OM 108 Settembru-Ottubru 2008

__________________________________________________________________________________________

L-“Angelus”

il-misteru tal-Inkarnazzjoni

Benedittu XVI

Kull jum, meta ngħidu t-talba tal-Angelus jkollna opportunità li nimmeditaw għal ftit mumenti, qalb il-ħidmiet kollha tagħna, fuq il-misteru tal-Inkarnazzjoni ta’ l-Iben ta’ Alla. F’nofs in-nhar, meta inkunu diġa bdejna nħossu l-għejja ta’ l-ewwel siegħat tal-jum, id-disponibiltà u l-ġenerożità tagħna jkunu mġedda meta nikkontemplaw l-“iva” ta’ Marija.

Din l-“iva” ċara u bla kundizzjonijiet għandha l-għeruq tagħha fil-misteru tal-libertà ta’ Marija, ħelsien sħiħ u għal kollox quddiem Alla, maqtugħ għal kollox minn xi rabta mad-dnub, bis-saħħa tal-privileġġ tat-Tnissil Bla Tebgħa tagħha.

Dan il-privileġġ mogħti lil Marija, li jaqtagħha mill-kundizzjoni komuni tagħna, ma jbegdhiex minna, iżda għal kuntrarju, iressaqha iktar lejna. Filwaqt li d-dnub jifred, jifridna minn xulxin, is-safa ta’ Marija tqarribha b’mod infinit lejn qalbna, attenta għal kull wieħed minna u xewqana għal veru ġid tagħna.

Dan jidher fis-santwarji Marjani kollha. Folol bla qies jiffullaw f’riġlejn Marija biex jafdawlha l-ħsibijiet l-iktar intimi tagħhom, ix-xewqat l-iktar profondi ta’ qalbhom. Dak li ħafna, minħabba jew il-mistħija jew il-modestja, ma jafdawx ma dawk li huma l-eqreb u l-iktar għeżież tagħhom, huma jafdawh lilha li hi kollha safja, lill-Qalb Bla Tebgħa tagħha: bis-sempliċità, mingħajr tidwir, fil-verità. Quddiem Marija, minħabba l-istess safa tagħha, l-bniedem ma jaħsibhiex darbtejn biex jikxef id-dgħjufija tiegħu, li jesprimi d-dubju u l-mistoqsijiet tiegħu, li jfassal t-tamiet u x-xewqat l-iktar sigrieti tiegħu.

Marija miqjuma mill-Anġli u l-bnedmin

mill-Omelija ta’ San Amadew, isqof ta’ Luasanne

Sa minn qabel ma ġiet imtellgħa fis-sema, l-isem ta’ Marija kien jiddi b’mod ta’ l-għaġeb fuq id-dinja kollha. Isimha kien ġa xxerred b’ġieħ kbir ma’ kullimkien, qabel ma tqiegħed is-sebħ tagħha ’l fuq mis-smewwiet.

Kien sewwa li jsir hekk, għax kien jixraq li, għall-ġieħ ta’ Binha wkoll, l-Omm Verġni ssaltan l-ewwelnett fuq l-art u mbagħad tikseb il-glorja fis-sema. Is-setgħa tagħha tinfirex f’din il-ħajja, sakemm tilħaq il-milja qaddisa fil-ħajja l-oħra, biex bħallikieku tgħaddi minn qawwa għal qawwa u tinbidel minn glorja għal glorja fl-ispirtu tal-Mulej.

Għalhekk, sa minn din id-dinja stess Marija kienet diġà qiegħda dduq il-frott tas-saltna tas-sema.

• L-anġli kienu jinżlu jservuha;
• il-bnedmin kienu jġibulha r-rispett u jaqduha;
• Gabrijel, flimkien ma’ l-anġli, waqaf magħha;
• Ġwanni, flimkien ma’ l-Appostli, kien jaqdiha, ferħan li taħt is-salib l-Omm Verġni ġiet fdata fl-idejn verġni tiegħu.
• L-anġli jifirħu xħin jaraw lis-sultana tagħhom, u
• l-Appostli jifirħu xħin jaraw lis-sidt tagħhom, u
• sew l-anġli u sew il-bnedmin jingħataw lilha b’rabta ta’ mħabba mill-qalb.

Dan seta’ jseħħ kemm għax Marija kienet f’għoli li ma bħalu f’għajnejn Alla, u kemm għax kienet tagħti servizz lil għajrha bi mħabba li ma titfissirx bil-kliem.

Marija, mil-għoli tal-palazz tal-virtujiet tagħha u mill-baħar tad-doni li Alla mlieha bihom, kienet tħares lejn il-fidi tal-poplu bil-għatx. U, b’idejha t-tnejn miftuħa kienet ixxerred fuq il-poplu x-xmajjar tal-grazzji li bihom kienet imfawwra aktar minn kulħadd. Marija kienet tagħtihom il-fejqan u s-saħħa fil-ġisem u r-ruħ, bis-setgħa tagħha li tagħti l-ħajja lil dawk li huma mejtin fil-ġisem u r-ruħ.

Min qatt mar għandha u reġa’ lura marid jew imdejjaq jew imċaħħad mid-dawl dwar il-misteri tas-sema? Min ma qalax li ried mingħand Marija, Omm il-Mulej, u reġa’ lura d-dar hieni u ferħan?

Imwettqa b’kotra ta’ għemejjel tajba bħal dawn, l-Għarusa, Omm l-Għarus waħdieni, kollha ħlewwa u għożża u għaxqa, kienet tniżżel mis-sema xmajjar ta’ sliem u xita ta’ grazzji. Hi kienet taħżinhom fiha nfisha biex issir qisha għajn li ssaqqi l-ġonna spiritwali, jew bħal bir ta’ ilmijiet ħajjin li jagħtu l-ħajja, jew bħal xmara ħierġa mill-Libanu tas-sema, li s-swieqi tagħha jferrħu l-belt ta’ Alla. Mbagħad, hi kienet ixxerred dawn l-ilmijiet ma’ kullimkien, mill-muntanja ta’ Sijon sal-popli kollha tal-qrib u tal-bogħod.

Għalhekk, meta Alla u Ibnu, s-Sultan tas-slaten, tellgħu lix-Xebba tax-xebbiet fis-sema, fost il-ferħ ta’ l-anġli u l-hena ta’ l-arkanġli, fost l-għajjat ta’ tifħir mis-sema kollu, mbagħad seħħet il-profezija tas-Salmista li qal lill-Mulej: F’lemintek is-sultana mżejjna b’deheb ta’ Ofir.

Lil Marija Bambina

Minn “Lilek Omm Alla” ta’ Ivo Galea

Elfejn sena Marija Bambina

gerbu b’ħeffa minn mindu twelidt,

Ħlejqa ċkejkna, Imnissla bla tebgħa,

bi sbuħitek lid-dinja għaġġibt.

Għaġġibt ’l Alla l-Missier meta fasslek

Biex tkun Bintu u Omm il-Mulej,

u l-Ispirtu fis għażlek b’Għarustu

sabiex minnek iwelled Feddej.

Inti l-għaxqa ta’ qalbna O Marija

għax tamitna qegħ’dnieha biss fik,

u ġo qalbna qed tikbes ix-xewqa

illi d-dinja mħabbitha turik.

Kemm jixraqlek, Marija Bambina,

li nħobbuk, infaħħruk u nqimuk,

għax ħadd bħalek ma jħobbna ħlief Alla

illi ħalqek biex aħna nħobbuk;

għax ħadd bħalek ma jistħoqq l-imħabba

ta’ din qalbna, mifnija bid-dnub,

ħlief dak Ibnek li lilna biex jifdi

ħalla ħajtu fuq Għuda Mislub.

Alla ħabbek, kif Huwa ħabb lilna

meta b’Ommna ħalliena f’idejk...

Inwegħduk, O Marija Bambina,

l-hena tagħna nsibuha f’riġlejk.

Għandek niġu fis-siegħa tan-niket,

Għandek niġu fis-siegħa tal-hemm,

Għaliex nafu li Qalbek Ħanina,

Qalb ta’ Omm li taf tagħder u tħenn.

U min jaf kemm-il elf sena jgħaddu,

kemm eluf ta’ eluf minn ta’ snin

u Int tibqa’, O Ħelwa Madonna,

Dik li tħares u tħenn għall-bnedmin.

Kien għalhekk li dak Ibnek fuq l-Għolja

Għażlek b'Ommu f'dal-wied minn tad-dmugħ,

biex bl-Imħabba ta' Qalbek Ħanina

tnessi ttaffi in-niket tar-ruħ

Elfejn sena għaddew fuq id-dinja

minn xħin Inti Tarbija Twelidt…

Waħdek biss… Inti biss mingħajr ħtija,

Sirt Omm Alla u ’l Anġli għaġġibt.

Elfejn sena għaddew, O Marija,

U illum elfejn bewsa nagħtuk...

O Marija Bambina Int Ommna

u bħal Ommna nixtiequ nħobbuk.

“Mimlija bil-grazzja” hu l-isem li għandha Marija

Papa Ġwanni Pawlu II

“Mimlija bil-grazzja” hu l-isem li għandha Marija f’għajnejn Alla. Skond ir-rakkont ta’ San Luqa, l-Anġlu uża din l-espressjoni anke qabel ma jgħid l-isem “Marija”. Dan juri li l-Mulej għaraf li dan kien li jispikka fil-personalità tal-Verġni ta’ Nazaret.

Il-frażi mimlija bil-grazzja, li tiddeskrivi l-karattru ta’ Marija, hija t-traduzzjoni tal-kelma Griega kecharitomene. Biex titfisser iktar eżatt l-isfumatura tal-kelma Griega wieħed m’għandux biss jgħid “mimlija bil-grazzja” iżda “magħmula mimlija bil-grazzja” jew iktar aħjar “ġiet mimlija bil-grazzja”. B’hekk jidher ċar li dan kien rigal mogħti minn Alla lill-Verġni Mbierka.

Sejħa għall-Adorazzjoni ta’ Ġesù fl-Ewkaristija

Matul l-ewwel dehra, l-Anġlu għallem lir-ragħajja ż-żgħar kif huma kellhom jaduraw lil Alla.

Matul it-tieni dehra, huwa saħaq magħhom li huma kellhom jitolbu ħafna u li kellhom joffru s-sagrifiċċ1ji bi tpattija għad-dnubiet magħmula kontra Alla.

Imbagħad, matul it-tielet dehra, huwa żamm f’idejh kalċi u ’l fuq minnu żamm ostja li minnha kienu qed jaqgħu qtar tad-demm għal ġol-kalċi. Filwaqt li ħalla l-kalċi u l-ostja fl-arja, mingħajr ma jżommu ma xejn, huwa nxteħet għal tulu fl-art u tenna għal tlett darbiet it-talba:

“L-Iktar Imqaddsa Trinità, Missier, Iben, u Spirtu s-Santu, jien naduraK profondament, u noffrileK il-Ġisem, id-Demm, ir-Ruħ u d-Divinità l-iktar għeżież ta’ Ġesù Kristu, li jinsabu preżenti fit-tabernakli kollha tad-dinja, bi tpattija għall-profanazzjonijiet, għas-sagrileġġi, u għall-indifferenza li bihom huwa offiż. U, permezz tal-merti infiniti tal-Qalb l-Iktar Qaddisa Tiegħu, u tal-Qalb Bla Tebgħa ta’ Marija, nitolbok il-konverżjoni tal-imsejkna midinbin”.

Huwa imbagħad qarben lit-tlett itfal. Imġegħlin mill-qawwa sopranaturali li ħakmithom, huma imitaw kull ma kien għamel l-Anġlu, billi inxteħtu għal tulhom fl-art kif għamel hu u jtennu t-talb li hu kien qal, u baqgħu għal żmien twil fil-qagħda li fiha kien ħallihom l-anġlu.

Ġewwa Fatima ġiet inawgurata pittura li turi sew din il-ġrajja: l-Anġlu flimkien mat-tlett ragħajja żgħar f’att ta’ Adorazzjoni. Fid-dehriet tagħha, l-Madonna wkoll sejħet bla waqfien għall-adorazzjoni bi tpattija għad-dnubiet magħmulha kontra Alla, kontra l-Qalb ta’ Ġesù, u kontra l-Qalb bla Tebgħa ta’ Marija.

Lill-Mulej Alla tiegħek għandek tadura

U xi tfisser it-Tqarbina tat-tlett ragħajja żghar? It-tweġiba ta’ Luċija hija: “Għalija tfisser li Alla jrid jerġa’ jagħti l-ħajja lill-fidi tagħna fil-preżenza ta’ Ġesù Kristu fl-Ewkaristija Imqaddsa, u fil-qawwa tal-Kelma tiegħu meta qal: ‘Dan hu Ġismi; Dan hu Demmi’ ”.

L-Ewkaristija hija, qabel xejn, il-‘misteru tal-fidi’, biex nużaw il-kliem li jingħadu mill-qassis eżatt wara l-kliem tal-konsagrazzjoni. F’dak il-waqt Ġesù joffri ħajtu kollha għall-glorja ta’ Alla u għall-fidwa tal-bnedmin kollha.

Li tadura u tfaħħar lil Alla hija l-liġi li l-Ħallieq qiegħed f’kull ruħ maħluqa. Iżrael, il-poplu magħżul ta’ Alla, irċieva din il-liġi imxandra fuq il-Muntanja Sinai, ġaladarba din hi l-ewwel mill-għaxar Kmandamenti: “Lill-Mulej Alla tiegħek għandek tadura, u lilu biss taqdi”.

U meta wieħed mill-kittieba staqsa lil Ġesù “Liema huwa l-ewwel kmandament?” Ġesù wieġeb: “L-ewwel hu dan: “Isma, ja Iżrael: il-Mulej, Alla tagħna hu wieħed; u inti għandek tħobbu lil Mulej Alla tiegħek b’qalbek kollha, u b’ruħek kollha, u b’moħħok kollu, u bis-saħħa tiegħek kollha.” (Mk 12, 28-30).

L-adorazzjoni hija l-ewwel azzjoni tal-virtù tar-reliġjon. Li tadura lil Alla huwa li tagħrfu bħala Alla, Ħallieq u Feddej, il-Mulej ta’ kull ma jeżisti, Imħabba infinita u ħanina.

Ġewwa Fatima, l-ewwel l-Anġlu, u wara l-Verġni Mbierka ġew biex, gġal darba oħra, isejħu lill-bnedmin kollha, permezz tat-tlett itfal, biex jaduraw lil Alla, jagħmlu tpattija għall-offiżi magħmulin kontriH u kontra l-Qalb bla Tebgħa ta’ Marija, u biex jissieħbu fil-fidwa tal-midinbin li ma jadurawHx, ma jittamawx fiH, u ma jħobbuHx.

Aħna, iżda, nistgħu inwieġbu għas-sejħa tiegħu, biss jekk ngħixu magħqudin ma’ Ġesù, il-Feddej tagħna, li jinsab preżenti fit-tabernakli kollha tad-dinja. Il-kejl tal-għaqda tagħna miegħU jiddetermina l-qies tat-tweġiba tagħna. Jekk aħna mifrudin minn Ġesù ma nkunux nistgħu nagħmlu assulutament xejn.

Għalhekk il-Madonna tittama li aħna nissieħbu fl-adorazzjoni tagħna lil Alla u fil-fidwa ta’ dawk l-erwieħ li huma fil-periklu li jaqgħu fid-dnub u li jintilfu għal dejjem.

Is-Sagrifiċċji Spiritwali li jogħġbu lil Alla

Għalkemm, lilna aħna jista’ jidhrilna li l-affarijiet l-oħra iktar konkreti huma iktar importanti, iżda xejn mhu iktar importanti mill-għaqda intima tagħna ma’ Ġesù li ġie bl-istess kmand mingħand Missieru: tadura lil Alla, tagħmel tpattija għad-dnubiet magħmulin kontriH, u ssalva l-erwieħ.

It-triq tal-għaqda ma’ Ġesù hija t-triq tal-adorazzjoni. Hija dejjem għotja tal-grazzja u fl-istress ħin tweġiba soda min-naħa ta’ min jitlob. L-irġiel u n-nisa l-kbar tat-Testment il-Qadim, kif ukoll l-Omm ta’ Alla u l-Qaddisin, jgħallmuna li hu bl-adorazzjoini li r-ruħ tingħaqad ma’ Alla, u l-mixi l-quddiem fl-adorazzjoni juri l-progress ta’ dak li jkun fl-għaqda tiegħu ma’ Alla.

Ġesù Kristu huwa d-dielja u Hu juża l-kelma “friegħi” biex jiddeskrivi lil dawk li, permezz tal-imħabba, huma, f’ċertu sens, imlaqqmin fiH, ġaladarba, permezz tal-Ispirtu s-Santu, huma diġà għandhom sehem fin-natura tiegħu. M’hemmx dubju li l-Ispirtu ta’ Kristu jgħaqqadna miegħu. Huwa għal din ir-raġuni li Ġesù qal: “Mingħajri ma tistgħu tagħmlu xejn”.

Huwa għalhekk li f’Fatima kemm l-Anġlu kif ukoll il-Madonna jibqgħu jgħidu” “Itolbu, itolbu ħafna!”

Fit-tieni seklu wara Kristu, il-qassis Tertuljanu fil-kummentarju tiegħu fuq il-kliem li Ġesù qal lill-mara Samaritana maġenb il-bir ta’ Ġakobb jikteb li “L-Adorazzjoni hija s-sagrifiċċju spiritwali li ġie biex ineħħi għal kollox is-sagrifiċċji tal-imgħoddi”.

“Mara, emmini, tasal siegħa u issa hi, meta dawk li jaduraw tassew jaduraw fl-ispirtu u l-verità, għaliex il-Missier nies bħal dawn ifittex biex jadurawH. Alla huwa spirtu, u dawk li jadurawh għandhom jaduraw fl-ispirtu u l-verità”’.

Li tadura fl-ispirtu ma jfissirx l-intelligenza umana ta’ dak li jkun, iżda l-Ispirtu s-Santu li jwassal għal għand Ġesù u li sa mill-Festa ta’ Pentekoste, mexxa l-istorja Nisranija. Li tadura “fil-verità” ma jfissirx interjorità bla gisem, iżda atmosfera ħajja li fiha Ġesù qabbadna t-triq għal għand il-Missier.