O latín na publicidade

O latín segue hoxe máis vivo que nunca nos textos publicitarios. Ben sexa na prensa escrita, nos spots televisivos e radiofónicos ou na rede, outorga ao produto anunciado un plus de prestixio e calidade que lle permite destacar no mare magnum da xungla da publicidade, como apunta Delio de Martino no seu artigo "El latín publicitario". Normalmente son palabras en nominativo, que enlazan directamente coas bondades ou cualidades intrínsecas do produto, pero tamén temos barbarismos (Fiat Ulysse), solecismos (Nil melior), aféreses (Asus por Pegasus), apofonías (Lexus por luxus), etc. Hai tamén mutación de latinismos célebres, como un "ecce Bimbo" (por ecce homo) ou nomes mixtos latín e inglés (Air Nostrum). Outros son adaptacións ou ecos de locucións latinas, como Astra (per aspera ad astra), acrónimos como Asics (Anima sana in corpore sano) ou frases célebres de personaxes destacados da Antigüidade como César ou Horacio (Nunc est Bibendum)