8.3.Gradiente geotermikoa eta Lurraren barruko beroa

Lurraren gainazaletik barrualdera sakondu ahala tenperatura pixkanaka igotzen dela egiaztatu da. Tenperatura hazkunde honi Gradiente geotermikoa esaten zaio.

Gainazaletik hurbil, gradientea 30ºC ingurukoa da, sakonerako kilometro bakoitzeko.Tenperatura azkar igotzen da 2000ºC-ra iritsi arte, goiko mantuaren barruan. Ondoren, askoz geldoago igotzen da, eta Lurraren erdian 5000ºC-ra iristen da , gutxi gora behera.

Lurrak, sortu zenetik, energi termikoa mantentzen du eta barruko energia hau planetaren barne dinamikaren kausa da.

Beroa beti material beroetatik hotzenetara transferitzen da. Lurbarnean, beroa barne nukleo berotik kanpo azal hotzera transferitzen da. Bero-transferentzia hori da jarduera geologiko gehienen erantzulea. Bero transferentziarik gabe ez zen plaken tektonika edo sumendi jarduerak emango.

Lurraren barruko beroaren jatorria:

• Meteoritoen talkak: gure planeta duela 4.600 miloi urte sortu zen, asteroideak elkartu zirenean (erakarpen grabitatorioa dela eta). Ondoren, bostehun miloi urte baino gehiagoan, meteorito askok Lurra jo zuten eta haietako talka bakoitzak energia handia askatzen zuen, Lurraren tenperatura gero eta handiago eginez.
• Elementu erradioaktiboen desintegrazioa: Lurraren mantuan harriak osatzen dituzten mineraletan Uranio, Plutonio ,Torio elementu erradiaktiboak daude. Hauek desintegratzen dira espontaneoki eta energia igortzen dute erradiazioa gisa.
• Dentsitate handieneko materialen dekantazioa: batez ere burdina, nukleoa osatu zuen.

Lurraren barruko beroaren seinaleak : bulkanismoa, lurrikarak, plaka litosferikoen higidurak eta isostasia dira.