#10 翠榕橋 (火炭路)

沿住城門河畔散步，我哋嚟到翠榕橋。翠榕橋連接禾輋邨至第一城，係城門河第二條落成嘅分隔雙向行車橋，同時供行人及單車使用。(原來唔係第三？)

第一條係配合獅隧通車而建嘅獅子橋，即係由曾大屋去文化博物館嗰條。唔少人都以為第二條落成嘅係連繫沙田市中心嘅沙燕橋，因為市中心同對岸嘅沙田圍都比較早發展。其實堪稱交通命脈嘅沙燕橋去到1980年先動工，1982年落成。至於偏離發展中心嘅翠榕橋，1979年已經動工，1981年尾落成，相比鄰近地區發展更早，甚至早過富豪花園入伙。

但係一兩年嘅差距，對於當時發展蓬勃嘅新市鎮都足以造成影響。已取消巴士線87，原先往返瀝源邨至大角咀，後來想繞經新落成嘅沙角邨，但係最直接嘅沙燕橋又未起好，咁點算呢？87於是延長至沙角，先向北行去到富豪，繞經翠榕橋再返瀝源，再出獅隧。咁樣兜個大圈，今日睇嚟真係異想天開。幾個月後沙燕橋落成，87遷回瀝源，沙角則由新開辦嘅87A服務，前者繞路嘅問題隨即消失。如果有基建超支導致延遲落成，附近啲樓又起咗先，住咗先，唔知會拖幾耐先解決到呢？

(拍攝地點: 城門河畔近富豪花園，面向火炭)