت بەروڤاژی دناڤ جڤاکێ:

·        زورێت دهەین کەیف وشاد وبەختەوەر دبن ب تارێت وئاریش وئاستەنگێت مروڤێت خو ئو توند وتورە ودامای دبن ب سەرکەڤتن وپێش کەڤتنا مروڤ کەس وخزم وخویانیێت خو.

·        دبەرێدا هەڤال وهوگر ودوستەبرا دکێم بون، بەلێ ئەو دشیان خو بدەنە کوژتن سەرا تە دەمی تەنگاڤیا، بەس نوکە تە بهزاران دهەین سەر فێسبوک تویتەرێ وئنستگرامی، بەس هەکە تو مری کەسێ هاژتەنینە. هەڤالێ گاڤێ یە.

·        بچیک وزاروکێت بەرێ ژبلی کار وکوکێت مالێ دکرن پێش دەیباباڤە، هەر یێ پر بزاڤبو ب گەلەک رەنگ وجورێت یاریاڤە ژدەرڤە، وان زاخ وهێز ددایێ ئو دویر دئێخست ژدەرد وئیشا، نوکە یێ سەر قانا پشتێ ب ئای پاد وموبایل ولاپتوپی ڤە بو دەمەکێ درێژ، لەوما هەر دەم یێ تویشێ ئێش وژانایە ئو یێ بەرهەنگارێ نساخیا یە.

·        سەرەدانێت خێزانی بو کەس وکارا یا گشت وپێگڤەبو، بەرنیاسین وڤیان ودلپیڤەیێ یا موکم ودژوار بو دناڤ بەرا هەمی خێزانا، بەلێ نوکە زوربەی سەردانا یا کت کتەیە، ئو دبیتە دەلیڤە بو کەنج وتولازا کو بمینن پتنێ ل مال. ژبەر هندێ بەرنیاسبین وئەڤین یا کێم بوی دناڤ بەرا وان کەس وکارادا ب رەنگەکێ ئاشکرا ودیار.

·        نوکە دمالێدا سفکا دایێ داپیرە، ئانکو دەیک یا ب کارێ کچێ رادبیت ئو کچ یا مژیلە پئنترنێتێ ڤە یان پێش تلڤزیونێ، نەل منێ نە ل تەیێ.

·        بژار وژیری وبجلکیت دریای وپاتەکەری، خویندەڤانێ بەرێ سود ونەرخ  ژدەمێت خو دبرن ل خاندنگەها ئو دگەهشتە پلێت بلند ب زانین وتێگەهەشتنا خو، نوکە یێ بێ قوسیرە ژهەمی ئالاڤە، بەلێ سەحکێ یێ ڤالەیە ژزور پێزانینێت ژیانێ ئو ناگەهتە بنەجهێ وقویناغەکا درست ژبەر گەلەک ئەگەرێت نازاندنێ.

·        باب وباپیرێت مە قەر ودەین دگەل ئێک دکرن، قەرەبون دناڤ بەرا واندا ئاخڤتن بو، بەلێ نوکە فەند وفێلی، فێلباز وتەشقەلی, حیلە وجەمبازی یا مشەبو، ئەڤە دهێنەکرن ل سەر بیانیا حەتا دگەهتە خویانیا. کەس ژێ ناهێتە پارازتن.

·        ل نک گەلەکا دزی وکارێت چەپەل یا بویە جهێ زیرەکیێ وتێگەهشتنێ، ئو ئەو کەسێ خو دەتە پاش ژڤان کارا دبێژنێ ترسنوک وزشیم وژخوخلاس وبکێرنەهاتی.

·        دگەلەک جارادا مروڤێ بیانێ پتر یێ بەرهەڤ وئامادەیە بوهاریکاریێ ژنێزیکترین مروڤێت وی دەما تارێتەک لێ پەیدا دبیت ئو دکەڤتە ئاستەنگەکا گران.

بەپەلە

ئانها ئو بلەز من قەستا کەنالێ تلەڤزیونێ کر، چنکی من بەرنامەکێ راستە خو یێ هەی دا پێشکێشی هاولاتیا بکەم ب شوێوەکێ ئێکسەر. نوکە ئەزێ دستودیوێ ڤە، نهو خڕ کارمەندان یێت خو ئامەدەدکەن بو بجهئینانا ڤی بەرنامەی هو یێ گرنگ سەر هێرێشیت تورکیایێ ل سەر عەفرینێ. وان گوتە من تەنها تو یێ ل سەرهەوای ئو دەملدەست باخڤە. ئو ئەنها ئەزێ دپەییڤم ب رەنگەکێ زندی یان ب زیندی بێ راوستیان. ئیستا من بابەتێ خو  ب دویماهێ ئینا دگەل هەوە، نها هیڤیدارم هەوە سود ومفا ژڤان پەڤێت پەتی ورەسەن یێت هەڤ بەش دزمانێ کوردیدا وەرگرتبن وژبیرا هەوە نەچیت، چنکی هەر کەنالەک بو خو ئێکا ژوان یا گرتی وبکار دهینیت دیف مەراما خو، ڤێجا دڤێت هوین رامانا وان بزانن ل هەمی دەما ب درستی چنکی هەمێ حەتا رادەکێ هەر ئێکن.

  ١٧-١-٢٠١٨ دهوک

"میرم گەرم کە"

           میری نامەکەک هەبو دا فرێکەت بو جهەکێ دویر وتایبەت ب نهێنی. دەمێ سالێ زڤستان بو، بەفرێ هەمی رێک گرتبون، زورا مەترسی بو کو ب گەهنە وێ قویناغێ ب ساخی. چنکێ بابەت یێ گرنگبو وی گوتە پیرمەندێ خو عیسێ ریەکێ نیشان من بدە  کا دێ چەوا ڤێ نامێ گەهینیم. وی گوتە میری قاسدی گەرم کە میرێ من. ڤێجا میری گوتە زەلاما جلکێت گەرم وستویر بکەنە بەر دا ب هێتە پارازتن ژ سەرمایێ. بەلێ مەخابن چیێ دچو نە دزڤریڤە، دمر ناڤ بەفرێدا برێڤە. جلکێت ستویر ج بهایێ خو نەئینا. میری گوت عیسو ئەڤە کەتە بەرێ تە، ئینا پیرمەندی ئێک هەلبژارت وگوتێ ئەڤە چەند زێرەک بوتە ئو دەما تو ڤەگەریای دێ تەمەت ڤان دەمە تە: دێ هەرە وخو زیرەکە ئو زوی بزڤرە ڤە. قاسدی دو پێ هەبون ودوێت دی قەرکرن وبرێکەت ، هەر بهنەکێ دراوستیا سەحدکرە زێرا کەیفا وی دهات وپتر بلەز دچو ئو قەت ب سەرمایێ نە دحەسیا. ئو ل هاتنێ دگوتە خو عیسێ دێ هندی ڤان ژی دەتە من، ڤێجا پتر گەرم دبو. قاسدیا خو ب چهئینا بدرستی ئو زڤری کوچکا میری. میری گوتێ تو ب ڤان جلکا چوبوی. گوتێ بەلێ میر، میر ما حێبەتی، ئینا گوتە عیسێ ئەڤە چەوا چێبو ؟ کا بیژنە من. عیسێ بەرسڤ دا: میر من گەرم کربو ب دراڤا ئو تە گەرم دکر ب جلکا. پارا وەلێکر کو ب سەرمایێ نەحەسیێت میرێ من.

  ناڤێ من دلگەشە

         ناڤێ من دلگەشە، ئەز کچەکا کوردم دژێم دناڤ گوندەکێ کوردستانێ، وارێ باب وباپیرا. خانیێ مە یە، باپیرێ من یێ ئاڤاکری ب دەستێت خو ئو بهاری کاریا گوندییا ب رەنگەکێ زبارە. نە بێژن کوڵکە یان ژی زنجە، یێ هاتیە چێکرن ژلبنا، بگاریتا، بلەڤەنا، بحێسلکا، بشەقلا، بئاخێ. دەیکا من یێ کورتانەکری  پاشی یێ هونی وهوسی ب دەست ولەپێت خو زێرین. بلا پەنجەرا بچیک بیت بو من نە خەمە، بەسە ئەز هەرو سەرێ خو ژێ دەربێخم وسەحکەمە دنیا بەر فرەهو گەش. دڤێ پەنجەرێرا وەک تلەڤزیونێ ئەز دێ بو هەوە هەرو کورتە سەرهاتیەکێ بێژم و پێش کێش کەم ب دلەکێ پر ئەڤین ئو ب رویەکێ بکەیف وشادی وگرنژی. ل من نەگرن گەلی هەڤالان ئەگەر ئەز نەیا خەملاندی ونە یا پێش کێش بم، جل وبەرگێت من نە دجانبن وەکی هوین حەزدکەن. بەس ئەز دێ ب زمانێ خو یێ رەوان ونەرم ب کوردیەکا پەتی ژ گوتن و چیروک وسەرهاتیێت باب وباپیرا وەل هەوە کەم هوین خو ژ بیرڤەکەن ئو چاڤێت هەوە بمینن زل ل دەڤێ من. نەبێژن تو یا بچیکی، تو چ نوزانی بێژی، وەنینە دەیبابێت من ئەز یا فێرکرم وپرکرم ژ ئاخفتن وبێژە وگوتنێت مەزنا زەند وحێبەتی سەرێ هەوە بگریت ئو بمینن بێ هش و سەودا ومەندەهوش ژ بەر ئەوا ئەز د بێژم د راستا مللەتێ مە یێ کورد یێ پر تور وکەلەپور ودەولەمەند ژهەمی لایاڤە. زمانێ من زمانێ دایکی یە، پەیڤێت من پەیڤێت رەسەنن، لێکداینە ژ بەند وبێژەیا ژستران وهەلبەست ونارینکا. ئەز باخچێ زاروکامە، جەمێ لاوانم، هوزانێت دلدارانم، هەلبەستا گەنجانم، بستانێ پیرامە. سەیرانگەهم بو هەمی کەسا، دەریایەکا بێ بنم، پرم ژ درومراریا ژ هەمی رەنگ وتاما. نوژدارم بو ئێش ودەردا، مەلحەمێ سەروبرینا مە. هوزانا دڤەهینم بو دلدارا، سرودا دبێژم بو وەلات پارێزا، هەلبەستا دکەمە دیاری بوهەژار وبەلەنگازا. خەم رەڤینم، پر ڤین وئەڤینم، تژی هەستم، رەوشا هەمی مالامە، دل ڤەکەرا خەریب ومەستامە، کلیلکا خر دلامە. ئاش کەرا زیز وسلامە. دلگەشم ، سەر خاکا کوردستانێ دهێم ومەشم دل سپی مە نە یا دل رەشم، نە یا دل رەشم هەرا دل گەشم ئەز  ناڤ خوشم دلگەشم.

26 / 9 /2016  ئەحمەد عەلی

سەیدا وسولتان ورەڤدا کەران

       ل دەمەکێ بوری دڤێ جیهانێ دا سولتانەک هەبو رەڤدەکا کەرا خودان کربو ل ناڤ باخچەی، کاڤانانەک دانا بو بەر بو بو خزمەتا وان. بەلێ وان کەرا گەلەک زیان وخرابی دگەهاندنە دار وبارا. روژەکێ هزرەکێ خو ل سەرێ ویدا گوت ما دەم سەیدا دشێن زاروکا فێرکەن ب شێوەکێ درست، دێ شێن چارەسەریەکێ دەنە ڤان کەرا. گوتە ئێلچیا هەرن زیرەکترین سەیدایێ ل باژێری بو من بینن. دەما سەیدا ئامەدەبو بەر وی گوتێ: دێ پولەکێ بو ڤان کەرا ڤەکەی دا فێرکەیە رەوشتا. وی بەرسڤ دا گوت: زاروک پتر پێدڤیێ ڤێ چەندێنە سولتانێ بەرێز.سولتانێ گوتێ هەکە تو وەنەکەی تو دزانی دێ چ هینمە سەرێ تە. مولەت بو تە سێ هەیڤ دا تو ب ڤێ چەندی ب چهبینی. پشتی سێ هەیڤ بورین سەیدا ڤەگەریا نک سولتانی دەست ژپیا درێژ تر. سولتانی گوتێ ها سەیدا تە چکر تەکەرێت من فیرکرن یان نە. گوت بەلێ. گوتێ چەوا؟ گوت: من نیشا واندا ئەڤ سێ پەیڤە: یان، یان، یان !!! ئینا گوتێ ئەڤە چیە؟ من دڤێت ئەز بزانم رامان ژوان چیە؟. سەیدای گوت: من لاڤ ژخودێکر یان مەژی بدەتە وان کەرا یان خودێ مەژی ژسەرێ تەببەت بدرستی کو تو شێت ببی یان خودێ ئەزمانێ من شلکەت کو ئەز نەشێم باخڤم دا ئەز ژڤێ ئاستەنگێ قورتالبم سولتانێ هێژا. راستە کی دشێت کەرا تێبگەهینیت.

١٠-١-٢٠١٧ دهوک

مەتەلا مە ژی شپتێ "خالو خوارزایە" 

دبێژن کورە جحێلەک چو ئاشی، ئاشەڤان خالێ ویێ درست  بو، خوارزای ددلێ خودا دکر ودگوت: ئەز دبێژم خالێ منە مزی ژمن نا وەرگریت. هەر وەسا خالێ ژی ددلێ خودا دگوت دەما کورێ خویشکا خۆ دیتی: ئەڤە خوارزایێ منێ هاتی دێ کەپولکەکا زێدە دەتە من.

مزە = ئارە ل جهێ پارەی

کەپولک =  وەک ترارەکی یە دبن ئاری دهلینن دەنە ئاشەڤانی ل پێش پارەی ڤە.

پرسیار: هوین چ دبێژن بو کێ دکەڤیت خال مزێ ژ خوارزای نا وەرگریت؟ یان خوارزا کەپولەکا زێدە دێ دەتە خالێ؟؟؟

 بەرسڤ چیە؟

یان ژی مەتەلا مە وەک ڤێ گوتنا کوردی یە ئەوا دبێژیت:

"ئاشڤانى ئاش دئالیسیت وئێکى ئاشڤان دئالیست"

 میری گوت :"نە کێم کەت، نە زێدەکەت" 

      دەمەک پێ چو، پشتی عیسوی کوچکا میری هێلای ژبەر سەدەما تیپشکی. میری خەریبیا ویکر ودڤیا ب ڤەگەرینیت، بەس نەدزانی کا ل کیرێ یە. ژبەر هندێ، گوتە هندەک زەلاما بەرخەکی ببەن ئو بگێرینن ل ڤان گوندا ورەخ ودورا ب ڤی مەرجی کو ئەو بەرخە " نەکێم کەت، ئو نە زێدەکەت" دەمێ سالەکێ یێ ب شێت دێ دیاریەکێ وەلگریت، ئو یێ وەبکەت ونەشێت ڤی مەرجی ب درستی بینیت، دێ تەوان باربیت ل نک میری. مەبەستا وی ئەو بو ف جهێ عیسێ ب کەڤیت. کەسێ دخورا نەدیت ڤی مەرجی بجهبینیت. عیسێ سەر خو قەبیل کر. سال دەم بوری ئوهاتن ئەو بەرخێ نیشان ومەرج کری برنە دەف میری، میر ما مەندە‌هوش و حێبەتی کو ئەو بەرخە هەر وەکی خویە، میر پشت راست بو کو ئەڤە پیرمەندێ وی عیسوی یێ وەکری ئو ف جهێ وی کەت. چەوا ئەو شیا وەبکەت: هەرو ئەو بەرخە تێر دکر ئو بەری روژ ئاڤا دا هەردو گوهێت کودیکەکێ گورگێ نیشا دەت بو دەمکێ کورت، ئەڤ کارە شیا بەرخی ب هێلتە سەر وی کێشانێ ژ بەر ترسا گورگی.

محو وبابێ کورە

      ل باژێرێ دهوکێ ئو بتایبەت ل گرێ باصێ کو دگوتنێ دسالێت شێستێدا مەحلا گینیکا. ل دەمێ شورەشا کوردا دگەڵ رژێمێت بن گور. زور گوند وێران بون ئو گەلەک خەلک ئاوەرە ومشخت بون، هند خێزانا قەستا دهوکێ کربو. محو وبابێ خو یێ کورە ژوان تالان ڤێ کەتی بون. کارێ وان گەریان وخازوکی بو چنکی محوی نەدشیا چ شولا بکەت ژبەر بابێ خو یێ کورە چنکی ئەو یێ پێدڤیێ چاڤدانێ بو. زوربەی جارا دنڤستن ل کولانا ل بەر دیوارا یان دناڤ کولکادا. ژبەر هەژاری وبەلنگازیا وان دەیکا من ئودەکا بچیک بو وان ڤالاکر.

         دەما من خاندنا خو ب تەمامی دهینا ئەز دچومە نک وان، بابێ کورە سوحبەت وسەرهاتیێت خوش دگوتن. ل وی دەمی من بهایێ وان گوتن وبێژا نەدزانی ئەوێت دهاتن سەر زارێ وی. بەس من زور ژبەر کربون بێ ئەز بزانم کا مەبەست ورامان ژێ چییە؟

        ئێک ژوان گوتنێت وی پیرمەندی بو من گوتی ئو مایە دهزرا مندا ئەڤەیە: دا بێژیت کورێ من بخو ب خوینە دا بگەهیە مراد وئارمانجا خو چنکی:" کەس بخوزیا، نا گەهتە جوتێ کەزیا". ل وی دەمی من نەدزانی رامانا وێ گوتنی ئەوە کو ئەز کارەکی بدەست خوڤە بینی ئو خێزانەکێ پێک بینی پشتێ سەرکەڤتنێ. ئو دا کەت وبێژیت نە مینە وەک مە ڤان هەژارا. چنکی یێ خو ب هێلیت ل هیڤیا خەلکی خولیا سەرانە. لاوێ من مەزن دبێژن: "هیڤیا دەرا، خولیا سەرا". هزار رەحمەت ل گورێ تەبن باپیر، وەیە و وێڤەترە. 

روبێ رەش یێ لبەر پارێزەرا

     ل سالا ١٧٩١ ل فرنسایێ،  دادوەرەک روینشت بو ل سەر سڤاندێ خانیێ خو ل هنداڤی جادێ. دیت دو کەس بەرهەنگارێ ئێک بون، ئێکی کێرەک ل سنگی یێ دیدا ودرێژکرە وێرێ وبازدا. رێبارەک دوێرێرا بوری ودیت ئەو کەسە یێ د رەوشێدا، ئینا هەولدا وگەهاندە خەستێ. بەری پولیس پێناسینا ژێ وەرگرن ئەمرێ خودێ کر، ئو پولیسا ئەو کەس تاوانبەرکر بکوشتنا وی کەسی.

    ئەو تاوانبەرێ بێ سویچ، ئینا دادڤانێ، لویرێ ئەو دادوەرێ ئەو رویدان دیتی بەر چاڤێ خو بو سەروکێ بریاردانێ ل سەر ڤێ بابەتی. دەما وی ئەو مروڤە دیتی زانی ئەڤە ئەو کەسە نەیێ تاوانبەرە کو یێ ئەڤ کریارە کری، بەلێ نەدشیا ڤێ چەندی دیارکەت بو یاسایێ چنکی ل فرنسایێ ئەڤا دەڤی چ ناخون هەکە چ بەلگێت بەردەست وبەر چاڤ نەبن. دادوەری خو پێ نەئینا دەرێ و سزاکر کو ئەڤ مروڤە ب هێتە خندقاندن.

   ئەڤ بریارا وی دا دراستا ڤی کەسێ بێ تاوان  کەڤتە سەر هزر وهەستێت وی ونەدشیا خو ژێ بدەتە پاش ب چ رەنگا ل هەمی دەما. روژەکێ دیت پارێزەرەک ب ژورکەت وروبەکێ رەش ل بەر. دادوەر ما حیبەتی ژبەر وان جلکێت ل بەر وی وگوتێ: ئەڤە چنە ل بەر تە؟ پارێزەری بەرسڤا وی دا گوت: ئەڤ جلکێت رەش ل بەرمن نیشانە بو وان کەسێت بێ سویچ وتاوان دهێنە گونەهبارکرن دناڤ بەرا مە هەمیاندا.

    پشتی وێ ئەوا وی پارێزەری کری،  ئەڤ روبێ رەش بو چاڤکرن دهەمی دادڤانێت دجیهانێدا ئو حەتا نوکە.

کورێ مەژی رون

ئەگە تە سێ ئاخڤتن هەبن سەر ئەزمانێ تە: یا ئێکێ نە بێژە، یا دووێ ب داعویرە ئو یا سیێ ب هێلە دبن ئەزمانی ڤە

      مروڤەکێ (کوره) نەبین ل گوندەکێ دژیا وهەر شەڤ دەردکەڤت دا چیتە ب گوندی ڤە جرایەکێهل دگەل خو دبر. شەڤەکێ ژشەڤان دکولانەکا تەنگدا دچو ئو هەلکەڤت قوشمەکێ  زەلامان ژوێڤە دهاتن.ئێکێ ڤەبۆری ئو ئەزمان درێژ دەما گەهشتیێ گوتێ تو ب هەردو چاڤان یێ کورەیێ ڤێجا ئەو چ چرایە دلەپێ تە دا، هەبیت یان نەبیت هەر  وەکی ئێکە؟ ئینا کورەی بەرسڤا وی دا ئو ماڤێ وی بدرستیدا وگوتێ: ئەڤ چرا یێ دلەپێ مندا ژبەر ئێکێ وەکی تە یێ نەزان ونەتێگەهشتی ونەهشیار، ل نک من جهێ مەترسیێ یە ئو ترسا من ئەوە یێ ب چاڤ ب هێت بێسەر وخو ل من بدەت من راستە عەردکەت ئو پیا ل من بشکێنیت، تە زانی سەربارێ مامێ ژبەر چ من ئەڤ چرا هەلگرتیە؟

٢٤-١-٢٠١٨ دهوک

 مروڤێ خوری وکێم وکاس:

چنە رەوشتێت مروڤێ کێم وخوری ؟

ئێک: نە سرڤەشێرە

دبێژن: یێ نهینیێ ل دەمێ کەربێ نەڤەشێریت ئەوێ کێمە

دوو: درێنتە کێماسیا دخەلکی وکەیف وفەخر وشانازیێ پێدبەت

دبێژن: یێ چاک حێجەتا دگرن ویێ کێم خار ولەنگیا پێش چاڤدکەن

کەس کەیفێ ب تارێتێت خەلکی نابەت ژبلی مروڤێ کێم

سێ: پاشڤەبرن ونە جهئینانا سوز وپەیمانان

دبێژن: ل نک دەستڤەکری وناندەهی دانە، ئو ل نک کێمی پاشڤەبرن ونەدانە

چار: حەسیدی یان چاڤهاڤێژی: کێم کەس هەبن کو دبێ بارن ژڤێ رەوشتا پیس

دبێژن: چ لەش وگیان دبێ بارنینن ژحەسیدیێ، بەس یێ کێم دیاردکەت وقەنج دڤەشێریت ونەپەنی دکەت

دبێژن: حەسیدی ژرەوشتێت کێمانە، هێلانا وێ کارێت چاکانە

پێنج: ئەزمان پیس وپرجڤین

دبێژن: چەکێ کێمی ئاخڤتنا پیس وچەپەلە

شەش: ئنکاری ونەگوتنا قەنج وچاکیێ

مەردە مێری ل نک خو ڤە بینە دێ هێتە پێش

چەند بهای بدەیە خویری هەردێ بێژێت هێش

دبێژن: بنوکا هەر دژاتیەکێ، تە چاکیەک کربیت دراستا خوریەکیدا

حەفت: خو ب سەر لاوازیدا گرتن ئانکو  ب شێیە مروڤێ زەعیف وبێ هێز

دبێژن: خو ب سەر لاوازیدا گرتن کێماسی یە

دبێژن: شیان سەر مروڤێ لاواز، دەست داهێلان  ل سەر مروڤێ زۆردار ودژوار

هەشت: لێنەبۆرین وڤەزڤرینا عوزرخاستنێ

دبێژن: مەلیل ترین کەس ئەوە یێ داخازا لێبۆرینێ دکەت بو وێ کەسێ کێم وخوری

نەهـ: نەقەدی وماڤتێکەری

دبێژن: من نەدیتیە خوریەک هەکە نەیێ نەقەد وماڤتێکەربیت

دەهـ: قورت وقەلسی

دبێژن: هەمی خوری دقەلسن، بەلێ خڕ قەلس نە دخوری نە

هیڤیدارن: یێ ئەڤ توڤە رەوشت وتیتال ل دەف هەبن هەولدەت خو ب گوهێریت وبشێت ژنک خو ببەت ونەهێلیت وخو ژوان کەسێت ئەڤە ل دەف هەبن خو ژێ دویر بێخیت وخو نێزیکێ مروڤێت قەنج وچاک بکەت ل سەر رییا راست ودرست دا یێ پێشکەڤتی وسەرکەڤتی بیت دژیانا خودا.

٧-٩-٢٠١٨ دهوک – ئەحمەد عەلی حەسەن