#1 香粉寮街 (NF46,N621)

一衣帶水，顧名思義就係好似衣帶咁細長嘅河流。城門河將沙田分為東西兩岸，雖有河流相隔，但有眾多橋樑連繫兩岸，關係密切。嚟緊我哋會逐一介紹城門河嘅橋樑，分享沙田發展嘅歷史。

城門河嘅上游係大圍明渠，源頭位於美田邨。而最上游嘅橋就係「香粉寮街天橋」，連接美田邨同香粉寮村以及白田村，係兩村嘅唯一對外道路。香粉寮位於城門河上游，相傳以往村民利用水力將香木磨成粉，並設立小型作坊，因而得名。至於白田村範圍廣闊，分8區管理，部分分區有別名「谷寮」。70年代政府開始建造大圍明渠，令上游變成筆直嘅排洪河道，同時增設行人橋連接兩岸，當時附近仍然係村屋同農地，尚未現代化。

香粉寮街80年代通車，配合梅里臨時房屋區落成。道路盡頭新建行車天橋通往明渠對面嘅村落，因此形成今日兩條橋共存嘅狀態 (ND46行人，N621香粉寮街行車天橋)。臨屋區90年代尾清拆，原址重建成美田邨。

(拍攝地點: 香粉寮村口 遙望美田邨美景樓)