ELIKADURA OSASUNGARRIA. LEHEN HEZKUNTZAKO 3. MAILA

Oso garrantzitsua da txiki-txikitatik elikadura-ohitura osasuntsuak barneratzea. Ondoren agertzen diren jarduerak Bilboko Udalak lehen hezkuntzan osasuna sustatzeko daukan heziketa-programaren parte dira.

HELBURU NAGUSIA

Elikadura osasuntsu eta orekatua izateko ohiturak sustatzea.

HELBURU ZEHATZAK

• Bazkari osasuntsu eta orekatuak egiteko gaitasunak sortzea ikasleen artean.

• Plater osasuntsua prestatzeko elikagai talde bakoitzak eduki behar dituen proportzioak jakitea.

• Elikagaiak plater osasungarriko taldeetan identifikatzea eta sailkatzea.

EDUKIAK

Plater osasungarria

Plater osasungarria Harvardeko Osasun Publikoko Eskolako elikadura-adituek eta Harvardeko Osasun Argitalpenetako editoreek sortutako gidaliburua da. Bertan, otordu osasuntsu eta orekatuak zelan egin azaltzen dute (bai platerean jaten direnak, bai askarirako edo hamaiketarako eramaten direnak).

Elikadura osasungarria izateko egunero elikagai talde bakoitzetik jan behar diren proportzioak adierazten ditu platerak. Horrela azaltzen da, grafikoagoa izan dadin.

• Frutak eta barazkiak: Elikagaien % 50 talde honetakoak izan behar dira. Zenbat eta kolore eta mota gehiago, hobeto. Patatak ez dira talde honetan sartzen. Ahal dela, jan sasoiko jakiak.

• Karbohidratoak: % 25. Zerealak eta patatak. Garrantzitsua da zereal integralak aukeratzea.

• Proteinak: % 25. Proteina osasuntsu asko dituzten jakiak: aukeratu lekaleak, arraina, fruitu lehorrak eta haragi zuria. Haragi prozesatuak (saltxitxak, hestebeteak etab.) eta haragi gorriak mugatzea komeni da. Esnekiak talde honetakoak dira.

Plater osasungarriari buruzko informazio osagarria:

• https://www.euskadi.eus/contenidos/informacion/alim_sal_material/es_def/adjuntos/guia_alim_saldudable_euskara.pdf

• https://www.hsph.harvard.edu/nutritionsource/healthy-eating-plate/translations/spanish/

Ikusi plater osasungarriaren bideoa