#2 美田路

上回講到最上游嘅美田邨，我哋今次順住水流，落到美林邨，介紹另一條橫跨大圍明渠嘅天橋 - 美田路。話說新市鎮發展之前，有一條道路環繞大圍村作為界線，北面駁通大埔公路，以便居民往返市區。西面嘅界線就係今日嘅美田路，不過當時冇名，而南面正正係村南道。

美林邨1981年落成，政府同時改善村路嘅設計，並且興建延長段連接到今日美林邨美槐樓嘅位置，後來命名為美田路。新路段跨過早前整理完成嘅大圍明渠，大致勾畫出美林邨嘅發展範圍。同時方便日後發展美城苑、美松苑，以及恆峰花園等屋苑，將新市鎮範圍進一步擴展到山邊。2008年，美槐樓通往銅鑼灣山一段美田路新路段落成，並建成壹號雲頂等屋苑。早年運輸署曾建議283及隧巴305 (即未改行西隧嘅985) 繞經新路段，並於銅鑼灣山路迴旋處折返落山，但未有實行。

最初大圍嘅一條村路，演變成美田路，橫過大圍明渠，再向銅鑼灣山延伸。係沙田新市鎮發展由城門河畔開始發展，再逐步擴展上山嘅例證之一。

(拍攝地點: 美柏苑，望向美林邨美楓樓)