體驗西灣河觀塘渡輪

小編早幾日喺港島過海去觀塘工業區，搭地鐵又唔近，先至醒起原來有船由西灣河去觀塘，仲要淨係9蚊就過到海。去到碼頭等船，都見到有啲捧場客。21:03西灣河上船，21:17就到咗觀塘。坐喺窗邊吹下海風，呢個feel其實都幾「香港」。時間上幾吸引，同埋渡輪勝在航程穩定。不過渡輪喺本地通勤嘅角色不斷減弱，有啲航線好似變咗旅遊用途為主。嚟到觀塘碼頭巴士總站，80X同埋83X都就快開車，唔知而家仲有人搭船轉巴士返沙田？

九龍唔少碼頭嘅旁邊，都有一個超大型巴士總站，而且有大量路線停泊。以往過海交通依賴渡輪，維港兩岸嘅碼頭車站有重要嘅接駁用途。以往沙田好多往返九龍嘅巴士都以碼頭作為總站，唔少居民都會搭巴士轉船過海，甚至係去搭跨境航線。例如係大角咀碼頭嘅87, 87A, 87B，佐敦道碼頭嘅70, 81。時至今日九龍城碼頭仲有齊85, 85A, 85B，觀塘碼頭舊時就有74A, 80, 89A。今日仲有好多巴士線去各個碼頭，保留當年以碼頭為交通樞紐嘅遺風，不過真係搭巴士轉船嘅人已經少之又少。

隨住過海渡輪市場萎縮，有啲碼頭直情因為填海消失埋，所以大家而家會見到87B係去維港灣，81都改咗去西九龍高鐵站。新一代嘅大型巴士總站大多連接鐵路站，可見交通模式嘅變遷。