OM 107 Lulju-Awwissu 2008

Nru. 107 Lulju — Awwissu 2008

________________________________________________________________________________________________________________________

Ir-Rieda ta’ Marija hi l-istess Rieda ta’ Alla għalina

Mill-ittri ta’ San Massimiljanu Kolbe

Aħna għandna nħobbu l-Missier maħbub tas-sema. L-aqwa ktieb li jurina kif nimxu l-quddiem fl-imħabba ta’ Alla, huwa Ġesu Kristu, u dan imsallab. Għalhekk, l-imħabba tkun perfetta, aktar u aktar meta titlob minna s-sagrifiċċju tar-rieda tagħna.

Dan kollu aħna niksbuh aktar malajr permezz tal-Verġni bla tebgħa Marija. Fit-tjieba tiegħu, Alla ried jafda f’idejha t-tqassim tal-ħniena tiegħu. Ma hemm ebda dubju li r-rieda ta’ Marija hi l-istess rieda ta’ Alla għalina.

Meta aħna nikkonsagraw ruħna lilha, insiru f’idejha strumenti tal-ħniena ta’ Alla, kif hi strument f’idejn Alla.

• Ejjew inħallu lil Marija tmexxina.
• Ejjew inħallu lil Marija żżommna minn idejna.
• Taħt il-ħarsien ta’ Marija ma jkollniex għax nibżgħu u ninkwetaw.
  • Marija teħdilna ħsieb ta’ kollox.
  • Marija tipprovdilna kollox.
  • Marija tgħinna minnufih fil-ħtiġiet kollha tar-ruħ u l-ġisem.
  • Marija tbiegħed minna kull tiġrib u kull hemm.

Marija … Nixieq qabel immut

minn “Lilek Omm Alla” ta’ Ivo Galea

Nixieq qabel immut ninsiġlek għanja,

għanja sabiħa li ma tmutx maż-żmien,

u jgerbu s-sekli wieħed wara l-ieħor …

u tibqa’ l-għanja tidwi mal-ħolqien …

Għaliex minn ġarrab sew kobor imħabbtek

ikollu, bla ma jrid, jgħanni kburitek,

w għalkemm il-kelma tiegħi dgħajfa u fqira

tasal biex tagħti ħjiel kobor Sbuħitek.

Is-Safa tal-Qalb Tiegħek għaġġbet ’l-Anġli

u sfajt Għamara denja tal-Mulej,

Int sirt it-Tabernaklu ħaj u veru

ta’ Dak li jibqa’ jsaltan għalli ġej.

Int ġejt magħżula fost in-nisa kollha

biex tkun tassew “L-Imbierka”, O Marija,

u minn xħin dħalt fid-dinja bi Tnissilek

għaġġibt lill-ħolqien kollu bis-Sbuħija.

Il-Kobor Tiegħek kien fiċ-Ċokon Tiegħek,

għax dejjem kont Qaddejja tal-Mulej,

għalhekk Hu għażlek biex tissieħeb Miegħu

u stħoqqlok tkun imsieħba mal-Feddej.

Ir-rieda tiegħek kienet ħaġa waħda

mar-rieda tal-Mulej li għammar fik,

Hu għammar fik għax ħares lejn ċkunitek ...

xħin għażlek b’Ommu l-anġli stagħġbet bik.

Bil-grazzja kont mimlija minn Tnissilek

u din minn jum għall-ieħor kotrot fik,

għax Inti ma ridt xejn ħlief li ried Alla

u r-Rieda t’Alla dejjem seħħet biK.

Kif Inti aċċettajt li ssir Omm Alla

Alla sar Bniedem, “ċkien” ... u inti kbirt,

u l-kobor Tiegħek kompla jseħħ u joktor

xħin lilna bħala wliedek ħadtna b’wirt.

Xħin naħseb li Int Ommi u int Omm Alla

inħoss titnissel fija Tama kbira

għax jekk int sirt OMM ALLA, Omm l-IMĦALLEF,

ta’ ruħi wkoll sirt l-Omm, ruħ Ħatja u fqira.

U jiena naf li Inti qatt ma tehda

biex tħabbeb mal-Mulej lil min hu ħati,

għax Int għalhekk ilqajtna bħala wliedek

sabiex ħadd minna qatt, ma jmur ibati.

U jiena naħseb, Ja Omm Twajba w Ħelwa

li Inti stess ma tafx kemm inti kbira ...

kbira fl-Imħabba, kbira wkoll fil-Ħniena

għax qatt ma tħalli ruħ li tibqa’ lsira ...

Nixtieq, Madonna, li ninsiġlek għanja,

Għanja sabiħa li ma tmutx maż-żmien,

U met’ hekk Alla jrid Hemm Fuq niltaqgħu

jien nibqa’ ngħannihielek bla waqfien.

It-Tlugħ is-Sema tal-Verġni Marija

minn “Alla li jqassam id-doni b’idejn miftuħa” tal-Papa Piju XII

F’jum il-festa tat-tlugħ fis-sema tal-Verġni Marija, Missirijiet il-Knisja u l-għorrief kbar tagħha, fl-omeliji u t-talb tagħhom, jitkellmu fuq dan il-misteru bħala verità magħrufa minn dejjem u milqugħa mill-insara kollha. Huma jgħarblu sewwa dan il-misteru u juru t-tifsir sħiħ tiegħu. B’hekk aħna nifhmu malajr li din il-festa mhux biss tfakkar li l-ġisem mejjet tal-Verġni Marija qatt ma ra t-taħsir tal-qabar, imma tfisser ukoll li Marija kisbet rebħa sħiħa fuq il-mewt u għalhekk tgħolliet għall-glorja tas-sema, glorja bħal dik ta’ l-Iben il-waħdieni tagħha.

San Ġwann Damaxxenu hu l-aqwa wieħed fost dawk kollha li fissru dan il-misteru. Hu qabbel it-tlugħ glorjuż ta’ l-Omm ta’ Alla bir-ruħ u l-ġisem fis-sema mal-privileġġi u l-grazzji l-oħra kollha li bihom kienet imżejjna. Bi kliem tassew li jqanqal huwa jgħid:

• “Kien meħtieġ li dik li fit-twelid ta’ Binha żammet bla mittiefsa xbubitha, wara mewtha żżomm bla mittiefes ġisimha.
• Kien meħtieġ li dik li ġabet fi ħdanha bħala binha ’l Dak li ħalaq kollox, ikollha l-għamara tagħha ma’ Alla.
• Kien meħtieġ li l-għarusa li l-Missier għażel għalih, tgħammar għal dejjem f’kamartu.
• Kien meħtieġ li dik li rat lil Binha msallab, li dak in-nhar nifdilha qalbha s-sejf tan-niket li ma niffidilhiex fi twelidu, tarah ukoll fil-lemin tal-Missier.
• Kien meħtieġ li l-Omm ta’ Alla jkollha dak kollu li hu ta’ Binha, u tkun miqjuma mill-ħlejjaq kollha bħala Omm Alla u qaddejja tiegħu”.

San Ġermanu ta’ Kostantinopli kien jaħseb li l-ġisem tal-Verġni Omm Alla Marija ma rax it-taħsir tal-qabar u ttella’ s-sema għaliex dan kien jixraq mhux biss għax Marija kienet Omm Alla imma wkoll minħabba fil-qdusija speċjali tagħha. Għaliex bħala verġni ġisimha qatt ma ttiefes: “Int, kif inhu miktub, int kollok ġmiel u l-ġisem tiegħek ta’ verġni hu qaddis u safi, għamara kollu kemm hu ta’ Alla, tant li minħabba f’hekk ukoll ma kellux jerġa’ jsir trab. Baqa’ ġisem ta’ bniedem imma tbiddel għax kiseb id-don tal-ħajja li ma tintemm qatt. Baqa’ l-istess ġisem, imma ħaj u glorjuż, ħieles minn kull ħsara u mgħoni b’ħajja li ma għandha ebda nuqqas”.

Ġisem Marija hu qaddis u wisq glorjuż

Kittieb ieħor ta’ l-ewwel żminijiet tal-Knisja jgħid: “Marija hi l-Omm glorjuża ta’ Kristu, Alla u Salvatur tagħna li jagħti l-ħajja u ħajja bla tmiem. Għalhekk, Hu taha l-ħajja mill-ġdid u n-nuqqas ta’ taħsir f’ġisimha. Hu qajjimha mill-qabar u tellagħha għal dejjem miegħu, kif hu biss jaf”.

Dawn l-argumenti kollha ta’ dawn il-Missirijiet qaddisa fl-aħħar mill-aħħar huma mibnija fuq dak li nsibu fl-Iskrittura li turina l-Verġni Omm Alla Marija dejjem marbuta ma’ Binha Ġesu b’mod li taqsam miegħu xortih f’kollox.

Ta’ min jiftakar ukoll li mit-tieni mitt sena ’l hawn, Missirijiet il-Knisja dejjem qiesu l-Verġni Marija Eva ġdida, marbuta b’rabta li ma bħalha mat-tieni Adam, għalkemm mhux daqsu, fil-ġlieda tiegħu kontra l-għadu ta’ l-infern. Ġlieda li, kif tħabbar minn qabel fil-bidu, kellha twassal għar-rebħa sħiħa fuq il-mewt u d-dnub. Fil-kitba ta’ l-Appostlu tal-ġnus, dawn iż-żewġ għedewwa tagħna huma dejjem marbutin ma’ xulxin. Kif il-qawmien glorjuż ta’ Kristu mill-imwiet kien l-aħħar u l-aqwa ġrajja li biha seħħet għalkollox din ir-rebħa, hekk il-ġlieda li fiha l-Verġni Marija ssieħbet ma’ Binha kellha tintemm għaliha bil-glorifikazzjoni ta’ ġisimha. Kif jgħid l-Appostlu: Meta dak li jmut jilbes l-immortalità, mbagħad iseħħ dak li hemm miktub: “Inbelgħet il-mewt fir-rebħa”.

Għalhekk, il-kbira Omm Alla Marija sa minn dejjem ta’ dejjem kienet marbuta b’mod tassew ta’ l-għaġeb ma’ Binha Ġesu b’digriet wieħed tal-providenza ta’ Alla:

• bla tebgħa fit-tnissil tagħha,
• xebba bla mittiefsa u Omm Alla fl-istess waqt,
• sieħba minn qalbha tal-Feddej fir-rebħa sħiħa tiegħu fuq id-dnub u fuq dak kollu li d-dnub iġib miegħu,
• hi kisbet ġie˙ li ma bħalu, ġieħ li qisu jgħaqqad fih u jinseġ flimkien b’mod ta’ l-għaġeb il-privileġġi kollha tagħha;
• kisbet il-ġieħ li ġisimha ma jarax it-taħsir tal-qabar, għaliex kif Binha ħareġ rebbieħ fuq il-mewt, hekk hi wkoll kellha toħroġ rebbieħa fuq il-mewt u tittella’ fil-glorja tas-smewwiet bir-ruħ u l-ġisem, biex toqgħod bħala Sultana fuq il-lemin ta’ Binha, is-Sultan taż-żminijiet kollha, is-Sultan ta’ dejjem.

Iċ-Ċentinarju tal-Beatu Farnġisku

Il-Beatu Franġisku twieled f’Aljustrel, raħal fid-distrett ta’ Fatima, fit-3 a.m. tal-11 ta’ Ġunju 1908. Għammduh disgħat ijiem wara, fl-20 ta’ Ġunju 1908. Il-ġenituri tiegħu, Manuel Pedro Marto (1873 – 1957) u Olimpia de Jesus (1864 – 1956) kienu Insara devoti, b’dik il-fidi sħiħa u sempliċi li tikkaratterizza lin-nies tajba tal-kampanja.

F’ittra datata 7 ta’ Settembru 1917, l-avukat żagħżugħ, Dr Carlos de Azevedo Mendes, wara li tkellem ma’ Franġisku matul iż-żmien tad-dehriet, iddeskrivih hekk: “bil-beritta tas-suf imdeffsa l-isfel sew ġo rasu, bil-ġakketta qasira ħafna, l-qmis ħierġa minn taħt il-ġakketta, l-qalziet issikkat, kien qisu raġel żgħir. Tifel gustuż. Wiċċu ferrieħi u mqareb. Huwa wieġeb mill-ewwel għall-mistoqsijiet tiegħi”.

Xi xahrejn u ftit ġimgħat wara, jiġifieri wara l-aħħar dehra, l-Baruni ta’ Alvaiázere, Dr Luís António Vieira de Magalhães e Vasconcelos, matul iż-żjara tiegħu f’Fatima ukoll ħallielna deskrizzjoni ta’ Franġisku, li ġġib dik id-data. Iddeskrivih hekk: “Kien tifel ta’ bejn l-10 u t-12 il-sena, liebes skond id-drawwa ta’ tfal tal-kampanja. Kien jidher għalkollox ferrieħi u bla nkwiet ta’ xejn. Aħna tlabna lit-tfajjel żgħir biex jiġi magħna. Hu aċċetta mill-ewwel, u bi tbissima qabeż għal ġol-karozzza li konna qed insuqu. Aħna staqsejnih numru ta’ mistoqsijiet iżda hu iktar tbissem milli tkellem. Huwa deher li kien mistagħġeb bil-partijiet differenti tal-karozza”.

Mid-deskrizzjoni li ħalliet Sr Luċija, aħna nafu li hu kien iħobb l-għasafar, iħobb idoqq il-flawt u kien iħobb ikanta. Huwa kien iħobb il-fanali tal-Anġli. Iżda xejn ma kien isaħħru iktar minn tlugħ u inżul ix-xemx. Sakemm kien ikun baqa’ xi ħjiel ta’ nzul ix-xemx, hu ma kienx iħabbel moħħu biex iħares ħalli jara jekk xi fanali tal-Anġli kienux inxtegħlu.

Fliemkien ma’ oħtu Ġaċinta ta’ seba’ snin, u l-kuġina tiegħu Luċija ta’ 10 snin, Franġisku ra żagħżugħ ta’ xi 14 jew 15 il-sena fuq il-għolja qrib id-dar tiegħu fir-rebbiegħa tal-1916. Iż-żagħżugħ kien iktar abjad mis-silġ li fid-dawl tax-xemx kien jidher trasparenti bħallikieku kien tal-ħġieġ, u kien sabiħ ħafna. Kien l-Anġlu tal-Paċi li kellimhom u għallimhom jitolbu, filwaqt li qal li l-Qlub ta’ Ġesu u ta’ Marija kienu attenti għall-leħen tat-talb ta’ interċessjoni tagħhom. Kien hemm żewġ laqgħat oħra ma’ l-Anġlu.

Xi xhur wara, f’nofs in-nhar ta’ nhar il-Ħadd 13 ta’ Mejju, huma raw fil-Cova da Iria, fuq siġra tal-ballut, Mara liebsa l-abjad, tiddi iktar mix-xemx, u li kien ħiereġ minnha dawl iktar ċar u qawwi milli minn tazza tal-kristall mimlija bl-ilma safi, meta ir-raġġi tax-xemx jgħaddu minn ġo fiha.

Il-Mara staqsiethom: “Intom tridu toffru lilkom infuskom lil Alla u tilqgħu t-tbatijiet kollha li hu jrid jibgħatilkom, bħala att ta’ tpattija għaddnubiet li bihom huwa offiż, u li titolbu għall-konverżjoni tal-midinbin?”

“Iva, aħna irridu”, wieġbet Luċija, f’isem it-tlieta li kienu.

Bi tweġiba għat-talbiet ta’ l-Anġlu u tal-Mara, li dehritilhom ħames darbiet oħra, Franġisku ddedika lilu nnifsu għalkollox għal-missjoni tiegħu.

L-investigazzjoni kanonika rigoruża rrikonoxxiet l-erojċità tal-ħajja qasira tiegħu. Il-Papa Ġwanni Pawlu II għolla lil Franġisku u lill-oħtu ż-żgħira Ġaċinta għall-qima tal-altar, wara li nqala’ miraklu bl-interċessjoni ta’ Franġisku u Ġaċinta. Matul iċ-ċerimonja tal-beatifikazzjoni tagħhom, il-Papa qal li huma kienu tqiegħdu fuq il-gandlier li Alla kien xegħel biex jagħti d-dawl lill-umanità waqt is-siegħat ta’ dlam u dubji tagħha”.

Ħalli huma jiddu issa dejjem iktar bid-dija tal-eżempju tagħhom, bil-mod kif wieġbu għas-sejħa għall-konverżjoni u biex ipattu għall-offiżi magħmulin kontra Alla u l-Qalb Bla Tebgħa ta’ Marija. Fil-prattika tad-devozzjoni tagħna lejhom, aħna msejħin biex kontinwament nimitaw il-virtujiet tagħhom u biex nitolbu l-interċessjoni tagħhom b’fiduċja dejjem ikbar waqt id-diffikultajiet tal-ħajja tagħna.

Alla għoġbu jagħti ħafna grazzji lil dawk li rrikorrew lejh bl-interċessjoni tal-Beatu Franġisku. Madankollu, jixraq li meta nitolbu l-għajnuna tagħhom, it-talb tagħna jkun indirizzat kemm lil Fanġisku u lil Ġaċinta, għaliex jonqos miraklu bl-interċessjoni tagħhom it-tnejn biex ikunu dikjarati qaddisin.

Ir-Reċita tal-Magnificat

Mill-kitba ta’ S. Alwiġ M. De Montfort

Fuq l-eżempju tal-Beata Marija ta’ Oignies u ta’ ħafna nies qaddisin oħra, l-ilsiera ta’ Ġesu f’Marija għandhom igħidu l-Magnificat ta’ spiss b’ringrazzjament lil Alla tal-grazzji li huwa ta lill-Verġni Mqaddsa.

Din hi l-unika talba li kkomponiet il-Madonna – jew aħjar li Ġesu kkompona b’fommha: “Il-Magnificat” hu l-iktar sagrifiċċju ta’ tifħir li Alla rċieva taħt l-ordni tal-grazzja. Hu l-innu l-iktar umli, li juri gratitudni. Huwa ukoll l-innu l-aktar sublimi u għoli fost il-Kantiċi kollha. Il-Magnificat iħaddan misteri hekk kbar u moħbija li lanqas l-Anġli ma jafu bihom.

Gerson, bniedem qaddis u ta’ skola profonda, għadda biċċa kbira minn ħajtu jikteb trattati ta’ tjieba u għerf fuq l-iktar suġġetti tqal; u kien biss fl-aħħar ta’ ħajtu, li hu ndaħal jirtogħod bil-biża’ biex ifisser il-Magnificat, li bih inkuruna x-xogħol kollu tiegħu. Fil-ktieb tiegħu fuq dan is-suġġett, hu jagħmel xi osservazzjonijiet tal-għaġeb fuq dan il-kantiku. Fost ħwejjeġ oħra, jgħid li l-Verġni Mbierka kienet tgħidu ta’ spiss, speċjalment wara t-tqarbin, bħala talba ta’ ringrazzjament.

L-għaref Benzonius, waqt li kien jikkummenta fuq il-Magnificat jirrakkonta ħafna mirakli li twettqu bil-qawwa tiegħu. Hu jgħid li d-demonji jitregħdu u jaħarbu meta jisimgħu dan il-kliem: “Hu wera l-qawwa ta’ driegħu, xerred lil dawk li huma mkabbra f’qalbhom,” (Lq. 1,51).