OM 126 Settembru-Ottubru 2011

Nru. 126 Settembru — Ottubru 2011 ____________________________________________________________________________________________Ir-Rużarju: Il-Misteri tad-Dawl

Meta mit-tfulija u l-ħajja f’Nażaret ngħaddu għall-ħajja pubblika ta’ Ġesù, il-kontemplazzjoni tagħna twassalna għall-misteri li b’mod speċjali jistgħu jissejħu l-“misteri tad-dawl”. Tassew li l-misteru kollu ta’ Kristu hu misteru tad-dawl, għax hu d-“dawl tad-dinja” (Ġw 8, 12). Iżda dil-verità tidher l-iktar meta jħabbar il-Vanġelu tas-Saltna, matul il-ħajja pubblika tiegħu. ... Kull wieħed minn dawn il-misteri hu rivelazzjoni tas-Saltna li issa tinsab fl-istess persuna ta’ Ġesù. (1) Il-Magħmudija fil-Ġordan hi qabelxejn misteru tad-dawl. Meta Kristu, il-bniedem innoċenti li sar “dnub” minħabba fina (ara 2Kor 5:21) jinżel fl-ilma, is-smewwiet infetħu beraħ u l-leħen tal-Missier qal li hu “Ibnu l-għażiż” (ara Mt 3:17), filwaqt li l-Ispirtu niżel fuqu biex jagħtih il-missjoni li kellu jwettaq. (2) L-ewwel wieħed mis-sinjali mogħti f’Kana (ara Ġw 2:1-12), meta Kristu bidel l-ilma f’inbid u fetaħ qlub id-dixxipli tiegħu għall-fidi, bis-saħħa tal-indħil ta’ Marija, l-ewwel waħda fost dawk li jemmnu. (3) Il-predikazzjoni li biha Ġesù xandar il-miġja tas-Saltna ta’ Alla, sejjaħ għall-konverżjoni (ara Mk 1:15) u jaħfer id-dnubiet ta’ dawk kollha li jersqu lejh bil-fiduċja u bl-umiltà (ara Mk 2:3-13; Lk 7:47-48): il-bidu tal-ministeru tal-ħniena li hu jissokta jwettqu sa l-aħħar tad-dinja, b’mod partikulari permezz tas-Sagrament tal-Qrar, li hu ħallih f’idejn il Knisja tiegħu (ara Ġw 20:22-23). (4) L-aqwa misteru tad-dawl hu t-Trasfigurazzjoni, li skont it-tradizzjoni maħsub li seħħ fuq il-Muntanja Tabor. Il-glorja ta’ Alla tiddi mill-wiċċ ta’ Kristu filwaqt li l-Missier jordna lill-appostli mistgħaġbin biex “jisimgħu lilu” (ara Lk 9:35) u biex jitħejjew ħalli jaqsmu miegħu l-agunija tal-Passjoni, sabiex jaslu miegħu għall-ferħ tal-Qawmien u għall-ħajja mibdula mill-Ispirtu s-Santu. (5) It-twaqqif tal-Ewkaristija, li fiha Kristu joffri ġismu u demmu bħala ikel taħt ix-xbihat tal-ħobż u l-inbid, u jixhed “sa l-aħħar” imħabbtu għall-bnedmin (Ġw 13:1), li għall-fidwa tagħhom hu se joffri lilu nnifsu bħala sagrifiċċju.

Hawn il-preżenza ta’ Marija tibqa’ fl-isfond, ħlief fil-miraklu ta’ Kana.

L-Evanġelji jsemmu lil Marija mill-inqas meta f’xi waqt kienet preżenti matul il-predikazzjoni ta’ Ġesù (ara Mk 3:31-35; Ġw 2:12), u ma jsemmu xejn jekk kenitx waqt l-Aħħar Ċena u t-twaqqif tal-Ewkaristija. Iżda s-sehem tagħha f’Kana b’xi mod jissieħeb ma’ Kristu matul il-ministeru tiegħu. Ir-rivelazzjoni magħmula direttament mill-Missier waqt il-Magħmudija fil-Ġordan, u li dwiet minn Ġwanni l-Battista, hi mqiegħda fuq fomm Marija f’Kana, u ssir l-aqwa parir ta’ omm li Marija tagħti lill-Knisja ta’ kull żmien: “Agħmlu dak li jgħidilkom hu” (Ġw 2:5). Dan il-parir hu l-bidu xieraq

għall-kliem u s-sinjali tal-ministeru pubbliku ta’ Kristu u hu l-pedament Marjan tal-“misteri tad-dawl” kollha. (RosariumVirginis Mariae, 21)

L-Ewwel Misteru tad-Dawl

Ġesù tagħmmed fix-xmara Ġordan

Dil-ġrajja seħħet snin wara twelid Kristu, iżda nistgħu nsejħulha milied ieħor. Fl-ewwel festa l-Mulej twieled għall-bnedmin, fit-tieni reġa’ twieled għas-sagramenti; f’dik twieled permezz tal-Verġni, f’din permezz tal-misteru. F’dik twieled bħala bniedem u ommu Marija laqgħetu b’għożża liema bħalha, f’din twieled skont il-misteru u Alla l-Missier ħaddnu b’leħnu u qal: “Dan hu Ibni li fih sibt il-għaxqa tiegħi: isimgħu lilu”. F’dik naraw l-omm bi ħlewwa kbira żżiegħel b’Binha f’ħoġorha, fl-oħra nisimgħu lill-Missier jagħti xhieda tajba għal Ibnu; l-omm ressqitu lill-maġi biex jadurawh, il-Missier urieh lill-ġnus biex iqimuh. Ġesù ried li ġismu l-qaddis jinħasel bl-ilma, mhux biex jitqaddes bl-ilma, iżda biex hu jqaddes l-ilma, u jsaffi dak l-ilma li mess miegħu. (San Massimu)