86C早於1988年開辦，來往恆安及長沙灣。隨著利安等新屋邨落成，86C數年後延長至利安。86C延長後，上午繁忙時間不入恆安巴士總站，新增86P由恆安總站開出，替代該時段86C喺恆安總站嘅服務。然而，是否繞經恆安總站嘅爭拗喺往後10年仍然爭持不下。

馬鞍山特快前往深水埗區嘅特快服務——86X要到2002年先出現。86X沿86C走線到耀安後，經沙瀝公路不停站直達獅隧，經深水埗前往長沙灣甘泉街。數年後開辦回程班次，與去程嘅相異之處在於回程加經富安。2014年，86P同86X合併為286C，經青沙公路直達長沙灣。因為286C前往長沙灣比86C快捷，成功吸引大量喺長沙灣工業區返工嘅居民乘搭，班次亦逐漸增加。同時，86C不再繞經恆安總站及大圍。

雖然286C滿足咗前往長沙灣返工嘅通勤需求，然而不滿86C走線迂迴嘅意見仍不絕於耳。2020年，286C改為全日服務並延長至深旺道，希望為馬鞍山及第一城居民提供全日往來深水埗嘅特快服務。沙田來往深水埗區嘅客源可按時段區分：繁忙時間以長沙灣工商業區為主，而非繁忙時間則以深水埗為主。286C顯然針對前者，皆因非繁忙時間使用青沙公路前往深水埗，車程上未見優勢。可惜286C全日後，非繁由馬鞍山及第一城前往深水埗車程未有縮短，甚至比86C更慢。如果當初全日嘅係86X，可能會係更有利於街坊嘅辦法。