1.2.1.1.Bakterio zelularen egitura

Bakterioek oso egitura soila dute, ez baitute nukleorik , ezta organulu zelularretako asko eta asko ere.

Bakterio arrunt baten zelularen atalak hauek dira:

• Zelula-horma: bakterio batzuetan mintz plasmatikoa inguratzen duen estalki zurruna da, eta bakterioari forma eta babesa ematea du helburu.

Zelula-horma mureinaz osaturik dago eta mintz plasmatikoa baino lodiagoa da. Horma-motaren arabera bakterioak hainbat modutan tindatzen dira mikrobiologian oso ezaguna den Gram tindaketa teknika erabiliz. Gram tindaketa oso lagungarria da laborategian bakterioak identifikatzeko, eta bi bakterio talde daude irizpide horren arabera: Gram positiboak eta Gram negatiboak.

• Mintz plasmatikoa: zitoplasma inguratzen duen estalkia da. Zelula eukariotoaren oso antzekoa. Substantzien sarrera - irteerak erregulatzen ditu.
• Zitoplasma: bertan DNA eta erribosomak aurkitzen dira.
• DNA bakterianoa (material genetikoa): kate bikoitz batez osaturik dago. Zitoplasman sakabanaturik dago.
• Erribosomak: zelula eukariotikoenak baino txikiagoak dira, eta haietan bezala, proteinen sintesiaz arduratzen dira.

Bakterio batzuek beste hainbat egitura dauzkate: kapsula, flageloak eta pili, besteak beste.

• Kapsula: zenbait bakteriok duten kanpoko geruza da, horma zelularraren gainetik. Kapsula bakterio patogeno askotan agertzen da.
• Flageloa(k): bakterioari mugitzeko ahalmena ematen dio. Ez dira bakterio guztietan agertzen. Flageloen kopurua eta kokapena aldakorra da espezieen arabera.
• Pili: bakterioaren kanpoaldean kokatutako luzakinak dira. Ez dute parte hartzen mugimenduan.