چیروک

کچکا بچیک

     هەر دو دەستێت خو ل دور برایێ خو یێ بچیک ئالاندبون، هەولدا دا ل نک خوڤە بینیت. چەند مە دڤیا ئەم ب نک ڤە بچین، وێ بەر دمە دوراندن ئو چ دکەفتە بەر دەستێت وێ. یا وەستیای بو ئو رویی وێ یێ ب توزبو، ئەڤ توڤە کەس ب چ رەنگا نا هێنە هێلان پتنێ. ئەم ماینە حێبەتی، کا خێزانا وان، چ لێ هاتیە؟ ئو کێ گەهاندینە ڤێ دەڤەرا عەردی؟ مە ئەو دور پێچکرن ژهەمی رەخا، هەر وەکی فرشتەک هاتیە خارێ ژئەسمانا، مە داخازکر کو ئەم بینە پیروزکرن ئو مە پرسیارکر ژخودی مە بدەتە چاڤێ رەحمی سەر خاترا وان.   

           مە هێلا سەر ڤێ رەوشتی حەتا ئارام بوی، ئو پیچ پیچە ب نک ڤە چوین، یا ل بەر دەوام بو بەر دهاڤێتنە مە، ئو برا یێ وێ بچیک دکوشا وێدا. ماینە بێ هش کا دێ چ کەین؟ راستە وان بەرا چ زیان نە گەهاندنە مە، بەلێ ئەز یێ د وێ هەستێدا بوم، هەکە ئەم چەند نیزیک تر بەر وێ ڤە دچین، هەر وەکی ئەم وێ ژ ژیانێ ڤە وێ ڤە تر دبەین.

     مە  خو لی گرت حەتا بەرێت وی نەماین ل دور وێ. هوین هەمی دزانن ل دەمێ جەنگی، ئەو تشتێت بەر دەستێت تە تڤەنگە ئو بهنا سوتنا باریتی یە ئەوا دفن ژبەر دهێنە گرتن ئو پرت دکەت هەمی رەخ ودورا. چ لەعبیکێت بچیکا ف تە نینن ئو هەر تشتەکێ دی یێ ل ڤی رەنگی کو تو بشی ئارامێ بینی بو ترسا ڤان بچیکێت دڤی ژیدا ئو دڤی رەنگێ وەسادا. دڤێ رەوشتا توند ودژوار، زورا بەردا گریێ ئو ب چ رەنگا نا هێتە ژ بیرکرن.

   ب دل نەرمی ئو هێدی هێدی ئەم بەرڤە چوین، ئینا من گوتێ: زاروکا من نەترسە، چەند ئەز نیزیکتر دچوم ئەوێ پترتر برایێ خو ب نک خو ڤە دشداند ولەشێ وی دور خو دپێچا. ئەز گەلەک نێزیک بوم، دەستێ خو یێ بچێک دا بەر چاڤێ رویێ خو.

گوتە مە، مەنە کوژن! چاڤێت من پر بون ژروندکا، من گوتێ: ئەز تە ناکوژم، ئەزێ ل ڤێرێ دا تە ببم مال، ئەز کەتمە سەر چوکێت خو بەرانبەری وێ من گوهێ خو دایێ، ئو هەمێ ل دور من ل وێ هیڤیێ بون کا دێ چ ل دیڤ هێت. وەک ڤان رەوشێت پر توند وئێش نا ڤەگریێن د خر ژیانێدا بەس جارەکێ پتنێ. ئینا من گوتێ: کا خێزانا تە ئو دەیبابێت تە؟

وێ گوت: دائشکا کوژتن!

بدە هزرا خو کا ئەڤ زاروکە چەند ب رێڤە چویە دناڤ خانی هەڤتیا ووێرانکرنێ رادگەل ڤی بچیکی، ل وی دەمی من ب دەستێ خو نەخشێ یاریکەکێ ل سەر ئاخێ چێکر ل بەر چاڤێ وێ. من بەرێ خو کرە وی نەخشی ئو من گوتێ: تو حەز ڤان لەعبیکا دکەی؟ 

وێ کرە کەنی وگوت: ئەرێ خال!

من گوتێ دگەل من وەرە دا ئێکێ بدەمە تە ئو ئێکێ بو برایێ تە یێ بچیک. سەحکرە من ئو هزار هزار پرسیار دناڤ هزرا وێدا بون ئو ئەز مامە ل هیڤیا بریارا وێ. گەلەک دێ مەندەهوشبن ئو بێژن: ئەڤ سەرگردە، وەک ئەسعەد ئلئەسەدی، یێ شەرێ ڤان دائشا دکەت یێ مایە ل هیڤیا بریارا بچیکەکی!! بەلێ راستە... ئەڤ وەلاتێ هویێ مەزن یێ مایە ل هیڤیا بریارا ڤێ کچێ!!! یا ل سەر ڤێ وەلاتی هاتی، نا هێتە شرەڤەکرن وگوتن.

رابوڤە ئو دەستێ برایێ خو گرت پشتی راوستیای ئو توز ژکراسی خو داقوتای، ل دەڤ من هەر وەکی وێ چەند خەمێت دناڤ مندا وەراندنین وێرێ. 

دەستێ خو ل دەستێ مندا ئو ب رێڤە چو

دەما ب رێڤە چو، گوت: خال برایێ منێ برسی یە

من گوتێ خەمێ نەخو، من برایێ وێ هەلگرت ئو مە دا رێکێ

هوین یێ دبینن کا ئەڤە چیە دچێدبیت ل وەلاتێ من!!!

  ئەڤ کورتە سەر هاتیە من یا گوهارتی ژ عەربی بو کوردی وئنگلیزی، ئەڤە چوبو ل دەرو بەرێت باژیری میسلێ سەر زراڤێ سەرگردەکێ لەشکەرێ عیراقێ بن ناڤێ ئەسعەد ئەلئەسەدی.

٢٢-١٢- ٢٠١٦ دهوک –ئەحمەد عەلی

کورتە چیروک

"کەو دوژمنێ سەرێ خویە".

ئەڤ سەر هاتیە یا چێبوی دەمێ عیراق یا بن دەستێ ئینگلیزی

سەر هاتیەکا کەڤن ونوی ل هەمی دەمان!

         قوماندارەکێ ئینگلیز دكولانەكێدا دگەل وەرگێرێ خو سەیرانەک بربو رەخ گوندەکێ کوردان ڤە، ل وێرێ  دیت نێچیرڤانەكێ كەوا یێ دبۆریت، چەند كەوێت سەرژێكری یێ دلەپیدا وكەوەكێ ساخ ژی یێ درکەهێدا، گوتە وەرگێرێ خۆ گازیكێ وبێژێ ئەو كەو بچەندێ نە؟

          نێچیرڤانی گوتێ ئەوێت سەرژێكری ئێك ب دو دەرھەمان وئەڤێ ساخ ژی ب سێ دینارا نە، وی گوتێ بوچی ب سێ دینارا؟ چ جوداهی تێدا هەیە؟ ما ھەر نە كەوەن؟ ھەر نە یێ ڤێ دەڤەر وەلاتی یە؟ نێچیرڤانی گوتێ: بەلێ بەس ئەڤێت من سەرژێكرین من ب خێرا ڤی یێت گرتن وسەرژێكرن وئەڤە نەبا نوكە چ ژ ڤان کەوان ددەستێ مندا نەدبون دا ئەز ب دو دەرھەما بفروشم تە.

      قومانداری گوتێ ئەڤێ ساخ من دڤێت وتو بخو بومن وی سەرژێ بكە، بێ گومان، گوشتێ ڤی دێ خوشتربیت، نێچیرڤان تێكچو وگوتێ ھەردو كەون وئەڤێت ب دو دەرھەما ژی ھەر وەكی ڤینە چنکی بەری بێھنەكێ منێت گرتن وسەرژێكرن، تو بو چی ڤان بخۆ نابەی زۆر چێترە؟

     قومانداری گوتێ مادەم ئەڤ کەوە ھندێ بێ غیرەتە ئو چ خسلەت دسەریدا نینن وھاری کاریا ھەوە کەوگێران دكەت داكو نڤشێ خو برینیت و بئێختە  بن دەستێ ھەوە وھوین ھولێ بكەنە ھە، ئەڤە سێ دینارێت تە وسەرژێكە ئو ب دەف من: " ئەز نەیارێ وی مە یێ نەیاریێ ل خو ونڤشێ خۆدکەت".

پیرمەندێ کورد درست یا گوتێ:

    "هەمی دنیا دوژمنێ کەوینە، کەو بخو ژی دوژمنێ سەرێ خویە".