OM 115 Novembru-Diċembru 2009
OMMNA MARIJA
ITTRA MARJANA TA’ KULL XAHREJN
MAĦRUĠA MILL-KUMITAT DJOĊESAN
TAL-MADONNA TA’ FATIMA
MALTA
Nru. 115 Novembru — Diċembru 2009
_________________________________________________________________________
Alla għażel it- 13 tax-xahar għad-Dehriet ta’ Fatima
Alla Wieħed fi Tlett Persuni distinti
Patri Jeremias Carlos Vechina O.C.D, il-konfessur ta’ Swor Luċia kien ordnalha “taħt ubbidjenza” biex tikteb: “Kif jien issa nara l-messaġġ mal-medda taż-żmien u fid-dawl tal-ġrajjiet”. Dan hu ġabra tal-ispiritwalità matura tagħha, ħsiebha għal kollox f’Alla, b’fidi li ma tiċċaqlaqx u li tħalliha dejjem miftuħa għat-tama, wkoll meta bl-għajnejn tal-bnedmin tidher impossibbli.
Filwaqt li Swor Luċija mmaturat, il-ħajja spiritwali tagħha saret dejjem iżjed sempliċi, ċċentrata għal kollox fuq l-imħabba.
Hi kienet tħobb tirrepeti it-talba li għallimha l-Anġlu, li: “kienet għalija ħolqa kbira fl-għaqda tiegħi ma’ Alla, ħolqa li tħaddanni, żżommni, u mnaqqxa f’qalbi b’mod li ma titħassarx: “Trinità Qaddisa, Alla wieħed veru, li fik nemmen, fiK nittama; naduraK u nħobboK; ilqa’ l-imħabba tiegħi u l-adorazzjoni umli tiegħi.”
Hija tirrifletti wkoll dwar id-data tad-dehriet, u tikteb:
Għaliex Alla kellu jagħżel it- 13 tax-xahar għal din il-ġrajja? Jien ma nafx, iżda minn dak il-ħin il-quddiem waqt il-meditazzjonijiet tiegħi, ħsibt ħafna dwar dan id-dettal u staqsejt lili nnifsi: x’seta’ jfisser li għażel it-13 tax-xahar? Mingħajr ma kont naf it-tweġiba, darba waħda sibt lili nnifsi naħseb: Jista’ jkun li tfisser il-misteru tal-Iżjed Imqaddsa Trinita? “Alla wieħed fi tlett persuni distinti, Missier, Iben u Spirtu s-Santu”? U jien sikwit kont nimmedita fuq din il-fehma: Alla wieħed, tlett Persuni distinti, Missier, Iben u Spirtu s-Santu. Hi din it-tifsira li Alla ried jwassal? Jien ma nafx, iżda għalija din kienet qisha r-rifless ta’ dawl ġdid.
Is-Sejħa għas-Sagrifiċċju
minn “‘Sejħiet’ mill-Messaġġ ta’ Fatima” Kap 9—(ikompli ma’ l-aħħar ħarġa)
Imbagħad hemm sensiela ta’ sagrifiċċji żgħar li nistgħu u, sa ċertu punt għandna, noffru lil Alla. Il-fatt li fihom infushom huma żgħar, b’daqs
hekk m’humiex inqas mogħġubin minn Alla, iżda għandhom ħafna merti u ta’ vantaġġ kbir għalina nfusna, għaliex permezz tagħhom aħna nuru d-delikatezza tal-fedeltà tagħna, u l-imħabba tagħna lejn Alla u lejn il-proxxmu tagħna. Dawn is-sagrifiċċji żgħar li nagħmlu jgħanuna bil-grazzja, iqawwuna fil-fidi u l-imħabba, ningħoġbu minn Alla u mill-proxxmu, tagħna, u jeħilsuna mit-tentazzjoni tal-egoiżmu, tar-regħba, tal-għira u tat-tpaxxija tas-sensi.Hija l-ġenerożità fi ħwejjeġ żgħar ta’ kuljum li jseħħu kontinwament; li nipperfezzjonaw il-mument ta’ issa. Għalhekk:
Nitolbu bil-fidi u bl-attenzjoni
1) Nitolbu bil-fidi u bl-attenzjoni, nevitaw id-distrazzjonijiet kemm jista’ jkun; nitolbu bil-qima, niftakru li qegħdin nitkellmu ma’ Alla; nitolbu bil-fiduċju u l-imħabba, għax qegħdin fil-preżenza ta’ Dak li nafu li jħobbna u jrid jgħinna, bħalma jagħmel missier li jaqbad id ibnu ż-żgħir sabiex jgħinu jimxi: f’għajnejn Alla aħna dejjem tfal żg]ar fraġli li aħna dgħajjfa fil-prattika tal-virtù, li kontinwament nitfixklu u naqgħu, li minħabba f’hekk neħtieġu l-Missier tagħna li jagħtina idejh biex jgħinna nżommu bil-wieqfa u nimxu fit-triqat tal-qdusija.
Kemm jekk it-talb tagħna nagħmluh fil-knisja, fid-dar, matul xi vjaġġ, barra fil-kampanja jew mexjin għal għonq it-triq, Alla jinsab kullimkien u qiegħed jisma’ t-talbiet, it-tifħir u r-radd il-ħajr tagħna. Dan hu dak li Ġesù Kristu għallimna bit-tweġiba tiegħu lil mara Samaritana li staqsietu: “Missirijietna kienu jaduraw lil Alla fuq din il-muntanja; imma intom tgħidu li l-post fejn wieħed għandu jadura lil Alla jinsab f’Ġerusalemm” ... Ġesù qalilha, “Emmini, mara: jiġi żmien meta mhux fuq din il-muntanja taduraw lill-Missier, anqas f’Ġerusalemm. Intom taduraw lil dak li ma tafux; aħna naduraw lil dak li nafu (...). Iżda tiġi siegħa, anzi issa hi, meta dawk li tassew jaduraw jibdew jaduraw lill-Missier fl-ispirtu u l-verità.” (Ġw. 4, 19-24).
Alla jridna nitolbu bis-sinċerità. filwaqt li nagħrfu x’aħna, l-faqar tagħna, x-xejn tagħna quddiem Alla; nifhmu x’hinu dak li qegħdin nitolbu u nwiegħdu bis-sinċerità, lesti li nwettqu l-wegħdiet tagħna. Ħalli t-tifħir u r-radd il-ħajr tagħna lil Alla jixhed is-sewwa li hemm f’qalbna, fi spirtu ta’ fidi, ta’ mħabba u ta’ fiduċja; Alla ma jieħux pjaċir bi kliem sabiħ li hu fil-vojt u bla sens, jew b’formoli mfasslin biex jiġbdu l-applawsi mingħand il-ħlejjaq. Le, t-talb tagħna għandu jkun umli u akkompanjat ma’ spirtu ta’ sagrifiċċju.
Ħafna drabi, jkun meħtieġ li niċċaħdu minn xi ftit tal-ħin tal-mistrieħ tagħna; forsi inqumu iktar kmieni sabiex immorru l-knisja u nieħdu sehem fil-Quddiesa; jew bil-lejl qabel ma norqdu, inwarrbu ftit ħin biex nirreċitaw ir-Rużarju, nagħmlu sagrifiċċju li nitfu r-radju jew it-televiżjoni sabiex nagħmlu hekk. Hija ċ-ċaħda ta’ dak li jogħġobna u li nieħdu pjaċir bih li Alla jitlob minna. U kif diġa ntqal, jekk aħna ma rridux inċaħħdu lilna nfusna f’din il-ħajja, aħna se nsibu lilna nfusna ssagrifikati fil-ħajja li ġejja. Għaliex jekk ma nistgħux nittamaw li nsalvaw permezz tal-innoċenza tagħna, nistgħu nsalvaw biss permezz tat-talb u l-penitenza.
Noffru lil Alla s-sagrifiċċju ta’ xi att żgħir ta’ ċaħda tagħna nfusna fl-ikel
2) Noffru lil Alla s-sagrifiċċju ta’ xi att żgħir ta’ ċaħda tagħna nfusna fl-ikel, iżda mhux li nipperikulaw is-saħħa fiżika tagħna li neħtieġu sabiex inwettqu ix-xogħol tagħna. Hekk, per eżempju, li nagħżlu xi frotta, xi deżerta, xi xarba li ma tantx togħġobna minflok dik li nħobbu aħna, li nissaportu l-għatx għal xi ħin, jew għalinqas ma nixorbux iżżejjed.
Waqt li nkunu nieħdu sehemna waqt l-ikel, ma nieħdux l-aħjar biċċa. Iżda jekk ma nistgħux nagħmlu hekk mingħajr ma niġbdu l-attenzjoni fuqna nfusna, neħduha bis-sempliċità u mingħajr skruplu, filwaqt li nirringrazzjaw lil Alla talli jfissidna, għaliex ma għandniex naħsbu li Alla, ta’ Missier tajjeb li Hu, ikun kuntent bina biss meta jarana nipprattikaw iċ-ċaħda tagħna nfusna. Alla ħalaq l-affarijiet tajbin għal uliedu, u jieħu gost jarana nużawhom, mingħajr ma nabbużaw bihom, u imbag]ad inwettqu dmirna li naħdmu sabiex ikunu jistħoqqulna, u nagħmlu użu minnhom bil-gratitudni u bl-imħabba għal Dak li jfawwarna bid-doni tiegħu.
Is-sagrifiċċju li nistgħu u għandna nagħmlu f’dak li għandu x’jaqsam ma’ l-ilbies
3) Is-sagrifiċċju li nistgħu u għandna nagħmlu f’dak li għandu x’jaqsam ma’ l-ilbies: nissaportu ftit tal-kesħa jew tas-sħana mingħajr ma ngergru; jekk qegħdin f’kamra flimkien ma’ nies oħra, inħalluhom jagħlqu jew jiftħu l-bibien u t-twieqi kif jogħġobhom. Nilbsu deċenti u bil-modestja, mingħajr ma nsiru lsiera ta’ l-aħħar
moda, u ma nimxux magħha kull meta din ma tkunx taqbel ma’ dawk iż-żewġ virtujiet, sabiex aħna stess ma nkunux ta’ okkażżjoni ta’ dnub għall-oħrajn, bil-mod ta’ kif nilbsu, billi nżommu f’moħħna li aħna responsabbli għad-dnubiet li l-oħrajn jagħmlu minħabba fina.Għalhekk, għandna nilbsu b’mod li jaqbel mal-morali Nsara, mad-dinjità personali u b’solidarjetà ma’ l-oħrajn, filwaqt li noffru lil Alla s-sagrifiċċju tal-frugħa esaġerata. F’dak li għandu x’jaqsam mal-frugħa, nkunu nafu kif noffru lil Alla s-sagrifiċċju li ngħaddu mingħajr it-tiżjin estern esaġerat bil-ġojjelli, li nistgħu nagħaddu għalkollox mingħajrhom, u l-flus mill-bejgħ tagħhom nistgħu nużawhom biex ngħinu lil ħutna subien u bniet fil-bżonn. Minflok ma nilbsu ħwejjeġ magħmulin minn materjal sinjur u jiswa ħafna, ejjew nikkuntentaw b’xi ħaġa iktar sempliċi u li tiswa inqas, b’hekk niffrankaw sabiex inkunu nistgħu ngħinu lil ħutna subien u bniet li ma għandhom xejn biex jgħattu lilhom infushom.
Nissaportu mingħajr tgergir kull ħaġa żgħra ta’ dwejjaq
4) Nissaportu mingħajr tgergir kull ħaġa żgħra ta’ dwejjaq li nistgħu niltaqgħu magħha fi triqtna: kultant, tista’ tkun xi kelma kuntrarja, li ddejjaqna jew ma tgħoġobniex; drabi oħra tista’ tkun tbissima ironika, xi ħarsa bl-ikraħ, xi tmerija; jew inkunu maqbuża jew imwarrba bħalikieku ma niswew xejn; għad li wkoll, tista’ tkun xi nuqqas ta’ ftehim, xi ċanfira, xi ċaħda, meta inkunu maqbu\in, minsijin, xi azzjoni ta’ ngratitudni, u l-bqija.
Għalhekk, huwa meħtieġ li nkunu nafu kif nissaportu kollox, noffru s-sagrifiċċju tagħna lil Alla u nħallu l-affarijiet jgħaddu: nħallu dawn l-affarijiet kollha jgħaddu bħalikieku konna għomja, torox u muti, sabiex fil-fatt aħna nkunu nistgħu naraw aħjar, nitkellmu b’ċertezza ikbar u nisimgħu il-leħen ta’ Alla. Ħalli jidher qisu li tkun għaddiet ta’ l-oħrajn; ngħid “jidher” għaliex fil-verità dak li jirbaħ huwa dak li jaf iżomm is-skiet għall-imħabba ta’ Alla. Bil-ferħ inħallu lil oħrajn jieħdu l-ewwel postijiet, ikun xi jkun l-aħjar għalihom, inħalluhom jieħdu l-mertu tal-frott tat-taħbit tagħna, tas-sagrifiċċji tagħna, tal-ħidmiet tagħna, tal-ħila tagħna, ta’ dawk l-affarijiet li ittieħdulna, jien saħansitra ngħid tal-virtù tagħna, bħalikieku kienet tagħhom, u ejjew nikkuntentaw ruħna billi nkunu umli u nissagrifikaw lilna nfusna għall-imħabba ta’ Alla u tal-proxxmu tagħna.
Nissaportu bil-qalb il-kumpanija ta’ dawk li ma għandniex grazzja magħhom jew li ma naqblux magħhom, ta’ dawk li huma kontra tagħna, li jdejquna u jiffittawna b’mistoqsijiet mhux flokhom u wkoll li jweġġgħuna; ejjew inpattulhom bi tbissima, b’daqsxejn ta’ azzjoni tajba li nagħmlulhom, bi pjaċir, naħfrulhom u nħobbuhom, b’għajnejna mwaħħlin fuq Alla.
Din iċ-ċaħda tagħna nfusna sikwit hi l-iktar ħaġa diffiċli għan-natura umana tagħna, iżda hija wkoll dik li l-iktar togħġob lil Alla u li hi ta’ mertu għalina nfusna.
il-penitenzi u s-sagrifiċċji esterni
5) Imbagħad hemm il-penitenzi u s-sagrifiċċji esterni, xi wħud obbligatorji, l-oħrajn volontarji.
Eżempju tal-penitenzi obbligatorji huma s-sawm u l-astinenza kkmandati mill-Knisja. Iżda aħna nistgħu u għandna naqbżu dan limitu, li fil-fatt huwa ftit wisq meta mqabbel mal-ħtieġa tagħna li nagħmlu penitenza għad-dnubiet tagħna u għal dawk ta’ l-oħrajn.
Hemm ċerti strumenti ta’ penitenza li kienu wżati minn ħafna Qaddisin, bħalma huma swat, qomos tax-xagħar, u l-bqija. Penitenzi bħal dawn huma magħmulin f’għaqda ma’ Kristu flaġellat mal-kolonna, marbut bil-ħbula, nkurunat bix-xewk. Jekk Kristu bata hekk għalina, huwa iktar xieraq li aħna għandna nagħmlu xi ħaġa għaliH u għal-ħidma tiegħu tal-fidwa.
Prattika oħra hi t-talb, fi spirtu ta’ penitenza, b’dirgħajna miftuħin f’għamla ta’ salib, f’għaqda ma’ Kristu msallab, jew nitolbu baxxuti bi ġbina jmiss ma’ l-art. Hekk inbaxxu lilna nfusna quddiem Alla li ażżardajna noffenduH, aħna li quddiemu m’aħna xejn.
Għalkemm penitenzi bħal dawn m’humiex obbligatorji, f’ħafna każijiet huma meħtieġa; ngħidu aħna, biex jistgħu jintrebħu naturi li jitlagħlhom malajr li jġagħlu n-nies jidinbu, jew it-tentazzjonijiet qawwija tad-dinja, tax-xitan, tas-suppervja u tal-ġisem.
Ġesù Kristu, li kien divin, ma setax jidneb, iżda Hu tana eżempju mill-aqwa ta’ ħajja ta’ penitenza. Qabel beda l-ħajja pubblika tiegħu, Hu għadda erbgħin jum fid-deżert, jitlob u jsum. L-Evanġelji jgħidulna li matul il-ħajja pubblika tiegħu, Ġesù sikwit inqata’ mill-folla biex jitlob lill-Missier f’post imwarrab. U qabel ta lilu nnifsu għal mewt, Hu għadda ħin twil jitlob fil-Ġnien tal-Ġetsemani.
U aħna, ħlejjaq dgħajjfin li aħna, ma neħtiġux nitolbu? Neħtieġu tassew. Hu fit-talb li niltaqgħu ma’ Alla; hu f’din il-laqgħa ma’ Alla li Hu jagħtina l-grazzja u l-qawwa li neħtieġu sabiex niċħdu lilna nfusna billi noffru kull ħaġa mitluba minna: “Idħlu mill-bieb id-dejjaq. Għax wiesa’ l-bieb u spazjuża t-triq li tieħu għat-telfien, u ħafna huma li jaqbdu lilha. Imma kemm dejjaq huwa l-bieb u dejqa t-triq li tieħu għall-ħajja, u ftit huma li jsibuha!” (Mt. 7, 13 – 14). Hawn Ġesù Kristu jurina l-ħtieġa kbira li niċħdu lilna nfusna għax, mingħajr l-ispirtu ta’ ċaħda, ma nidħlux fil-ħajja ta’ dejjem.
“Offru kontinwament talb u sagrifiċċji lill-Aktar Għoli”.
-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-
IL LEJL TAS-SKIET
minn "Lilek Omm Alla" ta' Ivo Galea
Ejj’ nifirħu ma’ Marija
fit-Twelid tal-Iben Tagħha,
dit-Tarbija, ċkejkna ċkejkna,
bl-akbar għożża tħannen Magħha.
Ejj’ nifirħu ma’ Marija
waqt li tqiegħdu fil-maxtura,
w’ għarkobbtejha, kollha fidi,
lil Bin Alla bdiet tadura,
U Ġużeppi, umli w twajjeb,
kollu ġabra w kollu skiet
ma’ Marija, Omm u Verġni
il-ferħ jaqsam tal-Milied.
Ejj’ nifirħu u nissieħbu
ma’ dawk l-Anġli li kantaw
“Glorja ’l Alla”, kif fi ħdanha
lit-Tarbija ċkejkna raw;
u bħal Maġi lilu noffru
tliet rigali ħa’ nferrħuh ...
noffru Qalbna, noffru Ru]na
u Ħajjitna kollha ntuh.
Ejja naqsmu lkoll bejnietna
dan il-ferħ li huwa ġieb
għax Ġesù ġie biex jifdina
u mill-ġdid jagħmilna ħbieb ...
Dejjem lest jiltaqa’ magħna
Għad li aħna midinbin,
u b’dirgħajh it-tnejn miftuħa
lest jilqagħna ... imsejknin.
**** **** ****
Il-Milied joffri tagħlima ...
Alla ġie tal-lejl fil-kwiet ...
u jekk trid tiltaqa’ m’Alla
FittxU dejjem qalb is-Skiet.
-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-0-
Il-Knisja tal-Iżjed Imqaddsa Trinità
L-idea li tinbena knisja fis-Santwarju ta’ Fatima bdiet fl-1973. Dak iż-żmien, kien diġa jinħass il-bżonn ta’ post imsaqqaf ikbar, għaliex il-Bażilka tal-Madonna tar-Rużarju ta’ Fatima, kkonsagrata fl-1953, ma kienetx tesgħa l-pellegrini kollha, speċjalment nhar ta’ Ħadd u fiċ-ċelebrazzjonijiet speċjali.
Fil-programm pastorali tal-1974 miktub mir-Rettur, huwa ppropona li jinbena Spazju Kbir Imsaqqaf għal-Laqgħat. Iżda, kien biss fis-sena 1996 li ġew żviluppati l-pjanijiet għall-bini tiegħu.
Fl-1997, is-Santwarju organizza konkors internazzjonali. Fid-19 ta’ Diċembru 1998, ġurija internazzjonali għażlet il-proġett ta’ perit Grieg, Alexandros Tombazis. Dan il-perit fassal il-bini ta’ knisja ġdida fit-tarf tal-ispjanata tal-Bażilka, flok il-Pjazza Piju XII.
Wara li l-Isqof tad-Djoċesi ta’ Leiria-Fatima, D. Serafim de Sousa Ferreira e Silva approva l-proġett, il bini beda fi Farar 2004. It-tqegħid tal-ewwel ġebla sar fis-6 ta’ Ġunju 2004, matul iċ-ċelebrazzjoni tas-Solennità tal-Iżjed Imqaddsa Trinità.
Bir-raġun li l-knisja kienet iddedikata lit-Trinità Qaddisa:
- matul id-dehriet, l-Anġlu tal-Paċi stieden b’insistenza lir-ragħajja ż–żgħar biex jaduraw lil Alla, Trinità Qaddisa;
- fit-12 ta’ Mejju 1982, fil-Kappella tad-Dehriet, il-Papa Ġwanni Pawlu II lissen kliem ta’ qima lit-Trinità Qaddisa;
- il-Ġublew tas-sena 2000 kien iddedikat lit-Trinità Qaddisa.
Fit-12 ta’ Ottubru 2007, il-Knisja tal-Iżjed Imqaddsa Trinità ġiet ikkonsagrata mill-Kardinal Tarcisio Bertone, s-Segretarju tal-Istat tal-Vatikan u Legat tal-Papa Benedittu XVI, f’għeluq taċ-ċelebrazzjonijiet b’tifkira tad-90 Anniversarju tad-Dehriet tal-Madonna ta’ Fatima.