JARDUERA FISIKOA

Jarduera fisikoa Lehen Hezkuntzan osasuna sustatzeko garatu beharreko lau zutabeetako bat da: helburua ohitura osasungarriak hartzea da, sedentarismoa saihesteko eta umeen hazkuntza eta garapena bultzatzeko.

Jarduera fisikoa honela ulertzen da: “muskulu eskeletikoekin egiten den edozein gorputz-mugimendu, energia-gastua eta esperientzia pertsonala eragiten duena, eta inguruan ditugun izakiekin eta ingurunearekin elkarreraginean jarduteko aukera ematen diguna” (Devis, 2000).

Jarduera fisikoak gaixotzeko arriskua murriztea dakar (obesitatea, diabetesa, hipertentsioa…), lokomozio-aparatua garatzen eta finkatzen laguntzen du, ongizate psikologikoa sustatzen du eta sozializazioa hobetzen du, besteak beste.

Hala ere, garrantzitsua da Lehen Hezkuntzako umeen eboluzio-uneari egokitzea eta jarduera fisikoaren edukiak neska-mutilen beharretara egokitzea. Jarduera fisikoak baldintza batzuk bete behar ditu: atsegina, motibagarria, segurua, ez-lehiakorra izatea, autonomia sortzea…

Aurrekoarekin bat etorrita, Lehen Hezkuntzako lehen etapetan jolas sinpleak egiten hasten da (izaera ludikoa duen mugimendu-jarduera, iraupen laburrekoa, ezaugarri fisiko garrantzitsurik behar ez duena eta arau gutxi dituena) eta, ondoren, kirol aurreko jolasetara igarotzen da (iraupen ertaineko jarduera, jolas sinpleek baina arau konplexuagoak dituena, gutxieneko ezaugarri fisiko batzuk eta oinarrizko teknikak behar dituena); azkenik, kirol-jarduerara iristen da (kirola iraupen luzeko jarduera fisikotzat hartzen da, gaitasun fisiko handia eskatzen duten arau askorekin, eta teknika espezifiko konplexuak menderatu behar dira).

Aurrekoa Heziberri 2020an jasotako proposamenekin lotuz, jarduera fisikoaren bidez lortu beharreko zeharkako gaitasunak “izaten jakitea” eta “elkarbizitzen jakitea” dira, eta lortu beharreko diziplinak, berriz, mugimendurako gaitasuna eta gizarte-gaitasuna eta gaitasun zibikoa dira.

Material honetan programazio egituratua dago, ikasturte bakoitzean ezarri beharreko helburuak, edukiak eta bi ekintza biltzen dituena, ikasleen une ebolutiboari eta beharrei egokituta.