دعەمرەكي دا مامه، دتەمەنەکی دا مامە - ئەمرەكى دا مامه
پێشگۆتن
هەر وەکی ژ ناڤێ قەولی دیار و خویا و ئاشکەرا ئەف قەول باسی ژیانا مرۆڤی دکەت دەمێ مرۆڤ یێ خەمگین و کول و دەرد هەین و تشتەکی ژ ژیانا خۆ فامناکەت راستی و شاشیێ و خێر و شەرا ژهەڤ جودا ناکەت و خۆ دبینت بێ فەلەک و بێ سعود و ئێقبال و جار خۆ دبینت شاش و جار خۆ دبینت ل سەر ڕێیا راست و کول و دەردێت خۆ بۆ خودایێ خۆ بێژت و بانگا خۆ بگەهینتە خودايێ خۆ، هەروەسا ئەف قەول باسی مرنێ وئاخرەتێ دکەت و هندک سەبەقە ب شێوەیێ شيرەتان تێدا هاتنە، دناڤەرۆکا ڤی قەولیدا نەفسا مرۆڤی وەکی (بۆر) ئانکو هەسپ هاتیە ناسکرن بۆ تێگەهشتنێ وەک دفەلسەفا بتریا قەولاندا کو بۆر ب رامانا نەفسێ دهێت، ئانکو مرۆڤ و نەفس مینا کەسەکی ل سەر هەسپەکێ بت، دناڤەرۆکا ڤی قەولیدا دەمێ باسی مرنێ و ئاخرەتێ دکەت دبێژت ئەز برم جەم خودێ بەلێ مەرەم ژ ڤێ چەندێ ئەوە کو پشتی مرنێ ئانکو ل ڕۆژا ئاخرەتێ دێ هۆسا بیت.
وئەڤە ژی دەقێ قەولێ (دعەمرەكى دامامه - د تەمەنەکی دا مامە - ئەمرەكى دا مامه)
قەولێ دعەمرەكى دامامه
ب دەستوری خودێ
دعەمرەكى دا مامه
يارەكى ئەز رڤامه
یارێ ئەز رڤامە
ئەز ژ شەرقێ برمە شامه
ژشامێ هاتمه ئەز دبرمە شەرقێ
خەتا من ژڤێ
عەزيزێ من ! كول و کار وعەمەلێت من ژ ڤێ
چەندی دئێم و دمەيزينم
وێ دەگ بلند دكەم
وێ ل ڤێ دنیایێ دسەيرينم
ئەز کەسی ژ خۆ گونەهتر نابینم
عەزیزێ من! كەسەكی ژته چێتر نابينم
چەندی دئێم ودفكرم
بەيانا سلتان ئێزي دسەر خۆڕا هلدگرم
عەزيزێ من! ل روويێ ڤێ دنیایێ ئەز ژحەمووا ب گونەهترم
شوكر ئەز ب تەڕا ئەزی ب عێب تو عێرفەكی بێ عێب
ل روويێ ڤێ مەجلسێ تە ئەز كرمه عەجێب
گونەهێت من دپڕن نائێنه حسێب
ئەڤنه پلنگ دێ بنه بازی
كەس ل روويێ ڤێ مەجلسێ ناكەت گازى
ئەز ژ خۆ گەلەك نەی رازى
ئەڤنە پڵنگ دێ بنە شێر
كەس ل رويێ مەجلسێ ناپەڤت ب خێر
ئەز بانگا خۆ دگەهینمه جەبێر
نە شێرم نە بازی
وەختێ تە ل من دکرە گازی
من ل خۆ نێری وهەڤرازی
نە بازیمە نە شێر
کەس بمنڕا ناپەیڤت بخێر
من بانگا خۆ گەهانده جەبێر
عەزيزێ من! تە ئەز ل بۆرەکی سەرحشک كرم
چو جارا خۆ پێ ناگرم
ژ كەفتنا خۆ ئەزی حەيريم
سەر حشكه ومن چاره پێ نينا
وێ بەرێ خوە ددەتە رەڤینا
وەختێ بەرێ وی كەفته رەڤينا
عەزیزێ من! ئەز دترسم ژزەبێنیا
سەر حشكه ومن تێ نينه چاره
خودان ژدەستا ئی بێ زاره
بازددەت خەندەكان و كانداله
ل ڕۆژا ئاخرەتێ دێ مە ئێختە دەستێ زەبێنیت ب ساف وهەیبەتە
ئەز رەڤيام و گاڤ ل من بڕيان
وەختێ زەبێني بمنڕا گەهيان
ژ ترسادا دل و هناڤێت من بزديان
تە ئەز ل بۆرەکی کرم نە دبەزی
ل سەر لحێفا درازیم
تەنشتا من دتەزی
عەزیزێ من! تە ل حالێ من پرسی ل روویێ ڤێ مەجلسێ بتنێ ته ل من دکرە گازی
چۆمە شکەفتێ بەفر وباگێر دبی
چۆمە سەر پڕێ پڕ ل من وەربی
کەری دکڕم لەنگ دبی
سۆلێ دکڕم تەنگ دبی
هەکە ژنکێ بینم جوان دەنگ دبی
گەلۆ! ما بێ دەولەتی ب چی رەنگ دبی؟؟
عەزيزێ من! ل رويێ ڤێ دنيايێ مەفەرەك نينه
هەكە علمەكى بێژم، دێ بێژن وە نيه
هەكە خێرەكێ دكەم، دێ بێژن چەندى دينه
هەكە گۆتنەکێ دكەم دبێژنه من چەندی دەرەوينه
عەزیزێ من! ل ڤێ دنێ من فەلەک نینە
ژ بلی تە کەسی های ژمن نینە
عەزیزێ من! توو حالێ دبینە
چەندی دگریم وچەندی دئێشم ودناڵم
کەسەکی نەدزانی بچی حالم
هەتا ڕۆژا ئاخرەتێ ب گۆلا خودایێ خۆ دناڵم
وەرن كەسەكی مەعريفەت ل بال
خودێ سەكنى و ڤەوەستا بوو ل خەيال
كێ ديتيه عاشق بت ئی بێ هەڤال؟!
ژملکا وشاخا
ل وان سور گولا ل وان باغا
کێ دیتیە ئاشقێت بێ ئاخا
عاشقێ پەستا هەنه
ژ تاری و تالیێ دەنگ دكەنه
ئەو نزانن ل رۆژئاخرەتێ، ئەو دكەڕ و دكۆڕەنه
عاشقێت پەستا دزاڤن
هاوری دۆرێت وان حەموو داڤن
ئەو نزانن ل رۆژئاخرەتێ ،ئەو دكەڕن و دكۆر دبێ چاڤن
ئەون عاشقێت پەستا
وان ڤەنەخوارينه ژكاسا مەستا
لەو بۆرێ وان ل مەزن مەيدانا مەلەکا دوەستا
بۆرێ من ئی بێ دەولەته
دسەرى دا نەمايه غيرەته
ب گاڤا ئی کێم تاقەتە
لێ نەما حەرەكەته ئەز ئێخستمە دەستێ زەبێنیت ب سافەتە
عةزيزێ من! من بينەدەر ژدەستێ زەبينێت پڕ ئۆسفەته
بۆرێ من ل دنێ
چاڤ ل کوشتنێ ل دەرەوێ ل زنێ
عەزيزێ من ! ئەز دترسم، من شەرمەزاربكەت ل ڕۆژا ئاخرەتێ!
بۆرێ من ئی جاهله ونە بەدەوە
ژمن دڤێت خوارن و ڤەخوارن وخەوه
عەزيزێ من! ئێ غەدار و دسەکنت ل مەزن مەیدانا مەلەکا هەر ئەوە!!
بۆرێ من ب کارێ خۆ بەرگيره، نە كعێله
ڤێرا نەمايه چوو فعێله
عەزيزێ من! ئەز دترسم دێ من شەرمەزاربکەت ل ديوانێت جەبێره
وەختێ زەبێني ل من دەهاتن
خێر وگونەهێت من دكێشاندن
ل بەر ميرێ مەزن داناندن
هەفت جاران جاران گوننەهێت من ل خێرێت من دەردهاتن
برمە حزرەتا جەبێرا
وێ تەفتێش دکەن خێر وگوننەهێت مێرا
وەختێ خێر وگوننەهێت من دکێشا
هەفت جارا گوننەهێت من دەرکفتن ل خێرا
وەختێ زەبێنی ل من حدرین
ل بەر ساڤ وهەيبەتێت وان ئەز گريم
ژ بەر وكار ونەبوێت ل دنيايێ من کرین
خەلکۆ هوون مەکەن نه بێژیا
خۆ دوور کەن ژ خرابیا
سلتان ئێزی ئی قادرە ئی حازرە ل حەموو جیا
حالێ من حالەکی ژارا
من ژدەستێ زەبێنا گازی وهاواره
من گۆت: نە سەد خۆزيكا روحێت گونەهكارا!
حالێ من حالێ حەسەنه
زەبێني تێن ژمن پرس دكەنە
گەلۆ توو خودان ئیمانی و تە ئێزی مەفەرە؟
من گۆ! شکر ئەز ب ئيمانم
وب نافێ ئێزی مەفەرم
ل سەر ناڤ و دكارێ ئێزی ئێ شرينێ ئەزی موتام
وێ كێلەكێ ئەزی وەها بووم
ب كێفا خۆ ئەزی شا بووم
ب ناڤ ودكارێ سلتان ئێزیێ شرین ئەزی موتا بووم
ئەوه رۆژا پێ پره
ل پێشيا مە ئاگره
ئەوێ ڕۆژێ سلتان ئێزی بوو مەفەره
بانگا منە ب وی ئێزدانی
كەفتمه بەختێ وی سلتانی
خالقۆ! توو چەندی رێزانی
ژخوار هەتا بانی
ژعەردا هەتا ب عەزمانی
سلاڤێت مە موخلوقا ل خودانی
توو ب حەموو دەردا دزانی
ل حەموو دەردا تو دەرمانی
بانگا منە ب ئێزییە
ب رەحم و شەفقەتا خۆ ل مە دگەرییە
لێ دکر زینەکی قودرەتیە
مە ل وێ دیت مۆرا خۆ کانیا سپییە
كانيا سپی و قوبلەت بدوره
ئەو كورسيا ژباتنێدا ب مۆره
ئەو جیێ ئێزیێ منێ سۆرە
ئەز برمه ديوانا پەدشێ منێ هەر وهەرە
ل بەر سەكنی هەفتی هەزار قەلەندەرە
نور ژ كەسك وسۆر وسپی وزەرە
ژێ تێ بێهنا خۆش، بخور ومسك وعەنبەرە
کورسیا ئێزی سەکنی بوو ل سەرە
کورسیا سلتان ئێزی رونشتبوو ل سەر
یە ب لال ودور و پیرۆز پری جەوهەر
ژبەر دچن هەفتی هەزار وتەر
کاس ژقودرەتێ و دۆلی ژدورەکا زەر
ساقی ئێزیێ منێ مەفەر
دۆل یا پەدشێ منێ هەر وهەر
مە ل وێ ديت خۆشی و شايی
دەف وشباب وشاز و موغەنی وتەنبور ئەغلەر
ئەو جندینە ئێ ب راستی رێیا ئیمانا خۆ دبە سەر
ژموحەبەتا خۆ دگەرينن كاس
کاس ژقودرەتێ دور ژدورەكه ئەلماس
سلتان ئێزی پەدشێ منی رێناس
ئەز برمه ديوانا پەدشێ منی جەلال
هەفتی هەزار قەلەندەر ل بال
نور ژكەسك وسۆر وسپی ورەش ئال
ژيێ رەش خومار
ژێ تێ بێهنا خۆش سۆسن وبەيبون وريحان
ديسان ل سەر قەدەمگەها راوەستان
حلێ رەش ل بەژنا وان
گۆ بلا بێن خودان ئيمان خودان ئەرکان
دا بچنە ديوانا سلتان ئێزی بكەین سەيران
چی سەيرانەكه هۆيه ب نوره
گەلۆ چی سەیر هەبوو ل دیوانا ب نورە
کاسێ ل ناڤ وان دگەرین کاسا موحەبەتە
کاس ژقودرەتێ دۆلی ژدورەکا مەخمورە
سلتان ئێزی پەدشێ منێ غەفورە
من ل وێ ديوانێ ديت خۆشی وشايی
دەف وشباب وتنبور موغنی ئەغلەر
ئەو ژی دێ چنە حزرەتا ئێزی حال ومشور
ئەز برمه ديوانا پەدشێ منی رێناس
لبەر سەكنی هەفتی هەزار قەلەندەر وخاس
نور ژكەسك وسۆر وسپی ورەش لباس
من دیت دوو چاویش ل قەدەمگەها راوەستان
ئێک دبێژنێ خدر وئێک دبێژنێ لیاس
ژموحەبەتێ دگێرن کاس
کاس ژقودرەتێ دۆلی ژدورەکە ئەلماس
من ل وێ دیتبوو خۆشی وشاهی دەف و شباب! موغەنی و تەمبور! ئەغلەر و شاز
سلتان ئێزی مرازێت مە حاسل بکە وچی کەسێ مراز خواز
برمە دیوانا باتنێ
سێ سەد وشێست و شەش عالم وێ دکەن خوندنێ
سەرێ حەمووا ئێزی پەدشایێ من ئێکی ب تنێ
ئەم دکێمین وخودێ ئی تەمامە