現實版「路是人走出來的 」@石門站

[現實版「路是人走出來的 」🚧 @石門站]

早前小編分享過大圍站巴士總站入面嘅「Desired Path」，即係行人為咗節省步程，集體行出嚟嘅非正式路徑。今次再講一個更明顯嘅例子，而且係喺草地上嘅泥路，非常符合Desired Path嘅經典設定。

石門站B/D出口外嘅行人路好闊，同而家嘅巴士站之間有條狹長嘅草地分隔。原先呢度冇巴士小巴設站，🌳即使隔開兩邊，亦唔見得有問題，畢竟人流稀少。直至近十年，石門站附近有住宅落成，商業活動又變得活躍，人流量多咗好多，又有巴士小巴進駐。🤔越來越多人會途經石門站嘅出口，由工商業區行去巴士小巴站同碩門邨。因為分隔兩邊嘅草地都幾長，大多數行人都直接穿過草地，相信係由行人自己行出泥路。

有趣嘅係，三條泥路各有功用，一邊同樣連接鐵路站出口，另一邊分別去巴士站(圖上)、小巴站(圖下)、同埋過路處。捕捉微小嘅變化，都可以洞察社區近年變遷。