قەولێ سلاڤێت مەلکێ کەریم
پێشگۆتن
ناڤەڕۆکا ڤی قەولی ژ مەڕا خویا دکەت
کو دڤێت هەردەم خودێ ل سەر زار و زمان و هزر و بيرێت مە دابت و خێر و دوعا و پەروەستەبون ژێڕا یا فەرە ، چونکی ئەو ئافرێنەرێ هەموو زێندیایە و ئەم بەندەیێن وینە و دەروێشێن رێیا خودێنە ، دا کو ل ڤێ دنيايێ د رووسپی و سەرفەرازبن د ناڤ جڤاک و خەلکێدا ، ئەف تێکستە دیاردکەت گەلەک کەس هەنە لسەر رووێ ڤێ دنیایێ پرسیارا رێیا ئیمانێ و پرسیارا خودێ ناکەن ،گوهداریا قەول و بەیت و شیرەت و راسپاردێن ئۆلى ناکەن و پرسیارا چاکی و باشیێ ناکەن هزرا خێر و خێراتا ناکەن و حەلال و حەرامیێ ژ هەڤ جودا ناکەن بەلکو ب وی (مراری) ئانکۆ ب مالێ دنیایێ ڤە دمژولن و خودێ ب هەق نەناسن و د دووری خودێنە و چوو ژ رێیا ئیمانێ نزانن ، بەلێ هەر کەسێ ب تنێ ب مالێ دنیایێ بگرت ل داویێ وێ پۆشمان و سەرگردان بت ، چونکە مرۆڤ ل ڤێ دنیایێ مێڤانە و ئاخرەت وارە ، ئەو کەسێن ب تنێ ب مالێ دنیایێ ڤە دمژوول چوو خۆشی و ئارامیا دنیایێ نابینن و هەست ب خودێ ناکەن و ل تەنگاڤیا نزانن چی بکەن یان ژی ب چی رەنگی خۆ خلاس بکەن و ل رۆژا ئاخرەتێ(هەق و حسابێ) دێ گونەهباربن و دێ گەلەک پۆشمان بن و جهێ وان دێ دۆژەبت ، لەوما دڤێت مرۆڤ هەردەم هزر و کار و کریارێن چاک و باش بکەت هزرەکا مرۆڤی ل دنێ بت و هزرەکا مرۆڤی ل ئاخرەتێ بت ل ڤێ دنێ خێر و خێراتا بکەت و دوعا و درۆزا بكەت و خۆ نێزیکی خودێ بکەت و دگەل دایک و باب و دۆست و هەڤال و خەلكى حەموويێ یێ راست و راستبێژبت و خۆ دوربکەت ژ فند و فێل و حیلە و حەرامیێ ، راستی رێیا خودێیە دڤێت مرۆڤ هەردەم ئی راست بە دگەل حەموو خەلكێ و يێ ئەنیەت باش بە ، چونکە راستی رەوشتەکی بەرزێ هەر مرۆڤەکی یە و ناسنامە و (خودیکا - قۆتیکا ـ ئاوێتە) مرۆڤییە دناڤ جڤاکیدا و هەروەسا ل جەم خودێ ژی ، ئەگەر رەوشتێ تە ئی باش بت ئەڤە تە ئەرکانا ئێزدیاتیێ ب جهئینا ، چونکە راستی رێیا ئیمانێ یە و رێیا هەقیێیە و رێیا خودێیە و هنجی مرۆڤێ ب راستیێ بگرت دێ ل دنێ و ئاخرەتێ ئی رووسپی و سەرفەرازبت ، هەروەسان دڤێت مرۆڤ نە ئی نەفس بلند بت بەلکو ئی نەفس کند بت و ژ کەسی نەقەحەره بەلکو حش حەموو کەسان و حەموو موخلقان بکەت ، و قەول دبێژە هەرن جەم یەک و دوو و ژ هەف نەقەحەرن چنکو ئەف دنيايه ب و براتی و موحەبەتێ و ناسكرنێ يه خۆشه ، و هەر وەسا ئەف قەول دبێژە ئەگەر تو کەسەکی کار خراب بووی و نە ئی ل سەر رێیا ئیمانێ بوی و بشتی هنگی تە رێیا هەق ناسی تو هاتیە سەر رێیا ئیمانێ و رێیا راست ل سەر وێ رێیێ بمینە و ل سەر وێ رێیێبە و بەرنەدە و نەگهۆرە رێیا خودێ رێیا راست رێیا ئیمانێیە ، و دناڤەرۆکا ڤی قەولیدا (بۆر) ئانکو هەسپ ب ڕامانا نەفسێ هاتیە مينا فەلسەفا بتریا قەولان بۆ نمونە دەمێ دبێژت(ل بۆرێ حور سواربن) ئانکو نەفسا خۆ و ئینیەتا خۆ سافی بکەن و د دل پاقژ و هزر پاقژبن و بلا کارێ وه ئى باش بت ، و دەمێ سەبەقە دبێژت (هوون سوار نەبن ل بۆرێت سەركێش) ئانکو ل دوف نەفسا خۆ نەچن ئەگەر نەفسا 1- وە تشتێت خراب بخوازت
ئەڤە ژی دەقێ قەولی یە
سلاڤێت مەلكێ كەريم
ب دەستوری خودێ
2- سلاڤێت مەلكێ كەريم
ببن ئاشقێ سوڕا بەريم
ب مال و سەری وێ سوڕێ بپەرسین
3- سوڕا پێ دپەرستن خالقە
موحبێ دلا مابوو مالقە
زۆر هاتنە دنێ دریهسپی نە دبالقە
4- زۆر هاتنە حەددێ مێرا
ئەوان گوهێ خۆ ل مەعنیا نەدگێرا
نەدزانی ژکو تێ شەر وخێرا؟
5- زۆر كەفتنه بەحرێت تاری
ئەو دمژول بوون ب وی مراری
ئاشقێت مالێ دنیایێ چوو ژرێیا ئیمانێ نە دبژاری
6- ئەو مرارە ئی ب خوینە
هوون ژئێك مەگرن كەرب و كينه
ئەف فێنە فێنيەكا دەرەوينه
7- سەرا وى مراری
ژ ئێك مەگرن دل ساری
دنيا يه خۆشه ب موحەبەت وبراتی وياری
8- گاڤا غەدرا نەفسێ چووه
هەکە جەنگێ ملیاکەتا ل دووره
غەدر ڤەدگەرییە زووه
9- هوون بەتال مەكەن جەنگی
ل با يەك و دوو روونن ب هەڤدەنگی
ئيمان دهێته ناسكرن ب ڤی رەنگی
10- دبێژمە وە ژحاله
هنجييێ دلێ خۆ نەكەت سيقاله
مينا كەڤنە خرابەكە ئەڤە سەد سالی ئی ڤالا
11- دلێ خۆ ب سيقال كەن
سوڕا مير كنار كەن
ژئەو پاش قەستى بال كەن
12- هوون دلێ خۆ سیقال کەن
سوڕا میر دخەیال کەن
هەردەم قەستا بال کەن
13- ئێکانێ ژخۆڕا ب گيان بن
سەر ومالێ خۆ ب شكرا دن
ديندارا سلتان ئێزی ب ڤێ يەكێ دئێتە ستاندن
14- ئێکانیێ ژخۆرا ب غيرەتكەن
رێيا سلتان ئێزى ب جەعدەكەن
گيانێ خۆ ل بەر پەدشاديێ خۆ ب عزەتكەن
15- چێبن وگهۆرنەکەن
رێیا هەقیێ رێیا سلتان ئێزی ژبیرنەکەن
دا ل رۆژا ئاخرەتێ روحا وە ب عەزیەت نەکەن
16- دبێژمه وه يا جێش
هون سوار نەبن ل بۆرێت سەركێش
ل مەزن مەيدانا مەلەكا زۆر خەندەک دئێنە پێش
17- ل بۆرێ حور سواربن
ل قەولا گوهدار بن
ب حەموو موخلقاڕا يار بن
18- هەقە بناسێ نەفسێ
ل رويێ ڤێ مەجلسێ
مێر ئی خلاسه ب پرسێ
19- نەفسا یە ناس بێ
دێ دبەحرا گراندا غەواس بێ
تەبایا خەلکێ خاس بێ
20- فەقیرى يه ب جۆرە
هنجیێ نەفسا وی یە ل ژۆرە
ئەو زوو دکەڤت ژبۆرە
21- هنجیێ نەفسا وی یە ل خواربت
سوڕا میر ل کناربت
ئەو دێ دایم ب میرڕا هەڤال بت
22- هجیێ نەفسا وی یە خوارە
ماشێ میرێ خۆ ب حەلالی نەدخوارە
ژشەرمێڕا ئی حەلالە
23- هنجیێ ب حەرامی بخۆت ماشە
ژدیوانا جندیا ئەوی حاشا
سلتان ئێزی دێ وی هاڤێشتە پاشە
24- نەیە ب زۆرە و نەیە ب زارە
تو ژبلندیا وەرە خوارە
رێیا خودێ ب راستیێ یە دیارە
25- راستی یە رێزانە
رۆنایا دلانە
راستی رێیا ئەزدانە
26- نەفسا بلند نەیە رێزانە
راستی رێیا مێرانە
چیای پێ گرتی مەکانە
27- راستی مەعریفەتە
هنجی مێرێ قەنج تەربیەتە
ل دنێ وئاخرەتێ ئەو ئی ب عزەتە
28- راستی بنیات خاسە
ژخاسا ئەو کاسە
هنجيێ خودێ خۆ بناسە
ئەو روح ل با خودێ خۆ یە خاسە
29- راستی بنیات زێرە
وان جندیا دگێرە
ئی هەردەم هیڤی بخو دێڕە
ئەوێن دایم مەعامەلەتا وان بخودێڕا
30- راستی بنیات زێر بوو
هنجیێ بەر ب پێ بوو
دخوار و ژێ نەی تێربوو
31- بۆرێ خۆ لغاف کەن
رێیا هەقیێ قەنج چاک كەن
ل میرێ خۆ سلاڤ کەن
بۆرێ حڕێنا نەکە
رێیا هەقیێ ژبیرنەکە
هەرە ل دۆستێ خۆ سلاڤبکە
32- دبێژمە وە یا ساقی
شرۆڤەبکە هەقی
دڤێ دایم بۆرێ وە ئی ب لغاف بی
33- ژ بۆرى ڤەبە وەختێ هەرە
لغافا راستیێ بدە سەرە
خودانێ بۆرى سەر پشتا وی گۆیکەرە
34- دبێژمە وە گەلی ئێزدیا
هنجیێ رێیا ئیمانا خو بناسيە
ئەوی هون کر ب مەعنیا
35- هنجیێ رێیا خودێ خۆ بناسە
ئەو دیوارەکی ژئەساسە
ئەو روحەکە ل بەر پەدشێ خۆ گەلەکە خاسە
36- هنجیێ گیرڤانێ هەقیێ ل بەرە
حسابەکە زۆرە ل سەرە
هنجیێ گیرڤان ب راستی ل بەرە
دێ چتە دیوانا ب مال وسەرە
37- فەقیری ئەرکانەکی چێیە
دەروێشەکی خۆڤەکێ یە
ئێ دایم باقی هەر خودێ یە
ئەم دکێمین وخودێ ئی تەمامە