زانست

جۆرێت خاندنا بەختی

     ژکەڤندا وحەتا دەمێ نهو خەلک هەولدەن وپێکولێ دکەن کو ئەوا ب سەری دهیت چ باش یان خراب ب هەلپەسێریتە ئاشوپ وخەیالا خو. ڤێ دکەت دا بەرەف بەرسڤەکێ یان رونکرنەکێ ل نک خو پەیداکەت بو ئەوا ب دکەڤتە بەرێ وی. ئەم دشێین بێژن ئەڤەبو ئەو بنگەهـ یا هاتیە دانان ب تایبەت بو دامزراندنا زۆر زانستان کو رێ دایە گەلەک پێزانینان ل دیفدا. هندەک ژوان نە دبۆرین ژبازنا ئاشوپی، بەلێ بارا پتر ژوان دەلیڤە ڤەکربو بو زۆر پێحەسینان وزانینان یێ ب سەر چاک وباشیێ ڤە چوین. ئەڤ کەسێت ب ڤی کاری رابوین شیان قەناعەتێ بو بەرانبەری چێکەن کو هندەکێ ژداهوتویێ دزانن حەتا رادەکێ، وان وەسا باوەری ل نک وی خەلکی پەیداکربو کو ڤێ چەندی ب راست وەرگرن. ڤێ گەلەک شێوە وتەرز ژڤان کەسان دیارکرن وپەیداکرن ل نک جڤاکێ ل خڕ جیهانێ، چ یەکسان یان جێواز ل دەڤەرەکێ بو یا دی وب گەلەک رەنگان. ب کوردی دبێژنە ڤان توڤە کەسان: تالعڤەکر، خێڤزانک، بەختڤەکر، فالکەر، سحرکەر یان سحربەند، رەملدار، زانیەر. ئەو کەسێت ب ڤی کاری رادبن دجێوازن ژئێک دو ل دیف بەشێ شارەزایا وی دشوپا ئەوا وی خو تێدا بسپورکری. یا هاتیە زانین ژڤان توڤە کەسان کو چەندەکێ دزانن ژئاشکرنا پەردێت غەیبێ ئەوا خودێ بو وان رونکری ودایێ. وەسا پێش چاڤدکەن کو ئەو دشێن تالع وبەختی ب خوینن ب ئاناهیا هندەک ئالاڤێت تایبەت کو دبنە هاریکار بو وان دا ب ڤی کاری رابن، ئەو ژی دڤاڤێرن ژئێکی بو یێ دی ژکەڤن وحەتا گەهشتیە دەمێ نوکە. ئەڤە چەند بەش وجوینن ژوان  رەنگە پێکرنا ئەوێت هاریکار بو بەخت ئینانێ:

١- هاڤێتنا بەران: بژاندا بەران ل سەر ئەردی وشێوێ کەتنا وان دگەل ڤێکڤەتنا وان ل رەخ ئێک روننکرنێ ددەتە رەملداری کو هندەک پێزانینا ب دەتە بەرچاڤ وتالعی وی پێ دیارکەت.

٢- بژالەکرنا مۆرکان: پارا پتر ژنک ب ڤی کاری رادبن، لەپەکێ مۆرکان ژکەلەک تەرز ورەنگان دهێنە بەلاڤەکرن ل سەر ئەردی وب کەتنا وان گەلەک جاران ئەو ژنک جورعەتێ ددەتە خو کو هندەک دەڤخوشیێ ودگەل چەند نەراستیا پێش کێشی بوهەمبەری بکەت وقەناعەتێ بو چێکەت کو ئەڤە دبیت چیبیت.

٣- خاندنا ستێر وبورجان: ئەڤ چقێ زانستی یە، یێ نوییە ل دەف نەزان وخاندەڤانان، یێ هاتیە دشوپێدا ل دەمەکێ زۆرێ نێزیک، ئەوژی پشتی پسپۆر وپیتەکەرێت ڤی زانینێ هەولدای ب خاندنا ڤان ستێر وبورجان بو زانینا داهاتویێ کەس ومروڤان ل دیڤ پێزانینێت پەیدادبن چ یێت: تکنولوجی، بێجێت ئنترنێتێ، جهێت ڤێکەڤتنا پەیوەندیا جڤاکی، موبایل وتەلەفونان. 

٤- خاندنا کاقزێت یاریێ: یێ ب ڤی کاری رادبیت مروڤەکێ دەستهەلە ب لڤین وجانە بەندکرن وقولپینا کاغزێت یاریێ ب رەبگەکێ رێک وپێک کو دەلیڤێ ددەتێ بێژیت کا خێر یان شەر وخاربی دێ کەڤتە درێکا ویدا ل دەمێ داهاتو.

٥- خاندنا فنجانا قەهوێ: ئەڤ کارە دکەڤندا زۆرێ مشە بو ل چینێ وپشتی هنگێ گەهشتە روژهەلاتا ناڤە راست ول دەف تورک ئەغریقان، ئەڤ رەنگێ بەخت ڤەکرن یێ بەربەلاڤ بوی ل دەف عەرەبان ل دەمەکێ نێزیک، ئەوژی ب هاریکاریا فنجانا قەهوێ، پشتی ڤەخارنێ، بەرمایێ دبنیدا دهێتە شلقدان ووەرگێران ل سەر دەڤی، ب ڤێ ئاوایێ هندەک وێنە وخێچ ودرشم دهێنە نەخشاندن ل بنێ فنجانێ، ئەڤە دەرفەتێ ددەتە فالڤەکری وان رەمز ونیشانا پێگڤە گرێدەت دا چەند تێبینا ب دەتە بەرچاڤکرن چ راست یان درەو. ئەڤ رەنگە یێ مشە ل دیوانێت ژنکان ب تایبەت.

٦- خاندنا دەستی: هندەک دبێژن ئەڤە چقەکێ زانستێ یە، یا کەڤنە دمێژویێدا، یا بەردەوامە ل زۆر جهان ودەڤەران حەتا نوکە ب تەنگی. ئەڤە یا گرێدایە ب گیخ وخیچ ورەنگێت پەحنکا دەستی ودهێنە ڤەبستن ب داهاتیێ وی کەسی ڤە دپێشە روژێدا چ چاک یان خراب.

٧- سحر: ئاخڤتنە یان نڤێسین وکریارە سحرکەر پێ رادبیت ب هاریکاریا شەیتانی یان چەند هێزێت نەپەنی ومەبەست ژێ ئەوە دا بشێت کارتیکەرەکێ بکەت ل سەر وی کەسێ ئەڤ سحرە بو دهێتە چێکرن دا کو گوهورینەکێ بێخیتە دناڤ گیانی، مەژی یان دلی. زۆربەی جاران ب درستی ب جهتێت ودبیت ئەو کەس بهێتە کوژتن، توشی ئێشەکا دەرونی بیت دمەژیدا یان ئەسەرا خو ب کەت ل سەر لەشی ب گشتی وخاڤ ولاوازکەت ونەهش کەت.

٨- پیل وفێلبازی: ئەو کارە کێ پیلانی یە یێ فێلباز پێ رادبیت  ب وێ مەبەست وئومیدێ کو بشێت زەرەرێ وزیانێ ب گەهینیت بو وی کەسێ بەرامبەر ب ئالیکاریا شەیتانی ب گەلەک رەنگ وشوپان.

٩- پەیڤ لڤینا دەڤی: هنەکان یێ خو ب ڤی رەنگێ خێڤزانکی یێ بەر نیاسکری کو ئەو دشێت تشتێت نهین چارەسەرکەت ب پەیڤینا چەند ئاخڤتنێت نەپەنی یێ ئەو دزانیت وبێژیت وئەو تێدگەهیت، نەیێت دیار بو وی کەسێ بەرانبەر ب چ رەنگان.

١٠- چێکرنا نڤشتیان: ئەڤ نڤشتوکە دهێنە چێکرن وبەردەستکرن ژلایێ هندەک کاسان ڤە یێت دەست ڤەدان هەی سەر چەند بابەتێت دگرێدای ب ئول وئایێنی ڤە بو پالدانا شەری وخرابیێ وداخازا باش وچاکیێ بو وان کەسێت پێدڤیێ ڤێ چەندێ.

١٨-١٠-٢٠١٨ – دهوک – ئەحمەد عەلی حەسەن

نەخشێ بورجان: دەم وپێزانین

Horoscope Dates and Information

بورج دناڤ هندەک زمانێت کەڤن ونویدا: 

   بورج چقەکێ زانستی یە یێ سەر بخو وتایبەتزانە ب لڤینا ستێران وفەلەکان لدیف بنگەهێت زانستی یێت درست. پشتی ڤەدان وپێشکەڤتنا علمێ فەلکێ دەلیڤە دا پێزانینێت بنەجهـ  ل سەر ستێر وگولەکان وکارتیکەرا وان ل سەر مروڤان ل دیڤ دەمێ ژدایکبونێ . ئەڤە دهێتە کرن ب شێوەکێ دیڤچونێ وسەحکرنێ وبەرێخودانێ وشروڤەکرنێ ژهەمی رەخ وچق وشوپاڤە. ئەڤە دهێتە کرن دویر ژغەیبەتێ، هەر وەسا ئەڤ زانستە خو ناگرێدەت ب دیارکرنا دەمێ داهاتو ب چ رەنگان، بەلێ وێ پێش چاڤدکەت بو مە ئەوان سالوخەتێت گشت ب سەر وی کەسی ل دیف روژا بونێ و بەرانبەرێ بورجا وی ب تاتبەتی.   

     بورج دهێنە دابەشکرن دبن دوانزدە بەشان ل دیف هژمارا مەهێت سالێ. هەر ئێک ژوان بورجان سالوخەتێت تایبەت وهندەک خسلەت دڤاڤێر ژئێک ودو یێت دهەین ودسەر بخونە ژیێت دی. دکەڤندا یێ دهاتینە ب ناڤکرن دبن ناڤێت مروڤێت ئەفسانە، ناڤێت ئایینی، گیانەوەران وناڤێت تشتان. هەر سێ ژوان دهەڤبەشن وب سەرئێک ڤەنە دبن ڤان ناڤ ونیشانان: خاکی، بایی، ئاڤی، ئاگری. ژڤێ دەستپێکێ دێ ڤان بورجان پێش نیاسکەین ژلایێ هاتنا پەیڤێ دزمانیدا وژئالەکێ دیڤە ژرامان وواتا وان دگەل مەبەستێ ب کورتی.

   ناڤێت ڤان بورجان من یێت بەراوردکرنێ دگەل ئێک: ژکوردی، پەهلەڤی، لاتینی، گریکی، عەرەبی، ئنگلیزی وئارامی دا مەبەست رامان جهێ خو بگریت ل دەف خویندەڤانێ هێژا.

ناڤێت بورجان:

١- بەرخ: کاوڕ: ڤارەک: الحمل:   Aries, lamb

     دەستپێدکەت ژ(بیست وئێکێ ئادارێ وحەتا نوزدێ نیسانێ). یێ تەبعەت ئاگرە ومەریخ ستێرا وییە. خودانێت ڤی بورجی پێحەسینەکا دژوارا هەی دگەل ڤەکێشینەکا ب لەز دپێزانیادا. چنکی ئەڤ بورجە یێ تێگەهشتی یە. یێ ب کەیف وحەنەکە وترانەکەرە دژێ خەمگینیێ یە. حەژ درەوا ناکەت وخو ب دویردئێخیت ژئاستەنگ وئاریشان. خوڤیکە، وپێتێ نا دەتە کەسێ، ژخو پێڤە تر. یێ دەستڤەکرە وحەژ ژیانا مەزاختنێ دکەت ورەفاهیێ وفەخفەخێ وکەشخێ.

کورد دبێژن: بەرخێ ل بەر دو ماکانە

٢- گا: تۆرا: تەورتە: الثور:   Taurus, bull, ox

    ب زمانێ ئارامی دبێژنێ(تەورتە) وبکوردی پەیڤا (گا) چنکی گا یان گولک یێ نێرە وقەلەو وستویرە ومەزنە ئانکو یێ ستوەرە ژپەیڤا ئاڤستا کوردی. ژبەر ڤێ چەندێ دبیت پەیڤا تۆرا هاتبیت ژپەیڤا ستەور. دەستپێدکەت ژبیستێ نیسانێ وحەتا بیستێ گولانێ، تەبعەت خاکە وستێرا وی کولیلکە(زەهرە) Venus. یێ ب شولە وکارکەرە ژبەر خو وئەوێت دی. یێ ب سەبر وئارامە، خو ل بەر خڕئاستەنگا دگریت بەس دبیت ب هێتە وەرگێران وبەرەف توند وتێژیێ ڤە بچیت ژبەر هندەک سەدەمێت بێ نرخ وبها.

کورد دبێژن: رێکا گای هه‌ر گه‌لیی یه

٣- جێمک: چوتک: دووانە: دوپاتکەر: زەوگە: الجوزاء: التّوْأمان: , twins, doubleGemini

      پەیڤا (زەوگە) یا ئارامێ و(زوج) یا هاتیە وەگێران بو(جوز) ب عەرەبی کو بویە (جوزاء)، ئوهەر وەسا پەیڤا (Gemini) یا لاتینی یا هاتیە وەرگرتن ژپەیڤا کوردی (جێمک) بێ شک وگومان. دەستپێدکەت ژپیست وئێکێ گولانێ وحەتا بیست وئێکێ خوزەیرانێ، با ئانکو هەوا تەبعەتێ وی یە، ستێرا وی عوتاردە (عطارد)  .Mercuryنیزیکترین وبلەزترین ستێرە بو روژێ وگەلەکا بچیکە. خودانێ وێ یی پڕبێژە، حەز دویریێ دکەت وهەرێ بتنێ بیت، یێ ب خەیال وئاشوپە، یێ ماڤ تێکەرە وحەز تێکڤەدانێ دکەت ل سەر هەمی تشتان.

 کورد دبێژن: تو دبێژی جێمکن

 ٤- کێڤژالە: کرژنگ:خڕژنگ: قڕژال: کەرەچەنگ: السرطان  Cancer, crab  :

      ئەڤ بورجە دەستپێدکەت ژبیست ودووێ خوزەیرانێ وحەتا بیست ودووێ تیرمەهێ. یێ تەبعەت ئاڤە، ستێرا وێ عوتاردە (عطارد) Mercury. یێ ب هەست وهێزە، یێ نەگوهدارە، یێ نهینە، هزر وبیرێت بەرانبەری ددەتە رەخەکی، یێ ب ترسە ژدەمێ داهاتو، هەرێ دامایە وئەنی گرێ یە، خەلکڤیکە ویێ ئارامە بەس باوەریێ نا دەتە هەمی کەسان.

کورد دبێژن:  کێڤژالە، کەتیە چالە

٥- شێر: الأسد  Leo, lion :

         دەستپێدکەت ژبیست وسێ تیرمەهێ حەتا بیست ودووێ تەباخێ. ئاگر تەبعەتێ وی یە وستێرا وی روژە (sun)، خودانێت ڤی بورجی ب رەحم ودەستڤەکرن وداندەهن وناندەهن بو خەلکی، یێ سەرزەنگە وبەرز وبلندە دناڤ جڤاکی، هەمی ب یا وی دکەن وشیرەتا ژێ وەردگرن ل دەمێ تارێت وئاریشان.

کورد دبێژن: شێرێ ب زنجیرە

 ٦- کچە: کچین: العذراء:  Virgo, virgin

    دەستپێدکەت ژبیست وسێ تەباخێ وحەتا بیست ودووێ ئەیلونێ، تەبعەت خاکە وستێرا وی عەتاردە، یێ پڕ هزر وبیرە وهەر دەم یێ ب لڤە ومژیلە، حەژ گەنگەشێ وپڕبێژیێ دکەت، حەزا وی هەر هاریکاری یە ودەست ئانەهی یە، بەلێ نەڤێت وەبکەت.

کورد دبێژن: کچ ته‌شیا دایێ درێسیت

7- تەرازی: تەرازوو: میزان: کێشەر: الميزان: Libra, scales, balance

    ئەڤ بورجە دەستپێدکەت ژبیست وسێ ئەیلونێ وحەتا دگەهتە بیست وسێ چریا ئێکێ، یێ تەبعەت بایە وستێرا وی کولیلکە ئانکو(زەهرە، Venus)، یێ گێولویە، هەرێ جێواز وڤەگوهێزە، یێ باوەر کێشایە، پشتەڤانێ حەقی وراستیێ یە، حەژ چاکیێ دکەت وخەلکی پێک بینیت ودلێت وان نەرم بکەت، داهاتو مەراما وی یە وهەر حەز دکەت ب هاریکاری شول وکاران دگەل خەلکی دی ب جهبینیت.

کورد دبێژن: تەرازیا خودێ هەرا درستە

٨- دیپشک: دووپشک: کولاژدوم: گەزدوم: العقرب: Scorpius, scorpion, Scorpio,

    دیپشک یا هاتیە لێکدان ژدو پەیڤان(دیل یان دیلک – پشت) ئانکو دیلکێ وی یێ ل سەر پشتا وی. ئو گەزدوم یا هاتی ژ(گەزینێ) ئانکو ژپێڤەدانێ لەورا پشتی پێڤەدانێ لەش خڕ دگەزیت وخودان نا ئەوریت ل چ جهان. بورجا دیپشکی دەستپێدکەت ژبیست وچارێ چریا ئێکێ وحەتا بیست وئێکێ چریا دووێ، یێ تەبعەت ئاڤە وستێرا وی عوتاردە (عطارد) Mercury. خودانێ وێ یێ خوگرتی یە وبهێزە ژسەرڤە وژدەرڤە، بلا یێ ژکەستی وەستیای بیت ژناڤدا. حەژ دەستهەلاتیێ دکەت وحەز دکەت تشتی ب دەستخوڤە بینیت. رەوشا ورویدانا شروڤەدکەت ب شێوەکێ راست درست، ژبەر ناکوکیا وی وعنرینا وی وراستی بێژا وی ونەرازیبونا وی کو دبنە سەدەم بو دویرئێخستنا گەلەک هەڤال وهوگران ل دۆر وی.

کورد دبێژن: دیپشکی گوڤەندا خو یا گرێدای دناڤ چاڤان

٩- کڤان: کەوان: نیڤ هەسپ: نیم هەسپ: القوس: Sagittarius, bow

     نیشانا ڤی بورجێ نیڤهەسپە، دەستپێدکەت ژبیست ودووێ چریا ئێکێ وحەتا بیست وئێکێ کانینا ئێکێ، یێ تەبعەت ئاگرە، ستێرا وی جوپیتەرە ئانکو(المشتري- Jupiter)، ژهەمی ستێرا مەزنترە ورونترە ل ناڤ ئاسمانی. خودانێ وی تشتا ب ساناهی وەردگریت، یێ بهێزە، دەستهەلە، ناندەهە، یێ دوغریە ئانکو یێ دەق بدەقە، سەربخویە، یێ دەقشکێنە ورخنەگرە ب شێوەکێ دژوار لەوما هەرێ بەرگازندەیە وبەرنەکامە ل نک خڕان ل زۆر دەمان.

کورد دبێژن: کور کڤانێ بابێ دکێشیت

١٠- گیسک: ڤاهیک: الجدي: Capricorn, goat

     دەستپێدکەت ژبیست ودووێ کانینا ئێکێ وحەتا نوزدێ کانینا دووێ، یێ تەبعەت ئاخە وستێرا وی زوحەلە (زحل - Saturn)، جهێ باوەریێ یە حەتا ئاستەکا زۆرا بەرز وبلند، یێ موکمە دکارێ خودا ، یێ کێم ئاخڤتنە بەلێ یێ پڕ کریارە، ودشێت خو بسەر دەلیڤەێت تەنگ ودژوار ب دەرئێخیت ب چەلەنگی، چاڤدێریەکا زۆر ل خو دکەت، یێ راستە دگەل خو وخەلکێ جڤاکێ، حەز درستیێ دکەت وخو ب دویر دئێخیت ژخەون وئاشوپان، دگەل راستیێ دژیت.

کورد دبێژن: گیسکێ مالوفی یە

 ١١- دەولک: بێدروک: دولک: دول: دەولە: دولو: سەتڵ: الدلو: Aquarius, bucket, pail

              ئەڤ بورجە دەستپێدکەت ژبیستێ کانینا دووێ وحەتا هەژدەی شواتێ، یێ تەبعەت بایە، ستێرا وی زوحەلە (زحل – Saturn)، خودانێ وێ جار جار یێ شەرمینە وهندەک جاران یێ کەپی بلندە، ژبەر ڤێ چەندێ دبیتە جهێ ئیزایێ کو مروڤ دوی ب گەهیت ب درستی، خو ب هزر وبیر ورایێت خو ڤە دگریت، بەلێ ل دەمێ تەنگاڤیێ دهێتە خارێ ژوان ب ساناهی وپشتەڤانیێ ژێدکێشیت بلەز.

کورد دبێژن: دەولکەکێ ئاڤێ، ئێکێ هەری وتەقنێ

١٢- نەهنگ: حیت: ماهیک: ماسی: نونە: الحوت: Pisces, whale

   پەیڤا نونا (ماسی) یا ئارامی ژپیتا(ن)ێ یا هاتی چنکی ئەڤ پیتە رەنگێ ماسیێ ونەهنگی ددەت، ژنوزدێ شواتێ دەستپێدکەت وحەتا پیستێ ئاڤدارێ، یێ تەبعەت ئاڤە، ستێرا وی ژکەڤندا جوپیتەرە ئو نوی نپتونە ئانکو(المشتري- Jupiter)، یێ رازی یە ب دەمێ تێدا وپیتێ نادەتە دەمێ داهاتو، یێ دژوار وتولڤەکرە دەما دهێتە ئێشاندن، یێ پربێژە ومشە ئاخڤتنە، نهینیێت خو بو کەسێ دیار ناکەت ب چ ئاوایا. 

کورد دبێژن: خو نە تو نەهنگێ

    ل ئەڤا بۆری ل ژۆری بو مە بەرنیاس دبیت کو هەر سێ بورج دکەڤنە دبن ڤان خال ونیشانان:

١- دکەڤنە دبن نیشانا ئاڤێ ئەڤ بورجەنە: کێڤژالە ودیپشک ونەهنگ

٢- دکەڤنە دبن نیشانا ئاگری ئەڤ بورجەنە: بەرخ وشێر وکڤان

٣- دکەڤنە دبن نیشانا خاکی(ئاخێ) ئەڤ بورجەنە: گا وگیسک وکچین  

٤- دکەڤنە دبن نیشانا بای(هەوای) ئەڤ بورجەنە: جێمک وتەرازی ودەولک

 ١٣-١٠-٢٠١٨ – دهوک – ئەحمەد عەلێ حەسەن